Skip to content

Ivya Kulondela Apa Kulongana Kwakuti Swe Ina Klistu Nu Mulimo Witu

Ivya Kulondela Apa Kulongana Kwakuti Swe Ina Klistu Nu Mulimo Witu

Ivili Mwenemo

 

Palagalafu

Amazwi Aakuyulila Ukulongana

 2

Ivyuma Ivyaya Umwizwi Lyakwe Leza

 3

Sambililini Kuomba Ningo Umulimo wa Kusimikila

 4

Vino Swe Ina Klistu Twaaya

 5

Amazwi Aakuyalila Ukulongana

 6

Mwaombesya Pakuti Mwawelenga nu Kusambilizya Ningo

 7

Kwazwa Umusambi

 8

Insita

 9

Kutandala Kwa Mwangalizi wa Ciputulwa

 10

Mulungu wa Ukongano wa Ciputulwa Nanti Citungu

 11

Mulungu Lino Kuli Iciusyol

 12

Umwangalizi wa Kulongana Ukwakuti Swe Ina Klistu nu Mulimo Witu

 13

Ceyamani wa Kulongana Ukwakuti Swe Ina Klistu nu Mulimo Witu

 14

Kalemanya Umwi Umba Lyakwe ya Eluda

 15

Kasunda Muiyele

 16

Makalasi Yauze

 17

Mavidyo

 18

1. Kulongana ukwakuti Swe Ina Klistu nu Mulimo Witu kulaatungululwa ukulingana na vino Kabuku Kakuomvya pa Kulongana iikalondolola alino na vino ivyeo ivili apisika ivilanda. Ya kasimikila yonsi yalinzile kupeelwa malyasi akulangilila ivya kusimikila. Lyene yonsi akazanwa ku kulongana yano yasi ya kasimikila, limwi yangapelwa ndi cakuti yazumila ivisambilizyo vya muli Baibo nupya yaya ni miyele isuma ino Aina Klistu yalinzile kukwata.—be ifwa 282.

 2. Amazwi Aakuyulila Ukulongana: Mamineti yatatu nanti ukucepako. Cila mulungu, apa cisila ca lwimbo ni pepo, ceyamani uwa kulongana kuu, alalanda vino amalyasi aali umu kulongana kwa mulungu uwo yali, nu kulanda iuzyo ilili pi Pepala Lya Masuko Umu Kulongana Kwakuti Swe Ina Klistu nu Mulimo Witu.

 3. Ivyuma Ivyaya Umwi Zwi Lyakwe Leza:

  • Lyasi: Mamineti 10. Umutwe wi lyasi umuli ivisinka viili nanti vitatu, alino nu mwakufumya ivyeo, ivilembwa umu Kabuku Kakuomvya pa Kulongana. Aafwile ukupeelwa ilyasi lii, a eluda nanti umuomvi umulinge sana. Ndi cakuti mukutandika ibuku lipya umu kuwelenga Baibo ukwa mulungu, kulaaya ukutamba vidyo iilalondolola panono ivyeo ivyaya umwi buku kwene lilyo. Umwina aakulanda ilyasi lii, angalondolola ivyeo ivili muli vidyo pakuti vyuvwane na vino umutwe wi lyasi uli. Lelo, afwile ukulanda ivisinka vyonsi ivili umu kabuku. Nupya mu nsita kwene iyo, afwile nu kulondolola ivikope alino ni visinka ivili mu Malembelo mu kabuku kakuomvya pa kulongana, ivikulangilila ivyeo ivimalandwa umulungu uwo.

  • Ukuvwikisya Sana Ivyaya Umu Malembelo: Mamineti 8. Ilyasi lii i lya mauzyo na masuko ukwaula kulanda amazwi akutandikilako nanti akusyalikizya. Aafwile kulanda ilyasi lii a eluda  nanti umuomvi umulinge sana. Lino akulanda ilyasi lii afwile ukwankanya ningo insita pakuti aali umwi umba yalande ivisinka 4 kuli vino icilongano cingasambililako. Lelo, alinzile ukuzya mauzyo yonsi ukwaula kusyako. Nupya afwile kupingulapo ndi cakuti angawelenga vikomo vyonsi ivili pa mauzyo yaili akutandikilapo. Yonsi akwasukapo, yafwile ukwasuka sile umu masekondi 30 nanti ukucepako.

  • Kuwelenga Baibo: Mamineti 4 nanti ukucepako. Umwina aliwe alinzile kupeelwa ilyasi lii. Umusambi afwile ukutandika sile ukuwelenga ukwaula ukulanda amazwi ali yonsi pa kutandika nanti pa kumaliila. Ceyamani wa kulongana alaikako sana amano ukukwavwa umusambi ukuti awelenga ningo, aawelenga ivyuvwike, alumbula ningo amazwi, alinga iciunda, aimilila apalinzile, alino nu kuwelenga mu civyalilwa.

  4. Sambililini Kuomba Ningo Umulimo wa Kusimikila: Mamineti 15 nanti kucepako. Iciputulwa cii cayelako ukuti yonsi yakwata isyuko lya kusambilila ivya kusimikila na vino yangaomba ningo lino yakusimikila nu kusambilizya. Asambi yafwile kuomvya ivyeo ivili pifwa 1 lino yakulanda pa muku wakutandikilapo na lino yaswililako, umu kabuku kaakuti Swe Ina Klistu nu Mulimo Witu. Ya kasimikila ndi yakulonda yangalanda pa lupapulo nanti vidyo ili yonsi ivyaya pa viombelo vino tukaomvya mu mulimo. Insita zimwi umu kabuku kakuti Swe Ina Klistu nu Mulimo Witu mulaya ivyeo na vyuze vyakutulangilila umu kulungatika pali vino asambi yalalondela pa kucita ivilangililo. Pakuti Asambi yakwanisya kulanda ilyasi umu nsita ino yatipelwa, yatafwile ukwikamo amazwi yao. Ukupekanya ningo kungavwa ukuti umusambi alangilile icilangililo muli mineti sile wenga nanti kucepako. Pano calinga na ya eluda kwene yangapelwako malyasi akucita cilangililo.

  • Mavidyo Aakutulangilila Ivya Kusimikila: Tulatamba mavidyo cila mulungu akutulangila vino tungatandika kulanzyanya ivikacitika ndakai. Mavidyo yaa yalatulangilila vyakutandika kulanzyanya pa muku wakutandikilapo, kuswililako umuku wa kutandikilako alino na pa kuswilila kwakwe ciili. Aalinzile kutungulula ciputulwa ci ca ya sambi a Ceyamani kwene uwa kulongana mu mulungu uwo.

  • Umuku Wakutandikilapo: Umwina nanti nkazi aliwe alaapeelwa ukucita icilangililo cii. Ndi mwapeela umwina ale kaazwa afwile ukuya umwina kwene nanti lupwa lwakwe nupya ndi mwapela nkazi ale kaazwa afwile ukuya ankazi kwene nanti lupwa wakwe. Yano yakucita cilangililo ndi yakulonda yangiikala nanti kwimilila. Umusambi afwile ukusoolola imilamukile iyaya uku ncende kwene iiyo. Kulanzyanya kwene kuuko kufwile kulanga ukuti mukulondesya kutandika kulanzyanya nu muntu wiyo.

  • Kuswililako Umuku wa Kutandikilako: Umwina nanti nkazi aliwe alaapeelwa ukucita icilangililo cii. Ndi mwapeela umwina, kaazwa atafwile ukuya nkazi, nanti ndi mwapela nkazi, kaazwa atafwile ukuya mwina. (km 5/97 ifwa 2) Umusambi na kaazwa wakwe yangikala nanti ukwimilila lino yakucita cilangililo. Umusambi afwile kulangilila sile vino tungacita ndi twaya kuli wino walondesyanga kusambilila lino twamusimikile pa muku wa kutandikilapo. Amazwi akutulangilila ivya kulanzyanya na antu umu kabuku kaakuti Swe Ina Klistu nu Mulimo Witu, aakutwavwa sile ukutandika kulanzyanya na antu.

  • Kuswilila Kwakwe Ciili: Umwina nanti nkazi angapelwa ukucita icilangililo cii. Ndi mwapeela umwina, kaazwa atafwile ukuya nkazi, nanti mwapela nkazi, kaazwa atafwile ukuya mwina. (km 5/97 p. 2) Umusambi na kaazwa wakwe yangikala nanti ukwimilila lino yakucita cilangililo. Umusambi afwile kulangilila sile vino tungacita ndi twaya kuli wino walondesyanga kusambilila pa kuswilila kwa kutandikilapo. Amazwi akutulangilila ivya kulanzyanya na antu umu kabuku kaakuti Swe Ina Klistu nu Mulimo Witu, aakutwavwa sile ukutandika kulanzyanya na antu.

  • Isambililo Lya Baibo: Umwina nanti nkazi aliwe alaapeelwa ilyasi lii. Ndi mwapeela umwina, kaazwa atafwile ukuya nkazi, nupya ndi mwapela nkazi, kaazwa atafwile ukuya mwina. (km 5/97 ifwa 2). Umusambi na kaazwa wakwe ndi yakulonda yangikala nanti ukwimilila.  Ciputulwa cii cilinzile ukulangilila ukuti isambililo lya Baibo lyatilitandika mpiti ukutungululwa. Pakulangilila ivya kutungulula isambililo atafwile kulanda amazwi akuyulila nanti akuyalila, suka sile ndi cakuti akuombela pa cisinka kwene cico. Citakulondekwa ukuwelenga ivyeo vyonsi vino musambi apeezilwe nanti icakuti avino cifwile ukuya. Icicindame sana i misambilizizye isuma.

  • Ilyasi: Aafwile kulanda ilyasi lii u mwina nupya aafwile ukulilanda kwati ilyasi ku cilongano.

  5. Vino Swe Ina Klistu Twaaya: Ulwimbo ulwa kuyulila ndi lwasila, umu mamineti 15 aaciputulwa cii, mulaaya ilyasi lyonga nanti yaili aala-avwa ali umwiumba ukulondela ivyaya umwi Zwi Lyakwe Leza. Aalalanda amalyasi yayo aeluda nanti aaomvi alinge sana, namanye ngi yati mutacita vivyo. Lelo alinzile kulanda sile ilyasi lya vikulondekwa pa cilongano a eluda.

  • Sambililo Lya Baibo pa Cilongano: Mamineti 30. Aafwile ukutungulula a eluda umulinge sana. (Mu vilongano muno ya eluda yatavula, limwi yangaomvya aomvi alinge sana.) Iumba lyakwe ya eluda lifwile kusoolola wino angalinga kutungulula Sambililo Lya Baibo pa Cilongano. Yano yasoololwa kutungulula yafwile kusambilizya ningo pakuti yatapitilila mu nsita, yafwile kulalandapo sana pa malembelo aakukomya icisinka, nupya yafwile kula-avwa yonsi aali umwi umba kulalola vino yangasambililako ku vyeo vivyo. Ndi cakuti yakupituluka mu vyeo ivikalanda pa mitungulwile yi Sambililo Lya Lupungu, cilayavwa ukuti yatungulula ningo. Ndi cakuti cingalinga, cila mulungu mungaomvya ya katungulula na ya kawelenga apusane-pusane. Ndi cakuti ceyamani wa kulongana, walanda ukuti mufwile kwipimpazya Isambililo Lya Baibo pa Cilongano, ale katungulula alinzile kulola vino amacita pakuti aipimpazye. Limwi angasoololapo kukanawelenga mapalagalafu yamwi-yamwi.

  6. Amazwi Aakuyalila Ukulongana: Mamineti yatatu nanti ukucepako. Ceyamani uwa kulongana alaapituluka panono umu visinka ivingavwa icilongano ivyativisambililwapo alino nu kulandako ivili umu mulungu ulondeliilepo. Alinzile ukulanda icisinka icili api Pepala Lya Masuko Umu Kulongana Kwakuti Swe Ina Klistu nu Mulimo Witu (lma). Limwi angalumbulako ni iuzyo ililasukwa umulungu ulondeliilepo pakuti aina yaelenganyapo api uzyo kwene lilyo. Nupya umu nsita kwene iiyo, limwi angiusyako amazina ya yasambi aalalanda amalyasi umulungu ulondelilepo. Ndi cakuti kuli ivyakumayisya ivikulondekwa sana nanti ukuwelengelako aamu cilongano makalata yamwi, ceyamani kwene aliwe afwile ukulanda ivintu vivyo pa nsita kwene ino akulanda amazwi aakuyalila ukulongana, namanye sile ndi cakuti iyamunena ukuti atacita vivyo. Ivya kumanyisya ivikalondekwa lyonsi ivili wakwe kuya mu mulimo, utantiko wa mizifizye, mutafwile kuvilandila pa pulatifomu lelo mulinzile sile ukwika pa cipampa ca vyeo. Ndi cakuti ivyakumanyisya alino na makalata akuwelengela icilongano vitanga vilandwe umu nsita iyo, lyene ceyamani alinzile ukunena aina aali na malyasi umu ciputulwa cakuti Vino Swe Ina Klistu Twaaya, ukwipimpazyako malyasi yao. (Mulole  palagalafu 5 na  9.) Kulongana kulaasila nu lwimbo ni pepo.

 7. Mwaombesya Pakuti Mwawelenga nu Kusambilizya Ningo: Kutandika mu mulungu wakwe Januwale 7, 2019, ceyamani wa Kulongana Kwakuti Swe Ina Klistu nu Mulimo Witu, alaomvya kabuku kakuti Mwawelenga nu Kusambilizya pa kutaizya ya kalanda na pa kuyasunda. Mwana wi sukulu wensi alinzile ukuombela pa cisinka cino ciyalilwe muli tuu ( ) tuno tukwikwa pi lyasi lino apeezilwe mu Kabuku Aka Kuomvya mu Kulongana Kwakuti Swe Ina Klistu nu Mulimo Witu. Cila mwezi mu mulungu wa kutandikilako ceyamani wa Kulongana Kwako Swe Ina Klistu nu Mulimo Witu alalanzyanya ni umba cisinka conga mu kabuku kakuti Mwawelenga nu Kusambilizya. Ifwa pano yalemvile ukuti “Lembini Ukulunduluka Kwinu,” i vya kuomvya umusambi nupya ceyamani atalinzile ukucongapo.

  8. Kwazwa Umusambi: Umu malyasi yano asambi yalaalanda, ceyamani wa kulongana alaomvya sile mineti wenga uku kutaizya nu kwazwa umusambi api lyasi lyakwe, alaomvya kabuku kakuti Mwawelenga nu Kusambilizya. Lino ceyamani wa kulongana akwama umusambi ukuti akalande ilyasi, atafwile kulumbula icisinka pano umusambi akuombela. Lelo ndi cakuti umusambi wamala ukulanda ilyasi  nupya ceyamani walanda na mazwi akumutaizya, ali lino angalumbula icisinka cino umusambi wali akuombelapo nupya angalanda nu umulandu uno umusambi wataombela ningo pa cisinka cico nanti ukulondolola mu cikuuku umulandu uno cingazipila ukuti umusambi akikisyeko sana mano uku cisinka kwene cico. Ndi cakuti cikulondekwa sana ukwavwa umusambi wenga na wenga, mungamwavwa pa cisila ca kulongana nanti insita yuze, mungamwavwa apa cisinka kwene cino mwamupeezile ukuti akaombelepo nanti pali vyuze ivingalenga ukuti aalanda ningo malyasi, mungaomvya kabuku kakuti Mwawelenga nu Kusambilizya nanti ibuku li Sukulu. Pakuti mumanye umulimo uno umwangalizi uwa kulongana ukwakuti Swe Ina Klistu na kasunda muiyele yalaomba, mulole  mapalagalafu 13 na  16.

    9. Insita: Kusi ilyasi lino lilinzile kupitilila mu nsita, nanti a ceyamani wa kulongana kwene atafwile ukupitilila umu nsita yakwe. Ndi nsita yakwana sile, mufwile ukwimika umusambi umu mucenjelo. Ndi cakuti yauze aakulanda amalyasi umu kulongana yapitilila umu nsita, kasunda muiyele alinzile ukuya yasundila apa mbali. Ukulongana konsi kulinzile ukusila sile pi awala lyonga na mamineti 45, umu nsita kwene ii ala muli nu kwimba inyimbo na mapepo.

 10. Kutandala Kwa Mwangalizi wa Ciputulwa: Ndi cakuti umwangalizi wa ciputulwa atatandalila icilongano cinu, ukulongana kufwile ukuya vivikwene vino kutantikwe umu kabuku kakuomvya apa kulongana akakuti Swe Ina Klistu nu Mulimo Witu; kano sile api Isambililo Lya Baibo pa Cilongano umu ciputulwa icikuti Vino Swe Ina Klistu Twaaya, aali pano palaaya ilyasi lya mulimo ilya mamineti 30 ililaalandwa nu mwangalizi wa ciputulwa. Lino ilyasi lya mulimo litatala lyatandika, ceyamani wa kulongana, alaaya pa pulatifomu nu kupituluka umu malyasi ya wanda uwo alino nu kulandako ivili umu mulungu ulondeliilepo, angalandako ni vyakumanyisya ivikulondekwa nupya angawelenga na makalata akulondekwa kuwelenga, lyene pacisila ala-ama umwangailizi wa ciputulwa. Ndi umwangalizi wamala ukulanda ilyasi lya mulimo, aliwe kwene alalanda nu lwimbo luno atasoolola umwineco pa kumalila ukulongana. Umu mulungu wa kutandala kwa mwangalizi wa ciputulwa, kutafwile kuya makalasi na yauze umu lulimi luno cilongano cico cikaomvya. Lelo ndi cakuti mwakwata iumba ilikaomvya lulimi luze, limwi yene yangailonganila na lino mwangalizi akutandalila cilongano cico. Nomba iumba lilyo lifwile kuwela kwi kalasi nu kwiza ikala mu vilimba apa nsita lino mwangalizi wa ciputulwa akulanda ilyasi lya mulimo.

 11. Mulungu wa Ukongano wa Ciputulwa Nanti Citungu: Lino kuli ukongano wa ciputulwa nanti uwa citungu, kutafwile ukuya kulongana kwa pa cilongano. Ivyeo ivya kusambilila umu mulungu uwo, tulinzile ukuvisambilila uku ng’anda pa kupepa kwa lupwa nanti lino tukuisambilizya Baibo swenga.

 12. Mulungu Lino Kuli Iciusyo: Ndi cakuti Iciusyo cili umu manda ya mukasi ka mulungu, ale kutalaya ukulongana kwa mukasi ka mulungu. Lelo mungakomaana kuya mu mulimo pa wanda wa Ciusyo.

  13. Umwangalizi wa Kulongana Ukwakuti Swe Ina Klistu nu Mulimo Witu: Eluda wino iumba lyakwe ya eluda lyasoolola aliwe alaaomba ngu mwangalizi wa kulongana ukwa kuti Swe Ina Klistu nu Mulimo Witu. Umulimo wakwe, u wakusininkizya ukuti ukulongana kuu uukupekanyiziwa ningo nupya kukupitika ukulingana ni vyativilondololwa muli foomu kwene ii. Alinzile ukulalanzyanya ningo sana na kasunda muiyele. Ndi cakuti mwapokelela sile kabuku kakuti Swe Ina Kistu nu Mulimo Witu, umwangalizi wa kulongana kuu alinzile ukutantikila calimwi asambi alalanda malyasi umu mwezi kwene uwo. (Lolini  palagalafu 4.) Mulinzile ukupeelela calimwi malyasi ya asambi lino kucili imilungu nanti itatu pano yalalandila ilyasi, mufwile ukuyapeelela pali fomu iyakuti Kupeelwa Ilyasi Umu Kulongana Ukwakuti Swe Ina Klistu nu Mulimo Witu (S-89).

 14. Ceyamani wa Kulongana Ukwakuti Swe Ina Klistu nu Mulimo Witu: Cila mulungu eluda wenga alaomba nga ceyamani umu kulongana ukwa kuti Swe Ina Klistu nu Mulimo Witu. (Ndi cakuti ya eluda yataavula pa cilongano, aomvi alinge sana, yangaomviwa.) Ceyamani alapekanya amazwi aakuyulila ukulongana alino na aakuyalila alino nu kulanzyanya mavidyo yonsi akutulangilila vya kutandika  kulanzyanya na antu mu mulimo alino na mavidyo akulondolola icisinka conga icipya mu kabuku kaakuti Mwawelenga nu Kusambilizya. Nupya aliwe ala-ama yonsi ali na malyasi, napya umu vilongano umutavula sana ya eluda, angaalandako na malyasi na yauze kwene apa kulongana kuu. Atafwile kuvuzya ivyakulandapo lino kalanda wamala kulanda ilyasi. Iumba lyakwe ya eluda i lilasoolola ya eluda angalinga ukuomba uceyamani. Ya eluda atiyalinga ukuomba uceyamani, yalalekanila cila mulungu. Insita zimwi, umwangalizi kwene uwa kulongana kuu aliwe angaaomba sana uceyamani ukucila ya eluda yauze nanti cakuti iyalinga. Ndi cakuti eluda atalinga ukutungulula Isambililo Lya Baibo pa Cilongano, ukwaula nu kutwisika eluda wiyo angaomba na uceyamani pa kulongana. Lelo, cino mulinzile ukwiusya i cakuti eluda wino wasoololwa ukuomba nga ceyamani wa kulongana alinzile ukutaizya nu kwavwa asambi akulanda malyasi, afwile ukucita vivyo umu nzila isuma nupya alinzile ukuya nu kutemwa. Ceyamani alinzile nu kusininkizya ukuti ukulongana kukusila umu nsita. (Mulole  mapalagalafu 6 na 9.) Ndi cakuti pa pulatifomu pali incende, ceyamani nga kulonda angaikwatila maikulofoni pano akwamila ya kalanda ya malyasi pakuti wino akulanda ilyasi ndi yamwama sile aya zuwa-zuwa pali maikulofoni yuze iikuomviwa kuli ya kalanda ya malyasi. Nupya ceyamani nawe kwene ndi akulonda angaikala apa pulatifomu kwene apali tebulo apa nsita ino musambi akuwelenga Baibo nu mu ciputulwa cakuti Sambililini Kuomba Ningo Umulimo wa Kusimikila. Ukucita vivyo kungalenga ukuti ukulongana kutapitilila umu nsita.

 15. Kalemanya Umwiumba Lyakwe ya Eluda: Kalemanya umwiumba lyakwe ya eluda alaatantika akulanda amalyasi yonsi umu kulongana kufumyako sile amalyasi ya yasambi. Aliwe alaatantika na ceyamani uwa kulongana cila mulungu kufuma pali ya eluda yano yasoololwa ni iumba lyakwe ya eluda. Yalaombela capamwi nu Umwangalizi wa Kulongana Ukwakuti Swe Ina Klistu nu Mulimo Witu. Nupya kalemanya afwile nu kusininkizya ukuti utantiko wa kulongana konsi, uli pa cipampa ca vyeo.

  16. Kasunda Muiyele: Kwene cazipa sana ukuti eluda uwamanya ningo ukusambilizya aliwe aomba nga kasunda muiyele. Kasunda muiyele alaaomba umulimo uwa kwazwa uku mbali ya kalanda ya malyasi ndi cakuti icilinga ukuyavwa, ala-avwa ya eluda na aomvi ndi cakuti yalanda ilyasi ilili lyonsi, kwikako sile na malyasi aali umu kulongana ukwakuti Swe Ina Klistu nu Mulimo Witu, amalyasi aayantu yonsi, ukutungulula nu kuwelenga Lupungu Lwa Mulinzi nanti umwi Isambililo Lya Baibo pa Cilongano. (Mulole  palagalafu 9.) Ndi cakuti umu cilongano cinu mwaya ya eluda aingi akalanda malyasi nu kusambilizya ningo, lyene cila mwaka ale kungaya ukuomvya eluda muze ukuti aliwe aye kasunda muiyele. Kwene asi lyonsi lino kasunda muiyele anga-azwa aina lyonsi lino yalanda malyasi yao.

 17. Makalasi Yauze: Ndi cakuti umu cilongano cinu mwaya asambi aingi akalanda amalyasi, limwi mungakwata makalasi na yauze ukwakuti asambi yalandila malyasi. Cila kalasi lifwile ukukwata kasunda umulinge, cingazipa kasunda wiyo ukuya a eluda. Umu vilongano vimwi, umuomvi umulinge sana angaomba. Iumba lyakwe ya eluda i lifwile ukusoolola aangalinga ukuomba nupya nanti citale uli atafwile kuya aali umwi lyonsi. Kasunda alinzile ukulondela ivyativilandwa umu  palagalafu 8.. Ndi cakuti kuli ukuomvya makalasi na yauze, aasambi ali umu makalasi yayo yalinzile ukuya umu makalasi pa cisila ca ciputulwa cakuti Ukuvwikisya Sana Ivyaya Umu Malembelo. Yafwile ukuwela lino ciputulwa cakuti Sambililini Ukuomba Ningo Umulimo wa Kusimikila casila. Lino mukulanzyanya pa mavidyo aakulangilila ivya kusimikila, yano yali mu makalasi yauze yangatamba nanti kukutika vidyo iyo lino yali kuuku kwene ndi cakuti cingalinga kucita vivyo. Wino akutungulula ikalasi lilyo aafwile ukulizya vidyo iyo ukuomvya foni nanti tabuleti.

 18. Mavidyo: Umu kulongana kuu, mulaaya nu kutamba amavidyo aalasoololwa ukuomviwa. Mavidyo akuomvya pa kulongana kwa mukasi ka mulungu yalaya pa JW Laibulale nupya pulogalamu ii ingazumila pa mafoni apusanepusane na pa matabuleti. Insita zimwi amavidyo yano tulaatamba umuli amazwi akutulangilila vya kusimikila, tulayatamba na pa kukomaana ukwa kuya umu mulimo, lelo tulacita vivyo ndi cakuti twatandikilapo ukuyatamba umu kulongana kwakuti Swe Ina Klistu nu Mulimo Witu.