Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Maaci 2015

“Tata, Cii Acino Walondanga Kuti Cicitike”

“Tata, Cii Acino Walondanga Kuti Cicitike”

“Nakutaizya pano watusokolola ku antu atasambilila cino wafisa ku antu yamano na asambilile.”—LUKA 10:21.

1. I cani icalenzile ukuti Yesu ‘azange cuze ukupitila mu maka ya mupasi wa muzilo’? (Lolini cikope cakutandikilako.)

MUTALE mwelenganye vino caali ukulola Yesu ‘wazanga cuze kupitila mu maka ya mupasi wa muzilo.’ Limwi mwelenganya na vino Yesu wamwentwile, ala amanso yakwe yakuloleka sile ukuti atatemwa sana. I cani icalenzile ukuti aye nu luzango? Ala alino watumile sile asambi yakwe 70 uku kukosoola ilandwe lisuma pa Wene Wakwe Leza. Fwandi walondesyanga ukumanya vino yaali nu kuomba umulimo uu. Kwali alwani ya maka aingi aatalondanga ilandwe lisuma, wakwe yakalemba na aFaliseo aali acenjele nupya aasambilile sana. Antu yaa yaatunkaanga antu yauze ukulola Yesu ukuti waali akawaza sile alino na londezi yakwe ukuti yaali ‘antu aatasambiliile.’ (Mili. 4:13; Mako 6:3) Lelo nanti caali viivyo, asambi yawezile uku mulimo uu ala yali nu luzango. Nanti icakuti kwali aayakanyanga ukusimikila, yakwanisye ukusimikila nu ku mipasi ya nkota kwene! I cani icalenzile ukuti yazange sana nu kuya aasipe?—Welengini Luka 10:1, 17-21.

2. (a) U munzila ci muno asambi yakwe Yesu yaali wa ana yanono? (b) I cani icavwile alondezi yakwe Yesu ukusambilila icumi icicindame?

2 Lolini vino Yesu walanzile kuli Yeova, wavwanzile ati:  “Tata, Mwene wi yulu ni nsi! Nakutaizya pano watusokolola ku ana anono cino wafisa ku antu yamano na asambilile. Endi Tata, cii acino walondanga kuti cicitike.” (Mate. 11:25, 26) Yesu atalozyanga mukuti asambi yakwe yaali wa ana anono. Lelo, wamanyile ukuti yalolekanga wa ana anono ngu kuyakolanya ku antu yaaya amano nupya asambilile sana, aailolanga ukuya acenjele. Icicindamisye i cakuti, Yesu wasambilizye alondezi yakwe, ukuya wa ana anono, ukuya aicefye nupya afuuke. (Mate. 18:1-4) Uzye ukuya aicefye kwayavwile uli? Ukupitila umu mupasi wa muzilo, Yeova wayavwile ukuvwikisya icumi icicindame, lelo yaaya aali acenjele nupya aamano aayasuzile, yene yasiile viivikwene ni cilumba cao nupya Satana wayazyatiike.

3. I vyani vino tumasambilila umu cipande cii?

3 Fwandi aali mulandu kwene uno Yesu wayeeliile sana nu luzango! Icalenzile ukuti aye sana ni nsansa u kulola vino Yeova walenzile antu amisango yonsi ukumanya icumi icicindame, asi mulandu yasambilila nanti yatasambilila. Nakupya Yesu wazanzile sana ukumanya ukuti Isi watemilwe imisambilizizye yakwe. Uzye Yeova wasenuka, nupya u munzila ci muno akalangila ukuti acili akatemwa imisambilizizye ii? Umu cipande cii tumasambilila vino Yeova akalenga antu aicefya ukumanya icumi ndakai.

VINO TUKALONDOLOLA ICUMI UKU ANTU YONSI

4. U munzila ci muno Lupungu Lwa Mulinzi ulwa ngupale lwayeela u wila usuma?

4 Ndakai iuvi lyakwe Yeova likasambilizya antu umu nzila iyangupale nupya iyuvwike. Lekini tulande apa vintu vitatu. Nkoleelo kwaya Lupungu Lwa Mulinzi ulwangupale ulwa kusambililamo (ulwaya umu Cizungu nu mundimi zyuze). * Lupungu luu u wila usuma cuze, pano lwavwa sana yaayo yano cikatalila ukuvwikisya ululimi nanti ukuwelenga. Imitwe yandupwa yazana ukuti kufuma pano kwayela Lupungu luu ulwangupale, cangupalila ana ukuvwikisya pa kusambilila Lupungu. Antu aingi yalemba na makalata akutaizya pa mulandu wakuti kwayako Lupungu luu. Nkazi umwi walemvile ukuti mpiti atasukaangapo apisambililo lya Lupungu, wikalangamo sile. Nomba pacisila cakuomvya Lupungu ulwangupale, Walanzile ati: “Lyene nka-asukapo sana ni ntete zyasila! Nkumitaizya nupya nkutaizya na Yeova kwene.”

5. Uusuma ci uwaya muli Baibo umupya umupitulukwemo uwakuti Amalembo ya Calo Cipya?

5 Nupya cakwe ciili i cakuti, Baibo umupitulukwemo ningo uwakuti Amalembo ya Calo Cipya (New World Translation of the Holy Scriptures), wafumile umu Cizungu apa Okotoba 5, 2013, lino kwali ukukomaana kwa pa mwaka. * Ndakai umu malembelo aingi mwaya amazwi anono sile, lelo upiliulo wene utaasenuka nupya ukauvwika sana. Pali Yobo 10:1 mpiti pali amazwi 27 nomba yasyala 19; pa Mapinda 8:6 pali amazwi 20 nomba yasyala 13. Lelo vikomo vii vyonsi vikauvwika sana muli Baibo wii umupya. Umwina umwi umupakwe uwaombela Yeova pa myaka ingi walanzile ati: “Nkawelenga ibuku lyakwe Yobo muli Baibo wi umupya, nupya nga nkuwelenga nkauvwa kwati ali lino natandika ukuvwikisya!” Aingi sile yalanda wakwe vikwene.

6. Uzye mukauvwa uli vino lyene muvwikisya ukwaluka ukwaya pali Mateo 24:45-47?

 6 Cakwe citatu, lekini tulande apa kwaluka kumwi ukuliko ndakai muli vino twamanyile amalembelo. Ukwaluka ukwaliko umu Lupungu lwakwe Julai 15, 2013, ukwalandanga pa ‘muomvi mutailwe uwa mano,’ kwalenzile tuye nu luzango. (Mate. 24:45-47) Cipande ciici calondolwile ukuti muomvi mutailwe i Umba Likatungulula, alino “amu ng’anda” a yonsi apakwe na ‘amfwele nazyuze’ yano muomvi mutailwe akasakamala muli vyakwe Leza. (Yoa. 10:16) Ala caazipa wakwe cimwi vino twamanya icumi nupya tukasambilizyako yauze! U munzila ci na zyuze muno Yeova walangila ukuti watemwa imisambilizizye iyangupale nupya iyuvwike?

ULONDOLOZI UWANGUPALE UWA MALYASI AMULI BAIBO

7, 8. A malyasi ci yamwi alembwa muli Baibo akalozya uku cintu icicindame icili uku nkoleelo?

7 Ndi cakuti mwaombela Yeova apa myaka iingi, limwi mwalola vino ulondolozi wa malyasi amuli Baibo wasenuka umu mpapulo zitu. U munzila ci? Mpiti, impapulo zitu zyalandanga sana pa vintu vya unkolanya vino Baibo yalaandapo. Twalolanga vino Baibo yalandapo ukuti vikwimililako vimwi, lyene ndi vintu vivyo vyacitika twatangi vyafikiliziwa. Uzye amalembelo yalaandapo pa kufikiliziwa kwa malyasi amuli Baibo? Ee. Yesu walanzile apa “cilangililo cakwe kasema Yona.” (Welengini Mateo 12:39, 40.) Yesu walondolwile ukuti insita ino Yona waali umunda ya ciswi, cikaimililako insita ino Yesu wali nu kuya umwilindi.

8 Muli Baibo mwaya amalyasi na yauze akalanda pali vino vilacitika uku nkoleelo. Umutumwa Paulo walanzilepo apa malyasi kwene yao. Walanzile pali ucuza wakwe Abulaamu na Haga alino na Sala ukuti ukaimililako ucuza wakwe Yeova nu luko lwa ina Izlaeli alino ni iuvi lyakwe Leza ilya kwiyulu. (Gala. 4:22-26) Icili conga kwene, itenti lya kupepelamo ni ng’anda ikulu iya kupepelamo, uwanda uwa kufuuta maifyo, simapepo mukalamba, alino na vyonsi ivyali umu Masunde Yakwe Mose, vyalozyanga uku musango “uzimantukile wa vintu visuma vikwiza.” (Ayeb. 9:23-25; 10:1) I cintu cisuma cuze u kusambilila pa mausesemo yaayo. Uzye nomba lyene tungalanda ukuti aalembwa muli Baibo, ni nsita ino vyacitikilepo, vyonsi vikalozya kunsita yakunkoleelo?

9. Uzye ilyasi lyakwe Naboti lyalondololwanga uli mpiti?

9 Impapulo zya mpiti ilingi avino zyalondololanga. Lekini tusambilile apilyasi lyakwe Naboti, wino namwene mwipe Yezebele wapingwilile ukufwa pakuti iya wakwe, Aabu, angatoola icalo cakwe Naboti. (1 Yamw. 21:1-16) Lupungu Lwa Mulinzi lwa mu 1932, lwalondolwile ukuti Aabu na Yezebele yimililangako Satana ni umba lyakwe, lyene Naboti nawe wimililangako Yesu, alino imfwa yakwe Naboti imililangako imfwa yakwe Yesu. Nomba, umu 1961, ibuku limwi (“Let Your Name Be Sanctified”) lyalanzile ukuti, Naboti akaimililako apakwe na Yezebele akaimililako upefi waufi. Alino, vino Naboti wacuzile kuli Yezebele cimililangako vino apakwe yaali nu kucula umu manda aakusyalikizya. Apa myaka iingi, ulondolozi uu wakomya utailo wa yantu yakwe Yeova. Nomba u mulandu ci uno imilondolwele ya vintu ikusenuka?

10. (a) U munzila ci muno umuomvi mutailwe wayela umu pempule apa kulondolola amalyasi amuli Baibo? (b) Uzye impapulo ziitu ndakai zikalanda sana pali cani?

10 Apa myaka iingi, Yeova wavwa  ‘umuomvi mutailwe uwa mano’ ukuya umucenjele sana nanti umupempule. U munzila ci? Ndakai umuomvi mutailwe waaya umu cenjele sana apa kulondolola ukuti ilyasi lii ilya muli Baibo likaimililako usesemo umwi ucindame sana, yaacita vii lino yazana ulondolozi uuvwike wa mu malembelo. Nupya, yazana ukuti ulondolozi uwa mpiti, wakoma ukuvwikisya, ukwiusya nu kulondela vino ukasambilizya. Icicindame i cakuti, ukulondolola sana apa upiliulo ukalamba uwa malyasi ya muli Baibo, kwalenzile ukuti ivikulondolwa vyatala ukuvwika. Fwandi impapulo zya ndakai, zikalondolola ivyangupale, vino tungasambililako apa utailo, ukuzizimizya, uukapepa ni miyele yuze ino tungasambilila umu malyasi amuli Baibo. *

Ilyasi lyakwe Naboti likatusambilizya isambililo ilicindame sana (Lolini palagalafu 11)

11. Uzye lyene tuuvwikisya uli ilyasi lyakwe Naboti, nupya ilyasi kwene lii likatwavwa uli?

11 Lyene ilyasi lyakwe Naboti lyangupala nupya lyuvwika sana. Naboti atafwile pa mulandu wakuti wimililangako Yesu nanti apakwe. Lelo wafwile pa mulandu wakuti watwalilile ukuya uwa utailo kuli Leza. Wene watwalilile ukuvwila Isunde Lyakwe Yeova nanti cakuti yamucuzyanga kuli ya kateeka ya maka. (Mpe. 36:7; 1 Yamw. 21:3) Na ndakai kwene aomvi yakwe Leza yangakolanya Naboti, pano nayo kwene limwi yangaya ni ntazi wakwe ziizi izyakwetiko Naboti. (Welengini 2 Timoti 3:12.) Aina Klistu yonsi yanguvwikisya, ukwiusya, alino nu kuomvyanga vino yasambilila ukwilyasi lii ilya kukomelezya.

12. (a) I cani cino tutalinzile ukusondwelela apa malyasi amuli Baibo? (b) U mulandu ci uno twakwatila ulondolozi uuvwike sana nu mu vintu ivizike? (Lolini futunoti.)

12 Uzye tungasondwelela ukuti amalyasi amuli Baibo yakalanda sile pali vino tungasambililako ukwaula ukulanda apa upiliulo? Awe. Impapulo ziitu ndakai zisilanda sana apa upiliulo, lelo zikalanda pali vino ilyasi limwi muli Baibo lyakolana ni lyuze. Tungati vii, ucisinka  wakwe Naboti lino yamucuzyanga alino ni mfwa yakwe, cikatwiusya ucisinka uno Yesu na apakwe yakwe yaaya nao. Nomba, tukaiusya na ucisinka wa antu aingi ‘amfwele nazyuze.’ Icumi kwene tungalola vino Yeova akutusambilizya umu nzila iyangupale. *

VINO IVILANGILILO VYAKWE YESU VYALONDOLOLWA UMUNZILA IYANGUPALE

13. I cani icikaalanga ukuti tukalondolola ivilangililo vimwi vino Yesu walanzile umunzila iyangupale nupya iyuvwike?

13 Yesu Klistu aali Kasambilizya mukalamba sana. Inzila imwi ino wasambilizizyangamo, u kuomvya ivilangililo. (Mate. 13:34) Ivilangililo vyaziipa sana pano vikalondolola ivintu vitale umunzila iyangupale ino ingalenga ukuti twaelenganyapo sana. Apa myaka iingi, impapulo ziitu zikalondolola ivilangililo vino Yesu walandanga umunzila iyangupale nupya iyuvwike. Wakwe, Lupungu Lwa Mulinzi ulwa Ciyemba lwakwe Julai 15, 2008, lwatwavwile ukuvwikisya icilangililo ca citutumusi, ca lumbezu lyakwe musunta, ni ca mukwau, vino Yesu walanzile. Nomba paa twamanya ningo sana ukuti ivilangililo vii, vikalozya uku Wene Wakwe Leza, uno wavwa antu ukutaaluka ivintu ivyaya muno nsi iipe nu kuya asambi yakwe Yesu.

14. (a) Uzye mpiti twalondololanga uli umulumbe wa mwina Samaliya umusuma? (b) Uzye ndakai tuvwikisya uli umulumbe uno Yesu walanzile?

14 Uzye tunguvwikisya uli amalyasi, nanti imilumbe, ino Yesu walandanga? Icacumi ukuti, amalyasi yamwi yakalanda apa unkolanya napya yakasowela ni vilacitika uku nkoleelo; alino yauze nayo yakaalanda sana pali vino tungasambililako. Nomba tungamanya uli ukuti amalyasi yaa yakulozya uku cintu cimwi alino yauze yene foo? Apa myaka iingi, icasuko uku cuzyo cii ciiza camanyikwa ningo sana. Lekini tulande pali vino twalondololanga mpiti umulumbe uno Yesu walanzile uwa mu Samaliya musuma. (Luka 10:30-37) Lupungu Lwa Mulinzi ulwa mu 1924, lwalanzile ukuti umwina Samaliya wimililangako Yesu; umuseo uwapisile umumbali ya mwamba, ukufuma uku Yelusalemu ukuya uku Yeliko, walozyanga uku ntazi zya yantunze ukutandika lino antu akutandikilapo yapondwike umu calo ca Edeni. Nupya apuupu aali umu museo, yimililangako utuungwe utukalamba na atemwisya uculuzi, alino na ya simapepo na ina Levi yimililangako upefi waufi. Nomba, ndakai impapulo zikaomvya icilangililo cii uku kucelula Aina Klistu yonsi ukuti tufwile ukwazwa yonsi akulondeka uwa zwilizyo maka-maka ukuyazwa ukusambilila icumi pali Leza. Uzye cisituzanzya ukulola vino Yeova akwangupazya imisambilizizye yakwe?

15. I vyani vino tulasambilila umwilyasi ililondelilepo?

15 Umwisambililo lilondeliilepo tuli nu kusambilila apa mulumbe nauze uno Yesu walanzile uwa yakazyana ikumi. (Mate. 25:1-13) Uzye Yesu walondanga alondezi yakwe amu manda aakusyalikizya ukuvwikisya uli umulumbe uu? Uzye antu alandwa umu mulumbe, ni vyacitikanga, vikalozya ukucintu icilacitika uku nkoleelo? Nanti uzye Yesu walondanga ukuti tusambilileko isambililo ilyakutwazwa umu manda akusyalikizya? Tulasambilila umwi lyasi lilondeliilepo.

^ par. 4 Lupungu ulwangupale lwatandikiilepo umu lulimi lwa Cizungu umu Julai 2011. Ukutandika liili, Lupungu luu lwayako nu mu ndimi zyuze.

^ par. 5 Kuli amapekanyo yakuti Baibo wi akafume nu mu ndimi na zyuze kwene.

^ par. 10 Ibuku lya Ciyemba ilyakuti Pashanyeni Icitetekelo Cabo likalanda sana apa malyasi amuli Baibo a yantu 14 aaliko mpiti. Amalyasi yakalanda sana pali vino tungasambililako, asi pali vino antu aayamo yakaimililako nanti apa usesemo.

^ par. 12 Muli Baibo mwaya ivintu vino mungalola ukuti i “vitale kuvwikisya,” na muli vimwi vino Paulo walemvile. Nomba, yonsi alemvile Baibo yaali nu mupasi wa muzilo. Umupasi kwene wakwe Leza uwavwa na Ina Klistu ya cumi ukuvwikisya Baibo nu mu vintu ‘vizike vyakwe Leza.’—2 Pet. 3:16, 17; 1 Kol. 2:10.