Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Okotoba 2015

Mwaombela Yeova Ukwaula Ivya Kumupumvyanya

Mwaombela Yeova Ukwaula Ivya Kumupumvyanya

Maliya . . . watwalilile ukuuvwa kuli vino [Yesu] wasambilizyanga. Mata wasakamikwe pa mulandu wakuvulilwa kwa milimo.’ —LUKA 10:39, 40.

INYIMBO: 40, 55

1, 2. U mulandu ci uno Yesu watemiilwe Mata, lelo i vyani vino Mata waluvyanyizye ivyalangilile kuti atali umumalilike?

UZYE ndi mwelenganya pali nkazi wakwe Lazalo, Mata, mukati wali umuntu wa musango ci? Baibo ikati Mata wali a cuza wakwe Yesu, nupya Yesu wamutemilwe sana. Kuya kwene asi ali wino Yesu watemilwe sile nu kucindika. Maliya nkazi wakwe Mata, nawe kwene wali sana cuza wakwe Yesu. Nupya Yesu watemilwe na Maliya, nyina. (Yoane. 11:5; 19:25-27) Nomba u mulandu ci uno Yesu watemiilwe Mata?

2 Yesu watemilwe Mata pano wali uwa cikuuku na ukapekape, nupya waombesyanga. Lelo cino wamutemilwe sana, i cakuti wali nu utailo ukome. Wazumile vyonsi vino Yesu walandanga, nupya atatwisikanga ukuti Yesu wali ali Mesiya. (Yoane 11:21-27) Lelo nanti ciye vivyo, Mata atali umumalilike. Insita zimwi waluvyanyanga, wakwe vino naswe kwene tukaluvyanya. Lino Yesu wayatandalile, Mata wasokiile Maliya  nkazi yakwe, nu kuneena Yesu ukuti anene Maliya amwazweko imilimo. Mata walanzile ati: “Mwene uzye utasakamile vino kaci wane watansiila milimo yonsi ii kuti mbombe sile nenga? Munene aiize kuti angazweko.” (Welengini Luka 10:38-42.) U mulandu ci uno Mata walandiile vii, nupya ivyani vino tungasambililako kuli vino Yesu waswike?

MATA WAPUMVYANYIZIWE

3, 4. I vyani vino Maliya wacisile vino Yesu wataizye, nupya ivyani vino Mata wasambilileko? (Lolini icikope ca kutandikilako.)

3 Yesu wataizye sana vino Mata na Maliya yamwamile uku ng’anda, nupya walondanga ukuomvya insita iyo ukuyasambilizya icumi. Maliya wene lilyo kwene sile wikazile apiipi ni ngazo zyakwe Yesu, “ala akuuvwa kuli vino wasambilizyanga.” Walondanga ukusambilila ivingi kuli Kasambilizya Mukalamba. Mata nawe kwene, nga wasoolwilepo ukukutika kuli Yesu. Nupya, Mata nga ata vino wacitanga nu kutandika ukukutika, Yesu nga wamutaizye sana.

4 Nomba Mata wapumvyanyiziwe. Wapamviwe sana ukupekanyizizya Yesu ivyakulya ivisuma nu kuomba incito izingi wakwe cimwi pakuti azanzye sile Yesu. Lino waweni ukuti Maliya asikumwavwa, wasosile nu kutandika ukuilizyanya kuli Yesu. Yesu wamanyile ukuti Mata walondesyanga ukucita ivicizilemo, acino wamunenyile cikuuku-cikuuku ati: “Mata! Mata! Watusakamikwa nu kucuziwa pa mulandu wa vintu ivingi.” Nupya wamunenyile ukuti, ivyakulya vinono sile i vyalondekwanga. Lyene Yesu wataizye Maliya vino wisileko mano kukutika kuli aliwe. Walanzile ati: “Maliya watasolola icintu campomvu, nupya citalapokwa kunoli.” Limwi Maliya wilile ivyakulya vino waliile, lelo kwaula nu kutwisika atiilile vino wasambilile kuli Yesu na vino wamunenyile. Lino papisile imyaka 60, Yoane wizile alemba ati: “Yesu watemilwe Mata na kaci muze.” (Yoane 11:5) Amazwi yaa yakulangilila ukuti Mata uvwile vino Yesu wamunenyile, nupya waombiile Yeova na ucisinka umu umi wakwe onsi.

5. U mulandu ci uno catalila ndakai ukwika mano ku vintu vicindame, nupya iuzyo ci ilimaasukwa?

5 Twamanya ukuti ndakai kwaya vintu ivingi ivingatupumvyanya kuombela Yeova ukuluta vino cali umu nsita ya atumwa. Lupungu Lwa Mulinzi lwakwe Sepetemba 15, 1958, lwacelwile aina na yankazi ukuti yataalinzile ukuleka iviombelo ivyaliko pa nsita iiya, kuyapumvyanya kuombela Yeova. Na pa nsita kwene iiya cikaloleka kwati cilawanda kwayanga iviombelo ivipya. Ivintu vili wa mabuku, ya ledyo, mafilimu, na ya TV vyavuzile pa nsita iiya. Lupungu luu lwalondolwile ukuti lino tukupalamila ku mpelelekezyo ya nsi ii, “ivya kupumvyanya vilavula.” Ndakai, ali lino kuli vyakupumvyanya ivingi sana kuluta vino cali mpiti. I vyani vino tungacita pakuti twaika mano uku kupepa Yeova wakwe vino Maliya wacisile?

MUTAASUMBA SANA MANO KU VINTU VYA MU NSI

6. Uzye antu yakwe Yeova yakaomvya uli viombelo ivyayako ndakai?

6 Antu yakwe Yeova yakaomvya iviombelo ivyayako ndakai ukusimikila ilandwe lya wene. Lino inkondo ya mu 1914 itatala yatandika, na lino kwali inkondo kwene  ii, antu yakwe Yeova yatambisyanga vidyo iyakweti umutwe wakuti “Photo-Drama of Creation.” Yasimikile antu aingi sana umu mpanga izingi ukuomvya vidyo ii iya vikope na mazwi. Apakusila, vidyo ii yalondololanga ukuti kulaya insita isuma cuze iya mutende lino Yesu alateeka insi. Lyene pacisila antu yakwe Yeova yatandike ukuomvya ledyo, ukusalanganya ilandwe lya Wene uku yantu aingi wakwe cimwi ukuzinguluka insi. Ndakai tukaomvya ya kompyuta na Intaneti ukusimikila antu konsi kuno yali kwikako sile nu ku ncende ukutaya sana antu.

Mutaaleka ivintu ivitacindama ukumupumvyanya ukupepa Yeova (Lolini palagalafu 7)

7. (a) U mulandu ci uno caipila ukwika sana mano uku vintu vya mu nsi? (b) Ivyani vino tulinzile ukucenjelako sana? (Lolini futunoti.)

7 Baibo ikatucelula ukuti tutalinzile ukwika sana mano ku vintu vya mu nsi. Cii cikusenula nu kuti tutalinzile kusumba sana insita uku vintu vya mu nsi. (Welengini 1 Kolinto 7:29-31.) Ivintu vya musango uu vimwi vitaipa foo, lelo vingaatuliila insita. Limwi tungatemwa sana ukuya uku vyangalo, kuwelenga mabuku, kutamba TV, ukuya umu kutandala uku ncende zino twatemwa, ukuya sana mu kukala vimwi, nu kulondesya ukumanya iviya ivipya ivyati vifuma. Yamwi yatemwa sana kulanda na auze pa Intaneti, kutumilana mameseji, nanti ukulondesya ukumanya malyasi aatiyafuma nanti aatiyacimvya umu vyangalo. Lelo yamwi yangateekwa uzya ni vintu vii. * (Lolini futunoti.) (Kasambilizya 3:1, 6) Nga tukusumba sana insita uku vintu ivitacindama, cingalenga ukuti tutaika amano uku vintu vicindame, kuli kuti kupepa Yeova.—Welengini Efeso 5:15-17.

8. U mulandu ci uno cacindamila ukuti tutaatemwa sana vintu vya mu nsi?

8 Satana akaombesya ukutupumvyanya ukuomvya vintu vya mu nsi, kuti tute  ukuombela Yeova. Satana wacisile vii umu nsita ya atumwa, nupya avino akacita na ndakai kwene. (2 Timoti 4:10) Fwandi lyonsi tulinzile ukuiceceta ukulola ndi cakuti twatemwa sana vintu vya mu nsi nupya tulinzile ukusenuka. Baibo ikatunena ukuti tutalinzile ukutemwisya ivintu vya mu nsi. Lelo tulinzile sile ukutemwa Yeova. Nga twacita vivyo, cilatwangukila ukuvwila Yeova nu kupalama sana kuli aliwe.—1 Yoane 2:15-17.

MWAIKA MANO KU VINTU VICINDAME SANA

9. I vyani vino Yesu wasambilizye asambi yakwe ukwikako mano, nupya walangilile uli vino tulinzile ukuya?

9 Yesu wasambilizye asambi yakwe ukuti yataalinzile ukupumvyanyiziwa ni vintu vingi, wakwe vino wasambilizye Mata. Wayanenyile ukuti yaliinzile ukusumba mano uku kuombela Yeova nu kutungilila Uwene wakwe. (Welengini Mateo 6:22, 33.) Yesu walangilile vino tulinzile ukuya. Ataakweti vintu vingi, nanti ing’anda umwakwikala.—Luka 9:58; 19:33-35.

10. Uzye Yesu watulangilile uli vino tulinzile ukucita?

10 Yesu ataalesile icili consi ukumupumvyanya umu mulimo wa kusimikila. Lino watandike sile umulimo wa kusimikila, antu ali mu musumba wa Kapenaumu yalondanga ukuti Yesu atwalilile ukuya nayo. Uzye Yesu wacisile uli? Wisile sile mano ku mulimo wa kusimikila. Walanzile ati: “Ndinzile nkosoole ilandwe lisuma lya wene wakwe Leza nu ku misumba yuze kwene pano acino Leza wantumile.” (Luka 4:42-44) Yesu wapitanga intafu itali ukuya mu kusimikila nu kusambilizya ilandwe lisuma ilya wene ku yantu aingi. Yesu wali umumalilike, lelo nawe kwene watontanga nupya walondanga ukupuuza pano waombesyanga sana.—Luka 8:23; Yoane 4:6.

Yesu watusambilizye ukuti ngi cakuti tukusumba sana mano uku kukwata vintu ivingi sana, tungapumvyanyiziwa ukuombela Yeova

11. Icani cino Yesu wacisile lino umuntu umwi wamuuzizye vino angacita pa wavya uno wakweti? I sambililo ci lino Yesu wasambilizye asambi yakwe?

11 Apa nsita yuze lino Yesu wasambilizyanga asambi yakwe isambililo ilicindame, umuntu umwi wizile amunena ati: “Kasambilizya, nena mwina wane angankanyeko ivyuma vino tata watusilile.” Yesu atalondanga ukunena umuntu wii ivya kucita. Nupya cii calenzile ukuti atapumvyanyiziwa ukusambilizya asambi yakwe. Alino nupya waomviizye isyuko lii, ukuyasambilizya ukuti, nga yakulondesya ukukwata ivintu vingi yangapumvyanyiziwa ukuombela Yeova.—Luka 12:13-15.

12, 13. (a) I vyani vino Yesu wacisile umu Yelusalemu vino aaGliki yamwi yatemilwe? (b) Uzye Yesu wacisile uli lino Filipi wamunenyile ukuti antu yamwi yalondanga ukumulola?

12 Yesu wasakamiile sana lino kwasiile panono kuti afwe. (Mateo 26:38; Yoane 12:27) Wamanyile ukuti wali nu kucula sana nu kufwa. Nupya wamanyile ukuti wakweti vingi vino wali nu kucita lino atali  afwe. Pa mulungu, pa Nisan 9, Yesu wingile mu Yelusalemu ala watakwela pali punda. Iumba lyamupokeliile. (Luka 19:38) Uwanda uwalondeliilepo, Yesu wasifile nu kuzinga aculuzi aali nu cenjezi aakazyanga vintu pa mutengo ukulu cuze.—Luka 19:45, 46.

13 Antu yamwi aaGliki, aizile ku Yelusalemu ku kuzevya ucilo, yaweni vino Yesu wacisile nupya yatemilwe sana. Acino yanenyile umutumwa Filipi ukuti yalondanga ukulola Yesu. Lelo Yesu atalondanga antu yamwi ukumutungilila nu kumucingilila uku yalwani yakwe. Wamanyile icintu icali cicindame sana. Watwalilile ukwika mano uku kucita kulonda kwakwe Yeova, kuli kuti ukutuula umi wakwe. Wacinkwileko asambi yakwe ukuti wali umupiipi nu kufwa nu kuti yonsi amulondelanga yalondekwanga ukuipeelesya. Walanzile ati: “Wino wensi uwatemwa umi wakwe alauponzya, na wino wensi uwapata umi wakwe mu nsi ii, wene alapeelwa umi wape.” Nupya Yesu walavile asambi yakwe ati: “Tata alacindamika wensi akaantumikila” nu kumupeela umi wape. Filipi afwile wanenyile antu yaaya aaGliki ilandwe lii ilisuma.—Yoane 12:20-26.

14. Nanti icakuti Yesu wisile sana mano ku mulimo wa kusimikila, ivyani na vyuze vino wacitanga?

14 Lino Yesu wali pano nsi, waombanga sana umulimo wa kusimikila ilandwe lisuma. Nanti cakuti Yesu wisile sana amano ku mulimo wa kusimikila, ateelenganyanga sile lyonsi pa mulimo wa kusimikila. Wakwanisye ukuya uku winga umwi, kuno waile asangula manzi ukuya waini umusuma sana. (Yoane 2:2, 6-10) Nupya insita zimwi wayanga kuno ya cuza yakwe na antu yauze aalondanga ukuvwa ilandwe lisuma yamwamanga, nu kuyaliila pamwi nayo ivya kulya. (Luka 5:29; Yoane 12:2) Lyene ni cacindime sana icakuti lyonsi Yesu wakwatanga insita ya kwelenganya, nu kupepa alino nu kupuuza.—Mateo 14:23; Mako 1:35; 6:31, 32.

“TUFUME KU VINTU VYONSI VINO VIKATUVULUNGANYA”

15. I cani cino Paulo walanzile ukuti aina Klistu yalinzile ukucita, nupya walangilile uli vino tulinzile ukucita?

15 Umutumwa Paulo wakolinye Aina Klistu kuli yaayo aakacimvyanya umu lwilo, nupya walanzile ukuti pakuti antu yaa yacimvye, yalinzile ukusenka kuli vyonsi ivingayapumvyanya, fwandi ali vino Aina Klistu yalinzile ukucita. (Welengini Ayebulai 12:1.) Paulo kwene walangilile vino tufwile ukucita. Paulo nga walumbwike sana wakwe vino ya simapepo ya ciYuda yali, lelo wakanyile vintu vivyo pakuti aike mano ku vintu “visuma” sana. Waombesyanga sana umu mulimo wa kusimikila nupya waile uku ncende izingi sana, kumwi nu ku Asilya, Asia Minor, Makedoniya, na Yudeya. Paulo welenganyanga sile pa cilambu cino wali nu kupeelwa ukwiyulu. Walanzile  ati: “Ukwilila ivya cisila nga nu kwika mwenzo onsi ku vya nkolelo, caleka nkasimwila ulunga ni cikongwani kuti ince mpelwe cilambu.” (Filipi 1:10; 3:8, 13, 14) Paulo ataali nu muci, na cii camwazwile ukuti ‘aipelesye mwisikulu ku kutumikila Umwene kwaula ca kumupumvyanya.’—1 Kolinto 7:32-35.

Paulo wakaanyile ukulumbuka pakuti aike mano ku vintu “visuma” sana

16, 17. Tungakolanya uli Paulo, usi mulandu twatwala nanti foo? Uzye Mark na Claire yacisile uli vii?

16 Wakwe vino Paulo wali, aomvi yakwe Yeova yamwi ndakai yasoololapo ukukanatwala pakuti yaaombesya umu mulimo wakwe Yeova. (Mateo 19:11, 12) Aatatwala nanti ukutwalwa yatakwata sana aakusakamala wakwe vino caya kuli yano yatwala. Lelo usi mulandu twatwala nanti foo, fwensi sile tungasenka uku ‘vintu’ ivingatupumvyanya ukuombela Yeova. Limwi tungalondekwa ukusenula imiyele iitu pakuti tutaonona sile insita nu kuti twaombesya umu mulimo wakwe Yeova.

17 Mark na Claire, aakuliile uku Wales, yatandike upainiya lino yamazile isukulu. Lino yatwaline, yatwalilile ukuomba upainiya. Nomba yalondesyanga ukuombesya. Mark walondolwile ati: “Twakazizye ing’anda ino twikalangamo, iyali ni miputule itatu pakuti twangupazye imikalile, nupya twatiile ukuomba incito ino twaombanga pakuti tutandike umulimo wa makuule.” Pa myaka 20 iyapitapo, Mark na Claire yaomba umulimo wa kukuula Mang’anda ya Wene umu mpanga izingi izya mu Africa. Insita zimwi yakwatanga sile impiya izinono, lelo Yeova wayasakamalanga. Claire walanzile ati: “Ukuombela Yeova cila wanda kukatuzanzya wakwe cimwi. Muno tukaya tukapanga ivyuza ivingi sana, nupya tusiulizya nanti cimwi. Vintu vino twasya vitanga vilingane nanti panono uku nsansa zino twakwata umu mulimo wa kuombela Yeova insita yonsi.” Vikwene ali vino aomvi yonsi aakaombela Yeova insita yonsi yakauvwa. *—Lolini futunoti.

18. A mauzyo ci yano tungayuzya sweineco?

18 Uzye namwe mukalola ukuti mungaombesya umu mulimo wakwe Yeova? Uzye kwaya vimwi ivikamupumvyanya ukwika mano ku vintu ivicindame sana? Ngi cakuti avino cili mungacita uli? Limwi mulinzile ukulawelenga sana nu ukuisambilizya Baibo. Icipande icilondelilepo cilalondolola vino mungacita.

^ par. 7 Lolini icipande icikuti “Muntu Iciwelewele Wene Akataila Muli Vyonsi Kwene”

^ par. 17 Lolini lyasi lyakwe ya Hadyn na ya Melody Sanderson umu cipande icikuti “Nasambilile Icalungama no Kucita Ifyo Nasambilile.” (Lupungu Lwa Mulinzi, ulwa Ciyemba lwakwe Maci 1, 2006) Uculuzi wakwe ya Hadyn na ya Melody umu Australia, wapitikanga ningo sana, lelo yasiile yaata uculuzi wao nu kwingila umu mulimo wa nsita yonsi. Welengini mulole ivyacitike lino impiya zyonsi zyasizile ala yakuomba umulimo wa nsita yonsi umu India.