Skip to content

Muye pa utantiko wa vilimo

 ILYASI 87

Yesu Umu Ng’anda Ya Kupepelamo

Yesu Umu Ng’anda Ya Kupepelamo

LOLA umulumendo wino akulanda uku ikolo. Aikolo yaa aakasambilizya aapa ng’anda yakwe Leza iya kupepelamo iyayela umu Yelusalemu. Alino umulumendo wii a Yesu. Pa nsita yii ala watakulako. Lyene, ali ni myaka iya kuvyalwa 12.

Ya kasambilizya yati-yazunguka vino Yesu wamanya ivingi pali Leza ni vintu ivyaya muli Baibo. Nomba, u mulandu ci uno Yosefu na Maliya yatayelilepo paa? Uzye yalikwi? Leka tuvwe.

Cila-mwaka Yosefu wasendanga ulupwa lwakwe uku Yelusalemu mukuzevya Ucilo. Yaapitanga ulwendo ulutali sana pa kuyafika uku Yelusalemu kufuma uku Nazaleti. Kutaali uwakweti motoka, nanti sile amasitima. Pa nsita iiya, yataakwatanga vyonsi kwene vii. Antu aingi yaapitanga sile apansi, nupya paapitanga amanda yatatu pa kuyafika uku Yelusalemu.

Pa nsita ii lyene, ala Yosefu watakwata ulupwa ulukulu. Fwandi kwali nayauze aato yakwe Yesu aonsi na anaci yano Yosefu walondekwanga ukusakamala. Lyene umwaka uu wene Yosefu na Maliya yaaswililanga ukumwao ku Nazaleti pamwi na ana yao. Yelenganyanga ukuti Yesu wapitilanga pamwi na antu yauze. Nomba lino yaaile-imilila pa cifulo cimwi, ala iiyapita intamfu itali, yaaweni ukuti Yesu asipo. Yaatandike ukulonda Yesu muli yalupwa yao alino na muli yacuza yao, nomba yataamuzanyile! Lyene, yaaswilile uku Yelusalemu uku kulonda Yesu.

Lino yaafisile, yaazanyile Yesu ala ali na ya kasambilizya. Uvwanga vino ya kasambilizya yaa yaalandanga, nupya uzyanga na mauzyo. Antu yonsi yaazungukanga vino Yesu wali umucenjele sana. Nomba Maliya uzizye Yesu ati: ‘Mwana we, i cani cino watucuzizya vii? Ya so pamwi nani twati tusakamala sana tuzusile tukukulonda.’

Yesu nawe waswike ati: ‘I cani cino mukundondela? Uzye mutaamanya ukuti nemo ndinzile ukwikala umu ng’anda yakwe Tata?’

Yesu watemilwe ukuzanwa kuno angasambilila pali Leza. Nafwe tulinzile ukumukolanya, uzye asi avivyo vwile? Lino yaaswiliile uku Nazaleti, Yesu wayanga uku kulongana cila-mulungu. Yesu wamanyile ivingi sana ivya muli Baibo pano wene wikangako amano lino akusambilila. Fwandi naswe tufwile ukukolanya Yesu nu kulondela vyonsi vino wacitanga.