Skip to content

Muye pa utantiko wa vilimo

Mwe Ina Klistu Akoloci—Yeova Akataizya Pali Ucisinka Winu

Mwe Ina Klistu Akoloci—Yeova Akataizya Pali Ucisinka Winu

UMU nsi yonsi, ya eluda yatemwa sana imilimo ino yakaomba pa yantu yakwe Yeova. Yakatwazwa sana! Lelo pataleengile, kwali ukusenuka kumwi ukwacitiike. Ya eluda akoloci yayanenyile ukupeela ya eluda acilumendo imilimo imwi ikome. U mulandu ci?

Amapekanyo apya aakuti angalizi ya viputulwa na yano yakasambilizya umu masukulu ya uleza yakata imilimo iyo ndi yafisya imyaka 70. Nupya ya eluda ali ni myaka 80 yakapeela yauze imilimo yuze ipusanepusane, wakwe ukuya kalemanya wa muli Komiti Ikatungulula Iofesi nanti ukuya Kalemanya mwi Umba lyakwe ya Eluda. Uzye ya eluda akoloci yacita uli pa kusenuka kuu? Yatwalilila ukuya na ucisinka kuli Yeova ni iuvi lyakwe!

Ya Ken, aomvile pali ukalemanya muli Komiti Ikatungulula Iofesi apiipi ni myaka 49 yalanzile yati: “Nazumile ukupingulapo kuu. Nupya pa wanda uno nuvwile ukusenuka kuu, ala katondo nali nkupepa kuli Yeova ukuti umwina umwi uwa cilumendo angazanwa uwakuti aomba ukalemanya.” Vino ya Ken yalanzile ali vino akoloci acisinka aingi umu nsi yonsi yakayuvwa. Nomba vino yatemwa ukuombela aina, pa kutandika yamwi yuvwile sana uyi.

 Ya Esperandio aali ya kalemanya mwi umba lyakwe ya eluda umu cilongano cao yalanzile ukuti: “Canzungwisye.” Nomba yazumile ukuti: “Nkulondekwa insita iya kusakamala umi wane vino nkalwalilila.” Wakwe vino tungenekela, ya Esperandio yatwalilila ukuombela Yeova na ucisinka nupya yakaazwa sana amu cilongano cao.

Nga angalizi aakatandalila ivilongano yano yapeelwa imilimo yuze yene caya uli? Ya Allan, aomvile umu mulimo wa kutandalila ivilongano pa myaka 38 yalanzile ukuti: “Lino namanyile, nuvwile icanzi.” Nomba yamanyile usuma wa kusambilizya acilumendo imilimo, nu kutwalilila ukuomba na ucisinka.

Ya Russell aomvile umulimo wa kutandalila ivilongano alino nu mulimo wa kusambilizya aina apita mu sukulu pa myaka 40, yalanzile yati yene na ya mama yao yasakamile sana. Yatiile, “twatemilwe sana mulimo witu nupya twayuvwanga ukuti tucili na maka akutwalilila ukuomba.” Ndakai lyene ya Russell na ya mama yao yakaomvya vintu vino yasambilila alino ni vyayacitikila mu umi, uku ina na ya nkazi akaya sana ni nsansa ukuombela pamwi nayo mu cilongano cino yayamo.

Nanti icakuti mwemo pa lwinu mutatala mwayuvwapo wakwe vino yaa atiyalandwapo papela iyalanda, ivyeo ivyaya muli 2 Samueli vingamwazwa ukuvwikisya icalenga aina yaa yayuvwa vivyo.

UMONSI UWAICEFIZYE

Elenganyini pa nsita ino Abusalomu umwana wa Mwene Davidi wapondwike. Davidi wapuusile umu Yelusalemu autukila uku Maanaimu umusumba uwayelile uku ufumondaka wa Luzi Lwa Yodani. Lino Davidi wali kuku pamwi na aomvi yakwe yalondekwanga ivya kuomvya. Uzye mukwiusya icacitike?

Aonsi yatatu aikalanga umu musumba uu, umu kuitemelwa yayatwaliile ivya kuvimbala, ivyakulya ivipusane pusane alino ni viya vyakuomvya. Pa onsi yayo pali na Balizilai. (2 Sam. 17:27-29) Lino ucipondoka wakwe Abusalomu wasizile, Davidi waswilile uku Yelusalemu nupya Balizilai u wamusukilile aya amufisya uku luzi lwa Yodani. Davidi wanenyile Balizilai ukuti aye nawe uku Yelusalemu. Umwene Davidi wamunenyile ukuti wali nu kulamupeela ivyakulya nanti icakuti Balizilai “wali umukama wakwe cimwi” nupya atalondekwanga ni vyakulya vino yamulavile ukumupeela. (2 Sam. 19:31-33) Nomba Davidi afwile wataizye sana pa miyele ino Balizilai wakweti na vyonsi vino wali nu kulamupandako. Nupya lyali nu kuya isyuko sana ukwikala nu kuomba umu cilye ca ku wene.

Balizilai waicefizye nupya walanzile ukuti wali ni myaka 80. Walanzile nu kuti: “Kusi cimwi cino nkuzangilamo.” Uzye walozizye mwi? Balizilai afwile wamanyile ivingi nu kukwata mano pa myaka uwingi ino wakweti. Nupya wakweti ivingi ivyakunena antu pa kuyapanda mano, wakwe vino “aikolo” izile yapandako Umwene Leoboamu mano. (1 Yamw. 12:6, 7; Masa. 92:12-14; Mapi. 16:31) Fwandi limwi  amazwi yano Balizilai walanzile ukuti kusi cimwi cino nkuzangilamo yalozyanga ku vintu vino ataakwanisyanga ukucita pa mulandu wa kukota. Walanzile ukuti ukoloci walenzile ukuti atauvwa umulyo nu kukanauvwikisya ivikulandwa. (Kasa. 12:4, 5) Fwandi Balizilai wanenyile Davidi ukuti asende Kimuamu uku Yelusalemu. Kimuamu afwile wali a mwana Balizilai.—2 Sam. 19:35-40.

UKUPEKANYIZIZYA IVYA KU NKOLEELO

Ukusenuka pa mulandu nu kukota ukwatikulandwa pa kutandika, kwakolana na vino Balizilai welenganyanga. Kuya kwene, umu nsita itu, kwali ukwelenganya pa yantu aingi na vino yakakwanisya ukuomba ukuluta ukwelenganya sile pa muntu wenga ndi vino cali kuli Balizilai. Calondekwanga ukulola ivingaomba ningo kuli ya eluda acisinka umu nsi yonsi.

Aina kwene yaa akoloci yaali nu kuilolela ukuti iuvi lyakwe Yeova lingakoma uku nkoleelo ndi cakuti yasambilizya ya eluda acilumendo ukuti aliyo yaomba imilimo ino yaombanga. Ilingi ya eluda kwene akoloci aliyo yasambilizyanga acilumendo, wakwe vino Balizilai wasambilizye umwanakwe na vino umutumwa Paulo wasambilizye Timoti. (1 Kol. 4:17; Filipi 2:20-22) Aina yaa acilumendo yalanga ukuti ‘a mawila uku yantu,’ nupya yakaombesya kuti ‘mwili wakwe Klistu ukomeleke.’— Efes. 4:8-12; lolini na pa Mpendwa 11:16, 17, 29.

MASYUKO YA KUOMBA IMILIMO IPUSANE PUSANE

Aomvi yakwe Leza aingi umu nsi yonsi aata ukuomba imilimo imwi yatandika ukuomba imilimo yuze icindame sana umwi uvi lyakwe Yeova.

Ya Marco aomba umulimo wa kutandalila ivilongano ukucila pa myaka 19 yalanzile yati: “Ukusenuka kwa vintu kwalenga nasambilizya aonsi asipepa atwala ya nkazi aya umu cilongano citu.”

Ya Geraldo aomvile umu mulimo wa kutandalila ivilongano pa myaka 28 yalanzile yati: “Pa mauyo apya yano twakwata paya nu kwazwa atonte nu kutungulula masambililo ya Baibo.” Yalanzile ukuti yene na ya mama yao lyene yakatungulula masambililo 15, nupya atonte aingi yakazanwa uku kulongana.

Ya Allan, atiyalandwapo mpiti yalanzile ukuti: Lyene tukaombesya sana umu mulimo wa kusimikila. Tukaipakizya sana ukuombela konsi ukukazanwa antu, mu vifulo vya uculuzi ivyaya umu cifulo citu, nu kusimikila aina mupalamano, nupya yaili pali yayo yakaiza umu kulongana.”

Ndi cakuti namwe mwaya pa ina acisinka nupya mwapeelwa imilimo ipya pa yantu yakwe Leza, kuli inzila na yuze iyiyele ino mungazwilamo yauze. Mungatungilila umulimo wakwe Yeova lino mukuomvya vino mwamanya ukwazwa acilumendo umu cilongano. Ya Russell, atiyalandwapo mpiti yalanzile ukuti: “Yeova akusambilizya nu kuomvya acilumendo amanya imilimo imwi. Aina umwi uvi yakaipakizya lino alumendo yayo acili na maka yakusambilizya nu kucema!”—Lolini akambokosi kakuti “ Mwaazwa Alumendo Ukuomba Ningo Imilimo.”

YEOVA AKATAIZYA PALI UCISINKA WINU

Ndi cakuti mwatandike likwene ukuomba umulimo upya, twalililini ukwelenganya pa visuma lino mukuomba. Mwazwilizya mpiti antu aingi sana pa mulandu ni milimo inu isuma, nupya mungatwalilila ukwazwilizya na yauze kwene. Mwatemwikwa sana nupya mulatwalilila ukutemwikwa.

Ni cacindama sana i cakuti Yeova alatwalilila ukwiusya imiombele inu isuma. “Wene atalilila mulimo uno mwaomba nanti kutemwa kuno mwalanga kunoli pa kwazwa kuno mucili mukwazwa aina Klistu yauzo.” (Ayeb. 6:10) Amazwi yaa asuma yakatwazwa swensi kwene ukumanya ukuti vino Yeova watulaya vyaluta pa kwiusya sile imilimo ino twaomba mpiti. Yeova wamutemwa sana nupya atanga ailile vino mwamuombela mpiti na vino mukatwalilila ukumuombela pakuti mwamuzanzya!

 Nga ndi cakuti mwemo imilimo inu itaasenuka wakwe vino itulanda papela? Namwe kwene ivyativilandwa vingamukuma. U mu nzila ci?

Ndi cakuti ndakai mukalanzyanya nu mwina umwi umukoloci wino wapeelwa imilimo ipya, angamwazwa ukumanya ivingi pa mulandu wakuti wasambilila ivingi umu mulimo uno waomba pa myaka ingi. Mwaleenga ukuti umwina wiyo amupanda mano. Mwamuzya ukuti amunena vino mungacita muli vimwi vino mukuomba. Nupya mwaika mano kuli vino akaomba na ucisinka umulimo wakwe upya.

Asi mulandu mwemwe yakoloci nupya mukaomba umulimo upya nanti limwi mwemwe mwina nanti nkazi aangasambililako vimwi kuli umwi uwaombela Yeova pa myaka ingi, mwaiusya ukuti Yeova akataizya pali ucisinka wakwe yonsi amuombela pa nsita itali nupya aakatwalilila ukumuombela.