Skip to content

Muye pa utantiko wa vilimo

U Mulandu ci Uno Tulinzile Ukuyela ‘Apempule’?

U Mulandu ci Uno Tulinzile Ukuyela ‘Apempule’?

“Mutamanyile wanda uno Mwene winu aliza.”—MATE. 24:42.

INYIMBO: 136, 54

1. Langililini umulandu uno cacindamila ukumanya insita ino tufisilepo alino ni vikucitika. (Lolini cikope cakutandikilako.)

UKONGANO wa citungu wali apiipi nu kutandika. Ceyamani waile apa pulatifomu nu kuzengela yonsi ali umwi umba. Kwasile sile panono ukuti inyimbo zitandike ukulila. Ali umwi umba yamanyile ukuti kwasile sile panono ukuti ukongano utandike. Yalondesyanga ukukutika uku nyimbo, alino nu kuvwa amalyasi. Nomba limwi kwali yamwi atuvwile vino ceyamani walanzile. Fwandi yatiilwike ukuti ukongano wasya utandike, nupya yapitananga nu kulanzyanya ni vyuza. Camusango uu cikulangilila ivingacitika ndi cakuti tutilwike insita ino tufisilepo nanti ivikucitika kuno tuli. Lii i sambililo ilicindame sana kuli sweswe pano kuli nu kucitika icintu cimwi icitacitikapo, nupya tulinzile ukuipekanya uku cintu cico. Uzye i cintu ci cico?

2. U mulandu ci uno Yesu waneniile asambi yakwe ukuti yatwalilile ukuya “apempule”?

2 Lino Yesu walandanga pa “mpelelekezyo ya nsi” wanenyile asambi yakwe ukuti: “Cenjelini, pempulini, pano mutamanyile lino nsita ii iliza.” Pacisila cakulanda vivyo, nupya  kwene Yesu waswilizyepo ukuyanena imiku iingi ati: “Pempulini.” (Mate. 24:3; Welengeni Mako 13:32-37.) Ilyasi ilyaya muli Mateo ilyakolana na lii nalyo likalanga ukuti Yesu wacelwile alondezi yakwe ukutwalilila ukuya apempule lino walanzile ati: “Caleka pempulini, pano mutamanyile wanda uno mwene winu aliza. . . . Caleka namwe kwene mulinzile muiteyanye, pano Mwana wa Muntu aliza pa nsita ino mutenekile.” Nupya kwene wavwanzile ati: “Caleka pempulini pano mutamanyile uwanda nanti kasita.”—Mate. 24:42-44; 25:13.

3. U mulandu ci uno tukasumbila sana amano kuli vino Yesu watucelwile?

3 Swe ya Nte Yakwe Yeova tukasumba sana amano kuli vino Yesu watucelwile. Twamanya ukuti tukwikala umu “nsita ya mpela” nupya insita yaticepa ukuti “macuzi aipisye kuluta” yatandike! (Dan. 12:4; Mate. 24:21) Tukalola inkondo izipisye, ukuvula kwa vintu iviipe vino antu yakacita, imipepele nayo yavulungana, kwaya ukuulizya ivyakulya, indwala izikakoma antu aingi alino ni vulundumusi ivikacitika umu nsi yonsi. Twamanya ukuti antu yakwe Yeova yakaomba sana umulimo wa kusimikila umu nsi yonsi. (Mate. 24:7, 11, 12, 14; Luka 21:11) Tukalondesya ukulola vino ukwiza kwa Mwene kulalenga ukuti ivintu vituzipile alino nu kufikilizya ukulonda kwakwe Leza.—Mako 13:26, 27.

INSITA YATICEPA

4. (a) U mulandu ci uno tungazumilila ukuti lyene Yesu wamanya lino kulaya Alamagedoni? (b) Nanti icakuti tutamanya lino ucuzi ukulu cuze ulayako, i cani cino twasininkizya?

4 Twamanya ukuti iciputulwa iciliconsi ica pa ukongano wa citungu cakwata insita ino cikatandikilapo. Nomba nanti tungezya uli na maka, tutanga tumanye umwaka, uwanda nanti insita ino ucuzi ukulu cuze ulatandika. Lino Yesu wali pano nsi, walanzile ati: “Kusi nanti wenga wamanya kwiza kwa wanda ulya nanti kasita. Angeli ya mwiyulu nanti Mwana kwene yatamanya, suka sile Tata.” (Mate. 24:36) Nomba Yesu lyene pa waya ukwi yulu nupya wapeelwa amaka yakulwisya Satana na antu yakwe pano nsi. (Umbw. 19:11-16) Fwandi, cili sile ningo ukusondwelela ukuti Yesu wamanya lino kulaya Alamagedoni. Nomba swemo tutamanya. Tufwile sile ukutwalilila ukuya apempule ukufika lino kulaya ucuzi ukulu cuze. Yeova wene wamanya ningo sana insita ino alaletelapo icintu kwene cii. Wimika insita ino uwononesi ulizilapo. Akapenda insita ino ucuzi ukulu cuze ulinzile ukutandikilapo, nupya “wene ulafikiliziwa ukwaula kucelwa!” (Welengini Habakuku 2:1-3.) Uzye tungasininkizya uli ci?

5. Langililini vino Yeova lyonsi akafikilizya amausoowelo apa nsita ilinge.

5 Lyonsi Yeova akafikilizya amausoowelo apa nsita ilinge! Elenganyini pali vino walondiile sana insita lino wapuswisye aina Izlaeli ukufuma umu Eguputo. Ukulozya uku mwaka wa Nisani 14, 1513 B.C.E., Mose walanzile ukuti: “Pa wanda uno imyaka 430 yasizile, ukufuma lino aina Izlaeli ingile mu Eguputo, imitundu yonsi ya antu yakwe [Yeova] ifuma mu Eguputo, mu usiku wa wanda kwene ulya.” (Kufu. 12:40-42) “Imyaka 430” kwene iiya yatandike ukupendwa lino upangano wakwe Yeova kuli Abulaamu watandike ukuomba umu 1943 B.C.E. (Gala. 3:17, 18) Lino papisile insita, Yeova wanenyile Abulaamu ati: “Cumi manya vino amu mupanda wako yalaya alowezi mu mpanga yacilendo kuno yalaya yakaye azya nu kucula pa myaka imyanda ini (400).” (Utan. 15:13; Mili. 7:6) Myaka iiyo “imyanda ini (400)” iyakucula  yatandike umu 1913 B.C.E. lino Isumeli wasowike Isaki ala alino wasumuka sile. Nupya izile isila lino aina Izlaeli yafumile umu Eguputo umu 1513 B.C.E. (Utan. 21:8-10; Gala. 4:22-29) I cumicumi, Yeova wikiile calimwi insita ala kwasyala imyaka ingi ukuti ace atuule antu yakwe umu uzya!

6. U mulandu ci uno tungasininkizizya ukuti Yeova alapususya antu yakwe?

6 Yoswa uwali pali yaayo akulwilwe ukufuma uku Eguputo, wiwisye aina izlaeli ukuti: “Mwemo mwensi mumanyile umu myenzo inu yonsi ukuti kusi nanti cimwi cisuma cino [Yeova] Leza winu wamulaya icitafikiliziwa.” (Yoswa 23:2, 14) Tusitwisika ukuti Yeova alatupususya umu ucuzi ukulu cuze wakwe vino walaya. Nomba, ndi cakuti tukulonda ukwiza pusuka uwononesi, tulinzile ukutwalilila ukuya apempule.

TULINZILE UKUYA APEMPULE PAKUTI TUKAPUSUKE

7, 8. (a) Ku nsita ya mpiti i sunde ci lino mulinzi wali nu kulalondela, nupya uzye cii cikutusambilizya cani? (b) Langililini icingacitika ngi cakuti aalinzi yalala pa ncito?

7 Tungasambilila kuli vino vyacitike mpiti pa ucindami wa kuya apempule. Mpiti, imisumba ikalamba wa musumba wa Yelusalemu, yacingililwe na malinga ataali. Amalinga yacingililanga antu ya mu musumba uku yalwani angayazanza nupya kwayanga na patumpuke sana pano amu musumba imililanga ala yakulola impanga iyazinguluka. Cila wanda umusanya nu usiku, alinzi ikalanga apa mpongolo na pa malinga. Yacelulanga antu amu musumba ndi cakuti kwaya uzanzo. (Eza. 62:6) Alinzi kwene yaa yalondekwanga ukuya apempule pakuti yacingilile antu umu musumba.—Ezek. 33:6.

8 Uwasambilila sana pa malyasi ya mpiti Josephus walanzile ukuti, umu 70 C.E., ivita vya ina Loma yaposile ulupungu lwa Antonia ulwali apiipi ni linga lya musumba wa Yelusalemu, pano alinzi aali pa mpongolo yaizi! Ukufuma papo aina Loma ingile mu ng’nda ya kupepela nu kuyoca, uu uwali ali ucuzi ukulu cuze uno aikazi ya mu Yelusalemu alino na Ayuda yalolenkine nao.

9. I vyani vino antu ndakai yatamanya?

9 Mu mpanga izingi ndakai mwaya ya “kalinda” yapa mipaka nupya asambiliziwe ningo. Yakalola akuleta vimvulunganya mu ncende yao alino na alwani angingila mu mpanga nu kunona vintu. Lelo nanti ciye vivyo, aalinzi yaa yangalola sile yayo akaleta vimvulunganya akafuma ku uteeko uwapangwa sile na antu. Yatamanya ukuti kwaya nu uteeko wakwe Leza uwaya kwi yulu ukateekwa na klistu alino na vino ulacita pakupingula antu amu nko zyonsi. (Eza. 9:6, 7; 56:10; Dan. 2:44) Mu nzila yuze tungati, ukuya acenjele nupya apempule muli vyakwe Leza kungalenga tuye aipekanye lyonsi mpaka na lino wanda waupinguzi ulafika.—Masa. 130:6.

MUTAPUMVYANYIZIWA NI VYA MU NSI

10, 11. (a) I vyani vino tulinzile kucenjelako, nupya u mulandu ci? (b) I vyani vyalenga musininkizye ukuti Ciwa akavulunganya myelenganyizizye ya antu kuti yasule mausesemo aaya muli Baibo?

10 Elenganyini ukuti mulinzi walatenzi insita yonsi akulola. Lyene lili kwene lino kwasyala sile panono kuti ainuke, alino watonta nupya walala nukulala. Ali vino caya naswe, lino tukuya tukupalamila ku mpelelekezyo ya nsi ii alino uwavya uwakukanaya aapempule ukuya ukukomelako. Ala cikaipa ndi cakuti twafilwa kutwalilila kuya apempule! Lekini tulole vintu vitatu ivingalenga tufilwe kuya acenjele nupya apempule ngi cakuti tutacenjile.

 11 Ciwa akalenga antu ukuti yatatemwa vyakwe Leza. Lino kwasile sile panono kuti Yesu afwe, wacelwile alondezi yakwe pali wino wali akateeka wansi ii.” (Yoa. 12:31; 14:30; 16:11) Yesu wamanyile ukuti Ciwa angalenga antu kuya mu mfinzi pa kuti yatiluka mausesemo yano Leza wasowile pa vilacitika uku nkoleelo. (Zefa. 1:14) Satana wapafuzya amelenganyo ya antu ukuomvya mipepele ya ufi. I vyani vino mukaikako sana mano lino mukulanzyanya na yauze? Uzye Ciwa ‘aatalesyanya antu kuti yatalola luswepo’ pa mpelelekezyo ya vintu vya mu nsi iikwiza alino nu kumanya ukuti Klistu akuteeka mu Wene Wakwe Leza? (2 Kol. 4:3-6) Uzye mwatala muvwa kuno antu yakulanda yakuti: “Ntankulonda kuti munsimikile”? Mu ncende zingi, antu yakakana ndi cakuti tukulonda kuyanena pali vino vilacitika ku nkoleelo.

12. U mulandu ci uno tutalinzile ukuleka Ciwa atusombe?

12 Mutaleka vino antu yauze yakacita vyamutovoola nanti kumilesya kutwalilila kuya apempule. Mwamanya ivingi sana. Umutumwa Paulo walembiile aina Klistu yauze ati: ‘Mweisikulu mwamanya ningo ukuti uwanda wakwe Yeova uliza.’ Nupya walanzile ati: “Ulaya kwati kwiza kwa mwivi usiku.” (Welengini 1 Tesalonika 5:1-6.) Yesu watucelwile ukuti: “Mulinzile kuiteyanya, pano Mwana wa Muntu aliza pa nsita ino mutenekile.” (Luka 12:39, 40) Likwene sile Satana wasya asombe antu aingi cuze ukuzumila ukuti vyonsi vili ‘ningo nupya kuli mutende.’ Alayasomba pakuti yatandike ukwelenganya ukuti vyonsi vili ningo umu nsi. Nga swemo, uzye tulasombwa? Swemo ‘wanda uwo utalinzile kutupumikizya wa mwivi,’ ndi cakuti twatwalilila “kulola nu kupempula.” Acino fwandi lyonsi tulinzile ukuwelenga Izwi Lyakwe Leza nu kwelenganya sana pali vino Yeova akutunena.

13. Uzye ivikacitika umu nsi vikalenga antu yaye uli, nupya tungacita uli pakuti naswe tutaya vivyokwene?

13 Ivikacitika umu nsi vikavulunganya imyelenganyizizye ya antu. Antu aingi yasumba sana amano uku vintu vya cila wanda icakuti yatasumba na mano kuli vyakwe Leza. (Mate. 5:3) Yakalondesya ivyuma vya mu nsi ivikalenga antu yatemwe ivilondwa viipe vino imili ikalonda  ni vintu vya lunkumbwa lwa manso.” (1 Yoa. 2:16) Nupya, ya kacita ya vyangalo amu nsi ii yalenga ukuti antu yatemwe sana “vyakuizanzya,” nupya cila mwaka kukaya ivyangalo navyuze ivingi. (2 Tim. 3:4) Ali cino Paulo waneniile Aina Klistu ukuti yalinzile ukuta ‘kusakamala musango wa untunze nu kuzanzya vilondwa vyauko,’ pano cingalenga kuti yate ukwika mano kuli vyakwe Leza.—Loma 13:11-14.

14. Uzye u kucelula kwamusango ci ukwaya pali Luka 21:34, 35?

14 Swemo tusilonda ukuya wa antu amu nsi, tukalonda kuti twatungululwa nu mupasi wakwe Leza uno Yeova akaomvya ukutwazwa ukumanya ningo ivilacitika uku nkoleelo.  [1] (1 Kol. 2:12) Lelo, twamanya ukuti cangupala sana ukutandika ukusuula vyakwe Leza nupya vikwene avino cikaya ndi cakuti twasumba sana amano uku vintu vya mu nsi ukuluta ukusumba amano kuli ukapepa. (Welengini Luka 21:34, 35.) Antu yamwi yangaatuseka pa mulandu wa kutwalilila ukuya apempule, nomba cico citalinzile ukutulenga ukuitazyela. (2 Pet. 3:3-7) Lelo, tulinzile ukuzanwa lyonsi uku kulongana capamwi na Ina Klistu yanji, pano ali kuno kukazanwa umupasi wakwe Leza.

Uzye mukaezya na maka ukuti mutwalilile ukuya apempule? (Lolini mapalagalafu 11-16)

15. I cani icacitikile Petulo, Yakobo, na Yoane, nupya icamusango uu cingacitika uli kuli sweswe?

15 Ukukanaya amalilike kukalenga tutaya apempule. Yesu wamanyile ukuti antu atamalilika yakalondesya ivyakuizanzya. Elenganyini pali vino vyacitike lino Yesu wali apiipi nu kukomwa. Pakuti atwalilile ukuya uwakaele, walondekwanga ukulenga kuli Isi ukuti amupeele amaka. Yesu wanenyile Petulo, Yakobo, na Yoane ukutwalilila ukuya “apempule” lino wapepanga. Nomba, yatamanyile ukuti kwali nu kucitika icintu cimwi icitale sana. Yatatwalilile ukulola, lelo yatontiile imili yao iya munyefu nupya yaile yalala iyakasula nu kukasula. Lelo Yesu wene, nanti icakuti watonsile, watwalilile ukulola ala akupepa kuli Isi. Vikwene avino na asambi yakwe yalondekwanga ukucita.—Mako 14:32-41.

16. Ukulingana ni lembelo lyakwe Luka 21:36, uzye Yesu watusunzile uli vya kuya “apempule”?

16 Pakuti tutwalilile ukuya “apempule” muli ukapepa, tulinzile ukuombesya. Lino kwasile panono ukuti ivyacitike umu calo ca Getesemani vicitike, Yesu wanenyile asambi kwene yaa ukuti yalinzile ukupepa kuli Yeova nu kupapata. (Welengini Luka 21:36) Fwandi pakuti tutwalilile ukuya apempule muli ukapepa, naswe tulinzile ukutwalilila ukulola nu kupepa lyonsi.—1 Pet. 4:7.

MWAYA APEMPULE LYONSI

17. Uzye tungasininkizya uli ukuti twatituipekanya kuli vino vyasya vicitike uku nkoleelo?

17 Vino Yesu walanzile ukuti impelelekezyo iliza “pa nsita ino mutenekile,” fwandi ii isi insita ya kuta ukupepa Leza, nupya isi insita yakulondesya ivya mu nsi vino Satana akaomvya pa kusomba antu ni vintu vino imili itu ikalondesya. (Mate. 24:44) Muli Baibo, Leza na Klistu yatunena vintu vino yasya yatucitile alino na vino tungacita pa kuti tutwalilile ukuya apempule. Tulinzile ukusumba sana amano kuli ukapepa witu, kuli ucuza witu na Yeova, nu kusumba sana mano kuli vino vyacindama sana ivya Wene. Tulinzile ukumanya insita ino tufisilepo ni vikucitika pakuti tuye apempule uku vintu iviliza. (Umbw. 22:20) Umi witu uli pa uzanzo!

^ [1] (palagalafu 14) Lolini cipande 21 umwi buku lya Ciyemba ilyakuti Ubufumu bwa kwa Lesa Bwalitendeka Ukuteeka!