Skip to content

Muye pa utantiko wa vilimo

Uluzango—I Miyele Ikafuma Kuli Leza

Uluzango—I Miyele Ikafuma Kuli Leza

ANTU yakalonda ukuya nu luzango umu umi. Nomba umu manda yaa akusyalikizya, antu yonsi yakakwata mezyo atale pa mulandu nu “tusita tutale.” (2 Tim. 3:1) Ulufyengo, ukulwalilila, ukuulizya incito, ukufwilwa, nanti vyuze sile ivikalenga antu ukusakamikwa nu ulanda mukuya kwa nsita vikalenga umuntu ukuta ukuya nu luzango. Na aomvi yakwe Leza kwene yangatoovoka nu kuta ukuya nu luzango. Uzye ndi cakuti ivya musango uu vyamucitikila, mungacita uli pakuti muye nu luzango nupya?

Pakuti twasuke icuzyo cii, tulinzile ukutandikilapo ukumanya vino uluzango lwa cumi lwaya na vino yauze yacita pakuti yatwalilile ukuya nu luzango asi mulandu na mezyo. Lyene tumasambilila pali vino tungacita pakuti tutwalilile ukuya sana nu luzango nu kulundapo.

UZYE ULUZANGO I CANI?

Tutalinzile ukulola kwati ndi cakuti umuntu watasansamuka nanti akucita imyawe ala ali nu luzango. Katulangilile: Pacisila ca kumwa sana uwengwa, cakolwa angatandika ukusekoka. Nomba lino uwengwa wakololoka, angata ukuseka, nupya angatandika ukuloleka sana nu ulanda alino ni ntazi nyanya. Fwandi ukusansamuka kwa pa kasita kwakwe cakolwa wiyo asi u luzango lwa cumi cumi.—Mapi. 14:13.

Ukupusanako ni nsansa zya pa kasita, uluzango i miyele ya mu mwenzo. Lwalondololwa ukuti: “U kuyuvwa ningo sana pa mulandu wakukwata nanti ukwenekela vimwi ivisuma.” Umuntu ali nu luzango akaya ni nsansa lyonsi na lino ivintu ivitala sana. (1 Tesa. 1:6) Insita zimwi umuntu angaponelwa ni intazi nomba angatwalilila ukuya nu luzango umu mwenzo. Wakwe vino cali uku yatumwa, yayanyamvile pa mulandu wa kusimikila antu pali Klistu. Lelo, ‘atumwa yafumile mwi Tengo, yazanzile cuze, pano Leza wayapeenzile kuya alinge kusulwa pa mulandu wi zina lyakwe Yesu.’ (Mili. 5:41) Kwene yatazanganga pa mulandu wa kuyanyamba. Nomba vino yaali aomvi yakwe Leza, yali nu luzango pa mulandu wa kuya akaele kuli Leza.

Tusivyalwa nu luzango, nupya lutanga luizile sile. U mulandu ci? Pano uluzango lwa cumi lwaya pa miyele ino umupasi wakwe Leza ukalenga tuye nayo. Ndi cakuti umupasi wakwe Leza watwazwa, tungazwala “untu upya” uwayamo nu luzango. (Efes. 4:24; Gala. 5:22) Nupya ndi twakwata uluzango, cikatwazwa ukuzizimizya intazi zino tukakwata umu umi.

YANO TUNGAKOLANYA

Yeova walondanga ukuti ivintu pano nsi viye ningo, atalondanga kuye ivintu iviipe vino tukalola ilingi ndakai. Lelo, iviipe vino antu yakacita visilenga Yeova ate ukuya nu Luzango. Izwi Lyakwe Leza likati: “Amaka nu luzango vili mu wikalo wakwe.” (1 Mila. 16:27) Nupya, ivintu ivisuma vino atu yakwe yakacita vikazanzya “umwenzo” wakwe.—Mapi. 27:11.

Tungakolanya Yeova ndi tusikusakamikwa sana lino ivintu vitacitike wakwe vino twenekelanga. Cingazipa twasumba mano pa vintu ivisuma vino twakwata ndakai nu kuteeka umwenzo lino tukuloleela ivintu ivisuma ivilacitika  uku nkoleelo ukucila ukukanaya nu luzango pa mulandu ni vikutucitikila ndakai. *

Tungawelenga pa yantu yano tungakolanya aalembwa muli Baibo, aatwalilile ukuya nu luzango lino yeziwanga. Abulaamu wazizimizye uzanzo ni vintu vyuze ivitale vino antu yauze yacitanga. (Utan. 12:10-20; 14:8-16; 16:4, 5; 20:1-18; 21:8, 9) Asi mulandu ni ntazi, Abulaamu watwaliliile ukuya nu luzango umu mwenzo wakwe. Uzye wakwanisye uli ukucita vivyo? Wakweti sana upaalilo wakuti alikala umu nsi ipya lino Mesiya alaateeka. (Utan. 22:15-18; Ayeb. 11:10) Yesu walanzile ukuti: “So Abulaamu wali nu luzango pa kulola kwiza kwa wanda wane.” (Yoa. 8:56) Tungakolanya Abulaamu lino tukwelenganya pa luzango ulwaya uku nkoleelo itu.—Loma 8:21.

Wakwe Abulaamu, umutumwa Paulo na Sailasi nayo yatwalilile ukulolela pa malayo yakwe Leza. Yakweti utailo ukome, nupya yatwalilile ukuya nu luzango nanti icakuti yakwatanga intazi. Pacisila ca kuyuma sana ivikoti nu kuyasumbila mu cifungo, “usiku pakasi, Paulo na Sailasi yapepanga nu kwimba inyimbo kuli Leza.” (Mili. 16:23-25) Nupya nanti i cakuti Paulo na Sailasi yakomiizye utailo wao yatwalilile ukuya nu luzango pano yacuulanga pa mulandu ni zina lyakwe Klistu. Naswe tungakolanya Paulo na Sailasi ndi cakuti tukwiusya ivisuma ivikafuma mu kuombela Leza ni cisinka.—Filipi 1:12-14.

Ndakai, kwaya aina itu umu nsi yonsi yano tungakolanya aatwalilile ukuya nu luzango lino yeziwanga. Umu Novemba umwaka wakwe 2013, kwali cimuza icononyile sana ivintu uku Philippines, cimuza cico cononyile amang’anda ya ndupwa zyakwe ya Nte ukucila pali 1,000. Ya George, yano ing’anda yao yononike umu musumba wa Tacloban, yalanzile ukuti: “Asi mulandu na vino vyacitiike, aina yali ni nsansa. Ntamanyile na vino ningalanda pa luzango luno tuli nalo.” Lyonsi lino twakwata intazi izitale sana, tulatwalilila ukuya nu luzango ndi cakuti tukwelenganya sana pali vino Yeova watucitila. I vyani vyuze vino Yeova watucitila ivikalenga tuye sana nu luzango?

IVIKALENGA TUYE NU LUZANGO

Uzye i cani cuze icingatulenga ukuya sana nu luzango ukuluta pa kuya ya cuza yakwe Leza? Tale elenganyini pali vii: Twamanya Kateeka wa Uumbo onsi. A Tata witu, Leza, nupya Cuza!—Masa. 71:17, 18.

Tukataizya sana ukuti Yeova watupeela umi, nupya tukaipakizya. (Kasa. 3:12, 13) Vino Leza watuleeta umwi uvi lyakwe, twamanya vino akalonda twacita nupya twamanya ivya kucita pakuti twaipakizya umu wikalo. (Kolo. 1:9, 10) Nomba antu aingi yatamanya umulandu uno Leza watuumbiile. Pakuti alande sana pa upusano uwayapo, Paulo walemvile ati: “‘Cintu cino umuntu ataweni nanti kuvwa, cintu cino umuntu atatazile aelenganye ukuti cingacitika, cili cintu cino Leza wateyanyizizya yao amutemwa.’ Lelo Leza wasokolola inkama yakwe kunotuli kupitila mu mupasi wa muzilo.” (1 Kol. 2:9, 10) Ukumanya ukulonda kwakwe Yeova kukatuletela sana uluzango.

Elenganyini na pali vyuze vino Yeova wacitila antu yakwe. Uzye ukumanya ukuti amaifyo itu yangelelwa kusitulenga ukuya nu luzango? (1 Yoa. 2:12) Pa mulandu ni cikuuku cakwe Leza, twakwata upaalilo wakuti insi ipya yasya iyeko likwene. (Loma 12:12) Na ndakai kwene, Yeova watupeela iumba lyakwe ya kapepa yanji aaya ningo sana. (Masa. 133:1) Izwi Lyakwe Leza nupya likatuteekezya ukuti Yeova akacingilila antu yakwe kuli Satana ni viwa vyakwe. (Masa. 91:11) Ndi tukwelenganya sana pa vintu kwene vii ivisuma vino Leza watucitila, tulaya sana nu luzango.—Filipi 4:4.

VINO MUNGACITA PAKUTI MUYE SANA NU LUZANGO

Uzye Umwina Klistu uwaya mpiti nu luzango angungilizyako na luze? Yesu walanzile ati: “Nati munena vintu vii kuti muye mu luzango  ndi luno nkweti, na kuti luzango lwinu luye lufumaluke.” (Yoa. 15:11) Uzye cii cisikulanga ukuti tungungilizyako uku luzango luno twaya nalo mpiti? Vino mukaezya na maka ukuti mungilizyeko uluzango, mungavikolanya kuli vino vikacitika pakuti umoto wake sana. Mulinzile ukwikapo inkwi pa moto pakuti wake sana. Umu nzila iliyonga kwene, mulinzile ukutemwa sana vyakwe Leza pakuti muye sana nu luzango. Iusyini ukuti: Umuntu akaya sana nu luzango ndi umupasi wakwe Leza wamwazwa. Fwandi, mulaya sana nu luzango ndi cakuti mukupepa kuli Yeova ukuti amupeele umupasi wakwe alino nu kwelenganya sana pali vino Baibo ikalanda.—Masa. 1:1, 2; Luka 11:13.

Cuze icingamwazwa ukuya sana nu luzango, u kuombesya mu milimo iikazanzya Yeova. (Masa. 35:27; 112:1) U mulandu ci? Pano twaumvilwe pakuti “twaopa Leza nu kuyela amasunde yakwe, pano acino antunze” yaelako. (Kasa. 12:13) Umu mivwangile yuze tungati twaumvilwe pakuti twacita ukulonda kwakwe Leza. Fwandi ndi tukuombela Yeova, tukaaya sana nu luzango umu umi. *

IVINTU IVISUMA IVIKACITIKA NDI TULI NU LUZANGO

Ndi twaya nu luzango ulukafuma kuli Leza, ivintu vilatuzipila sana ukucila vino tukayuvwa sile umu mwenzo. Tulaazanzya sana Tata witu uwa kwi yulu lino tukumuombela nu luzango asi mulandu ni ntazi zino tungakwata. (Malan. 16:15; 1 Tesa. 5:16-18) Nupya pa mulandu wa kuya nu luzango lwa cumi, tukakaana uwikalo wakutemwisya ivyuma, lelo tukaipeelesya pakuti twaomba sana imilimo ya Wene. (Mate. 13:44) Ndi twalola usuma uwaya umu kucita vii, tulaya sana nu luzango, tulauvwa ningo pa miombele itu isuma, nupya tulaazanzya sana yauze.—Mili. 20:35; Filipi 1:3-5.

Umonsi umwi aakalondelezya uwa pa Univeziti ya ku Nebraska uku United States walanzile ukuti: “Ndi cakuti muli nu luzango nupya mukauvwa ningo sana pa umi winu, mungaya nu umi usuma uku nkoleelo.” Walanzile amazwi kwene yaa pacisila ca kupituluka umu masambililo akalanda pa umi. Mazwi yano walanzile yakauvwana na vino Baibo ikalanda ukuti: “Umwenzo wa nsansa u mulembo usuma sana.” (Mapi. 17:22) I cumicumi, lino mwaya sana nu luzango, mungaya nu umi usuma.

Fwandi asi mulandu ni vintu kutala umu manda yano tukwikalamo, tungaya nu luzango lwa cumi ndi Leza watupeela umupasi wa muzilo pa mulandu nu kupepa kuli aliwe, ukuisambilizya, nu kwelenganya sana pali vino vyaya muli Baibo. Nupya tukaya sana nu luzango ndi tukwelenganya pali vino Leza akatupolelela ndakai, ukukolanya utailo wa yantu yauze, nu kulondesya ukucita ukulonda kwakwe. Ndi tukucita vyonsi vii, naswe tungavwanga wakwe vino kalemba wa masamu wavwanzile pali Masamu 64:10, apakati: “Antu asuma yalazanga pa mulandu wa vintu vino Leza wacita. Nu kuzina lyene yalazina kunoli.”

^ par. 10 Imiyele ya kuteeka umwenzo tulaisambililapo umu cipande icilayako uku nkoleelo umu vipande vii ivikulanda pa “miyele ino umupasi ukatulenga ukuya nayo.”

^ par. 20 Pakuti mumanye inzila na zyuze izingamwazwa ukuya sana nu luzango, lolini kambokosi akakuti “ Inzila na Zyuze Izingatwazwa Ukuya Sana nu Luzango.”