Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Febuluwale 2015

Mauzyo Yano Aakawelenga Yakauzya

Mauzyo Yano Aakawelenga Yakauzya

Uzye amabuku yano antu yaalemba yakazumilizya ukuti Pontio Pilato akuno wali?

Apa ciliwe cii cipaapatane paalemvilwe izina lyakwe Pilato umu ciLatini

Aakawelenga Baibo yaamanya Pontio Pilato, pano lino Yesu wapeezilwe imilandu yamutwazile kuli aaliwe ukuti apingwile Yesu ukufwa. (Mate. 27:1, 2, 24-26) Nomba, izina lyakwe likazanwa imiku iingi umu mabuku ya mpiti. Ibuku limwi (The Anchor Bible Dictionary), lyalondolola ukuti amabuku aingi aakalanda apa malyasi ya mpiti yalanda “ivingi sana pali Pontio Pilato ukucila vino yalanda pali ya kateeka yauze yonsi aciLoma aateesilepo umu Yudeya.”

Izina lyakwe Pilato likazanwa sana umu malyasi yano Josifasi, umu Yuda uwasambiliile malyasi ya mpiti walemvile, uwalanzile apa milandu itatu ukulozya uku ntazi zino Pilato waali nazyo lino watekanga umu Yudeya. Filo nawe, umu Yuda uwasambiliile malyasi ya mpiti walanzile apa mulandu walenga 4. Kalemba uwi zina lyakuti Takitasi umwina Loma, wino walemvile apa malyasi yakwe ya kateeka aciLoma, wa sininkizye ukuti Pontio Pilato wapingwile Yesu ukuti yamukome pa nsita ino Tibelyasi wateekanga.

Umu 1961, aasambilila pa vintu vya mpiti aaombelanga umu cikulwa cino yaatambisyanga ivintu, icaali mu Loma umu musumba wa Kesaliya uno ndakai ukaamwa ukuti Izlaeli, yaazanyile iciliwe cipaapatane apalemvilwe izina lyakwe Pilato umu ciLatini. Ivyalembwa (paa) vitamanyikwa ningo-ningo, lelo cikaloleka ukuti amazwi aayapo aakuti: “Taibelyamu Pontio Pilato, Kapitao wa ina Yudeya, watapeela (ci) kuli yaleza aacindikwa.” Icikulwa cii cifwile caali i ng’anda yakupepelamo iyacindikanga Kateeka wa ciLoma Tibelyasi.

Uzye nkazi kasimikila alinzile ukuvimba uku mutwe ndi cakuti lino akutungulula Isambililo Lya Baibo pali kasimikila umonsi?

Icipande cakuti “Mauzyo Yano Aakawelenga Yakauzya” icali mu Lupungu Lwa Mulinzi lwakwe Julai 15, 2002 ulwa Ciyemba, calanzile ukuti nkazi alinzile ku vimba ukumutwe ndi cakuti lino akutungulula isambililo lya Baibo pali na kasimikila umonsi umuwatiziwe nanti aatawatiziwa. Ukwelenganya sana api lyasi lii calenzile ukuti kuyeko ukusenula mumwi umu kulondekwa.

Ndi cakuti nkazi akutungulula isambililo alino pali na kasimikila umonsi umu watiziwe, nkazi afwile ukuzwala ica kuvimba uku mutwe. Nga wacita vivyo ala akulanga umucinzi kuli vino Yeova watantika umu cilongano ca ina Klistu, pano ala akuomba umulimo uwapeelwa sile uku ina. (1 Kol. 11:5, 6, 10) Limwi nga akulonda anganeena umwina ukuti atungulule isambililo ndi cakuti umwina watalinga ukutungulula isambililo lilyo.

Lelo, ndi cakuti nkazi akutungulula isambililo ilya tantikwa lino pali kasimikila umwina aatatala wa watiziwa aasi uwakwe, nga atazwite icakuviimba uku mutwe ala ataluvyanyizye ukulingana na Malembelo. Lelo, kampingu yakwe yankazi yamwi angalenga ukuti yazwale ica kuvimba uku mutwe nanti icakuti pali umwina aatawatiziwa.