Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Na. 1 2016

 LYASI LYAKUTANDIKILAKO | MUNGUVWIKISYA IVYAYA MULI BAIBO

U Mulandu ci Uno Tulinzile Ukuvwikisya ivyaya Muli Baibo?

U Mulandu ci Uno Tulinzile Ukuvwikisya ivyaya Muli Baibo?

“Baibo i buku limwi ilyamanyikwa sana ilikalanda pa vya mapepo. Lelo kuno lyafuma kutamanyikwa nupya litanga lyavwe aina China.”—LIN, uwa ku CHINA.

“Ivyalembwa umu mabuku aamuzilo aci Hindu kuno nkapepa ntanga mvyuvwe. Nga fwandi ninguvwa uli ivyalembwa muli Baibo?”—AMIT, uwa ku INDIA.

“Nacindika sana Baibo nkailola ngi buku lya mpiti nupya nuuvwa ukuti antu aingi yaakwata. Lelo nemo ntailola napo.”—YUMIKO, uwa ku JAPAN.

Antu aingi umu nsi yaacindika sana Baibo. Lelo limwi yatamanyikisya ivyayamo. Nupya vikwene aali vino caaya uku yantu aingi cuze aaku Asia, nomba na antu kwene aikala umu mpanga izingi umwavula Baibo nayo kwene yataimanyikisya.

Lelo, limwi munguzya muti, ‘Uzye u mulandu ci uno ndizile ukulondesya ukuvwikisya ivyaya muli Baibo?’ Vino cingaya nga muvwikisya ivyalembwa umwi buku lii ilya muzilo, aevi:

  • Mungaya ni nsansa

  • Mungamanya ivya kucita ndi mwakwata intazi umu lupwa

  • Mungamanya ivya kucita pakuti mutaasakamala sana

  • Mungaya ya cuza yasuma uku yantu

  • Mungaaomvya ningo impiya

Tale elenganyini pali Yoshiko, uwa ku Japan. Ataamanyile ivyalembwa muli Baibo, nupya wapingwilepo ukuiwelengela Baibo umwisikulu. Uzye mungamanya ivyacitiike? Walanzile ati: “Baibo yangavwa ukumanya umulandu uno Leza watu-umbila alino na vino ivintu vilaya uku nkoleelo; ndakai lyene naaya nu luzango pano namanya ivyalembwamo.” Amit, atalumbulwa papela nawe kwene wapingwilepo ukuiwelengela Baibo. Nawe kwene walanzile ati: “I cumicumi nazungwike cuze apa kumanya ukuti fwandi muli Baibo mwaya ivyeo ivingaavwa umuntu ali wensi.”

Baibo yaavwa antu aingi wakwe cimwi. Fwandi namwe kwene muce muiwelengele pakuti mukalole vino ilamwavwa!