Skip to content

Muye pa utantiko wa vilimo

 VINO SWE INA KLISTU TWAAYA

Vino Tungacita Pakuti Tutemwe Yeova na Anji

Vino Tungacita Pakuti Tutemwe Yeova na Anji

Nanti cakuti Masunde Yakwe Mose yatasintililwapo uku Ina Klistu ya ndakai, Masunde yaili akalamba yano yalembwamo kulikuti ukutemwa Leza nu kutemwa anji yacili yakalanda pa cicindame cino Yeova akalonda ukuti swe yantu twacita. (Mate. 22:37-39) Ukutemwa ukukalandwa paa tusivyalwa nako. Tulinzile ukucitapo cimwi. I vyani vino tulinzile ukucita? Conga cino tulinzile ukucita, u kuwelenga Baibo cila wanda. Nga twasambilila pa miyele iingi ino Leza wakwata ino tukawelenga muli Baibo, mu cumi tukalola “usuma wakwe Yeova.” (Masa. 27:4) Nupya ci cikalenga tumutemwe sana nu kulaelenganya wakwe aliwe. Cilalenga nu kuti twauvwila Masunde yakwe, ukwikako ni sunde lyakuipelesya ukwazwako yauze. (Yoa. 13:34, 35; 1 Yoa. 5:3) Lolini ivintu vitatu ivingamwazwa ukuti mwaipakizya ukuwelenga Baibo:

  • Mwaikako amano nu kwelenganya ukuti vikucitika. Mwaelenganya ukuti akuno muli. I vyani vino mungalola, ukuvwa, alino nu ku nunsya? Uzye yano muli nayo kuko kwene yangayuvwa uli?

  • Mwasenula imiwelengele. Limwi mungacita vii: Ukuwelenga ala mukufumya izwi, nanti ukulondela muli vino yakopela limwi. Mungawelenga pa muntu umwi uwalembwa muli Baibo nanti pi lyasi sile limwi ukuluta ukulondela vino ivipande vyakonkana. Mungaomvyako cipande 4 mu kabuku kaakuti Kabuku Akakutwazwa Ukusambilila Izwi Lyakwe Leza pa kuwelenga pali Yesu. Ukuwelenga icipande consi pano iyatola ilembelo lyakusambilila cila wanda. Mungawelenga mabuku amuli Baibo ukulingana na vino yakonkana kulembwa.

  • Mwawelenga kuti muvwe ivikulandwapo. Kuwelenga nanti icipande conga pakuti mukwate insita yakwelenganya pali vino mwawelenga kwazipapo ukuluta ukuwelenga ivipande ivingi. Mwalola insita isuma. Mwaelenganya pali vyonsi ivyati vilandwapo. Mwaomvya ya mapu ni vyeo vyuze vino iyalozyako. Mwalondelezya pali vino mutuvwikisye. Nga mungakwanisya, cingazipa ukukwata insita yakwelenganya pali vino umukuwelenga ukulingana ni insita ino umwasumba pa kuwelenga.