Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Novemba 2015

Uzye Mukalola Kwati Leza Asimusakamala?

Uzye Mukalola Kwati Leza Asimusakamala?

“UMULANDU ci uno cingancitikila vii? I cani cino Leza walekela icintu cii ukuncitikila?” Amauzyo yaa ayano Sidnei uwa myaka 24 aakaikala uku Brazil walondesyanga ukumanya. Ukufuma pano wasyetukile apona aivuna, akapitila sile pa kajinga kayalemale.

Antu yakauvwa uyi nu kulola kwati Leza asiyasakamala, ndi cakuti yakulwala, yafwilwa, yaponelwa nu uzanzo alino na pa mulandu wa nkondo. Nomba ivintu iviipe vyatandika ukucitika mpiti sana. Na Yobo uwaliko mpiti, intazi zyamucitikile umukukonkana, ni cacitike i cakuti, wasokiile Leza, nu kulanda ati: “Nalila kuno uli lelo kusi ukunjasuka, nimilila pa mulola wako lelo wakana ukundolesya. Nalola kwati lyene watunsangukila ukuncuzya na maka yako yonsi.”—Yobo 30:20, 21.

Yobo atamanyile ukwafumile intanzi ziizi ni calenzile ukuti zicitike. Lelo, caziipa sana vino Baibo yatulondolwela umulandu uno ivintu vya musango uwo vikacitikila nupya yatulondolwela vino tungacita lino kwacitika iviipe.

UZYE LEZA WALONDANGA UKUTI ANTU YACULA?

Baibo yalanda pali Leza ukuti: “Ivicitwa vyakwe vyaya ivifumaluke nupya visi vyalufyengo. Leza winu uwakutailwa nupya uwacumi wene akacita sile ivilungame ivisi vyakutitikizya.” (Malango 32:4) Uzye vwilini vino Baibo yalanda ukuti Leza akacita “ivilungame ivisi vyakutitikizya,” cingaya sile ningo ukulanda ukuti Leza walondanga ukuti antunze yacula nanti ukuti akaomvya intazi pakuti ayafulule?

Awe citanga ciye ningo, pano Baibo ikati: “Ndu muntu watunkwa na mezyo, wene atalinzile ukulanda ati ‘Leza akuntunka.’ Pano Leza atangatunkwa ni nkota, nupya Leza asyatunka muntu nanti wenga.” (Yakobo 1:13) Nupya Baibo ikatusambilizya ukuti, Leza waumvile antu amalilike. Wapeezile antunze yakutandikilako Adamu na Eva, incende isuma, umwali vyonsi vino yangatemwa, alino nu mulimo usuma uno yaali nu kuipakizya ukuomba. Wayanenyile nu kuti: “Muvyalane muvule mulimbe insi yonsi nu kuyangalila.” Fwandi Adamu na Eva yataali nu kulalola kwati Leza asikuyasakamala.—Utandiko 1:28.

Nomba ndakai, tutaaya amaliilike. Ukutandika sile lino Adamu na Eva yapondwike, antu yakacula wakwe cimwi. Twasininkizya vii, pano Baibo ikaati: “Uumbo onsi ukuteta nu kuwaika.” (Loma 8:22) Uzye lyene, caali uli pakuti tutandike ukucula?

U MULANDU CI UNO ANTU YAKACULILA?

Pakuti tuvwikisye umulandu uno antu yakaculila, lekini tulande icalenzile kuye ucuzi kwene. Pa kutandika, Leza walesizye Adamu na Eva ukulya “iviseekwa vya ku muti uno ukapeela amano ya kumanya visuma ni viipe;” nomba yene yatuvwilile vino wayanenyile pano umungeli uwapondwike, wino wizile aya Satana Ciwa, wayasomvile. Amazwi yano Ciwa wanenyile Eva aakuti yataali nu kufwa ndi yatuvwilile isunde lino Leza wayapeezile, yalangilile ukuti Satana akupeela Leza umulandu wa usomvi. Nakupya Satana walanzile nu kuti, Leza waitemwa pano wiima antu insambu izyakuisoolwela icisuma ni ciipe. (Utandiko 2:17; 3:1-6) Cino Satana walozyangako i cakuti ivintu vingaziipila antu ndi yakuiteeka aeneco ukwaula Leza. Icintu cii calenga kuye iuzyo licindame ilyakuti, uzye Leza walinga ukuteeka antu?

Nupya kwene Ciwa walanzile ukuti antu yakaombela Leza pa mulandu na ukaitemwe. Ciwa wanenyile Leza pali Yobo uwali uwa cisinka ati: “Uzye asi wewe kwene ukamucingilila pamwi ni vyuma vyakwe vyonsi? . . . Lelo ndi cakuti wapokolola na vyonsi vino akweti, umalola wakutuka ale ukuvwa nu kuvwa!” (Yobo 1:10, 11) Nanti icakuti Satana walandanga pali Yobo, icisinka cino walandangapo i cakuti, antu yonsi yakaombela Leza pa mulandu na ukaitemwe.

VINO LEZA WACITA PAKUSINILA SATANA

Uzye caali nu kuya uli pakuti Leza asinile Satana ukuti vino walandanga vyali i vya ufi? Leza wino wakwatisya mano wamanyile ivyakucita, ivingatwavwa ukukana uvwa kwati Leza atatusumbako amano. (Loma 11:33) Acino fwandi wazumilizye antunze ukutandika ukuiteeka aeneco pakuti cimanyikwe ndi cakuti ukuteeka kwa yantunze u kwacindama ukuluta ukateeeka wakwe Leza.

Icumi kwene ivintu ivikacitika pano nsi, vikalanga  sile apaswe ukuti uteeko wa yantunze wafilwa ukuteeka. Kutaaya uteeko nanti aonga uwaleeta umutende wa cumi ni nsansa. Nupya amauteeko kwene yaa a untunze, yaleenga nu kuti insi iyononeke cuze. Fwandi tukasininkizya amazwi amuli Baibo, aakuti: “Umuntu atange aisolwele umweneco uyo wakwe. Kusi umuntu uwakwata amaka apa umi wakwe.” (Yelemiya 10:23) Acino ukwaula nu kutwisika, uteeko wakwe Leza, uungaleta umutende uwa manda pe, insansa, alino ni vintu ivyakuzipila antunze yonsi, pano vikwene aali vino Leza akalonda.—Ezaya 45:18.

Uzye Leza alacita uli pakuti ukulonda kwakwe kukafikiliziwe? Iusyini ukuti Yesu wasambilizye alondezi yakwe ukuti yaapepa yakuti: “Uwene wako wize, kulonda kwako kucitike pansi vino kukacitika mwiyulu.” (Mateo 6:10) Fwandi, insita ino Leza wasoolola ndi yafika, alaomvya Uwene wakwe ukufumyapo ivintu vyonsi ivyaleeta ucuzi. (Danieli 2:44) Uku nkoleelo kutalatala kuye nupya ivipowe, indwala alino ni imfwa. Nupya Baibo yalanda na pa yantu aulilwa nanti apina ukuti Leza “alapokolola antu aulilwa akupunda iyati tutuulwe.” (Masamu 72:12-14) Nakupya Baibo yalanda nu kuti: “Patalaya nanti wenga alailizyanya apakulwala.” (Ezaya 33:24) Nanti sile antu afwa, yano Leza akaiusya, Yesu walanzile ati: “Kasita kakwiza, kano antu yonsi ali mu malindi yaluvwa izwi . . . , nu kufumamo.” (Yoane 5:28, 29) I cumicumi malayo yaa, yakatuzanzya cuze!

Ndi twataila amalayo yakwe Leza, cilatwavwa sana ukukanaelenganya ukuti Leza asitusakamala

VINO MUNGACITA PAKUTI MUTALOLA KWATI LEZA ASIMUSAKAMALA

Lino papisile imyaka umupipi na 17, Sidnei uwatalumbulwa umu cipande kwene cii, walanzile ati: “Kwene ntatala nasokelapo Leza apa uzanzo uwancitikile, lelo ukulanda sile icisinka, apa kutandika naweni kwati Leza atansakamile. Amanda yamwi nkauvwa ulanda sana, nupya ndi nelenganya vino nalemala, nkalila nu kulila. Nomba, nasambilila muli Baibo ukuti Leza asi aliwe walenzile kuye uzanzo uuwa pakuti amfulule. Pano Baibo ikaati, intazi ‘zikaponela umuntu ali wensi.’ Ukupepa lyonsi kuli Yeova nu kuwelenga Baibo kwangavwa ukuya umukome muli ukapepa alino nu kulunduluka.”—Kasambilizya 9:11; Masamu 145:18; 2 Kolinto 4:8, 9, 16.

Ndi cakuti tukwelenganya sana apa mulandu uno Leza walekela sile uyi ukuyako alino nu kwelenganya pali vino ulafumiziwapo, kungatwavwa ukukanaelenganya ukuti Leza asitusakamala. Twasininkizya ukuti Leza “akalambula yao akamulondalonda.” Acino fwandi, wensi wino akataila Leza nu Mwanakwe Yesu, ataluvwa ulanda.—Ayebulai 11:6; Loma 10:11.