Skip to content

Muye pa utantiko wa vilimo

 ILYASI 50

Anaci Yaili Asipe

Anaci Yaili Asipe

LINO aina Izlaeli yaali ni intazi, yalililanga kuli Yeova. Nawe Yeova wayapeelanga ya katungulula aataakweti intete aayaazwanga. Baibo ika-ama ya katungulula kwene yaa ukuti yakapingula. Yoswa u wali kapingula wa kutandikilako, lyene kwizile kuya na yakapingula na yauze wakwe Otinieli, Eudi na Syamugali. Nomba yaili avwilizye aina Izlaeli, yaali anaci yano yaamanga ukuti Debola na Yaeli.

Debola wali a kasesema mwanaci. Yeova wamuneenanga ivyali nu kucitika uku nkoleelo, nawe waneenanga antu vino uuvwa ukufuma kuli Yeova. Nakupya, Debola wali a kapingula. Wikalanga umwisika lya kancindu, nupya antu iizanga kuli aliwe pakuti aiza ayazwilizya.

Pa nsita kwene iiya, Yabini u wali umwene wa Kenani. Wakweti amaceleta 900 aankondo. Iumba lyakwe ilya yasilika lyali na maka sana icakuti aina Izlaeli aingi yaayapatikizye ukutandika ukuombela Yabini. Kapitao wa yasilika yakwe Yabini yamwamanga yakuti Sisela.

Wanda umwi, Debola watumile amazwi kuli Kapingula Balaki aakuti: ‘Yeova watalanda ukuti: “Senda aonsi 10,000 nu kuyatungulula uku Mwamba wa Taboli. Indi nu kukuletela Sisela kuuku kwene. Nupya ndakupeela amaka yakumucimvya na asilika yakwe.”’

Balaki waneenyile Debola ukuti: ‘Indi nu kuya ndi cakuti naawe wazumila ukuti tuce tupite swensi.’ Debola walondiile, lelo waneenyile Balaki ukuti: ‘Asi wewe wino yalacindika pa kucimvya ukulayako, pano Yeova alaomvya umwanaci ukukoma Sisela.’ Nupya vivikwene i vyacitiike.

Balaki watentemwike umwamba wa Taboli ukuya komaanya asilika yakwe Sisela. Lyene Yeova walenzile imvula ukutoonya sana, nupya asilika aingi aali alwani ya ina Izlaeli yamwelile muli mulamba. Nomba, Sisela wene wapuusile ni celeta lyakwe.

Lino paapisile akasita sile akanoono, Sisela waile ukwitenti lyakwe Yaeli. Avino Yaeli nawe wamwingizye nu kumupeela umukaka. Lino wamwile umukaka, uvwile sana utulo alaala akondelwa nu kukondelwa. Lyene Yaeli watoozile ulupoopo lwitenti nu kulupampamila umu mutwe wakwe Sisela. Lino Balaki wizile, Yaeli wamulanzile apaali Sisela ala watafwa! Fwandi vino Debola walanzile vyali ivya cumi.

Lyene nu mwene Yabini nawe kwene yamumoozile, avino aina Izlaeli izile yaya nu mutende pa nsita inoono.