Skip to content

Muye pa utantiko wa vilimo

I Vyani Vino Leza Alacita?

I Vyani Vino Leza Alacita?

Ndi cakuti mwali ni ntazi, mungenekela ukuti cuza winu amacitapo cimwi pakuti amwazwe. Ukwelenganya pali vivyo, kukalenga yamwi yaalanda ukuti Leza asi cuza wao pano yakayuvwa ukuti asiyacitila nanti acimwi. Ukulanda sile cisinka, Leza atapeleela sile pa vintu vingi vino watucitila mpiti lelo alacitapo vimwi pa ntazi zyonsi nu ucuzi uno tukapitamo ndakai. I vyani vino Leza alacita?

ALAFUMYAPO IVIIPE VYONSI

Leza alafumyapo intulo ya uyi onsi. Baibo ikalondolola intulo iyo lino ikalanda ukuti: “Insi yonsi ili pisika lya utesi wa mwipe wilya.” (1 Yoane 5:19) “Umwipe” wiyo ali wiya kwene wino Yesu wamile ukuti “kateeka wa nsi ii” Satana Ciwa. (Yoane 12:31) Satana aliwe akalenga iviipe vyonsi ivyaya pano nsi. I vyani vino Leza alacita?

Yeova wasya ace acitepo cimwi ukuomvya umwanakwe Yesu Klistu pakuti “aonone Ciwa, wino uwakwata maka pa mfwa.” (Ayebulai 2:14; 1 Yoane 3:8) Nupya Baibo ikalanda ukuti na Ciwa umwineco kwene wamanya ukuti, “watasyala sile ni nsita inono” ukuti aononwe. (Umbwilo 12:12) Nupya Leza alafumyapo na yonsi akacita iviipe.—Masamu 37:9; Mapinda 2:22.

ALALENGA INSI UKUYA PALADAISE

Lino Kaumba witu atatala wafumyapo uyi onsi pano nsi, alacitapo cimwi pakuti afikilizye ukulonda kwakwe ukwa pakutandika pa yantunze ni nsi. I vyani vino tukalondesya akatucitile uku nkoleelo?

Umutende umalilike nu kucingililwa. ‘Aicefya yalapyana impanga nu kusyukila mutende umalilike.’—Masamu 37:11.

Ivyakulya ivingi nupya ivisuma. ‘Mulavula ivyakulya umu nsi ni viseekwa vilavula nu mu myamba kwene.’—Masamu 72:16.

Amang’anda asuma ni ncito isuma. “Yalakuula amang’anda ya kwikala mwenemo, yalaalima ni vyalo vya matingi nu kulya iviseekwa vya mwenemo. . . . Asoololwe yane yalaipakizya vino yailimile aeneco.”—Ezaya 65:21, 22.

Uzye mukalondesya ukwizalola kuno vyonsi vii vikucitika? Likwene sile ivintu vii vyonsi vyasya vitandike ukucitika.

ALAFUMYAPO MALWALE NI MFWA

Ndakai aliwensi akalwala nu kufwa, nomba citalatwalilila ukuya vivyo pa nsita itali. Likwene sile Leza wasya ace aomvye impolelwa yakwe Yesu pakuti “wensi wino wataila munoli atakalowe, lelo aye nu umi wa pe.” (Yoane 3:16) I vyani ivilacitika lyene?

Kulwala kulasila. ‘Apa antu yonsi aaya umu mpanga itu, patalaya nanti wenga alailizyanya apa kulwala. Antu alikala umu nsi yalaelwa uluse apa uyi wao.’—Ezaya 33:24.

Imfwa italayako. ‘Alamila imfwa amanda pe! Yeova Kateeka wa Maka Yonsi alakumbula aminsozi mu manso ya antu yonsi.’—Ezaya 25:8.

Antu yalikala amanda pe. “Uwila wakwe Leza u umi wa pe muli Klistu Yesu Mwene witu.”— Loma 6:23.

Afwe yalatuutululwa. ‘Antu awololoke na asi awololoke, yalazyukuka kufuma ku afwe.’ (Milimo 24:15) Yalaipakizya uwila wakwe Leza uwa mpolelwa.

Uzye Leza alafikilizya uli vyonsi vii?

 ALIKAPO UWENE UMALILIKE

Leza alafikilizya vyonsi vino akalonda ukucitila antunze ukuomvya uwene wakwe uwa kwi yulu, uulateekwa na Yesu Klistu Umwene uwasontwa. (Masamu 110:1, 2) Ali wene nanti uteeko uno Yesu wanenyile alondezi yakwe ukupepela ukuomvya amazwi akuti: “Tata witu uwa mwiyulu, . . . Uwene wako wize.”—Mateo 6:9, 10.

Uwene Wakwe Leza ulateeka pano nsi nu kufumyapo iviipe vyonsi kumwi nu ucuzi onsi. Uwene uu ali uteeko usuma sana ukucila amawene yonsi ayantunze. Ali mulandu kwene uno Yesu waipeelisye ukukosoola “ilandwe lisuma lya Wene” lino wali pano nsi nu kunena atumwa yakwe ukucita icilicimwi kwene.—Mateo 4:23; 24:14.

Pa mulandu wakuti Yeova watemwa antu, wayalaya ukuti alayacitila ivintu ivisuma sana. Uzye cii citamulenzile ukulondesya ukumumanya nu kupalama kuli aliwe? Uzye ndi mwasoolola ukucita vivyo mulaipakizya uli? Icipande icilondelilepo cilalondolola.

I VYANI VINO LEZA ALACITA? Leza alafumyapo malwale ni mfwa, alaomvya Uwene wakwe ukulenga antu ukuya nu mutende nu kulenga insi ukuya paladaise