Skip to content

Muye pa utantiko wa vilimo

 ILYASI 85

JYesu Wavyalwa

JYesu Wavyalwa

UZYE watuumanya iziina lya kanya kaa? Ee, a Yesu. Watavyalilwa umu cikuulwa cino yakasungilamo ya punda ni inyama zyuze. Vikuulwa vivyo vyapusana nu uluwa nanti citata pano vyene vikaloleka kwati ng’anda. Maliya akulonda alaalike Yesu umu mulangu, muno yakapeelela ya punda ni inyama zyuze ivyakulya. Nomba, u mulandu ci uno Maliya na Yosefu yaelile muu? Ii, isi ncende isuma muno mwana afwile ukuvyalilwa, asi avivyo?

Ee, isi ncende isuma. Nomba, umulandu uno yaeliile muu aeu: Kateeka wa ina Loma, Agusto, wisile isunde ilyakuti cila-muntu afwile ukuswilila kuno wavyalilwe ukuti akalembesye iziina lyakwe umwibuku. Yosefu wavyalilwe kukwene uku Betelemu. Nomba lino Yosefu na Maliya yaafisile ukuntu kuu, kutaali ing’anda muno yaali nu kufikila. Fwandi acino yailiile umwali inyama. Nupya uwanda kwene uuwa, ali lino Maliya waviile Yesu! Nomba, Yesu ali sile ningo, wakwe vino ukulola pa cikope.

Uzye watuulola ya kacema apa cikope aakwiza uku kulola Yesu? Uwanda uno Yesu wavilwe, ya kacema yaali umu mpanga usiku ala yakucema imfwele, lyene kwawazile sana uluswepo kuno yaali. Uluswepo lulu lwali u mungeli! Ya kacema yuvwile sana intete. Nomba, umungeli wayaneenyile ati: ‘Mutuvwa intete! Nati-mukwatila ilandwe lisuma. Uwanda wilelo, umu Betelemu, Klistu Umwene watavyalwa. Aliwe alapususya antu! Mumaya mukamuzane watapombwa umu nsalu, nupya iyamulaalika umu mulangu.’ Awe papokwene sile kwizile angeli aingi cuze iyatandika ukulumbanya Leza. Nayo acemi yaakatwike zuwa-zuwa nu kupitisya kuti yakalonde ukwali Yesu; lyene paa, yamuzana ndi vino ukulola apa cikope.

Uzye wamanya umulandu uno Yesu wayeela umucindame sana? Uzye wamumanya ningo? Iusya vino twalanzilepo pali Mwana Leza umonsi uwa nkoleelo umwilyasi lya kutandikilapo umwibuku kwene lii. Umwana kwene wiiya, waombanga na Yeova pa kupanga amayulu ni insi ni vintu vyuze. Wiyo, ali Yesu kwene!

Yeova wakuusizye umi wa Mwana wakwe ukufuma ukwiyulu nu kuwika umunda yakwe Maliya. Papokwene sile akanya kaatandike ukukula umu ndilwa yakwe Maliya wakwe vino utunya toonsi tukakula. Nomba, umwana wii wene, wali a Mwana Leza. Yesu wizile avyalilwa umu cikuulwa ca nyama uku Betelemu wakwe vino uweni apa cikope. Uzye lyene wamanya icalenzile ukuti angeli yazange sana nu kuneena antu pa kuvyalwa kwakwe Yesu?