Skip to content

Muye pa utantiko wa vilimo

 Cipande 15

Mwaipakizya Imilimo Ino Mukaomba

Mwaipakizya Imilimo Ino Mukaomba

“Swensi tulinzile . . . kuilyokezya pa vintu vino twaombela.”—KASAMBILIZYA 3:13.

1-3. (a) Uzye antu aingi yakauvwa uli pa milimo ino yakaomba? (b) A mauzyo ci yano tumalandapo umu cipande cii?

ANTU umu nsi yonsi yakaombesya pakuti yaisunga nu kusunga indupwa zyao. Aingi yatatemwa incito ino yakaomba, nupya yamwi yakacula sana cila wanda pakuti sile yakatuke yaye uku ncito. Nga vino caya na kuli mwemwe, mungacita uli pakuti mwaipakizya incito ino mukaomba? Mungacita uli pakuti mutemwe incito ino mukaomba?

2 Yeova watunena ukuti: “Swensi tulinzile ukulya nu kumwa nga nu kuilyokezya pa vintu vino twaombela. Vyonsi vii u wila wakwe Leza kunotuli.” (Kasambilizya 3:13) Yeova watuumvile ukuti twalonda ukuomba imilimo. Akalonda twauvwa ningo pa milimo ino tukaomba.—Welengini Kasambilizya 2:24; 5:18.

3 Nomba, i cani cingatwazwa ukuipakizya imilimo ino tukaomba? Iincito ya musango ci ino Aina Klistu yatalinzile ukuombako? Tungacita uli pakuti incito ino tukuomba yatusilako insita ya kupepa Yeova? Nupya u mulimo ci ucindame sana uno tungaomba?

YA KAOMBA YAILI ALUTA YONSI

4, 5. Uzye Yeova akalola uli ukuomba imilimo?

4 Yeova umwineco watemwa sana ukuomba. Pa Utandiko  1:1 pakati: “Pa kutandika Leza waumvile iyulu ni nsi.” Lino Leza wamazile ukupanga insi na vyonsi ivyayamo waweni ukuti “ivisuma wakwe cimwi.” (Utandiko 1:31) Kaumba witu watemilwe sana vino waumvile.—1 Timoti 1:11.

5 Yeova asita ukuomba. Yesu watiile: ‘Tata lyonsi akaomba ukufika na ndakai.’ (Yoane 5:17) Nanti i cakuti tutamanya ivintu vyonsi vya kuzungusya vino akacita ndakai lelo twamanyako vimwi. Akasoolola antu alateeka pamwi nu mwanakwe Yesu Klistu umu Wene wakwe. (2 Kolinto 5:17) Nupya Yeova acili akatungulula nu kusakamala antu. Nupya pa mulandu nu mulimo wa kusimikila, antu aingi umu nsi yonsi yakumanya Yeova nu kukwata upaalilo wa kwikala amanda pe umu paladaise pano nsi. —Yoane 6:44; Loma 6:23.

6, 7. Uzye Yesu a kaomba wa musango ci?

6 Yesu nawe kwene watemwa sana ukuomba wakwe vino Isi waya. Lino Yesu atatala wiza pano nsi, wali a “ciinda wa milimo,” yaombelanga pamwi na Leza lino waumbanga ivintu vyonsi ivya mwi yulu na pano nsi. (Mapinda 8:22-31; Kolose 1:15-17) Lino wali pano nsi, Yesu watwalilile ukuombesya. Lino wali umulumendo, wasambilile ukuomba umulimo wa kuwaza limwi nu kukuula mang’anda. Yesu wamanyile ningo sana ukuomba umulimo uu icakuti wamanyikwe ukuti a “kawaza.”—Mako 6:3.

7 Nomba umulimo uno Yesu wacindamike sana pano nsi u wakusimikila ilandwe lisuma nu kusambilizya antu pali Yeova. Wakweti imyaka itatu na citika iya kuomba umulimo wa kusimikila, nupya waombiisye sana pano waombanga ukufuma katondotondo mpaka usiku.  (Luka 21:37, 38; Yoane 3:2) Yesu wapitanga intamfu iitali umu miseo ya lukungu, ala akusimikila antu aingi.—Luka 8:1.

8, 9. U mulandu ci uno Yesu akaipakizizya imilimo ino akaomba?

8 Yesu walolanga ukuomba umulimo wakwe Leza wa vya kulya. Umulimo uu walenganga ukuti akwate amaka nupya aye umukome. Kwali manda yamwi yano Yesu waombesyanga icakuti atakwatanga ni nsita ya kulya. (Yoane 4:31-38) Waomvyanga kasita konsi kano wakwata uku kusambilizya antu pali Isi. Ali mulandu uno waneniile Yeova ati: “Nati mpela lulumbi kunuli nu mu nsi nati malila milimo ino wampile kuti ncite.”—Yoane 17:4.

9 Fwandi caloleka paswe ukuti Yeova na Yesu yakaombesya nupya yakazanga nu kutemwa sana vino yakuomba. Tukalonda kukolanya Leza nupya tukalonda ‘ukulondela mu ntampulo zyakwe Klistu.’ (Efeso 5:1; 1 Petulo 2:21) Uli mulandu uno tukaezezya na maka ukuombesya muli vyonsi vino tukuomba.

UZYE TULINZILE UKULOLA ULI IMILIMO INO TUKAOMBA?

10, 11. I cani icingatwazwa ukuti twaelenganya ivisuma pa ncito ino tukaomba?

10 Vino sweswe yantu yakwe Yeova tukaombesya pakuti twaisakamala ningo nu kusakamala indupwa zitu. Tukalonda ukuti twaipakizya imilimo ino tukaomba, nomba citangupala. I vyani vino tungacita fwandi ndi cakuti tutaatemwa incito ino tukaomba?

Ukwelenganya ivisuma kungalenga twaipakizya incito iliyonsi ino tukaomba

11 Mwaelenganya ivisuma. Limwi tutanga tuzane icifulo cuze ukwa kuombela nanti ukucefyako imilimo ino tukaomba, nomba tungasenula amelenganyo  itu. Ukumanya vino Yeova akaenekela ukuti avino tulinzile ukucita kungatwazwa. Yeova akaenekela ukuti umonsi aliwe alinzile ukwezya apapezile amaka yakwe ukusakamala ulupwa muli vino lukalondekwa. Baibo ikati umuntu aakafilwa ukusakamala ulupwa lwakwe “u mwipisye kuluta wiyo atataila.” (1 Timoti 5:8) Ndi cakuti mwemwe mutwe wa lupwa, mukaombesya pakuti mwazanila ulupwa ivikalondekwa. Asi mulandu mwatemwa incito ino mukaomba nanti foo, mwamanya ukuti ndi mukusakamala ningo ulupwa lwinu, mukazanzya Yeova.

12. Uzye ivintu vikatuzipila uli ndi tukuombesya nupya tuli na ucisinka?

12 Mwaombesya nupya mwaya na ucisinka. Ukucita vii kulamwazwa ukuipakizya incito ino mukaomba. (Mapinda 12:24; 22:29) Usuma uwayamo uwa kuti amulemba incito yalamutaila. Aakalemba incito yakatemwa aomvi aya ni cisinka pano yatanga iiye impiya, ivintu vya pa ncito, nanti ukucita ivintu vyuze umu nsita ino yalinzile ukuomba. (Efeso 4:28) Ni cacindamisya i cakuti, Yeova akamanya ndi cakuti mukuombesya nupya mwemwe ya cisinka. Mungaya na kampingu musuma pano ala imumanya ukuti mukuzanzya Leza wino mwatemwa.—Ayebulai 13:18; Kolose 3:22-24.

13. I cani cuze icingacitika ndi cakuti tuli ni cisinka pa ncito?

13 Mwaiusya ukuti imiyele inu isuma lino muli pa ncito ikalenga Yeova ukulumbanyiziwa. Cico naco cikalenga twatemwa incito ino tukaomba. (Tito 2:9, 10) Limwi umwi pali yano mukaomba nayo angatandika ukulonda ukusambilila Baibo pa mulandu ni miyele inu isuma.—Welengini Mapinda 27:11; 1 Petulo 2:12.

 I NCITO YA MUSANGO CI INO NDINZILE UKUSOOLOLA?

14-16. I vyani vino tulinzile ukwelenganyapo lino tukusoolola incito ya kuomba?

14 Muli Baibo mutaya imisango ya ncito ino Aina Klistu yalinzile ukuomba nanti ino yatalinzile ukuomba. Nomba mwaya ivisinte ivingatwazwa ukupingula ningo pa ncito. (Mapinda 2:6) Ndi cakuti twaomvya ivisinte vya muli Baibo, tungayuzya sweineco mauzyo yaa.

Mwalonda incito iitalapusana na vino Yeova akalonda

 15 Uzye incito ii ilandenga nkacita vintu vino Yeova walanda ukuti iviipe? Twasambilila pa vintu vino Yeova wapata, ivili wa kwiya nu kusomba. (Kufuma 20:4; Milimo 15:29; Efeso 4:28; Umbwilo 21:8) Fwandi tukacenjela sana lino tukusoolola incito iya kuomba pakuti tutasoolola ingalenga twacita ivipusane na vino Yeova akalonda twacita.—Welengini 1 Yoane 5:3.

16 Uzye incito ii ikatungilila ivicitwa vino Yeova wapata? Nomba nga ndi cakuti mwazana incito ya kukuula icalici mungacita uli? Ukuomba incito ya makuule kutaipa foo. Nomba mwamanya ukuti Leza wapata ivizumilo vya ufi vino yakasambilizya umu macalici. Fwandi nanti icakuti mutalasambilizyako ivizumilo vivyo, uzye mutalayuvwa aamulandu ukutungilila ivintu vino Yeova wapata?—Kufuma 21:22-24.

17. I cani cingatwazwa ukupingula ningo pakuti Leza azange?

17 Ndi tukuomvya ivisinte vya muli Baibo, tulaya wa antu alumbulwa pi lembelo lya Ayebulai 5:14, “asambiliziwa ningo kupalula visuma ni viipe.” Mwayuzya mweineco muti: ‘Uzye yauze yalasoka ndi cakuti nazumila ukutandika ukuomba incito ii? Uzye incito ii ilalenga nkasye mamane na ana yane nu kuya uku mpanga yuze? Uzye yaluvwa uli ndi caya vivyo?’

“MWAMANYA KUSOOLOLA IVILI VISUMA”

18. U mulandu ci uno catalila sana ukwika amano uku kupepa?

18 Cingatala sana ukukoleezya ukupepa Yeova umu manda yaa akusyalikizya umuli “tusita tutale.” (2 Timoti 3:1) Ukuzana incito nu kutwalilila ukuomba kuko kwene uwezyo ukome sana. Tulinzile ukusakamala ulupwa, nomba tulinzile ukukolezya ukupepa kwitu. Tutalinzile ukulenga ivyuma ukuya ivicindame sana umu umi witu.  (1 Timoti 6:9, 10) Nomba tungacita uli pakuti twamanya “kusolola ivili visuma” pa nsita ili imwi kwene nu kusakamala ulupwa?—Filipi 1:10.

19. Uzye ukutaila sana Yeova kungatwazwa uli ukumanya vino tulinzile ukukolezya?

19 Mwataila sana Yeova. (Welengini Mapinda 3:5, 6.) Twamanya ukuti Leza wamanya vyonsi vino tukalondekwa nupya akatusakamala sana. (Masamu 37:25; 1 Petulo 5:7) Izwi lyakwe likatunena ukuti: “Mwaikala umi uwa kuntatemwisya impiya, mwalola ukuti vino mukweti vyamukwana. Pano Leza wati, ‘Ntalatala imusye nanti kumutazyela.’” (Ayebulai 13:5) Yeova asilonda ukuti twasakamala sana pa kusakamala ulupwa lwitu. Pa miku iingi walanga ukuti angapeela antu yakwe vino yakulondekwa. (Mateo 6:25-32) Asi mulandu na vino incito ino tukaomba yaya, tulinzile ukuwelenga Baibo lyonsi nu kuisambilizya, kusimikila ilandwe lisuma alino nu kuya lyonsi uku kulongana.—Mateo 24:14; Ayebulai 10:24, 25.

20. Tungacita uli pakuti twangupazye umi?

20 Mwaleka amanso inu yalola sile pa cintu conga. (Welengini Mateo 6:22, 23.) Cii cikupiliula ukuti tulinzile ukwangupazya umi pakuti twaika sile mano pa kuombela Yeova. Twamanya ukuti cisi ca mano ukuleka impiya, uwikalo usuma, nanti iviombelo ivipya ivya ndakai ukuya ivicindame sana umu umi witu ukucila ucuza witu na Leza. Nomba i cani cingatwazwa ukukolezya ivintu ivicindame? Tulinzile ukwezya na maka ukukanakongola. Ndi cakuti mwakwata mpiti inkongole tantikini vino mungacita pakuti mucefyeko inkongole zizyo nanti sile ukulipila sile zyonsi. Ndi cakuti tutacenjile ivyuma vingatusendela insita ikulu na maka nupya cingalenga tutakwata ni nsita ya kupepa, ukusambilila nanti  ukusimikila. Mu cifulo cakulenga ivyuma vyavulunganya umi witu, tulinzile ukusambilila ukwikala kulingana na vino tukweti ivikalondekwa sana umu umi ivili wa “vya kulya ni vya kuzwala.” (1 Timoti 6:8) Nupya asi mulandu na vino umi witu uli, cingazipa insita zimwi ukuiceceta sweineco ukulola vino tungacita pakuti twaombela Yeova lyonsi.

21. U mulandu ci uno tulinzile ukusoolwela vino tulinzile ukukolezya umu umi witu?

21 Mwakolezya ivintu ivicindamisye. Tulinzile ukuomvya  insita itu, amaka ni vyuma vitu ningo. Ndi cakuti tutacenjile ivintu ivisi vicindame ivili wa masambililo nanti impiya vingatusendela sana insita. Yesu watiile: “Mutale mulonde Uwene wakwe Leza.” (Mateo 6:33) Vino tukasoolola ukucita, vino tukaelezya ukucita, vino tukacita cila wanda alino na mauyo yano twimika vikalanga vino tukakolezya.

UMULIMO UCINDAME SANA UNO TUNGAOMBA

22, 23. (a) U mulimo ci ucindame sana uno swe Ina Klistu twakwata? (b) I vyani vilatwazwa ukuipakizya incito itu?

22 Umulimo ucindame sana uno twakwata u kuombela Yeova nu kusimikila ilandwe lisuma kuli yauze. (Mateo 24:14; 28:19, 20) Wakwe vino Yesu wacitanga, naswe kwene tukalonda ukuomba umulimo uu ukufika apapezile amaka itu. Yamwi yakakuukila uku vifulo kuno kukalondekwa sana ya kasimikila. Yauze yene yakasambilila ululimi luze pakuti yasimikila uku antu akalanda ululimi kwene lulo. Mwalanda na antu acitapo ivintu kwene vivyo nu kuyuzya. Yalamunena ukuti yaya sana ni nsansa umu umi wao nupya yakaipakizya.—Welengini Mapinda 10:22.

Ukuombela Yeova ali mulimo ucindame sana uno tungaomba

23 Ndakai sweingi tukasumba sana insita ikulu uku milimo itu pakuti sile tulondele ulupwa lwitu vino lukulondekwa. Yeova wamanya vivyo, nupya akataizya sana pali vyonsi vino tukacita pakuti tusakamale ulupwa. Fwandi lekini tutwalilile ukukolanya Yeova na Yesu ukuombesya, asi mulandu ni milimo ino tukaomba. Nupya lekini twaiusya ukuti umulimo ucindame sana uno twakwata u kuombela Yeova nu kusimikila ilandwe lisuma ilya Wene Wakwe Leza. Na cii cilalenga tuye sana ni nsansa.