Skip to content

Muye pa utantiko wa vilimo

 ISAMBILILO 1

Inkama Iyatuleetela Uluzango

Inkama Iyatuleetela Uluzango

Uzye umwi watala wakuneenapo inkama?— * Kwaya inkama imwi iyaiyeela ino Baibo ikalandapo. Ika-amwa ukuti inkama pano antu yataimanyile. Na angeli kwene yalondanga ukumanya ivingi pa nkama ii. Uzye ungatemwa ukumanya inkama kwene ii?—

Uzye ukwelenganya ukuti angeli yalondanga ukumanya vyani?

Mpiti sana, Leza waumvile umonsi nu mwanaci akutandikilapo. Yayaamanga yakuti Adamu na Eva. Leza wayapeezile incende isuma sana ino yaamanga yakuti icalo ca Edeni. Adamu na Eva iyuvwila Leza, nga yaombiile pamwi na ana yao ukuziifya insi yonsi ukuti iyaloleka ningo wakwe viivikwene vino icalo ca Edeni calolekanga. Nupya nga iikalaanga umu Paladaise amanda pe. Nomba uzye, ukwiusya vino Adamu na Eva yaacisile?—

Adamu na Eva yatuuvwiliile Leza, nupya aali mulandu uno insi itaela paladaise ndakai. Nomba, Leza walavile ukuti wali nu kuziifya insi yonsi, kapya antu yonsi yaali nu kuya ni nsansa nu kwikala manda pe. Uzye wali nu kucita uli vii? Pa myaka iingi, antu yataamanyile vino wali nu kucita. Yaali inkama.

Lino Yesu wizile pano nsi, wasambiliizye antu ivingi sana pa nkama kwene ii. Walanzile ukuti yaali inkama iikalanda pa Wene Wakwe Leza. Yesu waneenyile antu ukupepela Uwene kwene uu ukuti wize. Uwene uwo ulaleenga ukuti insi iziipe cuze.

Uzye uvwa ningo vino wamanya inkama kwene ii?— Cino ufwile ukumanya i cakuti aalikala umu Paladaise, a yaayo sile aakauvwila Yeova. Muli Baibo mwaya malyasi aingi sana aakalanda pa yonsi na anaci auvwilanga Yeova. Uzye ungatemwa ukusambilila pa yantu kwene yaayo?— Leka tumanye yamwi pali yaa na vino tungayakolanya.

WELENGA MULI BAIBO

  • Mako 4:11

  • 1 Petulo 1:12

  • Utandiko 1:26-28; 2:8, 9; 3:6, 23

  • Mateo 6:9, 10

  • Masamu 37:11, 29

^ par. 3 Umu malyasi yaa, mulaazana umusilwa uukuloleka vii (—) ala wati-ulondelela pa mauzyo yamwi-yamwi. Lyene ndi mwazana umusilwa kwene uu, mwatala imuta panono ukuwelenga nu kuleka umwana aasuka.