Skip to content

Muye pa utantiko wa vilimo

Uzye Baibo Ingatwazwa na Ndakai Kwene?

Uzye Baibo Ingatwazwa na Ndakai Kwene?

YAMWI YAKATI ITANGA ITWAZWE. Dokota umwi watile ukutungululwa na Baibo ndakai, cingaya kwati ukuomvya ibuku lyakwe sayansi ilya mu 1920 ukusambilizyamo ana isukulu a ndakai. Antu aatacindika Baibo yakauzya nu kuti uzye umuntu angaomvya lupapulo ulukalanda pa makompyuta ya mpiti kuti lumwazwe ukumanya ivya kuomvya kompyuta iya ndakai? Fwandi tungati yamwi yakalola ukuti Baibo i ya sile sile, itanga itwazwe foo.

I cani cino umuntu angaomvezya ibuku lya mpiti mu manda itu umwaya antu acenjele? Pano ndakai kwaya ivyeo nyanya pa Intaneti ivingazwa antu nu kuyatungulula. Pa ma TV napo paya antu acenjele sana amanya imyelenganyizizye ya muntu, aakapanda antu amano pa mikalile alino na ya kalemba ya mpapulo acenjele. Kwaya na mabuku nyanya yano antu yakakala nu kuiwelengela aeneco pakuti yamanye ivya kuomba vimwi.

Fwandi vino ndakai kwaya ivyeo ivingi cuze ivikalembwa cila nsita, ngi cani cino umuntu angaalondela ivyalembwa muli Baibo iyasizile ukulembwa imyaka nalimwi 2,000 ku cisila? Uzye tutanga tuzumilizye vino aatacindika Baibo yakati kulondela ivyalembwamo, i cili cimwi nu kulondela ivyalembwa umwi buku lya kusambililamo sayansi nanti ilya makompyuta ya mpiti ilyata ukuomba? Kwene, ukwelenganya kuko, kusi ningo foo. Sayansi ni vya kupangapanga vikasenuka zuwa sana, nomba uzye vino umuntu akalondekwa navyo vikasenuka? Antu yacili yakalondekwa ukumanya ivyakucita pakuti yaikala ningo nu kuya ansansa nupya aacingililwe, yakalonda ukulauvwana umu lupwa, nu kukwata ivyuza visuma.

Nanti cakuti Baibo i ya mpiti, yalondolola ningo sana pa vintu vii. Nupya yafuma kuli Kaumba witu. Alino ikatutungulula nu kutwazwa ukumanya vino tungacita nga twakwata uwavya uli onsi. (2 Timoti 3:16, 17) Nupya muli Baibo mwaya ukusunda ukungatwazwa insita yonsi, u kwa manda pee! Baibo ikati: “Izwi lyakwe Leza i lya umi.”—Ayebulai 4:12.

Uzye mungati vino Baibo ikalanda i vya cumi? Uzye ivyalembwamo vitanga viombe, nanti limwi vingatwavwa wa vyeo ivyayako ndakai? Lupungu luu, luno lwatandikilapo ukulembwa pali ya magazini aiyeele alalembwa, lumamwazwa ukwasuka mauzyo yaa.