Skip to content

Muye pa utantiko wa vilimo

 CIPANDE 12

Mungacita Uli Pakuti Muye Cuza Wakwe Leza?

Mungacita Uli Pakuti Muye Cuza Wakwe Leza?

1, 2. Aaweni yamwi yamwi aali ya cuza yakwe Yeova?

UMUNTU wa musango ci wino mungatemwa ukuti aye cuza winu? Nanti ciye uli, mungatemwa umuntu uwaya ningo, wino mukauvwana sana. Mungatemwa sana umuntu uwakuti waya ni miyele isuma nupya uwa cikuuku.

2 Yeova Leza akasoolola antu yamwi ukuti yaye yacuza yakwe. Umuntu umwi uwali cuza wakwe Yeova a Abulaamu. (Ezaya 41:8; Yakobo 2:23) Namuze wino Yeova watemilwe sana a Davidi. Leza walanzile ukuti Davidi wali ‘u muntu wino mwenzo wakwe watemilwe.’ (Milimo 13:22) Nakupya, Yeova walolanga kasema Danieli ukuti wali ‘umutemwikwe cuze.’—Danieli 9:23.

3. I cani calenzile ukuti Abulaamu, Davidi, na Danieli yaye ya cuza yakwe Yeova?

3 I cani calenzile ukuti Abulaamu, Davidi, na Danieli yaye ya cuza yakwe Yeova? Yeova wanenyile Abulaamu ukuti: ‘Watunjela.’ (Utandiko 22:18) Fwandi Yeova akaaya cuza kuli yaayo aakamuvwila. Nanti sile u luko lwa yantu, lungaya na ucuza na aliwe. Yeova wanenyile aina Izlaeli ati: “Mwayela amazwi yane, pakuti nje Leza winu nga namwe mulaya antu yane.” (Yelemiya 7:23) Fwandi namwe kwene mulinzile ukuvwila Yeova nga mukulondesya ukuya cuza wakwe.

YEOVA AKACINGILILA YA CUZA YAKWE

4, 5. Uzye Yeova akacingilila uli ya cuza yakwe?

4 Baibo ikati Yeova akalondesya ‘ukupeela amaka kuli  yayo yano imyenzo yao i ya cumi kuli aliwe.’ (2 Milandu 16:9) Pa Masamu 32:8 paaya amazwi yano Yeova walaya ya cuza yakwe aakuti: “Namakusambilizyanga nu kukulanga inzila mwakupita. Namakuwakanga nu kukupanda mano.”

5 Mulwani witu uwa maka akalonda ukutulesya ukuya ya cuza yakwe Leza. Lelo Yeova akaalonda ukutucingilila. (Welengini Masamu 55:22.) Swe ya cuza yakwe Yeova tukamuombela nu mwenzo witu onsi. Tukaaya acisinka kuli aliwe nanti sile tuli ni ntazi. Nupya twaya nu utailo wakwe uno kalemba wa masamu wakweti. Walanzile ati: “[Yeova] ali pipi ukwi kasa lilunji lyane, fwandi kusi icingantenkanya.” (Masamu 16:8; 63:8) Uzye Satana akaezya uli ukutulesya ukuya ya cuza yakwe Leza?

VINO SATANA WATWISIKE ANTUNZE

6. I vyani vino Satana walanzile pa yantunze?

6 Umu Cipande 11 twasambilile vino Satana Ciwa watwisike ukateeka wakwe Leza nu kumupeela umulandu wa kuti wene u waufi nupya ataaya ningo pa kukanaleka Adamu na Eva yaipingula aeneco icipe ni cisuma. Mwi buku lyako Yobo tukasambililamo ukuti Satana acili akatwisika antu aakalonda ukuya ya cuza yakwe Leza. Satana akalanda ukuti antu yasyaombela Leza pa mulandu nu kumutemwa, lelo a pa mulandu wakuti akayapeela vimwi. Nupya Satana akati wene angatalusya aliwensi kuli Leza. Lekini tulole vino tungasambilila kuli Yobo na vino Yeova wamucingilile.

7, 8. (a) Uzye Yeova wayuvwanga uli pa miyele yakwe Yobo? (b) I vyani vino Satana walanzile pali Yobo?

7 Uzye Yobo wali a weni? Wali umonsi umusuma sana uwaliko pano nsi imyaka apipi na 3,600 iyapitapo. Yeova walanzile ukuti pa nsita iya kutali umuntu ali wensi pano nsi uwakweti imiyele isuma wakwe Yobo. Yobo wacindike  sana Leza nupya wapasile iviipe. (Yobo 1:8) Yobo wali a cuza wakwe Yeova uwa cisinka.

8 Satana walanzile ukuti Yobo akaombela sile Yeova pa mulandu na ukaitemwe. Satana wanenyile Yeova ati: “Uzye asi wewe kwene ukamucingilila pamwi ni vyuma vyakwe vyonsi? Ukapolelela icili consi cino akacita. I calenga ni viteekwa vyakwe visanduluke mu mpanga yonsi. Lelo ndi cakuti wapokolola na vyonsi vino akweti, umalola wakutuka ale ukuvwa nu kuvwa!”—Yobo 1:10, 11.

9. Uzye Yeova wazumilizye Satana ukucita cani?

9 Satana walanzile ukuti Yobo waombelanga Yeova pa mulandu sile na vino Leza wamupeelanga. Nakupya, Satana walanzile ati angalesya Yobo ukuombela Yeova. Yeova atazumilizye vino Satana walanzile, lelo wamupeezile insambu zya kwezya Yobo pakuti cimanyikwe ngi cakuti Yobo waombelanga Yeova apa mulandu na ukaitemwe.

VINO SATANA WEZIZYE YOBO

10. A mezyo ci yano Satana waleesile pali Yobo, nupya Yobo wacisile uli?

10 Cakutandikilako, Satana walenzile ukuti Yobo aponzye iviteekwa vyakwe vyonsi. Lyene Satana wakomile na aomvi yakwe Yobo aingi. Yobo waponzizye vyonsi vino wakweti. Na pakusyalikizya, Satana wakomile ana yakwe Yobo yonsi kwene 10 uku cipunga iciipisye ica mvula. Nomba Yobo watwalilile ukuya uwa cisinka kuli Yeova. “Umu uzanzo uwo onsi, Yobo atatazile aifye nanti cimwi nanti ukupeela [Yeova] umulandu.”—Yobo 1:12-19, 22.

Yeova walambwile Yobo pa kuya na ucisinka kuli aliwe

11. (a) I cani cuze cino Satana wacisile kuli Yobo? (b) Uzye Yobo wacisile uli?

11 Satana ataatiile papokwene. Wanenyile Leza ati: “Ndi cakuti wemo wala wakumya ku mwili wakwe nu kumutota, cawaya, ulalola vino alakutuka nu kukutipwila ale ukulola nu kulola!” Fwandi Satana walenzile Yobo ukulwala  indwala imwi iipisye. (Yobo 2:5,  7) Nalyo kwene Yobo watwalilile ukuya uwa cisinka kuli Yeova. Walanzile ati: “Mpaka sile ni mfwa yane, ntalatala inte ukuvwanga ukuti nene muntu umwi uwakaele.”—Yobo 27:5.

12. Uzye Yobo wasinile uli Satana ukuti u waufi?

12 Yobo ataamanyile icili consi pali vino Satana walanzile nanti umulandu uno waculilanga. Welenganyanga ukuti Yeova aliwe walenzile ukuti acule. (Yobo 6:4; 16:11-14) Lelo nanti cali vivyo, Yobo watwaliliile ukuya uwa cisinka kuli Yeova. Lyene patali cakutwisika. Yobo ataombelanga Yeova pa mulandu wakuti wamupeelanga vimwi, lelo wamuombelanga pa mulandu wakuti wamutemilwe. Imilandu yonsi ino Satana wapeezile yali iya ufi sile!

13. I vyani ivyacitikiile Yobo pa mulandu nu kuya uwa cisinka kuli Leza?

13 Nanti icakuti Yobo ataamanyile ivyacitikanga umwiyulu, watwalilile ukuya uwa cisinka kuli Leza nu kusinila Satana ukuti u mwipe. Yeova walambwile Yobo pali ucisinka uno wakweti.—Yobo 42:12-17.

VINO SATANA AKATWISIKA PALI MWEMWE

14, 15. I vyani vino Satana walanzile pa antunze yonsi?

14 Mungasambilila amasambililo acindame kuli vino vyacitikile Yobo. Na ndakai kwene Satana akati tukaombela Yeova pa mulandu sile uwakuti akatupeela vimwi. Pali Yobo 2:4 Satana walanzile ati: “Umuntu ali nu kupeela vyonsi vino wakwata pakuti aikale nu umi.” Fwandi Satana wanenanga antunze yonsi, asi a Yobo mutupu foo. Na lino paapisile imyaka iingi kufuma pano Yobo wafwilile, Satana watwalilile ukusaalula Yeova nu kulanda iviipe pa yaomvi yakwe. Pa Mapinda 27:11, paaya mazwi akuti: “Mwanane, uye na mano, pakuti uzanzye umwenzo wane, pakuti ningakwata insambu zya kwasuka wensi wino anganzewanya.”

 15 Mungasoolola ukulauvwila Yeova nu kuya cuza wakwe uwacisinka nu kusinila Satana ukuti u waufi. Icintu cicindamisye cino mungapingulapo ukucita, u kusenula imiyele inu nu kuya cuza wakwe Leza. Mufwile ukupingulapo zuwa ukucita vivyo. Satana akati mutanga mutwalilile ukuya acisinka kuli Yeova ndi cakuti mwaya na mavya. Akaezya na maka kutulenga kuti tutaya acisinka kuli Leza. Akacita uli vivyo?

16. (a) Iinzila ci zino Satana akaomvya pa kulesya antu ukuombela Yeova? (b) Nga mwemo, uzye Ciwa angacita uli pa kumutoovola ukuti mutaaombela Yeova?

16 Satana akaomvya inzila izingi pakuti atulesye ukuya ya cuza yakwe Leza. Akazanza “wakwe cisama wino akulunga umwi uwakuti alye.” (1 Petulo 5:8) Fwandi mutafwile ukuzunguka ndi cakuti auzo, yalupwa inu, nanti antu yauze yakumulesya ukusambilila Baibo nu kukonka vino mukusambilila. Mungaalola kwati yakumuzanza. * (Yoane 15:19, 20) Nupya Satana akaipanga kuti aloleke “wa mungeli wa luswepo.” Fwandi angatusomba pakuti tutauvwila Yeova. (2 Kolinto 11:14) Inzila nayuze ino Satana akaomvya pa kwezya ukutulesya ukuombela Yeova, u kuleka kuti twaelenganya ukuti tutange tuzanzye Yeova.—Mapinda 24:10.

MWAUVWILA MASUNDE YAKWE YEOVA

17. U mulandu ci uno tukauvwila Yeova?

17 Nga tukuvwila Yeova, ala tukusinila Satana ukuti u wa ufi. I cani icingatwavwa ukuya ni cumvwila? Baibo ikaati: “Uwatemwa [Yeova] Umwene Leza wako nu mwenzo wako onsi, nu umi wako onsi, na maka yako yonsi.”  (Malango 6:5) Tukaumvwila Yeova pa mulandu wakuti twamutemwa. Lino tukuya tukutemelwako Yeova, tulaalondesya ukucita vyonsi vino watuneena kuti tucite. Mutumwa Yoane walemvile ati: “Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale.”—1 Yoane 5:3.

18, 19. (a) I vintu ci vimwi-vimwi vino Yeova walanda ukuti i viipe? (b) Uzye twamanya uli ukuti Yeova asituneena ukuti twacita ivintu vino tutanga-tukwanisye?

18 Nomba i vyani vimwi vino Yeova watukaanya ukucita? Mu kambokosi akakweti umutwe wakuti: “ Patini Ivintu Vino Yeova Wapata,” muli vimwi vimwi vino Yeova watukaanya ukucita. Limwi pa kutandika, mungalola kwati ivicitwa vimwi pali vivyo ivitantikwe vitaipa sana. Lelo ndi mwawelenga Baibo nu kwelenganyapo sana, alino muliluka ukuti fwandi cacindama ukuvwila masunde yako Leza. Nupya mulalola nu kuti muli mumwi muno  mufwile ukusenuka. Nanti cakuti ukucita vivyo insita zimwi kutangupala, nga mwazifya imiyele inu, mulaaya nu mutende ni nsansa izikaiza ndi cakuti tuli na ucuza usuma na Leza. (Ezaya 48:17, 18) Twasininkizya uli ukuti umuntu angasenuka nu kuya ni miyele isuma?

19 Yeova asitunena ukuti tucite icili consi cino tutanga tukwanisye. (Malango 30:11-14) Wene a cuza witu, fwandi watumanya ningo kucila vino twaimanya sweineco. Wene wamanya ningo apapelela amaka itu alino na muno twatonta. (Masamu 103:14) Mutumwa Paulo watukomelizye ati: “Leza wene uwakutailwa. Wene atalazumilizya kuti mweziwe kuluta pali vino mungaposya. Pa nsita ino mukweziwa, wene alamulanga inzila yakuleukila matunko pa kumupeela maka akuti muposye.” (1 Kolinto 10:13) Fwandi tungataila ukuti lyonsi Yeova akulatupeela amaka pakuti twacita vya ololoke. Alamupeela “maka ya umi” pakuti mwazizimizya intazi, nanti zingatala uli. (2 Kolinto 4:7) Lino Paulo waweni vino Yeova  wamwazwanga lino ali ni ntazi, calenzile alembe ukuti: “Klistu wampeela maka akulungatana ni miyele ili yonsi.”—Filipi 4:13.

MWACITA VINO LEZA WATEMWA

20. I miyele ci ino Yeova wakwata ino mufwile ukukolanya, nupya u mulandu ci?

20 Ndi cakuti tukulonda ukuya cuza wakwe Yeova, tulinzile ukusenka kuli vino Yeova wapata. Lelo kwaya na vyuze vino tufwile ukucita. (Loma 12:9) Ya cuza yakwe Leza yaatemwa ivintu vino wene watemwa. Vimwi-vimwi vino Leza watemwa vyalondololwa pa Masamu 15:1-5. (Welengini.) Yacuza yakwe Yeova yakakolanya miyele yakwe nu kulanga ‘ukutemwa, uluzango, mutende, kuteeka umwenzo, uluse, cikuuku, kuya a cumi, kuicefya, nu kuikaanya.’—Galatiya 5:22, 23.

21. Mungacita uli pakuti muye ni miyele ino Leza watemwa?

21 Mungacita uli pa kuya ni miyele isuma wakwe ii? Mufwile ukusambilila vino Yeova watemwa lino mukuwelenga nu kusambilila Baibo lyonsi. (Ezaya 30:20, 21) Lino mukucita vii, mumatemwanga sana Yeova, alino cimamwavwanga ukulondesya ukumuvwila.

22. Uzye cilaya uli ndi mukuvwila Yeova?

22 Kusenula imiyele inu kungakolana nu kuzula ivyakuzwala ivyampiti alino ukuzwala ivipya. Baibo ikalanda ukuti mufwile ‘ukufumako ku umi wa mpiti’ nu kwingila ‘umu umi upya.’ (Kolose 3:9, 10) Nanti cakuti citange cangupale ukucita vivyo, ndi twasenula imiyele itu nu kuvwila Yeova, watulaya ukuti alatupeela “cilambu icikalamba.” (Masamu 19:11) Fwandi mwasoolola ukuvwila Yeova nu kusinila Satana ukuti u wa ufi. Mwaombela Yeova pa mulandu wa kumutemwa, asi a pa mulandu wakuti mukulonda kucapokelela vimwi uku nkoleelo. Lyene mulaya cuza musuma wakwe Leza!

^ par. 16 Cico cisikupiliula ukuti wensi aakumukaanya ukusambilila Baibo ala a Satana uwatamutuma. Lelo Satana ali “leza wa nsi yii,” nupya “insi yonsi yaaya pisika lya utesi [wakwe].” Fwandi citafwile ukumuzungusya lino yamwi yakumukaanya ukusambilila Baibo.—2 Kolinto 4:4; 1 Yoane 5:19.