Skip to content

Muye pa utantiko wa vilimo

 ILYASI 47

Mupuupu Umu Izlaeli

Mupuupu Umu Izlaeli

LOLA ivintu vino umonsi wii akuziika umwitenti lino akaikala mwenemo! Akuziika umukanju na goldi na siluva. Watavisenda ukufuma umu musumba wa Yeliko. Nomba uzye i cani icaali nu kucitika uku vintu ivyafumile umu musumba wa Yeliko? Uzye ukwiusya?

Vyali nu konoonwa, alino goldi na siluva vyali nu kupeelwa uku cipao umwitenti lya kupepelamo Yeova. Fwandi antu yaa, yatuuvwilile vino Leza walanzile. Iivile ivintu vyakwe Leza. Iziina lya monsi wii a Akani, alino yaayo yano ali nayo aamu lupwa lwakwe. Leka tulole ivyacitiike.

Pa nsita ino Akani wivile ivintu vii, Yoswa watumile aonsi yamwi ukuya umu kulwa na antu ya mu musumba wa Ai. Nomba, yaaile iyacimviwa umu ulwi. Yamwi yaakomilwe, alino yauze nayo yuutwike. Yoswa wizile aya nu ulanda sana. Wakupime apa nsi nu kupepa kuli Yeova ati: ‘U mulandu ci uno walekela ica musango uu ukutucitikila?’

Yeova waswike ukuti: ‘Katuka! Aina Izlaeli yati-ifya. Yati-yatoola ivintu vimwi ivyali nu konoonwa nanti ukupeelwa ukwitenti lyakupepelamo Yeova. Yati-iya umukanju usuma nu ku-ufisa. Ntalakupolelela suka uce uonoone umukanju kwene uuwa, nu kumoola uwasenzile ivintu kwene vii.’ Yeova walanzile ukuti wali nu kulanga Yoswa umuntu kwene wiyo umwipe.

Lyene Yoswa akolonganika antu yonsi pamwi, na Yeova asoolola umuntu kwene wiyo umwipe, Akani. Akani alaanda ukuti: ‘Nati-nifya. Naweni umukanju usuma, na goldi na siluva. Navikumvilwe sana icakuti navisenzile. Mumavizana nati-mviziika apa nsi umwitenti lyane.’

Lino ivintu kwene vii vyazanyilwe nu kuletwa kuli Yoswa, Yoswa waneenyile Akani ati: ‘I cani cino watuletelela vii? Ilelo Yeova amakufulula!’ Lyene antu yonsi iyatoola mawe nu kutamola Akani nu lupwa lwakwe mpaka yafwa. Icintu cii, cikutusambilizya ukuti tutafwile ukutoola ivintu ivisi viitu, asi avivyo?

Lyene aina Izlaeli yaaswilile umukulwa na ina Ai. Umuku uu wene Yeova wavwilizye antu yakwe, nupya yacimvizye umu ulwi.