Skip to content

Muye pa utantiko wa vilimo

 CIPANDE CA KUSAMBILILAMO 27

Muipekanye Likwene Lino Insita ya Kuzunyiwa Itali Ifike

Muipekanye Likwene Lino Insita ya Kuzunyiwa Itali Ifike

“Muntu wensi wakwe Klistu wino akalonda kwikala umi wa kucita vyawololoke pa manso yakwe Leza wene alazunyiwa.2 TIM. 3:12.

ULWIMBO 129 Tulatwalilila Ukuzizimizya

VINO TUMASAMBILILAPO *

1. U mulandu ci uno tulinzile ukuipekanyizizya lino insita ya kuzunyiwa itali ifike?

PA Wanda wa kusyalikizyako usiku ala Umwene witu Yesu atali akomwe, walanzile ukuti yonsi aasoolwile ukuya alondezi yakwe yaali nu kupatwa. (Yoa. 17:14) Na ndakai kwene, Aina Klistu ya cumi yakazunyiwa ku yantu asipepa Yeova. (2 Tim. 3:12) Lino tukuya tukupalamila ku mpelelekezyo ya nsi ii, tukwenekela ukuti ukuzunyiwa ku yalwani itu kulaya ku kukulilako.—Mate. 24:9.

2-3. (a) I vyani vino tulinzile ukumanya pa ntete? (b) I vyani vino tumalanda mu cipande cii?

2 Nomba i vyani vino tungacita pakuti tuipekanyizizye limwi lino insita ya kuzunyiwa itali ifike? Tutalinzile ukwezya ukulaelenganya sana pa viipe ivingatucitikila ku nkoleelo. Nga twacita vivyo, tungatoovoka pa mulandu ni ntete nu kusakamikwa. Ndi cakuti twatandika ukwelenganya sile pa viipe ivingatucitikila, tungauvwa sana intete icakuti ituta nu kuombela Yeova na lino tutatala twaponelwa ni intazi izili zyonsi. (Mapi. 12:25; 17:22) Intete ali canzo ca maka sana cino “Ciwa, mwanisi” akaomvya pa kutuzanza. (1 Pet. 5:8, 9) I vyani vino tulinzile ukucita likwene pakuti tuce tutwalilile ukuzizimizya lino yatandika kutuzunya?

3 Umu cipande cii, tumasambilila vino tungakomya ucuza witu na Yeova nu umulandu uno tulinzile ukucitila vivyo likwene. Nupya tumalanda na pali vino tungacita pakuti tuye asipe sana. Lyene, tumalanzyanya na vino tungazizimizya lino antu yatupata.

VINO MUNGACITA PAKUTI UCUZA WINU NA YEOVA UKOME

4. Ukulingana na amazwi aya pa Ayebulai 13:5, 6, i vyani vino tulinzile ukusininkizya nupya u mulandu ci?

4 Mwasininkizya ukuti Yeova wamutemwa nu kuti atalatala  amisye. (Welengini Ayebulai 13:5, 6.) Pa myaka iingi iyapitapo, Lupungu Lwa Mulinzi lwalanzile ukuti: “Umuntu uwamanya ningo Leza akamutaila sana lino waya na mezyo.” Icacumi sana! Pakuti tukazizimizye ukuzunyiwa, tulinzile ukutemwa Yeova nu kumutaila sana nupya tutalinzile ukutwisika ukuti watutemwa sana.—Mate. 22:36-38; Yako. 5:11.

5. I vyani ivilamwavwa ukumanya ukuti Yeova wamutemwa?

5 Mwawelenga Baibo cila wanda pakuti mupalame sana kuli Yeova. (Yako. 4:8) Lino mukuwelenga, mwaika sana amano ku miyele isuma ino Yeova wakwata. Mwauvwa ukuti wamutemwa sana lino mukuwelenga pa vintu vino akalanda alino na vino akacita. (Kufu. 34:6) Yamwi cingayatalila ukuzumila ukuti Leza wayatemwa pa mulandu wakuti pasi uwatala wayatemwapo. Ndi cakuti mukauvwa vivyo, cila wanda mwaezya ukutantika ivintu vimwi ivikalanga ukuti Yeova waya nu luse ni cikuuku kuli mwemwe. (Masa. 78:38, 39; Loma 8:32) Lino mukwelenganya pali vino vyamucitikila alino nu kwelenganya pali vino mukuwelenga muli Baibo, mulakwata ivintu ivingi ivyakulemba vino Yeova wamucitila. Ndi cakuti mukutaizya sana pali vino Yeova wamucitila, ucuza winu na aliwe ulakomelako.—Masa. 116:1, 2.

6. Ukulingana na amazwi aya pa Masamu 94:17-19, uzye amapepo ya kufuma pa nsi ya mwenzo yangamwazwa uli?

6 Mwapepa lyonsi. Mutale mwelenganye pa mwana mulumendo wino ya isi iyakumbatila. Umwana akauvwa ukuti watacingililwa nupya asitiina nu ukulanda na ya isi pa vili vyonsi, ivisuma ni viipe kwene ivyativimucitikila uwanda uwo. Namwe kwene mungaipakizya ucuza uliumwi kwene ndi cakuti mukupalama kuli Yeova cila wanda umwi pepo. (Welengini Masamu 94:17-19.) Lino mukupepa kuli Yeova, mwamunena vyonsi ivili ku mwenzo nu kunena Tata winu uwaya nu kutemwa vyonsi ivikulenga muye ni ntete nu kusakamikwa. (Ndosya 2:19) I vyani ivilacitika? Mulakwata cino Baibo ikaati: “Mutende uno kusi umuntu nanti wenga angaumanyikisya.” (Filipi 4:6, 7) Ndi cakuti mukupepa mu nzila ii, mulaaya mukupalama sana kuli Yeova.—Loma 8:38, 39.

Tukaya asipe ndi cakuti twataila sana Yeova nu Wene wakwe

Ya Stanley Jones yakomizye utailo wao pano yataile ukuti Uwene wakwe Leza uwa cumi cumi (Lolini palagilafu 7)

7. U mulandu ci uno tulinzile ukutailila ukuti amalayo yano Leza watulaya pa Wene wakwe yalafikiliziwa?

7 Mwakwata usininkizyo wakuti mapaalo yano Uwene Wakwe Leza watulaya yalafikiliziwa. (Mpe. 23:19) Ndi cakuti utailo wakuti malayo yakwe Leza yalafikiliziwa wacepa, cilangukila Satana na aomvi yakwe ukumutiinya. (Mapi. 24:10; Ayeb. 2:15) Uzye mungakomya uli utailo winu likwene mu malayo yano Uwene Wakwe Leza ulaleta? Mwakwata insita ya kuisambilizya pa malayo yano Leza watulaya pa wene wakwe alino ni milandu ino mungatailila ukuti yalafikiliziwa. Uzye ukucita vivyo kulamwazwa uli? Lolini ivyacitikile ya Stanley Jones anyefilwe mu cifungo pa myaka 7 pa mulandu nu utailo wao. *  I vyani ivyayavwile ukuzizimizya? Yalanzile iyati: “Utailo wane wakomiileko pano namanyile ivingi pa wene wakwe Leza na vino ulacita nupya ntatwisikanga na cii calenzile ukuti ntata ukuombela Yeova.” Ndi cakuti mwataila malayo yano Leza watulaya, mulapalama sana kuli Yeova nupya mutalaleka intete zimulesye ukumuombela.—Mapi. 3:25, 26.

8. Uzye ndi cakuti tukuzanwa lyonsi mu kulongana ala tukulangilila cani? Londololini.

8 Mwazanwa lyonsi mu kulongana. Ukulongana kukatwazwa ukupalama kuli Yeova. Ndi cakuti tukuzanwa mu kulongana ala tukulanga ukuti tulazizimizya lino insita ya kuzunyiwa ilafika. (Ayeb. 10:24, 25) U mulandu ci uno twalandila vivyo? Ndi cakuti utuntu sile utunono twatandika ukutulesya ukuzanwa mu kulongana, i vyani ivilacitika ku nkoleelo lino kulaya ukuika mu uzanzo pakuti sile tulongane pamwi na ina itu na ya nkazi? Umu nzila yuze, ndi cakuti tukulondesya ukuzanwa mu kulongana likwene, tutalaleka antu asipepa Yeova ukutulesya ukulongana pamwi na ina. Ikwene ali nsita ino tulinzile ukutemwa ukulongana. Ndi cakuti twatemwa ukulongana, kusi iciliconsi icilatulesya ukuvwila Leza nanti sile amu uteeko iikako isunde lya kutulesya ukulongana.—Mili. 5:29.

Ukusungila malembelo ni nyimbo zya Wene likwene kungamwazwa lino mwatandika ukuzunyiwa (Lolini palagilafu 9) *

9. U mulandu ci uno ukwiusyako amalembelo kwayela iinzila isuma iya kuipekanyizizyamo lino insita ya kuzunyiwa itali ifike?

9 Mwaiusya amalembelo yano mwasungila ku mutwe. (Mate. 13:52) Mutanga mwiusye vyonsi, nomba Yeova angaomvya umupasi wakwe uwa muzilo ukumwavwa ukwiusyako amalembelo yano mwawelengapo. (Yoa. 14:26) Uvwini vino umwina umwi walanzile wino isile wenga umu cifungo mu East Germany. Watiile: “Natemilwe sana ukuti pa nsita iya niusyanga malembelo aingi yano nasungiile! Pa manda yonsi yaaya yano ntakweti nanti acimwi nelenganyanga sana pa malyasi aingi alembwa muli Baibo.” Amalembelo yaaya yavwile umwina witu ukupalama sana kuli Yeova nu kutwalilila ukuzizimizya.

(Lolini palagilafu 10) *

10. U mulandu ci uno tulinzile ukulasungila inyimbo?

10 Mwasungila nu kwimba inyimbo izyakulumbanya Yeova. Lino Paulo na Sailasi yayanyefile mu cifungo mu Filipi, imbanga inyimbo zya wene zino iusyanga. (Mili. 16:25) Avino cali nu ku ina itu ku mpanga ino yamanga ukuti Soviet Union yano yasenzile mu uzya ku Siberia, uzye yacisile uli pakuti yakomeleke? Nkazi Mariya Fedun akaisya ukuti: “Twimbanga inyimbo zyonsi zino twamanyile, izyali mwi buku litu ilya nyimbo.” Walanzile  ukuti inyimbo zizyo zyayakomelezyanga yonsi nu kuyavwa ukuyuvwa ukuti iyapalama kuli Yeova. Uzye mukakomeleziwa ndi cakuti mukwimba inyimbo zya wene zino mwatemwa sana? Nga avino cili mutandike ukulazisungila likwene!—Lolini akambokosi akakuti “ Ngazwe Ukuya Umusipe.”

VINO MUNGACITA PAKUTI MUYE ASIPE SANA

11-12. (a) Ukulingana na amazwi aya pali 1 Samueli 17:37, 45-47, u mulandu ci uno Davidi wasipiile? (b) Isambililo ci ilicindame lino tukasambilila kuli Davidi?

11 Pakuti mutwalilile ukuzizimizya lino mukuzunyiwa mulinzile ukuya asipe. Mungacita uli ndi cakuti mukuyuvwa ukuti mwatimulizya imiyele iyo? Mwaiusya ukuti ukusipa kwa cumi kutasintilila pa ciimo ca muntu, amaka yano wakwata nanti ivintu vino angakwanisya ukucita. Mutale mwelenganye pali Davidi lino walolenkine na Golyati. Nga twalinganya Davidi ku cipombolo ciici, Davidi wali umunono sana, atakweti amaka, nupya ataakweti ni vyanzo vya mpomvu ivya kulwilako. Davidi atakweti nanti ulupanga. Nomba nanti ciye vivyo, wali umusipe sana. Davidi wasifile nu kusimula ukuya umu kulwa ni cipombolo ciici icali sana ni cilumba.

12 U mulandu ci uno Davidi wasipiile? Wataile ukuti Yeova wali nawe. (Welengini 1 Samueli 17:37, 45-47.) Davidi atisile amano ku kulola ukulu wakwe Golyati. Lelo, wisile amano kuli vino Golyati wali umunono sana ngu kumulinganya kuli Yeova. I vyani vino tukusambilila kwi lyasi lii? Tukaya asipe ndi cakuti twataila ukuti Yeova waya naswe nu kutaila ukuti yonsi akatuzunya anono sana ngu kuyalinganya kuli Leza wa Maka Yonsi. (2 Milandu 20:15; Masamu 16:8) Uzye tungacita uli pakuti tuye asipe sana likwene lino insita ya kuzunyiwa itali ifike?

13. Uzye tungacita uli pakuti tusipe sana? Londololini.

13 Tungaya asipe sana likwene ndi cakuti tukusimikila ilandwe lisuma ilya Wene Wakwe Leza kuli yauze. U mulandu ci? Pano nga tukusimikila tukasambilila ivya kutaila Yeova nu kucimvya intazi ya kutiina antu. (Mapi. 29:25) Wakwe viivi kwene vino imikole ikakoma sana ndi cakuti tukutukusya umwili, naswe tukasipa sana ndi cakuti tukusimikila ku ng’anda ni ng’anda, mu ncende umukazanwa antu aingi, konsi kuno tuli alino nu mu vifulo vya uculuzi. Ndi cakuti twasipa pa kusimikila likwene, tulaipekanya ukusimikila na lino amu uteeko yainda mulimo witu.—1 Tesa. 2:1, 2.

Ya Nancy Yuen yakanyile ukuta ukusimikila ilandwe lisuma (Lolini palagilafu 14)

14-15. I vyani vino tukusambilila kuli ya Nancy Yuen na ya Valentina Garnovskaya?

14 Tungasambilila ivingi kuli ya nkazi yaili  acisinka alangilile ukuti yaali asipe sana. Ya Nancy Yuen yali sile mamita 1.5 utali, nomba yatatiinanga. * Yakanyile ukuta ukusimikila ilandwe lisuma ilya Wene Wakwe Leza. Ni cacitike i cakuti yayanyefile mu cifungo pa myaka ukucila pali 20 ku China. Amu uteeko aayacuzyanga yalanzile iyati “wali ali muntu mupame sana ukucila antu yonsi” amu mpanga yao!

Ya Valentina Garnovskaya yataile ukuti Yeova wali nayo (Lolini palagilafu 15)

15 Avino cali na kuli ya Valentina Garnovskaya, yanyefilwe miku itatu mu cifungo mu mpanga ino yamanga mpiti ukuti Soviet Union pa myaka 21. * U mulandu ci? Yaipeelisye sana ukusimikila icakuti amu uteeko yayamanga ukuti “icipondo icipiisye.” I cani icalenzile ya nkazi yaa yaili aacisinka yasipe sana? Yataile ukuti Yeova wali nayo.

16. I vyani vino tukalondekwa pakuti tuye asipe sana?

16 Wakwe vino itulandapo mpiti, pakuti tusipe sana, tutalinzile ukutaila amaka itu na vino twamanya. Lelo, tulinzile ukutaila ukuti Yeova waya naswe nu kuti aliwe akatulwila. (Malan. 1:29, 30; Zaka. 4:6) Ukucita vivyo ukukalenga tuye asipe.

VINO MUNGACITA NDI CAKUTI ANTU YAMUPATA

17-18. Ukulingana na amazwi aya pali Yoane 15:18-21, u kucelula ci kuno Yesu watucelwile? Londololini.

17 Tukatemwa sana ndi cakuti yauze yakutucindika, nomba tutalinzile ukwelenganya ukuti ndi cakuti antu yatatucindike ala tutacindama. Yesu walanzile ukuti: ‘Aansansa amwemwe ndi antu yamupata, yamukana, yamutuka, yavwanga yati mwemwe yaipe pa mulandu wakulondela Mwana wa Muntu.’ (Luka 6:22) Uzye Yesu walozizye mwi?

18 Yesu atalandanga ukuti Aina Klistu yalinzile ukutemwa ndi cakuti antu yayapata. Lelo, watucelulanga pali vino vili nu kutucitikila. Tusi amuno nsi. Tukaomvya vino Yesu watusambilizye mu mikalile itu na lino tukusimikila ilandwe lisuma lino wasimikilanga. Ni cacitika i cakuti, amu nsi yatupata. (Welengini Yoane 15:18-21.) Tukalonda ukuzanzya Yeova. Tusiuvwa  uyi ndi cakuti antu yatupata pa mulandu wakuti twatemwa Tata witu.

19. Uzye tungakolanya uli atumwa?

19 Mutalinzile ukuleka iciliconsi cino antu yalanda nanti ukucita ukumulenga ukuvwa insonyi pa mulandu wa kuya Inte Yakwe Yeova. (Mika 4:5) Tungamanya ivya kucimvya intazi ya kutiina antu ndi cakuti twawelenga pali vino atumwa ali mu Yelusalemu yacisile lino Yesu wakomilwe. Yamanyile vino ntunguluzi zya mapepo izya Yayuda zyayapasile. (Mili. 5:17, 18, 27, 28) Lelo, cila wanda yatwalilile ukuya ku ng’anda ikulu yakwe Leza nu kuimanyisya apaswe ukuti asambi yakwe Yesu. (Mili. 5:42) Yataalesile ukuti intete ziyatoovole. Naswe kwene tungacimvya intazi ya kutiina antu ndi cakuti lyonsi tukuimanyisya ukuti sweswe ya Nte Yakwe Yeova ku ncito, ku sukulu, alino nu mu wikazi.—Mili. 4:29; Loma 1:16.

20. U mulandu ci uno atumwa yayeliile ni nsansa nanti i cakuti yayapasile?

20 U mulandu ci uno atumwa yayelile ni nsansa? Yamanyile umulandu uno antu yayapatiile nupya yalolanga ukuti isyuko sana ukuzunyiwa pa mulandu nu kucita vino Yeova akalonda. (Luka 6:23; Mili. 5:41) Pa cisila mutumwa Petulo walemvile ukuti: ‘Muli ni nsansa nanti mungacula pa mulandu wa kucita visuma!’ (1 Pet. 2:19-21; 3:14) Ndi cakuti twamanya ukuti antu yatupata pa mulandu wa kucita visuma, tutalaleka ukutiina antu kutulenge ukuta ukuombela Yeova.

VINTU VILAMUZIPILA NDI CAKUTI MWAIPEKANYIZIZYA LIMWI

21-22. (a) I vyani vino imupingulapo ukucita pakuti muipekanyizizye limwi lino insita ya kuzunyiwa itali ifike? (b) I vyani vino tulasambilila mu cipande icilondelilepo?

21 Tutamanya lino antu yalatandika ukutuzunya nanti lino amu uteeko yalainda mulimo witu. Nomba nalyo kwene, twamanya ukuti tungaipekanya likwene ndi cakuti twakomya ucuza witu na Yeova, ukuya asipe sana alino nu kumanyila limwi ivya kucita ndi cakuti antu yatupata. Kuipekanya ndakai kulatwazwa ukuya asipe uku nkoleelo.

22 Nomba tungacita uli ndi cakuti yatulesya ukupepa? Umu cipande icilondelilepo, tulalanda pa visinte vya muli Baibo ivilatwazwa ukutwalilila ukuombela Yeova lino yalatuinda.

ULWIMBO 118 “Tukuzizye Utailo”

^ pala. 5 Tusilonda ukupatwa. Nomba likwene sile nanti uku nkoleelo, swensi kwene tuli nu kuzunyiwa. Icipande cii cimatwazwa ukuya asipe nupya cimatwazwa ukuipekanyizizya ku kuzunyiwa.

^ pala. 7 Lolini Lupungu Lwa Mulinzi, lwakwe Dizemba 15, 1965, mafwa 756-767.

^ pala. 14 Lolini Lupungu Lwa Mulinzi, lwakwe Julai 15, 1979, mafwa 4-7. Mulole na vidyo yakuti Yeova Alalenga Izina Lyakwe Ukumanyikwa iyaya pa JW Broadcasting®. Lolini apakuti UKUUZYA YAMWI PA VYAYACITIKIILE.

^ pala. 15 Lolini Ibuku Lya pa Mwaka Lyakwe ya Nte Yakwe Yeova ilya mu 2008, mafwa 191-192.

^ pala. 67 ULONDOLOZI WA CIKOPE: Pa kupepa kwa lupwa, avyazi yakuomvya tupepala pa kwazwa ana yao ukwiusya malembelo.

^ pala. 70 ULONDOLOZI WA CIKOPE: Pa kuya mu kulongana, amu lupwa yakwimba inyimbo zya Wene muli motoka.