Skip to content

Muye pa utantiko wa vilimo

Mwacita Ivikalanga Ukuti Mwaya nu Utailo—Mwapingula Ningo pa Vintu!

Mwacita Ivikalanga Ukuti Mwaya nu Utailo—Mwapingula Ningo pa Vintu!

“Lino mukulenga cimwi mwataila kwaula kutwisika.”—YAKO. 1:6.

INYIMBO: 54, 42

1. I cani icalenzile Kaini afilwe ukupingula ningo, nupya i cani icacitiike?

KAINI walinzile ukusoololapo, kuli kuti ukupingulapo: Ukucimvya amelenganyo ya kucita ivipe, nanti ukuleka vino welenganyanga vyamutungulula. Vyonsi vino wali nu kupingulapo ukucita, vyali nu kuleenga ivintu vimuziipile nanti ukumwipila umu umi wakwe onsi. Mufwile mwamanya vino Kaini wapingwilepo ukucita ukuti atapingwile ningo. Vino wapingwilepo ukucita vyalenzile akome Abeli umuto wakwe. Nupya vino Kaini wapingwilepo ukucita vyalenzile ate ukuya cuza wakwe Leza.—Utan. 4:3-16.

2. U mulandu ci uno ukupingulapo ningo pa vintu kwacindamila?

2 Naswe kwene twakwata vino tulinzile ukupingulapo. Asi vyonsi vino tungapingulapo ivingaya ningo nanti ukwipa. Nanti ciye vivyo, ivingi vino tukapingulapo ukucita, vingalenga twalanguluka lino papita insita. Fwandi ukupingulapo ningo ivya kucita kungalenga twaikala ningo, ukuya nu mutende alino nu kukana languluka pali vimwi.—Mapi. 14:8.

3. (a) Uzye tulinzile ukuya nu utailo muli cani pakuti twapingula ningo pa vintu? (b) A mauzyo ci yano tumalandapo?

3 I cani cingatwavwa ukulapingula ningo pa vintu? Tulinzile ukuya  nu utailo muli Leza, nu kwiusya ukuti aliwe sile angatwazwa ukutwalilila ukulapingula ningo ivya kucita. Nupya tulinzile nu kutaila sana umwi Zwi Lyakwe Leza alino nu mu utunguluzi wakwe nu kulauvwila vyonsi vino akatusambilizya. (Welengini Yakobo 1:5-8.) Lino tukupalama sana kuli aliwe alino nu kuwelenga sana Baibo, tukaamanya ningo vino akapingula pa vintu. Lyene, tukaelezya ukulola vino malembelo yakalanda pali vimwi lino tutatala twapingulapo ukucita ivintu vivyo. Nomba tungacita uli pakuti twapingula ningo lyonsi? Nupya, uzye ukulondesya ukupingulapo pali cimwi kukapiliula ukuti tulinzile ukupingula sile pali cico kwene nanti ivintu viye uli?

SWENSI KWENE TULINZILE UKUPINGULAPO IVYA KUCITA UMU UMI

4. I vyani vino Adamu wapingwilepo ukucita, nupya i vyani ivyacitiike?

4 Kufuma sile lino Leza waumvile umuntu wakutandikilapo, antu yonsi yakalondekwa ukupingulapo pali vimwi. Adamu walinzile ukupingulapo nampo nga wali nu kuvwila Leza nanti mamakwe Eva. Waitemiilwe ukupingulapo umwisikulu. Uzye imumanya vino wapingwilepo? Wapingwile ukuvwila mamakwe, aatuvwilile Leza, na cii calenzile ukuti apanye isyuko lya kwikala umi wa manda pe muli Paladaise. Vii ali vino ucuzi watandike pano nsi. Pa mulandu wakuti Adamu ataapingwile ningo, calenga ukuti naswe kwene twacula.

5. Uzye tulinzile ukulola uli umulimo uno twakwata uwa kupingula pali vino tulinzile ukucita?

5 Yamwi yakaelenganya ukuti umi nga wazifile sana ndi cakuti tutaipingwilanga ivya kucita. Uzye namwe avino mukaelenganya? Iusyini ukuti, Yeova ataumvile antu ukuya wakwe vimasyini, ivisyaelenganya nu kupingulapo ivya kucita. Baibo ikatusambilizya vino tungaapingula ningo ivya kucita. Nanti icakuti Yeova akalonda kuti twaipingwilapo ivya kucita, asilonda ukuti ivintu vyatwipila lino twapingula pali vimwi. Lolini usininkizyo umwi uukalanga viivyo.

6, 7. I vyani vino aina Izlaeli yali nu kusoololapo, nupya u mulandu ci uno cataliile sana ukupingulapo ningo? (Lolini cikope cakutandikilako.)

6 Lino aina Izlaeli yafisile umu Mpanga ya Ulayo nu kwikalamo, yaali nu kupingulapo ivya kucita pa cintu cii icicindame sana: Yaali nu kupingulapo ukuti yapepa Yeova nanti ukupepa leza muze (nanti tuleza). (Welengini Yoswa 24:15.) Limwi cingaloleka kwati citaali icintu icitale ukupingulapo. Nomba, vino yaali nu kupingulapo vyali nu kuyalenga ukutwalilila ukuya nu umi nanti ukufwilapo. Amaila aingi umu nsita zyakwe Yakapingula, aina Izlaeli yataapingulanga ningo ivya kucita. Yafumanga uku kupepa Yeova nu kutandika ukupepa tuleza tuze. (Yakapi. 2:3, 11-23) Nanti limwi ezyini ukwelenganya pali vino cali uku yantu yakwe Leza lino yaali nu kupingulapo ukucita vimwi ala patipapita imyaka iingi ukufuma pa nsita ino kwali Yakapingula. Kasema Eliya walondolwile ningo cino yaali nu kusoololapo ukucita ati: Mwaombela Yeova nanti ndi mukulonda mwaombela leza waufi Baali. (1 Yamw. 18:21) Eliya wakalipiile antu yaaya pa mulandu wa kukanamanya vino yaali nu kupingulapo. Limwi mungelenganya ukuti citatazile ukupingulapo ivya kucita pano lyonsi caya ningo ukuombela Yeova. Nupya, kusi umuntu aakaelenganya ningo aangaitemelwa ukutandika ukupepa Baali. Nanti ciye vivyo, aina Izlaeli yaalolanga kwati cali sile ningo ukupepa Yeova na Baali pa nsita iliyonga kwene. Eliya wacincizye aina Izlaeli ukusoolola ukupepa ukwacindime sana, kuli kuti ukupepa Yeova.

7 U mulandu ci uno cataliile aina Izlaeli ukupingulapo ningo? Icakutandikilako, yatiile ukutaila Yeova nu kuta ukumuvwila. Yataamanyile ningo icumi nanti amano aakafuma kuli Leza; nupya yatataile Yeova. Ukucita ivintu ukulingana ni cumi cino Leza wasokolola nga kwayazwilizye  ukupingula ningo pa vintu. (Masa. 25:12) Ni caifile sana icakuti, yacitanga vino yalolanga antu yauze yakucita nantu ukuleka kuti yayapingwila ivya kucita. Antu aikalanga umu mpanga iiya aataali yakapepa yakwe Yeova yavulunginye imyelenganyizizye ya ina Izlaeli, nu kuleka ukuti yaalondela ukupepa kwa ufi. Yeova wacelwile antu yakwe ala kucili imyaka ingi ukuti ica musango uu cali nu kucitika uku nkoleelo.—Kufu. 23:2.

UZYE TULINZILE UKULEKA YAUZE YATUPINGWILA IVYAKUCITA?

8. I cintu ci icicindame cino tukusambilila kuli vino vyacitikile aina Izlaeli pa kupingulapo ivya kucita?

8 Ivyacitikiile aina Izlaeli vikatusambilizya icintu cimwi icicindame sana. Swensi kwene tulinzile ukuipingwilapo ivya kucita, nupya pakuti twapingulapo ningo, tulinzile ukumanya ningo Amalembelo. Pali Galatiya 6:5 pakatwiusya ukuti: “Umuntu wensi alinzile kuisendela cisendo cakwe umwisikulu.” Tutalinzile ukuleka umuntu muze aliwe aatupingwila ivya kucita. Lelo, tulinzile ukumanya sweineco vino Leza watemwa nu kusoolola ukucita vivyo kwene.

9. U mulandu ci uno ivintu vingatwipila ndi tukuleka kuti yauze yatupingwila ivya kucita?

9 I cani icingalenga twaleka yauze yatusoolwela ivya kucita? Antu yauze yangalenga kuti tutapingula ningo pali vimwi. (Mapi. 1:10, 15) Nomba, asi mulandu na vino yauze yangatupatikizya ukucita, tulinzile ukulondela ivyaya muli Baibo vino kampingu witu uwasambiliziwa ningo akutuneena ukucita. Ilingi ndi twaleka kuti yamwi yatupingwilapo ivya kucita, ala twapingulapo ukuti “tumayalondelanga.” Ndi twacita vivyo ala itusoololapo ivya kucita, nomba tungailetelela.

10. Uzye Paulo wacelwile aina Galatiya pali vyani?

10 Umutumwa Paulo wacelwile aina Galatiya pa ntazi iyali umu kuleka yauze yayapingwila ivya kucita. (Welengini Galatiya 4:17.) Yamwi umu cilongano yalondanga ukuti yapingwilako yauze ivya kucita pakuti yatalondela vino atumwa yasambilizyanga. U mulandu ci? Antu ya musango uwo yaali aakaitemwe nupya yalondanga kuti antu yayacindika. Vino yacitanga vitazifile nupya yatacindike umulimo wa Ina Klistu yauze uwa kuipingwila ivya kucita.

11. Uzye tungazwa uli yauze lino yakupingulapo ivya kucita?

 11 Vino Paulo wacitanga vyalangilile ukuti wacindike sana insambu zino Aina Klistu yauze yakweti izya kuipingwila ivya kucita. (Welengini 2 Kolinto 1:24.) Vikwene avino na ya eluda yalinzile ukucita ndakai lino yakwazwa Aina Klistu yauze ukuipingwilapo ivya kucita. Yakaitemelwa ukuomvya ivyeo ivyaya muli Baibo pa kwazwa ufyo wakwe Leza. Lelo, ya eluda yakaleka ukuti aina na ya nkazi yaipingwilapo ivya kucita. Ukucita vivyo kwaya ningo pano Leza alapingula antu yaayo pali vino yakacita. Icintu icicindame sana cino tungasambililako aeci: Tungalanga ukuti tukulonda ukwazwa yauze ukuomvya ukusunda nanti ivisinte ivyaya umu Malembelo. Nomba nanti ciye vivyo, yauze yakwata insambu nu mulimo wakuipingwila ivya kucita. Ndi yapingula ningo pali vimwi, ivintu vikayazipila. Fwandi ukwaula nu kupita umumbali, tutalinzile ukwelenganya ukuti twapeelwa amaka yakupingwila aina na ya nkazi vino yalinzile ukucita.

Ya eluda aaya nu kutemwa, yakaazwilizya yauze ukusambilila ivya kuipingwila pali vino yalinzile ukucita (Lolini palagalafu 11)

MUTAALEKA AMELENGANYO INU YAMULENGA UKUKANAPINGULA NINGO

12, 13. U mulandu ci uno citaziipila ukulondela sile ivili umu mwenzo witu ndi twatitusoka nanti pa nsita ino itutoovoka?

12 Antu aingi yakati: Uwalondela vino umwenzo ukukunena ukucita. Nomba ukucita vivyo kungaleta uzanzo. Nupya asi vino Malembelo yakatukomelezya ukucita. Baibo ikatucelula ukuti tutalinzile ukulondela sile imyenzo itu itaamalilika nanti vino tukwelenganya lino tukupingulapo ukucita vimwi. (Mapi. 28:26) Nupya amalyasi aaya muli Baibo yakalanga intazi izyaya umukulondela sile vino umwenzo ukunena umwi ukucita. Intazi ikalamba sana ino antunze aatamalilika yakwata iyakuti, umu mwenzo “mwazula ucenjezi uwa misango yonsi, nupya u wipe wakwe cimwi.” (Yele. 3:17; 13:10; 17:9; 1 Yamw. 11:9) Uzye fwandi, i cani icingacitika ndi cakuti tukulondela sile ivili umu mwenzo witu?

13 Umwenzo wa Mwina Klistu wacindama sana, pano amalembelo yakatunena ukuti tulinzile ukutemwa Yeova nu mwenzo onsi alino nu kutemwa yauze ndi vino twaitemwa. (Mate. 22:37-39) Nomba amalembelo ali muli palagalafu uwafumako yakulanga uzanzo ukayapo ndi tukutungululwa na melenganyo itu alino na vino tukuyuvwa sile umu mwenzo. Uzye vwilini cingaya uli ndi cakuti twapingula pali vimwi lino twatitusoka? Ndi cakuti twatala twacitapo vivyo tufwile itumanya icasuko. (Mapi. 14:17; 29:22) Nanti uzye mukwelenganya ukuti tungapingulapo ningo pa nsita ino itutoovoka? (Mpe. 32:6-12; Mapi. 24:10) Mwaiusya ukuti Izwi Lyakwe Leza likatunena ukuti icintu ca mano u kuyela “masunde yakwe Leza.” (Loma 7:25) Fwandi, tungasombwa zuwa ndi cakuti tukulondela sile amelenganyo itu nanti vino tukuyuvwa sile umu mwenzo lino tukupingula pa vintu ivicindame.

LINO MUNGASENUKA MULI VINO MUKWELENGANYA

14. Twamanya uli ukuti ukusenula vino umwi watapingulapo mpiti kungaya sile ningo insita zimwi?

14 Tulinzile ukupingula ningo pa vintu. Nomba cii cisikupiliula ukuti tutalinzile ukusenuka muli vino itupingulapo mpiti ukucita. Kungaya insita zimwi lino tulinzile ukupituluka muli vino twatitupingulapo mpiti, alino limwi nu kusenula vino itupingula. Iusyini vino Yeova wacisile uku ina Ninive apa nsita ino Yona wali nu umi. “Lyene lino Leza walola vino antu yacita na vino yazenzwike uku misango yao yankota, aya na mizu kunoyali nga atayaponyezizye uwononesi uno walanzile ukuti alayaponyezya.” (Yona 3:10) Lino Yeova waweni ukuti aina Ninive yatiyalapila, nupya yatiyasenuka, wasenwile vino wapingwilepo ukucita. Ukucita vii, kwalangilile ukuti asiumilila sile pali cino wapingula, waicefya, alino nupya waya na mizu. Nupya Leza asicita ivintu pa mulandu wa kusoka sile ukwa pa kasita akanono, wakwe vino antu aingi yakacita.

15. I cani limwi icingalenga tusenule vino twatitupingulapo mpiti?

 15 Kungaya vimwi ivingalenga twelenganyepo nupya pali vino twatitupingulapo mpiti nanti vino twatitusoololapo ukucita. Limwi cii cingacitika ndi kwaya vimwi ivyasenuka. Yeova wasenulanga vino watapingulapo mpiti ndi kwacitika vimwi. (1 Yamw. 21:20, 21, 27-29; 2 Yamw. 20:1-5) Nanti limwi ndi twamanyilapo vyuze ivipya tungalola ukuti icilinga ukusenula vino twatitupingulapo mpiti. Umwene Davidi pa nsita imwi yamunenyile ivya ufi pa mwizikulu wakwe Saulo, Mefibosyeti. Lino Davidi wizile auvwa ivya cumi, wasenwile vino wapingwilepo. (2 Sam. 16:3, 4; 19:24-29) Naswe insita zimwi cingalinga ukucita ndi vikwene.

16. (a) Uzye i vyani vimwi ivingatwazwa ukupingula ningo pa vintu? (b) Uzye tulinzile ukulola uli vino twapingulapo mpiti, nupya u mulandu ci?

16 Izwi Lyakwe Leza likatunena ukuti tutalinzile ukuzukuwa lino tukupingulapo pa cintu cimwi icicindame. (Mapi. 21:5) Ndi cakuti twateekela nu kupituluka muli vyonsi ivikulondekwa ukwelenganyapo pa kupingula pali cimwi, cilalenga ukuti twapingula ningo. (1 Tesa. 5:21) Lino umwina uwakwata lupwa atali acite vimwi alinzile ukulondelezya vino Amalembelo yakalanda nu kulondelezya umu mpapulo zitu alino nu kuvwa vino yauze amu lupwa yakwelenganyapo. Iusyini ukuti Leza wanenyile Abulaamu ukuvwa vino mamakwe walanzile. (Utan. 21:9-12) Ya eluda nayo yalinzile ukulondelezya sana ivyeo pa kupingula. Nupya ndi cakuti yasikuumilila sile pali vino yakwelenganya, nu kumanya ukuti nayo kwene yangaluvyanya, yatalaatiina ukuti limwi yauze yamata ukuyapeela umucinzi ndi kwaya ivyeo ivipya ivikulanga ukuti yalinzile ukupituluka muli vino yaapingula mpiti. Yalinzile ukuipekanya ukusenula amelenganyo na vino yapingula ndi calinga, nupya swensi kwene tulinzile ukuyakolanya. Cii cingalenga ukuti umu cilongano muye umutende nupya mutanga muye icimvulunganya.—Mili. 6:1-4.

MWACITA UKULINGANA NA VINO MWAPINGULA

17. Uzye tungacita uli pakuti twapingula ningo sana pa vintu?

17 Ivintu vimwi vino tukapingulapo vyacindama sana. Fwandi ndi tukupingulapo apa vintu ivicindamisye tulinzile ukwelenganyapo sana nu kupepelapo, nupya cii cingasenda insita. Aina Klistu yamwi yakalondekwa ukuti yapingulepo ukuti yatwale nanti ukutwalwa alino nu kupingulapo ukuzana aangalinga ukutwalana nawe. Cuze icacindama sana u kupingulapo ukutandika umulimo wa nsita yonsi umwaya ivintu ivingi ivisuma. Lino tukupingulapo pa vintu vya musango uu, cacindama ukutaila sana ukuti Yeova angatwazwa nu kututungulula. (Mapi. 1:5) Fwandi, cacindama ukulondelezya muli Baibo nu kupepa kuli Yeova pakuti tuzane ivyeo ivingatwazwa ukupingula ningo. Nupya mwaiusya ukuti Yeova angatupeela imiyele ikalondekwa pakuti tupingulepo ivikuvwana nu kulonda kwakwe. Lino mukupingula pa vintu ivicindame sana, lyonsi mwayuzya mweineco imuti: ‘Uzye vino napingulapo ukucita, vikulanga ukuti natemwa Yeova? Uzye vilalenga kuti umu lupwa lwane muye uluzango nu mutende? Nupya uzye vilalanga ukuti nkateeka umwenzo nupya naya nu luse?’

18. U mulandu ci uno Yeova akalondela ukuti twaipingwila sweineco ivya kucita?

18 Yeova asitupatikizya ukuti tumutemwe nu kutandika ukumuombela. Sweineco tulinzile ukuisoolwela. Vino watupeela uwila wa kuisoolwela, wacindika sana umulimo witu ni nsambu zino twakwata ‘izya kuisoolwela sweineco’ ukutandika ukumuombela nanti foo. (Yoswa 24:15; Kasa. 5:4) Nomba akalonda kuti twaelenganya pali vino twapingulapo ukucita nu kulola ndi cakuti vikuvwana na vino akatusambilizya. Ndi tukutaila ukuti vino Yeova akacita vyaya ningo nu kutaila sana ivisinte vino watupeela, tulaapingula ningo nupya tulaomba ningo sana muli vyonsi vino tukucita.—Yako. 1:5-8; 4:8.