Skip to content

Muye pa utantiko wa vilimo

I Vyani Vino Mwe Yonsi Aasontwa Mungasambilila Kuli Timoti?

I Vyani Vino Mwe Yonsi Aasontwa Mungasambilila Kuli Timoti?

UMWAKA uwafumileko, aonsi aingi umu nsi yonsi yasonsilwe ukuya ya eluda na aomvi umu vilongano vyakwe ya Nte Yakwe Yeova. Ndi cakuti namwe muli pa ina kwene yaayo yano twatemwa sana, mufwile mwaya ni nsansa pi syuko lino mwapokeelela.

Nanti cingaya vivyo, limwi mukasakamikwako panono. Ya Jason, eluda uwa cilumendo, yalanzile ukuti: “Lino nasonsilwe, nasakamiile sana pa milimo ipya ino napeezilwe.” Mose na Yelemiya yayuvwile ukuti yataalinzile lino yapokelile imilimo ipya ukufuma kuli Yeova. (Kufu. 4:10; Yele. 1:6) Ndi cakuti namwe avino mukayuvwa, uzye mungacimvya uli intazi iyo nu kutwalilila ukulunduluka? Lekini tulole vino cali uku musambi Timoti.—Mili. 16:1-3.

MWAKOLANYA TIMOTI

Timoti wakweti imyaka uku ma 20 lino umutumwa Paulo wamunenyile ukuti yaombela pamwi umu mulimo wa kutandalila aina umu vilongano. Pa kutandika, vino Timoti wali umwance, limwi waisuuzile nu kusiitoka ukuti atanga akwanisye ukuomba umulimo upya uno wapeezilwe. (1 Tim. 4:11, 12; 2 Tim. 1:1, 2, 7) Nomba lino papisile imyaka 10, Paulo wanenyile aina aali umu cilongano ca ku Filipi ati: “Nkupaalila mu Mwene Yesu ukuti ndatuma Timoti kunomuli zuwa . . . Kusi namuze wakwe Timoti angaya nu mwenzo ndu wane.”—Filipi 2:19, 20.

I cani calenzile Timoti ukuya eluda umusuma sana? Lekini tulande pa vintu 6 vino mungasambilila kuli Timoti.

1. Wasakamalanga sana antu. Paulo wanenyile aina amu Filipi ukuti: ‘Timoti alaamusakamala.’ (Filipi 2:20) I cumicumi Timoti wasakamalanga antu. Wasumvile sana mano kuli vino yaombanga muli vyakwe Leza, nupya waitemelwanga ukuyazwa.

Mutalinzile ukuya wakwe namutekenya wino yaomvya umu cilangililo uwisile sile mano uku kufika zuwa pa vitesyoni ukuluta ukwika amano uku yantu yano walinzile ukusenda. Umwina William, eluda umucindikwe sana uwaomba ueluda pa myaka ukuluta pali 20, walanzile amazwi ya kupanda mano kuli ya eluda apya ati: “Mulinzile ukutemwa aina. Mwasumba mano kuli vino vikulondekwa ukucila ukusumba sana mano kuli vino ivintu vilinzile ukuombwa umwi uvi.”

2. Wakolezyanga umulimo wa kusimikila. Pa kulanda vino Timoti waombanga ningo ukupusanako na yauze, Paulo walanzile ukuti: “Cila muntu akasakamala pa vintu vyakwe umwisikulu, kwaula kusakamala mulimo wakwe Yesu Klistu.” (Filipi 2:21) Paulo walemvile amazwi yaa ala ali umu Loma. Waweni ukuti aina yasumvile sana mano uku milimo yao. Umunzila imwi tungati yataombesyanga muli vyakwe Leza. Nomba Timoti wene asi vino wacitanga! Ndi wakwata isyuko lya kulundulula ilandwe lisuma, wakolanyanga Ezaya uwalanzile ati: “Mukwai namayako! Ntumini nene!”—Eza. 6:8.

Uzye mungacita uli pakuti mwaomba ningo imilimo inu alino na vyakwe Leza? Icakutandikilako, mulinzile ukumanya icifwile ukuya pa nkoleelo. Paulo walanzile ukuti: “Mwamanya kusolola ivili visuma.” (Filipi 1:10) Mwaika imilimo yakwe Leza pa nkoleelo. Cakwe ciili, mwaangupazya ivintu.  Mwataluka ivilivyonsi ivingamononela insita na maka. Paulo wakomelizye Timoti ati: “Fumako ku matunko yano ance yakaponelamo, nupya uwalwisya kucita vyawololoke, kuya nu utailo, kutemwa, nga nu mutende.”—2 Tim. 2:22.

3. Waombesyanga mu mulimo wakwe Leza. Paulo wiwisyeko aina Filipi ukuti: “Mweisikulu mumanyile vino Timoti waya ni cumi, na vino wene nani twaombanga pamwi wa mwana ni isi pa mulandu wi landwe lisuma.” (Filipi 2:22) Timoti ataali umukasu. Waombesyanga lino wapitanga na Paulo, nupya cii calenzile yatemwane sana.

Umwi uvi lyakwe Leza mwaya milimo iingi sana ndakai. Mungaomba ningo sana imilimo ii nupya ingamupalamika ku ina na ya nkazi. Fwandi mulinzile ukuya ‘aacincile lyonsi lino mukutumikila Umwene.’—1 Kol. 15:58.

4. Waomvyanga vino wasambilile. Paulo walembiile Timoti ati: “Lelo wemo walondela usambilizyo wane, kuteeka mwenzo kwane, kutemwa kwane, kuposya kwane.” (2 Tim. 3:10) Pa mulandu wakuti Timoti waomvyanga vino wasambilile, walinzile ukuomba umulimo ukalamba mwi uvi.—1 Kol. 4:17.

Uzye mwakwatako uwikolo nanti umuzo umwi uwika mano kuli vyakwe Leza wino mungakolanya? Nga mutakweti, u mulandu ci uno mutanga mulonde nanti awenga? Mwina Tom, eluda uwaomba pa myaka iingi akaiusya ukuti: “Eluda umwi uwaomvile ningo pa myaka iingi wantemilwe sana nupya wansambilizye ivingi. Lyonsi namuzyanga ivilivyonsi nupya naomvyanga amano yano wampandanga. Na cii calenzile intete zisile.”

5. Watwalilile ukuisambilizya umwineco. Paulo wakonkomizye Timoti ukuti: “Uyelezye umi wakucindika Leza.” (1 Tim. 4:7) Kateya wa vyangalo akakwata uwa kumwangalila, nomba nalyo kwene alinzile nu kuisambilizya umwineco. Paulo wanenyile Timoti ati: “Kufika lino ndiza kuko, omvya insita na maka yako mu kuwelenga malembelo pa lwalala nu kukosola nu kusambilizya. . . . Waomba incito zii mu kutekela nu kuipeelesya mu kuomba kuti antu yonsi yalole vino ukuya inkolelo mu visuma.”—1 Tim. 4:13-15.

Namwe kwene mulinzile ukuomvya ningo vino mwamanya. Mulinzile ukulamanyilako ivipya ivikasenuka umwi uvi lyakwe Leza. Nupya, mutalinzile ukuitaila sana, ukulaelenganya ukuti mwemo mwamanya ivingi vino mungaomvya pa kuombela pa wavya uli onsi ukwaula nu kulondelezyapo. Mwakolanya Timoti, ‘Ukuisunga nu kuya acenjele mu kusambilizya kwinu.’—1 Tim. 4:16.

6. Wataile sana umupasi wa muzilo wakwe Yeova. Ukulozya ku mulimo wakwe Timoti wa kusimikila, Paulo wamunenyile ukuti: “Mu maka ya mupasi wa muzilo, uno ukaikala munotuli, nakunena ukuti wacingilila vintu visuma vino walasikwa.” (2 Tim. 1:14) Pakuti Timoti acingilile umulimo wa kusimikila, walondekwanga ukutaila umupasi wa muzilo.

Ya Donald aomba ueluda pa myaka iingi yalanzile yati: “Aonsi aasontwa yalinzile ukucindika ucuza wao na Leza. Yonsi akacita vivyo ‘amaka yao yakavulila kweneko.’ Ndi cakuti yakulenga Leza ukuti ayapeele umupasi wakwe uwa muzilo nu kukwata imiyele ino ukatulenga ukukwata, yalaya ipaalo ku ina yao na ya nkazi.”—Masa. 84:7; 1 Pet. 4:11.

UZYE MWATEMWA SANA IMILIMO INO MWAPEELWA?

Tukakomeleziwa sana ukulola aina aingi apya, aasontwa wakwe mwemwe yakulunduluka muli vyakwe Leza. Ya Jason, atiyalumbulwa pantandikilo ya cipande cii, yalanzile yati: “Pa nsita yonsi ino naomba ueluda, nasambilila ivingi ni intete zyasila. Lyene nkaipakizya ukuomba umulimo uno napeelwa nupya nkalola ukuti isyuko sana ukuukwata!”

Uzye mulatwalilila ukulunduluka muli vyakwe Leza? Mwaitemelwa ukusambilila kuli vino Timoti waombanga. Nupya namwe kwene mulaya ipaalo ku yantu yakwe Leza.