Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Mei 2015

 LYASI LYAKUTANDIKILAKO

Uzye Impelelekezyo Yatipalama?

Uzye Impelelekezyo Yatipalama?

Uzye Leza alaleka antunze yatwalilile ukuteeka antu yauze umu unkalwe nu kwika umi wao mu uzanzo? Awe, pano twatitulola ukuti Leza alaleta impelelekezyo ya lufyengo ni viipe vyonsi ivyayako pa myaka iingi. Kaumba wa yantunze ni nsi akulonda mumanye ukuti impelelekezyo yatipalama. Uzye watusokolwela uli vii?

Elenganyini pa cilangililo cii: Lino muli na motoka pa lwendo, limwi mungatandikilapo ukulola vimwi vyakumilangilila kuno mukuya pa intaneti, pali mapu, nanti pali vyuze ivilembwe. Lyene lino mwalola ivimanyililo ni vimbamba ivikuuvwana ni vyakumilangilila vino mukweti, nupya kwene mungasininkizya ukuti mwasya mufike kuno mukuya. Umunzila ili yonga kwene, Leza watupeela Izwi lyakwe, ilikatulanga vino ivintu vili umu nsi yonsi. Lino twalola ivimanyililo vivyo, tukasininkizya ukuti impelelekezyo yatipalama.

Baibo ikalondolola ukuti insi ilafika apa nsita iyiyele, iilalangilila ukuti impelelekezyo yatiyafika. Umu nsita iiyo, kulaacitika ivintu ivitatala vyacitikapo. Lolini vimwi vino Baibo yalandapo.

1. KUSENUKA KWA VINTU UMU NSI Usesemo uwalumbulwa umu cipande 24 umwi buku lyakwe Mateo, ukalaanga ivintu vyakumanyilako impelelekezyo ya nsi. Ivintu vivyo i vyakumanyilako “mpelelekezyo ya nsi” nupya vilaacitika mpaka ni “mpelelekezyo” ikafike. (Vikomo 3, 14) Pa vintu kwene vii, paaya inkondo, ivipowe, vilundumusi umu cende zimwi-zimwi, kwifya, kukanaya nu kutemwa, nupya ya simapepo yalasomba antu nu kuyaponzya. (Vikomo 6-26) Ukuya kwene, ivintu vii vyatandika mpiti sana ukucitika. Nomba, lino impelelekezyo ikupalamila, ivintu vivyo vifwile ukulacitika sana. Nakupya kwaya na vyuze vitatu vino tumalandapo ivyakumanyilako impelekezyo ya nsi.

2. VINO ANTU YAAYA NDAKAI: Baibo ikaati, “mu manda akusyalikizya,” kulikuti iciputulwa ca nsita icikatungulula uku mpelelekezyo, ivicitwa vya yantu viliipa cuze. Tukawelenga ukuti: “Antu yalaitemwa, atemwisya impiya, yalaitumika, acilumba, akanyati, yatalayela akwasi yao, yatalataizya, nupya yatalalonda vyauleza. Yene yatalaya nu luse na mizu, yene yalaya akwakwa, alwete nupya akakate. Yalapata ivisuma. Yalaya asomvi, azakantike nupya yalaya na mataki. Yene yalatemwa vyakuizanzya kuluta kutemwa Leza.” (2 Timoti 3:1-4) I cacumi ukuti antu yasicindikana ukufuma na mpiti, lelo “mu manda akusyalikizya” mwene Baibo yalanda ukuti antu yali nu kwipisya, ali mulandu uno amanda kwene yaa yaka-amilwa ukuti “tusita tutale.” Uzye namwe mwalola ukuti ndakai antu yaipa sana?

3. ANTU YAKONONA INSI: Baibo ikati Leza alonona “yao akaonona insi.” (Umbwilo 11:18) Uzye antu yakaonona uli insi? Baibo yalondolola ukuti na pa nsita ino Nowa wali nu umi avino cali vikwene. Ikaati: “Antu onsi yali aipe ni mpanzela zyao zyasalangine insi yonsi. Leza alolekesya azana ukuti insi yonsi yazulamo inkota, pano vicitwa vya antu ivya nkota. Nga Leza anena Nowa ati, ‘Nimpingula ukonona muntunze. Namaonona insi yonsi kumwi na aliyo, pano yatizulamo lwete ni nkota zyao.’” (Utandiko 6:11-13) Uzye mwalola ukuti ndakai umu nsi mwaya sana unkalwe? Cuze icakuti antu ndakai yaalunduluka sana muli vyakwe sayansi. Yaakwata ivyanzo ivingakoma antu yonsi pano nsi. Antu yakonona insi umu nzila na yuze. Yakonona ivintu ivikatungilila umi pano nsi. Yakonona umuza uno tukafuuta,  yakakoma sana inyama nu kukoma imiti cikome-kome, viyemba vikalamba navyo vikononeka pa mulandu ni vicitwa vya yantu.

Mutale mwelenganye, ‘Uzye vwilini pa myaka sile umwanda (100) iyapitapo, tungati antu yaakweti ivyanzo ivingonona antunze yonsi pano nsi?’ Nomba ndakai antu yaapanga ivyanzo ivya maka sana nupya yakaonona sana ivintu ivyaya umu nsi. Lyene antu yakapanga ivintu ivingi sana, nomba yakafilwa ukumala intazi zino ivintu vivyo vikaleeta. Lelo, antu yataakwata amaka pali vino vilacitikila insi uku nkoleelo. Leza walaya ukuti, lino antu yatatala yonona ivya umi vyonsi ivyaya umu nsi, alonona yonsi aakaonona insi.

4. MULIMO WA KUSIMIKILA UMU NSI YONSI: Usowelo na uze uukalanga ukuti tuli umu manda akusyalikizya u wakuti: “Ni Landwe lisuma lii ilya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliza.” (Mateo 24:14) Umulimo kwene uu uwa kusimikila, wali nu kuya uyiyele sana ukuluta vino ya simapepo amu macalici yaasenula antu apa myaka ingi sana ukuti yaye umu macalici yao. Ilandwe ilyali nu kukosolwa sana umu manda akusyalikizya i ‘Landwe lisuma ilya Wene.’ Uzye mwamanya iumba limwi lyakwe yakapepa aasumba sana mano ukwi landwe kwene lii? Ndi cakuti kwaya yamwi aakasimikila ilandwe kwene lii, uzye yayela sile kuko kwene kuno mwikala, nanti uzye yakasimikila ilandwe kwene lii ilisuma “mu nsi yonsi kuya umboni ku antu amu nko zyonsi”?

Ilandwe lya Wene likakosolwa umu nsi yonsi umu ndimi izingi

Pa Intaneti paya Webusaiti iya www.jw.org iikalanda sana api “Landwe lisuma” kwene “lii ilya Wene.” Paaya impapulo izikalanda api landwe lilyo umu ndimi ukucila 700. Uzye vwilini kwaya na kuze kuno mungazana ivyeo ivikalanda api landwe lisuma ilya Wene wakwe vii? Mpiti sana lino kutatala kwaya Intaneti, ya Nte Yakwe Yeova yaamanyikwe ukuti yaakosolanga ilandwe lisuma ilya Wene. Ukutandika umu mwaka wakwe1939, apa nkupo yakwe Magazini uwa Lupungu Lwa Mulinzi pakaaya amazwi yakuti “Ulukamanyisya Antu pa Wene Wakwe Yeova.” Ibuku limwi ilikalanda pa vya mipepele lyalanzile ukuti umulimo wa kusimikila uwa Nte Zyakwe Yeova “waiyela sana.” Umulimo kwene uu uwa kusimikila ukalanda sana api landwe lisuma ilyakuti Uwene Wakwe Leza wasya ulete “mpelelekezyo.”

INSITA IYIYELE SANA

Uzye mwailolela mweineco ukufikiliziwa kwa vintu vini (4) ivyati vilandwa umwilyasi kwene  lii? Ukuluta pa myaka umwanda onga (100), muli magazini wii mukaalembwa ivyeo ivya kwazwa antu ukumanya ukuti impelelekezyo ili apiipi. Kuya kwene, antu yamwi yasizumila vivyo. Yakaati antu yakaalemba amelenganyo yao nupya insita zimwi yangalemba ni vya ufi. Nupya yakaati, vino lyene ndakai antu yakalanzyanya umu nsi yonsi, cikaloleka kwati ivintu vikwipilako umu nsi. Lelo, kwaya ivintu ivingi ivikalanga ukuti tuli umu manda akusyalikizya.

Antu yamwi asambilila sana yakati likwene insi yasya isenuka. Mu mwakwa wakwe 2014, antu yamwi aasambilila vyakwe sayansi yalanzile apa vintu ivingalenga ukuti antu yate ukulunduluka umu wikazi, yalanzile ukuti: “Ukulolekesya pa vintu vino antu yakapanga ndakai kwalenzile tusondwelele ukuti ivintu vivyo vingaleta uzanzo uku yantu yonsi.” Antu aingi lyene yasininkizya ukuti tukwikala umu nsita iyiyele. Aakalemba magazini wii uwa Lupungu pamwi na antu aingi aakawelengamo, yaasininkizya ukuti tuli umu nsita iyiyele nupya impelelekezyo ili apiipi. Lelo, mutafwile ukutina ivintu ivilacitika uku nkoleelo, mungiza muye ni nsansa sana. U mulandu ci uno twalandila vivyo? Pano mungaca mupusuke!