Skip to content

Muye pa utantiko wa vilimo

 CIPANDE CA KUSAMBILILAMO 11

Mwakutika Ukwi Izwi Lyakwe Yeova

Mwakutika Ukwi Izwi Lyakwe Yeova

“Wii, u Mwanane mukundwe . . . Mwamuvwa.”—MATE. 17:5.

ULWIMBO 89 Mwaya ni Cuvwila, Alino Mulapaalwa

VINO TUMASAMBILILAPO *

1-2. (a) Uzye Yeova walanzyanyanga uli na antunze? (b) I vyani vino tumalandapo umu cipande cii?

YEOVA watemwa ukulanzyanya naswe. Kucisila waomvyanga ya kasema, angeli nu mwanakwe Klistu Yesu pa kunena antu vino walondanga ukuti yacite. (Amo. 3:7; Gala. 3:19; Umbw. 1:1) Ndakai akalanzyanya naswe ukuomvya Izwi Lyakwe Baibo. Watupeela Baibo apakuti tumanye nu kuvwikisya vino akaelenganya ni nzila ino akacitilamo ivintu.

2 Lino Yesu wali pano nsi, Yeova wavwanzile ukufuma ukwi yulu apa maila yatatu. Lekini tulande pali vino Yeova walanzile, vino tungasambilila uku mazwi yano walanzile na vino mazwi yano walanzile yangatwazwa.

“WEWE MWANANE, MUKUNDWE”

3. Ukulingana na mazwi aaya pali Mako 1:9-11, a mazwi ci yano Yeova walanzile lino Yesu wawatiziwe, nupya ivisinka ci vicindame vino amazwi yayo yasokolwile?

3 Mako 1:9-11 yalondolola icatandikilepo ukucitika lino Yeova wavwanzile ukufuma ukwi yulu. (Welengini.) Walanzile ukuti: “Wewe Mwanane mukundwe, munuli nkuzanga cuze.” Yesu watemilwe sana pa kuvwa vino Isi walangizye ukuti wamutemwa nu kumutaila. Amazwi yano Yeova walanzile yasokolwile ivisinka ivicindame vitatu pali Yesu. Icakutandikilapo i cakuti Yesu u Mwanakwe. Cakwe ciili i cakuti Yeova watemwa Yesu. Na cakwe citatu i cakuti, wazangilanga muli aliwe. Fwandi lekini tulande sana pa visinka vii vitatu.

4. U mulandu ci uno Yeova waneniile Yesu pa luwatizyo lwakwe ukuti: “Wewe Mwanane”?

4 “Wewe Mwanane.” U mulandu ci uno Yeova walandiile  amazwi yaa? Lino Yesu wali ukwi yulu, wali umwana wakwe Leza uwa ku mupasi. Acino uwanda uno wawatiziwe, wapasilwe nu mupasi wa muzilo. Pa nsita iiya, Leza walangizye ukuti vino Yesu wali Umwankwe umupakwe, wakweti upaalilo wa kuswilila ukwi yulu nu kuya Umwene nupya Simapepo Mukalamba uwasontwa na Leza. (Luka 1:31-33; Ayeb. 1:8, 9; 2:17) Fwandi apa luwatizyo lwakwe Yesu, kwali icalenzile Isi alande ukuti: “Wewe Mwanane.”—Luka 3:22.

Tukauvwa ningo ndi yatutaizya nu kutukomelezya (Lolini palagalafu 5) *

5. Tungakolanya uli Yeova muli vino walangizye ukutemwa nu kukomelezya uku Mwanakwe?

5 “Wewe mukundwe.” Vino Yeova wacisile pa kulanga Yesu ukuti wamutemilwe nu kuti wazangilanga muli aliwe, vikalenga naswe twakomelezya yauze. (Yoa. 5:20) Tukayuvwa ansansa lino umuntu wino tukaelenganyapo walangizya ukuti watutemwa nu kuti akataizya pali vino tukacita. Umu nzila iliyonga kwene, aina itu na ya nkazi amu cilongano pamwi na ya lupwa itu, yakalonda tuyalange ukutemwa nu kuyakomelezya. Ndi cakuti twataizya yauze, tukakomya utailo wao nu kuyazwa ukuombela Yeova na ucisinka. Avyazi nayo yakalondekwa ukukomelezya ana yao. Ndi cakuti avyazi yakutaizya ana yao ukufuma pansi ya mwenzo nu kulangizya ukuti yayatemwa, yakayazwa ukukula ningo.

6. U mulandu ci uno tulinzile ukutaila muli Yesu Klistu?

6 “Munuli Nkuzanga Cuze.” Mazwi yaa yakalanga ukuti Yeova wataile sana ukuti Yesu wali nu kuomba ukulonda kwakwe Isi. Yeova wataila sana Umwanakwe, fwandi naswe tungataila ukuti Yesu alafikilizya amalayo yonsi yano Leza watulaya. (2 Kol. 1:20) Ndi twelenganya api lyasi lii lyakwe Yesu, tukacizya napo ukulondesya kusambilila kuli aliwe nu kumukolanya. Wakwe viivi kwene vino  Yeova wataile sana Yesu, avino wataila na aomvi yakwe ukuti yalatwalilila ukusambilila uku Mwanakwe.—1 Pet. 2:21.

“MWAMUVWA”

7. Ukulingana na mazwi aaya pali Mateo 17:1-5, iinsita ci na yuze ino Yeova walanzile ukufuma ukwi yulu, nupya i vyani vino walanzile?

7 Welengini Mateo 17:1-5. Umuku wakwe ciili lino Yeova wavwanzile ukufuma ukwi yulu, aliili lino Yesu ‘wasenwike.’ Yesu yali na Petulo, Yakobo na Yoane lino yaile pa mwamba utali. Cinso cakwe Yesu iciyengesa wi lanzi ni vizwalo vyakwe iviswepa swe wa luswepo. Alino ikuloleka Mose na Eliya ala yakulanda na Yesu apa mfwa nu kutuutuluka. Nanti icakuti atumwa yakwe Yesu “yali ala iyalala,” yaweni icilolwa cii icakuzungusya lino izile yazyuka. (Luka 9:29-32) Icalondelilepo i cakuti, ikumbi iliyengese lizile liyavimbilikizya ni Izwi lyakwe Leza ilifuma umwi kumbi. Wakwe vino Yeova wacisile lino Yesu wawatiziwe, na pakwene Yeova wavwanzile ukufuma umwiyulu ukulangilila ukuti wazangilanga muli aliwe nupya wamutemilwe. Walanzile ati: “Wii, u mwanane mukundwe. Munoli nkuzanga cuze.” Nomba pa nsita ii Yeova walanzile na mazwi yakuti: “Mwamuvwa.”

8. Uzye icilolwa ca kusenuka kwakwe Yesu cazwilizye uli Yesu na asambi yakwe?

8 Icilolwa calangizye umusango uzimantukile uwa lulumbi na maka vino Yesu wali nu kukwata ndi waya Umwene umu Wene Wakwe Leza. Ukwaula nu kutwisika, Yesu wakomeleziwe nupya calenzile ukuti azizimizye intazi zino wali nu kupitamo ukwikako sile ni mfwa iipisye. Icilolwa cii nupya cakomizye utailo wa yasambi yakwe Yesu. Cii cayazwile ukuya aiteyanye uku wezyo ulionsi uno yali nu kupitamo pa kuomba umulimo ukome uno yapeezilwe. Apa cisila ca myaka na limwi 30, umutumwa Petulo walanzile ukuti acili akaiusya icilolwa ciici ica kusenuka kwakwe Yesu icali ca kuzungusya.—2 Pet. 1:16-18.

9. U kusunda ci ukucindame kuno Yesu wapeezile asambi yakwe?

9 “Mwamuvwa.” Yeova walenga cimanyikwe paswe ukuti akalonda twauvwa vino Yesu akutunena nu kucita vivyo kwene. I vyani vino Yesu walanzile lino wali pano nsi? Walanzile ivintu ivingi sana ivicindame vino tulinzile ukukutikako! Wasambilizye alondezi ivya kukosoola ilandwe lisuma nupya wayacinkulangako lyonsi ukuti yaalinzile ukuya apempule. (Mate. 24:42; 28:19, 20) Wayanenyile ukuombesya, nupya wayakomelizye ukukanatoovoka. (Luka 13:24) Yesu walondanga alondezi yakwe ukutemwana, ukuya alemane nu kulondela masunde yakwe. (Yoa. 15:10, 12, 13) Ukusunda kuno Yesu wapeezile asambi yakwe kwacindime sana! Nupya ukusunda kuko kwacindama na ndakai kwene wakwe vino kwacindime uku yasambi yakwe Yesu.

10-11. Tukalanga uli ukuti tukukutika kuli Yesu?

10 Yesu walanzile ukuti: “Wino wensi uwaya uwa cumi wene akauvwa mazwi yane.” (Yoa. 18:37) Tukalangizya ukuti tukukutika ukwi izwi lyakwe ndi cakuti ‘tukuteekelelana nu kwelelana.’ (Kolo. 3:13; Luka 17:3, 4) Nupya tukalangizya ukuti tukukutika ukwi izwi lyakwe ndi cakuti tukuitemelwa ukukosoola ilandwe lisuma “mu nsita ilingine nu mu nsita italingine.”—2 Tim. 4:2, Cimambwe New Testament.

11 Yesu walanzile ukuti: “Mfwele zyane zikauvwa izwi lyane.” (Yoa. 10:27) Alondezi yakwe Yesu yakalangizya ukuti yakauvwa ukwi izwi lyakwe ukupitila umu vicitwa asi kuvwa sile foo. Yasipumbulwa na “masakamiko amu  umi.” (Luka 21:34) Ali mulandu uno yakacindamikila sana masunde yakwe Yesu na lino ivintu ivitala. Aina itu aingi cuze yakazizimizya amezyo aipisye, kuzunyiwa, kuulizya ivyakulya alino na mazanzo aakuiponela sile. Nanti yapite umu ntazi zyonsi zii, yakatwalilila ukuya acisinka kuli Yeova asi mulandu ni ntazi zizyo. Yesu akayanena ukuti: “Wino wensi akapokelela masunde yane nu kuyayela, ala wene uwantemwa. Na wino wensi uwantemwa, wene alatemwikwa na Tata.”—Yoa. 14:21.

Umulimo wa kusimikila ukatwazwa ukuombela ningo Leza (Lolini palagalafu 12) *

12. Iinzila ci na yuze ino tukalangilamo ukuti tukakutika kuli Yesu?

12 Inzila na yuze ino tukalangilamo ukuti tukakutika kuli Yesu u kuombela pamwi na ina asoontwa ukuti yatutungulula. (Ayeb. 13:7, 17) Iuvi lyakwe Leza lyasenulako ivintu ivingi umu myaka ya ndakai, ukwikako sile ni miomvezye ya viombelo vino tukaomvya umu mulimo wa kusimikila, vino ukulongana kwa mukasi ka mulungu kulinzile ukuya, alino ni mikuulile, mizifizye ni misungile ya Mang’anda itu aa Wene. Tukataizya sana pa kusenuka kuu! Tusitwisika ukuti Yeova alatupolelela pa kuombesya kuno tukaombesya lino tukulondela yano yakututungulula.

13. I visuma ci ivyaya umu kukutika kuli Yesu?

13 Ivintu vikatuzipila ndi tukukutika kuli vyonsi vino Yesu akatusambilizya. Yesu walavile asambi yakwe ukuti ndi yalondela vino wayasambilizyanga yaali nu kukwata upuzo. Walanzile ukuti: ‘Mulazana upuzo. Pano ikoli lyane lino nkazwika ilyangupale, ni cisendo cino nkatwika citanyooma.’ (Mate. 11:28-30) Izwi Lyakwe Leza na mabuku ya Malandwe 4 aakalanda pa umi wakwe Yesu nu mulimo uno waomvile yakatupeela upuzo, amaka alino nu kutuleenga ukuya na mano. (Masa. 19:7; 23:3) Yesu walondolwile ukuti: ‘Asansa ayao akauvwa mazwi yakwe Leza nu kuyayela.’—Luka 11:28.

‘NDALANGIZYA ANTU LULUMBI LWANE’

14-15. (a) Uzye vino Yeova walanzile pa muku wakwe citatu, vyalingana uli ni vyalembwa pali Yoane 12:27, 28? (b) U mulandu ci uno vino Yeova walanzile vyasansamusizye nu kukomelezya Yesu?

14 Welengini Yoane 12:27, 28. Ibuku li landwe lyakwe Yoane i lyalanda pa muku wakwe citatu uno Yeova wavwanzile ukufuma ukwi yulu. Lino kwasiile manda anono ukuti Yesu afwe, waile uku Yelusalemu ku kuzevya Ucilo. Walanzile ukuti: “Nuvwa ulanda cuze.” Lyene wapefile ati: “Tata langa antu  yonsi lulumbi lwi zina lyako!” Lyene Isi wavwanzile ukufuma ukwi yulu ati: “Nati ndangizya antu lulumbi lwane nga ndacita cii nupya kwene.”

15 Yesu wapisile umu ntazi iziipisye pa mulandu nu mulimo uno wakweti uwalondekwanga ukuya na ucisinka kuli Yeova. Yesu wamanyile ukuti wali nu kucula sana alino nu kufwa imfwa iipisye. (Mate. 26:38) Nomba cino Yesu wacindamike sana u kulangizya lulumbi ukwi zina lyakwe Isi. Yesu wapeezilwe umulandu wa kupontela umupasi wa muzilo, nupya wasakamile ukuti imfwa yakwe yali nu kuleta umuzewanya api zina lyakwe Leza. Vino Yeova walanzile vyakomelizye sana Yesu! Lyene wamanyile ukuti izina lyakwe Yeova lyali nu kucindikwa. Amazwi yakwe Isi yamusansamwisye nu kumukomelezya pali vino vyali nu kumucitikila. Nanti icakuti Yesu sile uuvwile umwalozile vino Isi wavwanzile, Yeova walesile ukuti vino walanzile vilembwe pakuti tungasambililako.—Yoa. 12:29, 30.

Yeova alaleka ukuti izina lyakwe licindikwe nupya alapususya antu yakwe (Lolini palagalafu 16) *

16. U mulandu ci uno insita zimwi tungaasakamalila pa muzewanya uno antu yakaleta api zina lyakwe Leza?

16 Wakwe vino cali kuli Yesu, naswe tungaasakamala pa muzewanya uno antu yakaleta api zina lyakwe Leza. Nupya viivi kwene vino cali kuli Yesu naswe kwene antu yakatufyenga. Nanti limwi tungauvwa uyi pa malyasi ya ufi yano antu yakalanda pali sweswe. Nupya tungaelenganya pa muzewanya uno malyasi  yaa yakaleta api zina lyakwe Yeova na pi uvi lyakwe. Lino caya vivyo, alino amazwi yano Yeova walanzile yakatusansamusya. Tutalinzile ukusakamala sana pali vino antu yakazewanya izina lyakwe Yeova ni uvi lyakwe. Tusitwisika ukuti ‘pa mulandu wakuti sweswe yakwe Klistu, Leza alatupeela mutende uno kusi umuntu nanti wenga angaumanyikisya. Mutende kwene uu, ulaatungulula umi witu ni myelenganyizizye itu.’ (Filipi 4:6, 7) Yeova alatwalilila ukulanga ululumbi ukwi zina lyakwe. Alaomvya Uwene wakwe kusisyapo iviipe vyonsi vino Satana na antu ya mu nsi ii yakacitila aomvi yakwe acumi.—Masa. 94:22, 23; Eza. 65:17.

USUMA UWAYA UMU KUKUTIKA UKWI IZWI LYAKWE YEOVA

17. Ukulingana ni vyeo ivyaya pali Ezaya 30:21, uzye Yeova akalanda uli naswe ndakai?

17 Yeova acili akalanda kuli sweswe na ndakai kwene. (Welengini Ezaya 30:21.) I cacumi ukuti tusiuvwa Leza wavwanga ukufuma ukwi yulu. Lelo watupekanyizizya Baibo umwaya vino akalonda twacita. Nupya umupasi wakwe Yeova ukalenga ‘umuomvi mutailwe’ ukutwalilila ukusambilizya antu yakwe. (Luka 12:42) Tukapokelela ivyeo ivingi sana umu mpapulo zino yakapulinta alino ni zya pa intaneti, mavidyo, ni mpapulo zya kukutikako sile zino yawelenga!

18. Uzye amazwi yakwe Yeova yakakomya uli utailo winu nu kumwazwa ukuya asipe?

18 Lekini lyonsi twaiusya amazwi yano Yeova wanenyile Umwanakwe lino wali pano nsi! Si lekini amazwi yakwe Leza alembwa muli Baibo yatulenga ukutaila ukuti Yeova wakwata amaka pa vintu vyonsi nu kuti alasisyapo iviipe vyonsi vino Satana na antu ya mu nsi ii iipe yakacita. Nupya lekini lyonsi twalondesya ukukutika ukwi izwi lyakwe Yeova. Ndi tukucita vivyo, tulatwalilila ukuzizimizya intazi zino tukapitamo ndakai ni ziliza uku nkoleelo. Baibo ikatwiusyako ukuti: “Mulinzile kuteeka myenzo, kuti mucite kulonda kwakwe Leza nu kupokelela cino walaya.”—Ayeb. 10:36.

Lwimbo 4 ‘Yeova U Mucemi Wane’

^ par. 5 Lino Yesu wali pano nsi, Yeova walanzile pali aliwe ukuomvya izwi ukufuma ukwi yulu amaila yatatu. Iila lyonga pali yaa, Yeova wakomelizye asambi Aina Klistu ukukutika uku Mwanakwe. Ndakai Yeova akalanda naswe ukupitila Umwi Izwi Lyakwe umwaya na vino Yesu wasambilizyanga alino nu kupitila mu cilongano cakwe. Icipande cii cimalanda pali vino tukaipakizya ndi tukuvwila Yeova na Yesu.

^ par. 52 ULONDOLOZI WA VIKOPE: Eluda walola kuno umuomvi aakatumikila akwazwilizya ukuzifya pa Ng’anda ya Wene nu kuombela uku mpapulo. Eluda wamutaizya.

^ par. 54 ULONDOLOZI WA VIKOPE: Atwalane aaku Sierra Leone yakupeela mulondo wa nswi akapepala ka kumwamilako uku kulongana kwa pa cilongano.

^ par. 56 ULONDOLOZI WA VIKOPE: Ya Nte aakaikala kuno yalesya umulimo witu yakulonganila umu ng’anda. Iyazwala kwati yasi umu kulongana pakuti antu yatayasumbako sana mano.