Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Na. 2 2017

 LYASI LYAKUTANDIKILAKO | UZYE MUKATAIZYA APA WILA UKULU CUZE UNO LEZA WAMUPEELA?

Kutaya Uwila Uwaluta Uu

Kutaya Uwila Uwaluta Uu

AKAKUSONGWELAKO penso kano ya Jordan yalemile, kakuloleka kwati katakweti incito. Nomba a kantu kamwi kacindame sana kuli ya Jordan. Ya Jordan yalanzile iyati: “Ya Russell, ya cuza aikolo, aliyo yampeezile lino nali umwance.” Lino ya Russell yafwile, alino Ya Jordan yamanyile ukuti ya Russell yaombesyanga ukusakamala isikulu wakwe ya Jordan alino na avyazi yao na lino ivintu vyatazile cuze. Ya Jordan yalanzile iyati: “Ndakai nasambilila ivingi kuli vino ya Russell yacisile, akawila kaa, a kacindame cuze kucila mawila yano napokelelapo.”

Wakwe vino cali kuli ya Jordan, insita zimwi uwila ungaloleka kwati utacindime sana uku yantu yamwi. Nomba kuli wiyo uwatapokelela angataizya sana nanti icakuti uwila uwo usi wa mutengo sana. Baibo ikalanda pa wila umwi ucindame sana ukuluta mawila yonsi, ikati: “Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wa pe.”—Yoane 3:16.

Uu ali wila ungalenga umuntu ukuya nu umi wape! Uzye kungaya uwila ungalingana nu wila uu? Nanti icakuti yamwi yatamanya vino uwila uu wacindama, Aina Klistu ya cumi yene yacindika sana uwila uu nupya yakaulola ukuti u wa “mutengo.” (Masamu 49:8; 1 Petulo 1:18, 19) Nomba, u mulandu ci uno Leza watumiile Umwanakwe ukuti aliwe aye uwila pano nsi?

Umutumwa Paulo walanzile umulandu uno Leza wacitiile vivyo, watiile: “Iifyo lingile muno nsi pa mulandu wa muntu wenga, nga ni iifyo lyakwe i lyaleta imfwa.” (Loma 5:12) Umuntu wakutandikilako Adamu, wayembukiile sile uku mufulo apakukana uvwila Leza, naci calenga kuti kuye imfwa pano nsi. Fwandi Adamu kwene wii, u walenga ukuti antu yonsi pano nsi yacuula nu kufwa.

“Pano malipilo yi ifyo, imfwa. Lelo uwila wakwe Leza umi wape muli Klistu Yesu Mwene witu.”  (Loma 6:23) Pakuti Leza akulule antu ukufuma ukwi ifyo ilyalenga kuti yaafwa, watumile Umwanakwe, Yesu Klistu, ukwiza pano nsi ukwizapeela umi wakwe umalilike ukuya impolelwa pa maifyo itu. Pa mulandu wa wila uno wapiile kulikuti, “impolelwa,” yonsi akataila muli aliwe yalakwata umi wape.—Loma 3:24.

Paulo walanzile pa mapaalo yano Leza wapeela ya kapepa yakwe ukupitila muli Yesu Klistu, ati: “Lekini tutaizye pa wila wakwe uwa kuzunguka uno mazwi yatangalondolola.” (2 Kolinto 9:15) Icacumi ukuti impolelwa yalenga tukwate mapaalo aingi cuze akuzunguka. Nomba pa mawila yonsi yano Leza watupeela, u mulandu ci uno imfwa yakwe Yesu yayeela ali wila ucindame sana? Nupya impolelwa kwene ii yapusana uli na mawila yonsi yano Leza watupeela? * Nupya tungalanga uli ukuti tukataizya pa wila uu? Tukumulalika ukuti muwelenge vipande viili ivilondelilepo pakuti mulole vino Baibo ika-asuka amauzyo yaa.

^ par. 8 Yesu waitemiilwe ukupeela “umi wakwe pa mulandu witu.” (1 Yoane 3:16) Fwandi, vino impolelwa yapeezilwe pa mulandu nu kulonda kwakwe Leza, vipande vii vimalanda sana pa mulimo uno Leza Kapeela wa mpolelwa wakwata.