Skip to content

Muye pa utantiko wa vilimo

 CIPANDE CA KUSAMBILILAMO 2

Mungaya ya Kakomelezya Yasuma

Mungaya ya Kakomelezya Yasuma

“Yakwene sile ali ya kaomba yanji umu mulimo wa Wene Wakwe Leza nupya ali yano yakankomelezya.”—KOLO. 4:11, NWT.

LWIMBO NA. 90 Mwakomelezyanya

VINO TUMASAMBILILAPO *

1. I ntazi ci izipisye zino aomvi yakwe Yeova yakakwata?

UMU nsi yonsi, aomvi yakwe Yeova aingi yakakwata intazi izingi izikalenga yauvwa sana ulanda. Uzye mwalolapo ivya musango uwo mu cilongano cinu? Aina Klistu yamwi yalwala ulwale uwipisye nanti kuzizimizya imfwa ya atemwikwa yao. Yauze nayo yakaya sana nu ulanda nga yalola lupwa wao umwi nanti cuza wata ukuombela Yeova. Lyene yamwi nayo yakucuula pa mulandu na mazanzo akaiponela. Aina yonsi yayo na ya nkazi yakalondekwa ukukomeleziwa. Uzye tungayazwa uli?

2. U mulandu ci uno mutumwa Paulo walondekwanga ukukomeleziwa insita zimwi?

2 Mutumwa Paulo wayanga sana mu uzanzo insita izingi. (2 Kol. 11:23-28) Nupya wazizimizyanga “munga mu mwili,” limwi tungati walwile ulwale umwi. (2 Kol. 12:7) Nupya uvwile sana uyi lino Demasi wino yaombelanga pamwi nawe wamusiile pa mulandu wakuti wizile ‘atemwa ivya mu nsi.’ (2 Tim. 4:10) Paulo wali umwina Klistu musipe nupya mupakwe uwaitemelwanga ukwazwa antu yauze, nomba nawe kwene insita zimwi watovookanga.—Loma 9:1, 2.

3. Aaweni akomelizye nu kutungilila umutumwa Paulo?

3 Paulo wakomeleziwe nu kutungililwa ukulingana na vino walondekwanga. U mu nzila ci? Yeova waomvizye umupasi wa muzilo ukukumukomya. (2 Kol. 4:7; Filipi 4:13) Nupya Yeova waomvyanga Aina Klistu yauze uku kumukomelezya. Paulo walanzilepo pali yakaomba yauze yamwi ukuti ‘yamukomelezyanga.’ (Kolo. 4:11) Pali yano walumbwile pali na Alisitako, Tikikasi na Mako. Yakomelizye sana Paulo nu kumwazwa ukuzizimizya. I miyele ci iyalenzile Aina Klistu yaa yatatu ukuya ya kakomelezya yasuma? Tungakolanya uli aina yaa lino tukulonda ukukomelezya yauze?

 MWAYA ACISINKA WAKWE ALISITAKO

Wakwe Alisitako, tungaya acisinka nga twatwalilila ukuya ya cuza ku ina na ya nkazi mu nsita zya ntazi (Lolini mapalaglafu 4-5) *

4. Uzye Alisitako walangilile uli ukuti wali a cuza wa cisinka kuli Paulo?

4 Alisitako wali umwina Klistu uwa ku Tesalonika, umwina Makedoniya nupya wali a cuza musuma wakwe Paulo. Umuku wa kutandikilapo uno tukawelenga pali Alisitako muli Baibo u mwilyasi lino Paulo walemvile lino watandalile aina Efeso pa lwendo lwakwe citatu ulwa umisyonali. Lino yaombelanga pamwi na Paulo, Alisitako yamulemile ku kaliumba ka antu aipe. (Mili. 19:29) Lino yamufumizye atapisile pakuti aicingilile, lelo watwalilile ukuya uwa cisinka nu kwikala nu mutumwa Paulo. Lino papisile imyezi ala yali umu Gilisi, Alisitako watwalilile ukutungilila Paulo asi mulandu na vino alwani yalondanga kukoma Paulo. (Mili. 20:2-4) Mu 58 C.E. lino Paulo yamutumile ku Loma ale u mufungwa, Alisitako wamusukilile pa lwendo luu ulutali, nupya yonsi yoili yazizimizye lino uwato waunzilwe. (Mili. 27:1, 2, 41) Cikaloleka kwati lino yafisile mu Loma, wikazileko panono na Paulo mu cifungo. (Kolo. 4:10) Fwandi ali mulandu uno Paulo wakomeleziwe sana nu kuteekeziwa na cuza wa musango uu uwali sana na ucisinka!

5. Ukulingana ni lembelo lya Mapinda 17:17, tungaya uli ya cuza acisinka?

5 Wakwe Alisitako, naswe kwene tungaya ya cuza ya cisinka ku Ina na ya nkazi lyonsi lino yasi ni ntazi na lino yali ni ntazi. (Welengini Mapinda 17:17.) Umwina nanti nkazi angalondekwa ukukomeleziwa nanti icakuti ipapita sana insita ukufuma pano intazi iyo yasiilile. Frances, * wino yaisi yafwile pa mulandu na kansa na ya nyina nayo iiza iyafwa lino papita sile imyezi itatu watiile: “Intazi izitale sana zikalenga twauvwa uyi pa nsita iitali. Nupya nkataizya sana ya cuza yane acisinka akaiusya ukuti ncili nkauvwa uyi nanti icakuti ipapita sana insita ukufuma pano avyazi yane yafwilile.

6. Uzye ukuya acisinka kulalenga tucite cani?

6 Ya cuza acisinka yakaitemelwa ukwazwa aina yao na ya nkazi. Umwina uwi zina lyakuti Peter walwile ulwale uwipisye uwali  nu kumukoma. Mamakwe, Kathryn watiile: “Atwalane yamwi umu cilongano citu yatutwazile kuli dokota kuno twaile tumanya vino ya Peter yalwile, na vino ulwale uwo wali. Pa nsita kwene iya yapingwilepo ukuti yalatwazwa ukuzizimizya intazi ii nupya ukufuma lilyo kwene yakatwazwa muli vyonsi vino tukulondekwa.” Kukaya ukukomeleziwa sana ukukwata ya cuza ya musango uwo, angatwazwa ukuzizimizya intazi zino tukweti.

MWAYA AKUTAILWA WAKWE TIKIKASI

Wakwe Tikikasi, tungaya ya cuza atailwe lino yauze yali ni ntazi (Lolini mapalaglafu 7-9) *

7-8. Ukulingana ni lembelo lyakwe Kolose 4:7-9, uzye Tikikasi wacisile uli pa kulanga ukuti wali acuza wa kutailwa?

7 Tikikasi, U mwina Klistu wa ku Loma umusumba wa mu Asia, wali a kaomba muze na Paulo nupya umutailwe. (Mili. 20:4) Muli ya 55 C.E., Paulo wapokanga impiya zya kwazwilizya Aina Klistu aku Yudeya, nupya afwile wanenyile Tikikasi ukumwazwa ukuomba umulimo uu ucindame. (2 Kol. 8:18-20) Lino papisile insita ala Paulo ali umu cifungo umu Loma pa muku wa kutandikilako, Tikikasi ali wino wali inkombe yakwe. Watwalanga makalata yakwe Paulo na mazwi akukomelezya uku vilongano vya ku Asia.—Kolo. 4:7-9.

8 Tikikasi watwalilile ukuya a cuza wa kutailwa kuli Paulo. (Tito 3:12) Asi Aina Klistu yonsi aaliko apa nsita iya aali atailwe wakwe Tikikasi. Muli ya 65 C.E., lino Paulo wanyefilwe lyakwe ciili, walemvile ukuti Aina Klistu aingi umu citungu ca Asia yatalondanga ukuya pamwi nawe, limwi yatiinanga ya kakanya. (2 Tim. 1:15) Nomba Tikikasi wene watwalilile ukutungilila Paulo na cico calenzile Paulo amutaile sana nu kumupeela imilimo na yuze. (2 Tim. 4:12) Paulo watemilwe sana ukukwata cuza umusuma wakwe Tikikasi.

9. Uzye tungakolanya uli Tikikasi?

9 Tungakolanya Tikikasi nga tuli ya cuza akutailwa. Tutalinzile sile ukulaya aina itu na ya nkazi aakulondekwa uwazwilizyo ukuti tulayazwa, lelo tulinzile nu kucitapo vimwi ivingayazwa. (Mate. 5:37; Luka 16:10) Lino yayo akulondeka uwazwilizyo yamanya ukuti tulayazwa, yakatekeziwa sana. Nkazi umwi walondolwile mulandu uno twalandila vivyo. Watiile: “Kukaya ukuteeka sana umwenzo  pano ala watumanya ukuti umuntu wino wakulavile ukukwazwa, alakwazwa pa nsita ino walavile.”

10. Ukulingana na vino lembelo lya Mapinda 18:24 likalanda, a kuli weni kuno yonsi ali ni ntazi nanti aali nu ulanda yakazana ukukomeleziwa?

10 Yonsi akuzizimizya intazi ilingi yakakomeleziwa sana ndi cakuti iyakwata cuza umutailwe. (Welengini Mapinda 18:24.) Pa cisila lino umwana umulumbendo wakwe ya Bijay wazinzilwe yuvwile sana uyi, yalanzile ukuti: “Nalondanga ukunenako umwi vino nayuvwanga, umuntu wino ningataila.” Ya Carlos yayaposile imilimo ino yaombanga umu cilongano pano yaluvyanyizye vimwi. Yatiile: “Nalondanga ukulondolwelako umwi vino nayuvwanga ukwaula ukuvwa intete ukuti amaelenganya vyuze pali nene.” Ya Carlos yazanyile ukuti yano yangalondolwela vino yayuvwanga a eluda, nupya yayazwilizye ukumala intazi ino yakweti. Nupya yakomeleziwe sana pa mulandu wakuti yamanyile ukuti ya eluda yali acisinka pano yatange yanene ali wensi vino yayanenyile.

11. Tungacita uli pakuti tuye ya cuza atailwe?

11 Pakuti yauze yatutaile, tulinzile ukuteeka umwenzo. Lino ya Zhanna ya iya yayasiile, yakomeleziwe sana lino yanenyileko ya cuza vino yayuvwanga. Yatiile: “Yateesile sana umwenzo ala yakuvwa kuli vino nkuyalondolwela nanti icakuti naswilizyangapo sile ukulanda ivintu ivili vimwi kwene.” Namwe kwene mungaya ya cuza asuma ndi cakuti mwaya ya kuvwa yasuma.

MWAITEMELWA UKUOMBELA YAUZE WAKWE MAKO

Cikuuku cino Mako wakweti cavwilizye mutumwa Paulo kuzizimizya intazi, naswe kwene tungazwa aina itu ndi yaponelwa ni ntazi (Lolini mapalaglafu 12-14) *

12. Mako wali a weni, nupya walangilile uli ukuti waitemelwanga ukuombela yauze?

12 Mako wali Umwina Klistu Umuyuda uwa ku Yelusalemu. Banaba umuvyala wakwe mako wamanyikwe sana pa mulandu nu mulimo uno waombanga uwa umisyonali. (Kolo. 4:10) Ya lupwa yakwe Mako yakaloleka ukuti yakweti sana icuma, nomba impiya ni vikwatwa vitacindime sana kuli Mako. Umu umi wakwe onsi, Mako walangilile ukuti waitemelwanga ukuombela antu yauze. Pa nsita izipusanepusane waombelanga pamwi nu mutumwa Paulo nu mutumwa Petulo lino yaombanga imilimo ino yapeezilwe, nupya Mako afwile ali wino wakalanga nu kupekanya ivyakulya, ukwa kulala ni vintu vyuze ivili wakwe vii. (Mili. 13:2-5; 1 Petulo 5:13) Paulo walondolwile Mako ukuti wali pali “ya kaomba [yauze] umu mulimo wa Wene Wakwe Leza” nupya wali a kakomelezya wakwe.—Kolo. 4:10, 11, NWT.

13. Uzye amazwi aya pali 2 Timoti 4:11 yakalanga uli ukuti Paulo wataizyanga Mako pali vino wali ni cisinka?

13 Mako wizile aya a cuza musuma sana wakwe Paulo. Lino Paulo wali mu cifungo umuku wa kusyalikizyako umu Loma muli ya 65 C.E., walemvile kalata wakwe ciili kuli Timoti. Muli kalata wiya, Paulo wanenyile Timoti ukuti akaye uku Loma pamwi na Mako. (2 Timoti 4:11) Ukwaula nu kutwisika Paulo wataizyanga sana pali vino Mako waomvile, ali mulandu uno walondesyanga sana kumulola pa nsita iya iyali itale wakwe cimwi. Mako wazwilizyanga Paulo muli vino walondekwanga, wakwe ivyakulya alino na vyuze ivyali nu kumwazwa pa kulemba makalata. Ukwazwiwa nu kukomeleziwa kuno Paulo wapokelile kwamwazwile sana kuzizimizya kufika na lino wizile afwa.

14-15. Uzye amazwi aya pali Mateo 7:12 yakatwazwa uli ukumanya vino tungazwa yauze?

14 Welengini Mateo 7:12. Lino tukweti intazi, tukataizya sana yayo aakatwazwa nu kutusakamala muli vino tukulondekwa! Ya Ryan yano yaisi yafwile ukwaula ukwenekela yalanzile ukuti: “Kwaya ivintu ivingi vino  tukacita cila wanda vino tukalola ukuti tutanga tukwanisye ukuomba ndi cakuti tukucuula. Nomba cikakomelezya sana nga umwi watucitila icintu cimwi nanti icakuti asi cikulu sana.”

15 Ndi cakuti tukwikako sana amano nu kulola ivikucitika, cingatwazwa ukucita vimwi ivingazwa yauze. Nkazi pa yatwalane yano itulandapo mpiti wapingwilepo ukwazwa ya Peter na ya Kathryn, yano itulandapo ukuya konsi kuno yalondekwanga ukuya mu kulwaziwa. Yonsi yoili, ya Peter na ya Kathryn yataakweti amaka ya kupisya motoka, fwandi nkazii wapanzile utantiko uwalenzile yauze mu cilongano cao ukuipeelesya ukuyapekanyizizya imipitile. Uzye utantiko uu waomvile? Ya Kathryn yatiile, “Tuvwile kwati yatwisizya icisendo cino twanyemwile.” Lyonsi mwaiusya ukuti mungakomelezya sana yauze nga mwacita kantu kamwi kanono sile pakuti muyazwe.

16. I vyani vino tungasambilila kuli Mako pa kukomelezya yauze?

16 Mako umusambi uwaliko mu nsita yako Yesu, wali u Mwina Klistu mupamviwe. Wakweti milimo ingi icindame sana iya kuomba mu mulimo wakwe Yeova, pa milimo iyo pali nu kulemba ibuku lilandwe ilikaamilwa ukwi zina lyakwe kwene. Nomba nanti ciye vivyo, Mako waomvizye insita yakwe ku kukomelezya Paulo, nupya Paulo walenganga uwazwilizyo kuli Mako ukwaula intete. Angela wino nyinakulu wakomilwe ku vipondo, wataizye sana pa kuipeelesya kwakwe yonsi amukomelizye. Watiile: “Ndi cakuti ya cuza yakulonda kukwazwa kufuma pansi ya mwenzo cikaanguka ukulanda nayo. Cikaloleka ukuti yakalonda ukungazwa ukwaula ukuvwa intete.” Tungayuzya sweineco tuti, ‘uzye namanyikwa ukuti nkaitemelwa kukomelezya ya kapepa yanji mu vintu vino nkacita?’

MWALONDESYA UKUKOMELEZYA YAUZE

17. Uzye ukwelenganya pa mazwi aya pa 2 Kolinto 1:3, 4, kungatulenga uli ukukomelezwa yauze.

17 Cangupala sana kuzana aina na ya nkazi akulondekwa ukukomeleziwa. Tungaomvya amazwi ali yamwi yano yauze yaomvizye  pa kutukomelezya. Nino wino nyinakulu wafwile walanzile ukuti: “Yeova angatuomvya ukukomelezya yauze ndi cakuti tukuipeelesya kuomviwa.” (Welengini 2 Kolinto 1:3, 4.) Frances wino itulandapo mpiti watile: pali 2 Kolinto 1:4 paya icumi. Naswe tungateekezya yauze pa mulandu wakuti naswe twateekeziwa.”

18. U mulandu ci uno yamwi yakatiina ukukomelezya yauze (b) Uzye tungakomelezya uli yauze? Langililini

18 Tulinzile ukulondelezya inzila zya kwazwilamo nanti i cakuti tukuvwa intete. Limwi tungatina pa mulandu wakuti tutamanyile ivya kulanda apa kukomelezya umuntu ali ni ntanzi. Ya Paul ya eluda yakaiusya vino aina yamwi yaya komelizye lino ya isi yafwile, Yatile: “Naweni ukuti citali icanguke uku ina ukwiza landa nani. Aina yatakweti ivyakulanda ivingi. Nomba nayataizye pali vino yaipelisye ukunkomelezya nu kungazwa.” Vikwene ivya citikile mwina wi zina lyakuti Tajon pa nsita ino kwali icilundumusi watile: “Ukulanda sile icisinka nsi iusya amazwi ali umu makalata yano ina yalemvile. Nomba nkaiusya sile ukuti izile mu kumpempula nu kunkomelezya.” Tungakomelezya yauze ndi cakuti tukuyalanga ukuti twayasakamala.

19. U mulandu ci uno mukulondesya sana ukuya ya kakomelezya yasuma?

19 Lino tukupalamila ku mpela ya nsi ii ipe, ivintu umu nsi vyakulaya vikwipilako sile. (2 Timoti 3:13) Nupya tulatwalilila ukulonda ukukomeleziwa pa mulandu ni ntazi zino tukakwata pa mulandu wa kuti tutamalilika. Umutumwa Paulo watwalilile kuzizimizya lino waombelanga Yeova umi wakwe onsi, nupya wataizye pa kukomelezya kuno Aina Klistu yauze yamukomelezyanga. Lekini twaya acisinka wakwe Alisitako, akutailwa wakwe Tikikasi nupya aitemelwa ukwazwa yauze wakwe Mako. Nga tukucita vivyo, tulaazwa aina itu na ya nkazi kutwalilila ukuya azyanzye mu utailo.—1 Tesalonika 3:2, 3.

^ pala. 5 Mutumwa Paulo wakwatanga intazi izingi mu umi wakwe. Insita izingi lino wakwatanga sana intazi, aina yakwe yamwi yamukomelezyanga sana. Tumalanda pa miyele itatu iyalenzile aina yaa ukuya ya kakomelezya yasuma. Lyene tumalanda na pali vino tungayakolanya muli vyonsi vino tukucita lino yauze yakulondekwa kukomeleziwa.

^ pala. 5 Amazina yamwi atiyalumbulwa mu cipande cii asi mazina yao.

LWIMBO NA. 111 Ivikalenga Twaya ni Nsansa

^ pala. 56 ULONDOLOZI WA CIKOPE: Alisitako na Paulo yazizimizye lino uwato waunzile.

^ pala. 58 ULONDOLOZI WA CIKOPE: Tikikasi wapeezilwe mulimo wa kutwala makalata yakwe Paulo ku vilongano.

^ pala. 60 ULONDOLOZI WA CIKOPE: Mako wazwilizyanga Paulo muli vino walondekwanga.