Skip to content

Muye pa utantiko wa vilimo

 CIPANDE CA KUSAMBILILAMO 29

‘Yangini Mucite Antu Ukuya Asambi’

‘Yangini Mucite Antu Ukuya Asambi’

“Caleka yangini konsi mu nsi mucite antu amu nko zyonsi kuya alondezi yane.”—MATE. 28:19.

ULWIMBO 60 Alino Yalapusuka

VINO TUMASAMBILILAPO *

1-2. (a) Ukulingana ni isunde lyakwe Yesu ilyaya pali Mateo 28:18-20, u mulimo ci ucindame uno Aina Klistu yakwata? (b) A mauzyo ci yano tumaasuka mu cipande cii?

ATUMWA yafwile yatemilwe sana lino yakolongine pa mwamba. Lino Yesu watutuulwilwe, wayanenyile ukuti yakakolongane ku ncende iiya. (Mate. 28:16) Uu ufwile wali ali wanda uno ‘walolike ku alondezi yakwe yonsi kuluta pali 500.’ (1 Kol. 15:6) U mulandu ci uno Yesu wamiile asambi yakwe kuuku? Walondanga ukuyapeela mulimo, wayanenyile ati: “Caleka yangini konsi mu nsi mucite antu amu nko zyonsi kuya alondezi yane.”—Welengini Mateo 28:18-20.

2 Asambi auvwile amazwi yano Yesu walanzile izile iyaya mu cilongano ca Ina Klistu yakutandikilako. Umulimo ucindame uno amu cilongano cii yali nu kuomba u kupanga antu ukuya asambi yakwe Klistu. * Ndakai mu nsi mwaya ivilongano ivingi sana ivya Ina Klistu ya cumi, nupya umulimo uno yakwata uliumwi na uuwa kwene uno Aina Klistu yakutandikilako yakweti. Umu cipande cii, tumalanda pa mauzyo yaa ali 4: U mulandu ci uno cacindamila ukupanga asambi? I vyani vino tulinzile ukucita pakuti tupange asambi? Uzye Aina Klistu yonsi yangazwilizyako ukupanga asambi? Nupya u mulandu ci uno tulinzile ukuyeela ateekele pa kupanga asambi?

 U MULANDU CI UNO CACINDAMILA UKUPANGA ASAMBI?

3. Ukulingana na mazwi aya pali Yoane 14:6 na 17:3, u mulandu ci uno mulimo wa kupanga asambi wacindamila?

3 U mulandu ci uno mulimo wa kupanga asambi wacindamila? Pano umusambi wakwe Klistu sile aliwe angaya cuza wakwe Leza. Nupya, antu akalondela Klistu yakaikala ningo pali ndakai nupya yakwata nu upaalilo wa kwizaipakizya umi usuma amanda pe ku nkoleelo. (Welengini Yoane 14:6; 17:3.) Yesu watupeela umulimo ucindame sana, nomba tusiomba swenga mulimo uu. Umutumwa Paulo walemvile pali aliwe na yano waombelanga pamwi nayo ukuti: ‘Tukaombela pamwi na Leza.’ (1 Kol. 3:9) Vino Yeova na Klistu yapeela mulimo ku yantu atamalilika i syuko sana!

4. I vyani vino tungasambilila kuli vino vyacitike kuli ya Ivan na ya Matilde?

4 Umulimo wa kupanga asambi ukatuletela sana uluzango. Elenganyini pali ya Ivan na ya mama yao ya Matilde aku Colombia. Yasimikiile ku mulumendo umwi uwi izina lyakuti Davier, uwayanenyile ukuti: “Nkalonda ukusenuka, nomba nkafilwa.” Davier wali akalwa wa lwete lwa makofi ulwakucimvyanya uwaomvyanga imilembo ikavulunganya uwongo, ukukoleka sana, nupya wikalanga na Erika umwanaci wino yatatwaline nawe. Ya Ivan yalondolwile iyati: “Twatandike ukusambilila nawe Baibo. Wikalanga mu muzi uwayelile ukutali nupya twakwelanga amajinga pa nsita itali pakuti tufikeko ala tukupita mu miseo umwali sana matipa. Lino Erika waweni ukuti Davier watandika ukusenuka mu miyele ni vicitwa, nawe kwene watandike ukusambilila Baibo.” Pataalengile Davier watiile ukuomvya milembo ikavulunganya uwongo, ukukoleka nu lwete. Nupya yatwaline na Erika. Ya Matilde yalanzile iyati: “Lino Davier na Erika yawatiziwe mu 2016, twiwisye amazwi yano Davier walandanga akuti, ‘Nkalonda ukusenuka, nomba nkafilwa.’ Twatemilwe sana icakuti twalizile nu kulila.” I cumi kwene tukaya sana nu luzango ndi cakuti tukwazwa antu ukuya asambi yakwe Klistu.

I VYANI VINO TULINZILE UKUCITA PAKUTI TUPANGE ASAMBI?

5. I vyani vino tulinzile ukutandikilapo ukucita pa kupanga asambi?

5 Pa kupanga asambi tukatandikilapo ‘ukulonda antu’ aakaitemelwa ukusambilila pali Yeova. (Mate. 10:11) Tukalanga ukuti sweswe ya Nte Yakwe Yeova ndi cakuti tukusimikila kuli yonsi yano twazana. Nupya tukalanga ukuti sweswe Ina Klistu ya cumi ndi cakuti tukulondela vino Klistu watunenyile ukuti twasimikila.

6. I vyani ivingamwazwa ukulaomba ningo mu mulimo wa kusimikila?

6 Antu yamwi yakalondesya ukusambilila icumi ca muli Baibo, nomba aingi yano tukazana pa kutandika yakaloleka kwati yatiisileko amano. Tulinzile ukuyakomelezya ukulondesya ukusambilila. Pakuti twaomba ningo mu mulimo, tulinzile ukulapekanya ningo. Mwasoolola ivyeo vino antu yano mukuzana yangatemwa ukuvwa. Lyene mwapekanya vino mumaya mukatandike ukulanzyanya.

7 Mungacita uli pakuti mutandike ukulanzyanya nu muntu, nupya u mulandu ci uno mungalandila ukuti cacindama ukukutika lino muntu akuvwanga alino nu kulanga mucinzi?

7 Limwi munguzya umuntu wino mwazana muti: “Uzye cingaya sile ningo ndi namuzya vino mukaelenganya pi lyasi limwi? Intazi zino tukakwata ndakai azino na antu mu nsi yonsi yakakwata. Uzye mukwelenganya ukuti uteeko wa muno nsi ungasisyapo intazi zino antu yakakwata?” Lyene mungalanzyanya ilembelo lyakwe Danieli 2:44. Nanti limwi munguzya aina mupalamano muti: “Uzye mwemo mukaelenganya ukuti iinzila ci isuma iya kusambilizizyamo ana pakuti yakakule ningo? Ningatemwa ukuvwa vino mukaelenganyapo?” Lyene  mungalanzyanya ilembelo lyakwe Malango 6:6, 7. Ilyasi ilili lyonsi lino mwasoolola, mulinzile ukwelenganya pa yantu yano mulalandako. Mwaelenganya pali vino ilyasi lilyo lilayazwa ndi yamanya vino Baibo ikasambilizya. Lino mukulanda nayo, cingazipa ndi cakuti mukukutika kuli vino yakulanda nu kucindika vino yamanya. Nga mwacita vivyo mulayuvwikisya, nupya nayo yalatemwa ukuvwa kuli vino mukulanda.

8. U mulandu ci uno tulinzile ukutwalilila ukulaswilila kuli yano twasimikiile?

8 Lino muntu atatala wapingulapo ukutandika ukusambilila Baibo, limwi mungalondekwa ukusumba insita ikulu na maka ala mukuswililako. U mulandu ci? Pano antu limwi yatanga yazanwe pa ng’anda umuku wa kutandikilapo uno mwaswililako. Nupya, limwi mungalondekwa ukuswililako imiku iingi pakuti umuntu aitemelwe ukutandika ukusambilila Baibo namwe. Mwaiusya ukuti, icimelwa pakuti cikule mulinzile ukucikontelela lyonsi. Avino caya nu ku yantu yano tukazana, ukutemwa Yeova na Klistu kukaya kukulilako ndi cakuti tukulanzyanya nayo lyonsi api Izwi Lyakwe Leza.

UZYE AINA KLISTU YONSI YANGAZWILIZYAKO UKUPANGA ASAMBI?

Ya Nte mu nsi yonsi yakaombako mulimo wa kulonda antu akalonda ukumanya icumi (Lolini mapalagilafu 9-10) *

9-10. U mulandu ci uno tungalandila ukuti Umwina Klistu aliwensi angazwilizyako ukulonda antu akalonda ukuya asambi?

9 Umwina Klistu wensi wakwata mulimo wa kwazwa antu akalondesya ukumanya icumi. Tungakolanya umulimo uu ku yantu akulonda mwana uwataponga. U mu nzila ci? Elenganyini pali vino vyacitike lino umwana umwi uwa myaka itatu waponzile ku ng’anda. Mupipi na antu 500 yaile mu kumulonda. Pa cisila, lino papisile amaawazi 20 kufuma pano umwana wapongiile, umwi pali yaya kwene aile mu kumulonda, waile amuzana mu calo cakwe cisaka. Umuntu wiyo atalondanga ukuti antu yamupeela mucinzi pali vino wacisile. Walanzile ati: “Umwana wii wataloleka pa mulandu wakuti antu yonsi yaa iyaombela pamwi.”

 10 Antu aingi yaya wa mwana wiya umuponge. Yatakwata upaalilo, nomba yakalonda uwakuyazwa. (Efes. 2:12) Swe ya Nte ukucila pali 8 milyoni tukaombela pamwi ukulonda antu ya musango uwo. Limwi mwemo mutanga muzane muntu angaitemelwa ukusambilila Baibo namwe. Nomba, ya kasimikila yauze aakaombela mu cifulo icilicimwi na cimo mukaombelamo, yangazana umwi akulonda ukusambilila icumi icaya mwi Izwi Lyakwe Leza. Ndi cakuti umwina nanti nkazi wazana umwi uwakuti wiza waya umusambi wakwe Klistu, yonsi aazwilizye ukuomba mulimo uu yakaya sana nu luzango.

11. Nanti icakuti pali ino nsita musikusambilizya umwi Baibo, u mu nzila ci zyuze muno mungazwilizizyamo ukupanga asambi?

11 Nanti icakuti pali ino nsita musikusambilizya umwi Baibo, mungazwilizyako ukupanga asambi mu nzila zyuze. Ndi cakuti mwalola umupya pa Ng’anda ya Wene, mungamupokelela ningo nu kumwazwa. Nga mwacita vivyo mungamwavwa ukusininkizya ukuti mu cumi sweswe Ina Klistu ya cumi. (Yoa. 13:34, 35) Ivyasuko vino mukaasuka pa kulongana nanti icakuti vingaya ivipi vingalenga apya yanenako yauze vino yakusambilila pali Yeova. Nupya mungaomba nu mupya mu mulimo nu kumwazwa ukulondolola ningo amalembelo lino akusimikila. Nga mukucita vivyo, mulamusambilizya ukulakolanya Klistu.—Luka 10:25-28.

12. Uzye tukalondekwa ukuya asambilile sana pakuti tulinge ukupanga asambi? Londololini.

12 Pasi alinzile ukwelenganya ukuti pakuti asambilizye umwi ukuya musambi wakwe Yesu alinzile ukuya musambilile sana nanti ukumanya ivingi sana. U mulandu ci? Elenganyini pali ya Faustina aakaikala mu Bolivia. Yaatamanyile ukuwelenga lino yatandike ukusambilila na ya Nte Yakwe Yeova. Nomba ndakai yamanyako panono ukuwelenga. Paa lyene yawatiziwa, nupya yatemwa sana ukusambilizya yauze Baibo. Ilingi, yakatungulula amasambililo ya Baibo 5 cila mulungu. Nanti icakuti ya Faustina yatanga yalute yano yakasambilizya Baibo ukuwelenga, yazwa antu 6 ukumanya icumi nu kuwatiziwa.—Luka 10:21.

13. Nanti i cakuti twapamviwa, i visuma ci vimwi vino tukazana mu mulimo wa kupanga asambi?

13 Aina Klisu aingi yapamviwa sana ku milimo icindame sana ino yakwata. Nomba yakalonda insita yakutungulula amasambililo ya Baibo, nupya yakaya sana nu luzango. Lolini ivyacitike kuli ya Melanie. Yali avyazi ataakweti ya iya, ikalanga mu Alaska nupya yakweti umwana umukazyana uwa myaka 8. Nupya yaombanga incito nu kusunga avyazi yao alwile kansa. Ya Melanie aliyo yali sile ya Nte mu musumba uno ikalangamo. Lyonsi yapepanga ukuti Yeova ayapeele amaka ya kuya mu kusimikila nanti i cakuti ikuzuka pano yalondesyanga ukuzana umuntu angalonda ukusambilila Baibo. Pataalengile yazanyile ya Sara  aatemilwe sana ukumanya ukuti Leza wakwata izina. Lino papisile insita, ya Sara yazumile ukusambilila Baibo. Ya Melanie yalanzile iyati: “Lyonsi pali Cisano manguzi, natontanga sana nomba twayanga nu mwanane mu kutungulula isambililo nupya twaipakizyanga sana. Twatemwanga ukulondelezya amasuko ku mauzyo yano ya Sara yuzyanga, nupya twatemilwe sana ukulola iiza yaya ya cuza yakwe Yeova.” Ya Sara yazizimizye lino yayazunyanga, iyasya yata nu kupepa kuno yapepanga nupya izile iyawatiziwa.

TULINZILE UKUYA ATEEKELE PA KUPANGA ASAMBI

14. (a) Uzye aakapanga asambi yakolana uli na alondo? (b) Uzye amazwi yakwe Paulo aya pali 2 Timoti 4:1, 2 yangamwazwa uli?

14 Nanti icakuti mutalatala mwazana umwi akulonda ukuya musambi, mutalinzile ukutoovoka mwatwalilila ukulonda angatemwa ukuvwa. Mwaiusya ukuti Yesu wakolinye mulimo wa kupanga asambi kuli ya kavuwa ya nswi. Ya kavuwa ya nswi yakamala amaawazi aingi ukwaula ukulema luswi nanti longa. Ilingi yakaya mu kuvuwa usiku nanti katondotondo, nupya insita zimwi yakaya kutali sana pakuti sile yazane inswi. (Luka 5:5) Mu nzila iliyonga kwene, ya kasimikila yamwi yakasumba amaawazi aingi mu mulimo ala iyateekela nupya yakaya mu ncende izipusanepusane. U mulandu ci? Pakuti yangazana antu aingi akusimikilako. Ya kasimikila yonsi aakaombesya mu nzila ii yakapolelelwa pano yakazana antu akalondesya ukuvwa ilandwe lisuma. Uzye namwe mungezya ukuya mu kusimikila pa nsita ino mungazana antu pa mang’anda nanti ku ncende zino mungayazanako?—Welengini 2 Timoti 4:1, 2.

Mwateekela lino mukwazwa asambi ukulunduluka muli ukapepa (Lolini mapalagilafu 15-16) *

15. U mulandu ci uno tulinzile ukuyela ateekele lino tukutungulula amasambililo?

 15 U mulandu ci uno tulinzile ukuyela ateekele lino tukutungulula amasambililo ya Baibo? Umulandu onga u wakuti tulinzile ukwazwa umusambi ukumanya nu kutemwa vino Baibo ikasambilizya. Nupya tulinzile nu kwazwa musambi ukumanya nu kutemwa Umwineco wakwe Baibo, Yeova. Nupya ndi cakuti twasambilizya musambi vino Yesu akalonda asambi yakwe yacita, tulinzile nu kumwazwa ukumanya vino angacita pakuti aye Umwina Klistu wa cumi. Tulinzile ukuteekela ndi cakuti musambi cikumutalila ukuomvya visinte vya muli Baibo. Asambi yamwi yakasenula zuwa amelenganyo yao ni vicitwa mu myezi sile inono, nomba yauze yene pakapita insita pakuti yasenuke.

16. I vyani vino mukusambilila kuli vino vyacitike kuli Raúl?

16 Umwina umwi misyonali uwa ku Peru walanzile ivisuma vimwi ivyacitike pa mulandu wakuti wali umuteekele. Walanzile ati: “Nasambilizye musambi umwi uwi izina lyakuti Raúl mu mabuku yonsi yoili yano tukaomvya pa kusambilizya. Nomba watwalilile ukuya ni ntazi mu umi. Icupo cakwe citali ningo, wapontanga nu kutukana, nupya ana yakwe cayatalilanga ukumucindika. Nanti ciye vivyo wizanga mu kulongana lyonsi, na cii calenzile ntwalilile ukumutandalila nu kumwazwa pamwi nu lupwa lwakwe. Papisile imyaka ukucila pali itatu ukufuma pano twatandikile ukusambilila nawe, alino wizile alinga ukuwatiziwa.”

17. I vyani vino tulasambilila mu cipande icilondelilepo?

17 Yesu watunenyile ‘ukuya konsi mu nsi mu kupanga antu ukuya asambi.’ Pakuti tufikilizye ukuomba mulimo uwo, ilingi tukalanda na antu yano ivizumilo vyao vyapusana sana ni vitu, ukwikako na yano yasiya ku calici ilili lyonsi nanti aatazumila muli Leza. Icipande icilondelilepo cilalanda vino tungacita pakuti tusimikile ilandwe lisuma ku yantu aankulilo izipusanepusane.

ULWIMBO 68 Ukuta Imbezu Zya Wene

^ pala. 5 Umulimo uno Aina Klistu yakwata u wa kwazwa antu ukuya asambi yakwe Klistu. Icipande cii cimalanda pa nzila izingatwazwa ukuombesya mu mulimo witu.

^ pala. 2 IZWI ILYATILILONDOLOLWA: Asambi yakwe Klistu yasipeleela sile pa kumanya vino Yesu wasambilizyanga. Lelo yakaviomvya nu kuviomvya. Yakaezya na maka ukulondela sana mu ntampulo zyakwe Yesu.—1 Pet. 2:21.

^ pala. 52 ULONDOLOZI WA CIKOPE: Umonsi ali pa cuuti wapoka ulupapulo kuli ya Nte pa ciwansa ca ndeke. Umuku uze, lino acili pa cuuti, walola ya Nte yakusimikila. Lino waswilila ku mwao, ya kasimikila yamutandalila pa ng’anda apakwe.

^ pala. 54 ULONDOLOZI WA CIKOPE: Umonsi aliumwi kwene watandika ukusambilila Baibo. Lino papita insita, wawatiziwa.