Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Mei 2015

Mauzyo Yano Aakawelenga Yakauzya

Mauzyo Yano Aakawelenga Yakauzya

Uzye Gogi wa ku Magogi, uwalumbulwa umwi buku lyakwe Ezekelo a weni?

Apa myaka iingi, impapulo ziitu zikalondolola ukuti Gogi wa ku Magogi, a kaimililako Satana Ciwa ukutandika sile lino wasumbilwe pano nsi. U mulandu ci? Pano ibuku lya Umbwilo lyalondolola ukuti Satana aali wino akalenga ukuti antu yakwe Leza yayacuzya. (Umbw. 12:1-17) Fwandi, i calenzile tumanye ukuti Gogi i zina lyuze lyakwe Satana.

Nomba kwaliko uwavya umwi apa ulondolozi uu. Mutale mwelenganye pali vino Yeova walanzile ukulozya kuli Gogi kwene wii, watile: “Ndakusangula icakulya ca vyunyi, ivilyanyi vya misango yonsi ni ca nyama zyonsi zya mpanga.” (Ezek. 39:4) Nupya Yeova walanzile nu kuti: “Ndapeela Gogi incende imwi ilumbukisye mu ina Izlaeli, umwakumuzika, . . . Ali kuno yalazika Gogi pamwi ni umba lyakwe lyonsi.” (Ezek. 39:11) Nomba vwilini, cingacitika ukuti Satana iciumbwa ca mupasi aye “icakulya ca vyunyi ni vilyanyi vya misango yonsi?” Nupya, uzye Satana angakwata uli “incende . . . umwakumuzika?” Baibo italandapo ukuti Satana yalamulya nanti ukumuzika, lelo ikati Satana alanyepwa kulingana ni myaka 1,000.—Umbw. 20:1, 2.

Baibo ikatunena ukuti, pampela ya myaka 1,000, Satana yalamusapula, nupya “Alapita ku kusomba antu amu nko zyonsi, yano asalangana mu nsi yonsi, kulikuti Gogi na Magogi. Wene alayakonganika pamwi ku ulwi.” (Umbw. 20:8) Uzye Satana angasomba Gogi atuuli ndi cakuti wene aali Gogi kwene? Fwandi, “Gogi” uwalumbulwa umu usesemo wakwe Ezekelo nu mwi buku lya Umbwilo, asiimililako Satana.

Nga fwandi Gogi wa ku Magogi a weni? Pakuti twasuke iuzyo lii, tufwile ukumanya ningo wino akacuzya antu yakwe Leza. Baibo itaalanda sile apa kuzanza kwakwe ‘Gogi, wa ku Magogi’ lelo yalanda na pakuzanza kwa “mwene wa ku [katutu]” alino na “yakateeka amu nsi.” (Ezek. 38:2, 10-13; Dan. 11:40, 44, 45; Umbw. 17:14; 19:19) Uzye ukuzanza kuu u kupusane? Awe. Baibo yaomvya sile mazina apusane, lelo ukuzanza kwene u kulikumwi. U mulandu ci uno twalandila vivyo? Pano Baibo ikalanda ukuti inko zyonsi zilakongana ukuti zizanze antu yakwe Leza umuku wa kusyalikizya, na kuu kulaya aali kutandika kwakwe Alamagedoni.—Umbw. 16:14, 16.

 Ndi twalola Amalembelo yonsi yaa aakulanda apa kuzanza kwa kusyalikizya kwa antu yakwe Leza, tutanga tutwisike ukuti Gogi wa ku Magogi, akaimililako inko izya muno nsi, asi Satana foo. Uzye inko zii zilatungululwa nu “mwene wa ku [katutu]” uwa unkolanya? Tutanga tusondwelele. Lelo, kwati vyakolana na vino Yeova walanda pali Gogi ukuti: “Ulakatuka uku cifulo cako icayela ukutali uku katutu, we mweneco kwene pamwi ni mitundu iingi iyayela kunuli. Mulapita mwensi apa mfwalasi, iumba ilikalamba ilya vita ivitanga pendwa.”—Ezek. 38:6, 15.

Avino na Danieli kwene walanzile uwaliko pa nsita iliyonga na Ezekelo, ati: “Amazwi yaluvwika ukufuma ku ufumondaka nu ku katutu nga yalamuletela ingofyo, nupya alakatuka umu cipyu ku kuyalwisya nu kulovya antu avule. Wene alasimpa na mataalu yakwe aku wene apakasi kakwe yemba nu mwamba apa kuulwa Ng’anda ikulu yakwe Leza. Lelo wene alafwa, nga kutalaya umwi kuku uwakumwazwilizya.” (Dan. 11:44, 45) Nakupya vikaumvwana ni vyalembwa umwi buku lyakwe Ezekelo pali vino Gogi alacita.—Ezek. 38:8-12, 16.

Uzye ivyani vilacitika apa cisila ca kuzanza kwa kusyalikizya? Ibuku lyakwe Danieli likatunena ukuti: “Umungeli uwazwite insalu itelepelele alanda ati, ‘apa nsita ilya umungeli mukulu Mikaeli [Yesu Klistu], wiyo akacingilila [kutandika mu 1914] antu yako alaloleka [apa Alamagedoni]. Lyene kulaya insita ya macuzi [akulu cuze], iipisye wakwe cimwi ino itatazile iyako ukufuma sile ku kutandika kwa nko ukufika na pilelo kwene. Lelo lino insita iiya ilafika, antu yako yonsi yano amazina yao yalembwa mu lupapulo lwakwe Leza yalatuulwa.’” (Dan. 12:1) Nupya na pa Umbwilo 19:11-21 napo kwene paaya ulondolozi uli umwi kwene pali vino Yesu alacita.

Nga “Gogi na Magogi” aalumbulwa pali Umbwilo. 20:8 yakaimililako weni? Apa mpela ya myaka 1,000 lino antu yaleziwa umuku wakusyalikizya, yonsi aalapondokela Yeova yalalanga ukuti yali ni miyele iipe wakwe ‘Gogi wa ku Magogi,’ kulikuti mitundu ya antu alazanza antu yakwe Leza apa kusila kwa ucuzi ukulu cuze. Nupya ni cilayacitikila cilaya icili cimwi, kulikuti imfwa ya pe! (Umbw. 19:20, 21; 20:9) Fwandi caloleka apaswe ukuti, alaya yacipondoka yakwe Leza, apa mpela ya myaka 1000 nayo yalamwa ukuti “Gogi na Magogi.”

Fwandi vino sweswe asambi yakwe Baibo, tukulondesya ukumanya aalaya “umwene waku [katutu].” Nomba asi mulandu na alatungulula inko ku kulwisya antu yakwe Leza, swemo twasumba sana amano uku vintu vii viili: (1) Gogi wa ku Magogi ni vita vyakwe yalononwa; na (2) Yesu Klistu, Umwene witu, alacingilila antu yakwe Leza nu kuingizya umu nsi ipya muno mulaya umutende wakwe cimwi.—Umbw. 7:14-17.