Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Novemba 2015

 LYASI LYAKUTANDIKILAKO | MWAMANYAPO VYANI PA NTE ZYAKWE YEOVA?

Uzye ya Nte Yakwe Yeova Antu ya Musango Ci?

Uzye ya Nte Yakwe Yeova Antu ya Musango Ci?

Twaya iuvi lyonga umu nsi yonsi nupya tutaasakaana ni mipepele yuze. Nanti icakuti iofesi litu ilikalamba lyaela uku United States, swe ya Nte Yakwe Yeova aingi twikala umu mpanga izipusane-pusane. Alino swensi kwene ukucila pali 8 milyoni tukasambilizya antu Baibo umu mpanga izicizile pali 230. Tukauvwila amazwi yano Yesu walanzile aakuti: “Ilandwe lisuma lii lya Wene lilakosolwa mu nsi yonsi kuya umboni ku antu amu nko zyonsi.”—Mateo 24:14.

Asi mulandu na kuno twikala, tukauvwila isunde ilya uteeko. Nomba, tusiyika umu vikanza vya miteekele ya muno nsi. Pano tukauvwila vino Yesu walanzile ukuti Aina Klistu asi ya “mu nsi.” Fwandi aali cino tusiyikila umu vikanza vya miteekele nanti sile ukulwako inkondo. (Yoane 15:19; 17:16) Lino kwali Inkondo ya Nsi yakwe ciili, ya Nte Yakwe Yeova, yayayaaliile umu vifungo, nu kuyacuzya nu kuyakoma pa mulandu wakuvwila isunde lyakukanaya umu vikanza vya miteekele ya muno nsi. Umwina Germany umwi uwali sikofu, walemvile ati: “Ya Nte Yakwe Yeova ali yano yangalanda sile ukuti yatalwileko inkondo.”

“[Ya Nte Yakwe Yeova] yaaya ni miyeele isuma. Tungayaomvya ningo sana nu mu vikanza vya miteekele, nomba yatanga yazumile. . . . Yamanya ningo amaka yano amauteeko ya untunze yaakwata, lelo yazumila ukuti Uwene Wakwe Leza sile uli uno ulafumyapo iviipe vyonsi ivikacuzya antu.”—Nová Svoboda newspaper, Czech Republic.

Nomba kwene tukaikala mukwene umu nsi. Ali cino Yesu wapepiile alondezi yakwe ukuti: “Nsyakupepa kunuli kuti uyafumye mu nsi.” (Yoane 17:15) Fwandi, mufwile mukatulola uku ncito, mu masitolo, alino nu ku sukulu.