Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Na. 3 2017

Nkauvwa ningo sana ukuya pamwi na acance mu cilongano

 BAIBO IKA-AVWA ANTU UKUSENUKA

Natemilwe Sana Ukuteya Besibo Ukuluta Icili Consi!

Natemilwe Sana Ukuteya Besibo Ukuluta Icili Consi!
  • UMWAKA UNO YAVILWE: 1928

  • KUNO YAVYALILWE: COSTA RICA

  • VINO UMI WALI: YATEMILWE SANA IVYANGALO

VINO NAALI

Navyalilwe umu musumba wa Puerto Limón, umusumba uwayela ku nkumba yakwe yemba umu Costa Rica. Twavilwe 8, nene namba 7. Ya tata yafwile ala indi ni myaka 8. Fwandi ya mayo aatukuzizye.

Besibo aino nateyanga sana umu umi wane. Na lino nali umwance naipakizyanga sana icangalo cii. Fwandi lino ntali imfisye imyaka 20 natandike ukuteya cangalo cii umu kaliumba kanono. Lyene lino nacizile imyaka 20 ala nkateya umu kaliumba kwene kako, umwi wanenyile ukuti inje nkateyeko umwi umba ilikalamba umu Nicaragua. Nomba, insita iyo ala ya mayo yalwala nupya nene nayasakamalanga, fwandi nakanyile ukuyako. Pa nsita yuze, umonsi muze nawe wizile aneena ukuti nkateyeko ukwi umba ilikulu ilya mu Costa Rica, nali pali yano yasoolwile ukufuma umu kaliumba kanono. Pa pene nazumile ukuti ningaya. Natandike ukuteya umwi umba ilikalamba ukufuma umu 1949 ukufika mu 1952, nupya twakonkinyepo ukuya uku mpanga zyuze wakwe ku Cuba, ku Mexico, nu ku Nicaragua. Namanyile sana ukuteya, nateyanga besibo ni miku 17 umu kukonkana ukwaula ukuluvyanyapo. Nupya nuvwanga ningo sana ndi yakundumba!

Ica ulanda i cakuti nakweti ni miyele iipe. Nanti cakuti nakweti umwanaci wenga wino twacinanga nawe, kwali na yauze pa mbali. Namwanga sana uwengwa. Wanda umwi nakolike sana icakuti nizile njizana sile umu ng’anda katondo, ntaamanyile na vino nawezile! Nupya nateyanga ni vyangalo vya kusitika.

Lino nali ni miyele kwene ii, ya mayo izile yaya Inte Yakwe Yeova. Yezizye ukunsambilizya Baibo, nomba vitaomvile pano ntakwatanga insita pa mulandu ni vyangalo. Ndi cakuti tuli umu ciwansa tukwezya vino tulaya umukuteya, ntuvwanga ni  nzala! Mano yonsi yayanga sile ku cangalo cii. Natemilwe besibo ukuluta icili consi!

Nomba, lino naali ni myaka 29, nizile ncisika sana lino nalondanga ukwanka bola. Lino nuvwileko ningo, nalesile ukuteya umwi umba likalamba. Lelo nasambilizyanga yauze ivya kuteya besibo aali mu kaliumba kanono ateyelanga apiipi na kuno nikalanga.

VINO BAIBO YANGAVWILE UKUSENUKA

Umu 1957, nazumiile ukuyazanwako uku kulongana kwa citungu kwako ya Nte Yakwe Yeova ukwayelile umu ciwansa muno twateyelanga bola. Lino nali umwi umba, nalolanga vino ya Nte Yakwe Yeova yali ni miyele isuma ukupusanako ni miyele iipe ino nalolanga kuli yano yayanga umu ciwansa nga tukuteya bola. Vino naweni pa kulongana kuku kwa Nte Zyakwe Yeova vyalenzile ntandike ukusambilila Baibo nupya natandike nu kuzanwa umu kulongana.

Natemilwe sana ivintu vino nasambilile muli Baibo. Pali vino nasambilile pali na vino Yesu wasoowile ukuti mu manda akusyalikizya, asambi yakwe yali nu kukosola ilandwe lya Wene Wakwe Leza umu nsi yonsi. (Mateo 24:14) Nasambilile nu kuti Aina Klistu acumi yasisimikila pakuti yakwate impiya. Yesu watiile: ‘Mwapelwa amaka yakucita vii uwila, namwe mwacitila antu uwila.’—Mateo 10:8.

Lino nasambililanga Baibo, nalinganyanga vino nasambililanga kuli vino ya Nte Yakwe Yeova yacitanga. Nakumbwanga vino yaombesyanga ukukosola ilandwe lisuma ilya Wene umu nsi yonsi. Naweni ukuti yene yali na ukapekape uno Yesu walanzile ukuti Aina Klistu yalinzile ukukwata. Ndi nawelenga pali Mako 10:21 nu kuwelenga amazwi yakwe Yesu aakuti ‘Iza undondele,’ papo kwene nalondanga ukuya Nte.

Kwene, cansumbile insita pakuti mpingulepo ningo ukuya Nte. Pano apa myaka ingi cila mulungu nakwatanga “isyuko” ndi tukuteya icangalo ca kusitikapo. Lelo, nasambilile muli Baibo ukuti, Leza wapata aakapepa leza wi “isyuko,” alino nu lwiswa. (Ezaya 65:11; Kolose 3:5) Lilyo kwene napingwilepo ukuleka ivyangalo vya kusitikapo. Pa Mulungu, apa cisila cakuleka icangalo cakusitikapo, inamba yane ‘iisyuko’ ino nateyelangapo yacimvizye! Ala umulungu uwo antu yantumfizye sana pali vino ntaileko nupya yezizye ukumpatikizya ukuti inje nkateye nupya, nomba nakanyile. Ntatazile nswilile ku kuteya icangalo cakusitikana.

Nupya kwene nizile nkwata uwezyo uweziye utailo wane pa wanda kwene uno nawatiziwe ku kulongana kwa citungu kwa Nte Zyakwe Yeova. (Efeso 4:24) Manguzi uwanda kwene uwa, lino naswilile kuno nalalanga nazanyile umukazyana wino twacinanga nawe kucisila. Lino wambweni sile watile “ya Samu manda uwingi, lekini ilelo twizye sana!” Lyene papo kwene sile, natiile, “Awe!” Namunenyile ukuti nemo natandika ukulondela vino Baibo ikasambilizya. (1 Kolinto 6:18) Wapunzile ati “Mutuli?” Lyene wasuzile vino Baibo ikalanda pa uzelele nu kutwalilila ukumpatikizya ukuti tutandike ukuvwana nawe. Nomba nakanyile, injula icisasa ningila, mfunga nako. Ndakai, naya ni nsansa ukufuma sile lilikwene lino nali Nte umu 1958, nkauvwa ningo sana ukuti natwalilila ukuya uwa cumi muli vino nasenuka.

UKUSENUKA KWANGAVWA SANA

Nkauvwa kwati ningalemba ibuku pa visuma vino nazana umu kulondela vino Baibo ikasambilizya! Lyene paa, umi wane wazipa naya nu luzango wakwe cimwi nupya nazana ivyuza vya cumi mwi uvi lyakwe Yeova.

Ncili nkateya besibo, lelo ntikako sana mano ndi vino cali mpiti. Lino nateyanga besibo kwene ii, nalumbwike sana nupya nakweti impiya, lelo ivintu vii vitanga vitwalilile. Nomba, ucuza wane na Yeova na ina yane yonsi umwi uvi, ulatwalilila manda pe. Baibo ikati: “Insi ii ya pansi ikupita, pamwi nu lunkumbwa ululi mwenemo. Lelo umuntu wino akacita kulonda kwakwe Leza akaikalilila manda pe.” (1 Yoane 2:17) Lyene ndakai natemwa Yeova na ina ukuluta icili consi!