Kulingana na masunde yano Leza wapeezile aina Izlaeli, Yeova wapokelelanga ivipeele ni nkunda vino aina Izlaeli yapeelanga wa malambo kuli aliwe. Nupya lyonsi lino yalanda pa cipeele yalandanga na pa nkunda, alino umuntu wali nu kusoololapo cino angapeela wi lambo pali vyoili. (Levi 1:14; 12:8; 14:30) U mulandu ci uno mapekanyo yaa yazipiile uku ina Izlaeli? Mulandu onga uwakuti asi lyonsi lino antu yakwatanga ivipeele. U mulandu ci?

Ivipeele vikalanga umu mpanga iya Izlaeli lyonsi lino kwayanga ukukaye. Lyene umu Okotoba, vyakuukilanga uku mpanga izyayelile uku kaeya ukwayanga ukukaye nupya vyaswililanga uku Izlaeli nga kwatandika ukukaya. (Lwimbo 2:11, 12; Yele. 8:7) Fwandi umu nsita ino ivipeele vyafumanga umu Izlaeli, cali nu kulayatalila ukupeela ivipeele wa malambo.

Lelo inkunda zyene, zyayanga umu mpanga iya Izlaeli imyezi yonsi. Ni cacindamisya icakuti, aina Izlaeli yateekanga inkunda. (Loliniko na Yoani 2:14, 16) Ibuku limwi ilyakuti Bible Plants and Animals lyalondolola ukuti, “umu mizi yonsi nu mu matauni ya mu Palestine yakateeka inkunda. Nupya yonsi yakakuula umwa kwikala inkunda nanti ukupanga icipongo mu ciumba muno ivyunyi vingikala.”—Loliniko na Ezaya 60:8.

Fwandi, Yeova walangilile ukuti watemilwe aina Izlaeli nupya wayalangulukilangako kupitila umu kuyazumilizya ukumupeela ivyunyi vino yakweti pa nsita kwene iyo wa malambo.