Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Januwale 2015

 LYASI LYAKUTANDIKILAKO | UTEEKO UWAULA MAFISAKANWA

Vino Mafisakanwa Amu Uteeko Yaipa

Vino Mafisakanwa Amu Uteeko Yaipa

Amafisakanwa amu uteeko yalondololwa ukuti, u kuomvya amaka uyi-uyi kuno aakaomba umu uteeko yakaacita pakuti yakwate vino yakulonda. Kuomvya maka ukwamusango uwo kwatandike mpiti sana. Mu masunde yakwe Mose mwaya masunde aakakanya ukulipila umwi ivya mafisakanwa pa kupingula imilandu, ukulangilila ukuti vicitwa vya musango uu vyamanyikwe mpiti sana ukucila na pa myaka 3,500 iyapisilepo. (Kufuma 23:8) Kuya kwene, amafisakanwa yaacila pa kupokelela sile vimwi. Aomvi ya mu uteeko yakatoola ivintu vya uteeko, ukuomvya vino yataapelwa insambu zya kuomvya, nanti sile ukwiya impiya. Yangaomvya ni cifulo cino yaapelwa umu uteeko ukwazwa ivyuza na yalupwa.

Nanti icakuti amafisakanwa yaaya umu tuungwe utwingi utwa untunze, cikaloleka ukuti amafisakanwa ya mu uteeko yene yaacilapo ukwipa. Amu kaungwe kamwi akakalolekesya pa mafisakanwa ya mu uteeko umu nsi yonsi (kano yaka-ama ukuti Transparency International), yaalemvile ulupapulo lumwi umu 2013 (ulwakuti Global Corruption Barometer) muno yaalanzile ukuti antu umu nsi yonsi yakaelenganya ukuti, muno mwaya sana amafisakanwa, u mu tuungwe twa vikanza vya miteekele, yakapokola, aomvi ya mu uteeko, aakaombela uku ng’anda ya masunde, na aomvi ya mu vilye vya uteeko. Lolini vimwi-vimwi vino yaalondeliizye ivikulangilila ivikacitika umu nsi yonsi.

  • UMU AFRICA: Mu 2013, aomvi amu uteeko 22,000 uku South Africa yaapezilwe umulandu wa mafisakanwa.

  • UKU AMERICA: Mu 2012, antu 25 ku Brazil yaazanyilwe nu mulandu wa kuomvya impiya zya uteeko ukulipila antu pakuti yakayavotele. Pa yantu yaayo paali nu wali inkonkanyi yakwe kateeka uwateesilepo, kulikuti umuntu uwamaka sana, uwakweti icifulo cakwe ciili umu mpanga iiya.

  • UKU ASIA: Ku Seoul, mu mpanga ya South Korea, antu 502 yaafwilile umu cikuulwa icaponyile. Yaakalondelezya yaazanyile ukuti aomvi amu uteeko yaaposile impiya zya mafisakanwa kuli yano yaakulanga icikuulwa cico pakuti yayazumilizye ukuomvya simenti iicipe, nu kukana konka masunde ya uteeko pa mikuulile iitanga ilete uzanzo.

  • UKU EUROPE: Umuomvi umwi uwa mu uteeko (European Commission Home Affairs Commissioner Cecilia Malmström) walanzile ati, “Intazi ya [mafisakanwa yati-tandika ukulolekela uku Ulaya.]” Walanzile nu kuti, “cikaloleka ukuti aaya umu vikanza vya miteekele yataasumbako amano ukuti yalwisye ukusisyapo amafisakanwa.”

Catala sana ukusisyapo amafisakanwa amu uteeko. Umuntu umwi uwasambilila sana (Professor Susan Rose-Ackerman) uwamanya sana ivyakucita pa kumala intazi ya mafisakanwa, walemvile ati, “uteeko ulinzile ukusenuka muli vino ukacita uculuzi” pakuti intazi ii isile. Nanti icakuti cikaloleka kwati kusi aangasisyapo intazi ya mafisakanwa, Baibo ikalanga ukuti intazi ii ilafumiziwapo ukwaula nu kutwisika.