Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Ogasiti 2015

Twalililini Ukuloleela!

Twalililini Ukuloleela!

‘Lelo ndi mwalola ukuti uwanda wazimba, nemo nkuti muulolele mutazukuwa.’—Haba. 2:3.

INYIMBO: 32, 45

1, 2. Uzye ya kapepa yakwe Yeova yakacita uli lyonsi?

AOMVI yakwe Yeova yaatandika mpiti ukuloleela ukufikiliziwa kwa mausoowelo aalembwa muli Baibo. Yelemiya wasoowile ukuti Yelusalemu wali nu konoonwa, nupya cii cizile cicitika umu 607 B.C.E. lino aina Babiloni izile yonona Yelusalemu. (Yele. 25:8-11) Ezaya, wino umupasi walenzile asoowele ukuti Yeova alafumya Ayuda umu uzya, walanzile ati: “Ala asyuke ayayo yano yataila muli [Yeova].” (Eza. 30:18) Mika, wino usoowelo wakwe nawe ukalanda pa yantu yakwe Leza aaliko mpiti, wailandile ati: “Namapempukilwa kuli [Yeova].” (Mika 7:7) Nupya pa myaka iingi, aomvi yakwe Yeova yaalolelanga ukwiza kwakwe Mesiya, nanti Klistu.—Luka 3:15; 1 Pet. 1:10-12. *

2 Aomvi yakwe Leza ndakai nayo yaatwalilila ukuloleela, pano mausoowelo yamwi aakalanda pali Mesiya yacili yakufikiliziwa. Ukupitila umu Wene wakwe Mesiya, Yeova wasya ace afumyepo uyi onsi lino aloonona aipe nu kupususya antu yakwe umu nsi ino Satana ali kateeka. (1 Yoa. 5:19) Fwandi lekini  lyonsi twaya apempule nu kumanya ukuti insi ii yasya iyononwe.

3. I cuzyo ci cino limwi tungatandika ukwelenganyapo ndi twaloleela impelelekezyo pa myaka iingi?

3 Swe ya kapepa yakwe Yeova, tukalondesya ukulola kuno ukulonda kwakwe Yeova kukucitika pano “nsi vino kukacitika mwiyulu.” (Mate. 6:10) Yamwi ndi yalola kwati yalolela sana, yangatandika ukwelenganya yati, ‘Uzye pali umulandu uno tulinzile ukutwalilila ukuloleela?’ Lekini tusambilile.

U MULANDU CI UNO TULINZILE UKUTWALILILA UKULOLELA?

4. U mulandu ci uno tulinzile ukutwalilila ukuya apempule?

4 Twasambilila muli Baibo vino tulinzile ukuya lino impelelekezyo ya nsi ii itali ifike. Yesu wanenyile alondezi yakwe ukuya “apempule.” (Mate. 24:42; Luka 21:34-36) Izwi kwene lii likalangilila umulandu uno tulinzile ukutwalilila ukulolela, pano Yesu ali vino walanzile! Acino, iuvi lyakwe Yeova likatwazwa vino tungacita. Impapulo zino Umuomvi Mutailwe akatupekanyizizya zikalanda ukuti tulinzile “ukuloleela uwanda wa Mwene.” Nupya tulinzile ukutaila ukuti Yeova alatupeela insi ipya.—Welengini 2 Petulo 3:11-13.

5. U mulandu ci uno cacindamila sana ukuya apempule ndakai?

5 Nanti icakuti ukuloleela kwacindime sana uku Ina Klistu aaliko mpiti, lyene ndakai kwacindama nu kuluta. U mulandu ci? Pano tukwikala umu nsita ya kuyapo kwakwe Klistu. Ukuyapo kwakwe Klistu kwaloleka ukutandika umu 1914. Alino icilangililo ca mbali ziingi, icayamo ukwipa kwa vintu umu nsi nu kukosolwa kwi landwe lya Wene umu nsi yonsi, vikalanga ukuti tuli uku “mpelelekezyo ya nsi.” (Mate. 24:3, 7-14) Vino Yesu ataalanzile utali wa nsita iiyali nu kupitapo lino impelelekezyo itali ize, tulinzile ukuya sana apempule.

6. U mulandu ci uno ivintu vilatwalilila ukwipilako sile lino impelelekezyo ikupalamila?

6 Limwi tunguzya tuti: Uzye “mpelelekezyo ya nsi” isilozya uku nsita ya kunkoleelo lino ivintu umu nsi vilipa sana? Baibo isilanda ukuti uyi ulinzile ukuvulisya sana “mu manda akusyalikizya.” (2 Tim. 3:1, 13; Mate. 24:21; Umbw. 12:12) Fwandi tulinzile ukumanya ukuti ivintu vilatwalilila sile ukwipilako umu nsi.

7. Uzye Mateo 24:37-39 ikalangilila ukuti cilaya uli umu manda akusyalikizya?

7 Uzye mukaelenganya ukuti ivintu umu nsi viliipa ukufika pi lino ‘ucuzi ukulu cuze’ utali wize? (Umbw. 7:14) Uzye mukaelenganya ukuti kulaya inkondo umu nsi yonsi, antu yonsi yatalakwata ivyakulya, alino nu kuti kulaya indwala umu ndupwa zyonsi? Ndi cakuti ivintu vyaya vivyo, na yaayo aakapaazya yangatandika ukuzumila ukuti usoowelo wa muli Baibo u wa cumi. Lelo, Yesu walanzile ukuti antu aingi ‘yatalamanya’ ukuyapo kwakwe, nupya yalaaomba imilimo yao ukufika na lino impelelekezyo iliza. (Welengini Mateo 24:37-39.) Fwandi amalembelo yasilanda ukuti ivintu viliipa sana icakuti antu yonsi yace yapatikiziwe ukumanya ukuti impelelekezyo yatipalama.—Luka 17:20; 2 Pet. 3:3, 4.

8. I vyani vino yaayo aakauvwila ukucelula kwakwe Yesu ukwakuti “pempulini” yasininkizya?

8 Lelo, pakuti icilangilililo ca mpelelekezyo ciombe umulimo uno cifwile ukuomba, cilinzile ukufikiliziwa icakuti yaayo aakauvwila vino Yesu walanzile nu  kuya ‘apempule’ yamanye. (Mate. 24:27, 42) Nupya cii, cikacitika ukutandika umu 1914. Ukutandika umu mwaka kwene uuwa, icilangililo ca mpelelekezyo cikafikiliziwa. Ukwaula nu kutwisika, lyene ndakai tuli umu “manda akusyalikizya,” nupya kusiile insita inono ukuti antu aipe yononwe.

9. I vyani ivilinzile ukutulenga ukutwalilila ukuloleela ukononwa kwa yantu aipe?

9 U mulandu ci fwandi uno Aina Klistu ndakai yalinzile ukutwalilila ukuloleela? Tukatwalilila ukuloleela pano tukauvwila Yesu. Nupya twamanya ukuti icilangililo ca kuyapo kwakwe catandika ukuloleka. Twazumila ukuti impelelekezyo ili apiipi, pano twasininkizya ukupitila umu malembelo. Acino fwandi tukatwalilila ukuya apempule nu kuloleela ukononwa kwa yantu aipe.

TULALOLEELA UKUFIKA LILACI?

10, 11. (a) Uzye Yesu wavwilizye asambi yakwe ukuipekanya ukucita vyani? (b) Uzye Yesu wanenyile alondezi yakwe ukucita vyani ndi cakuti impelelekezyo yaleengela? (Lolini cikope cakutandikilako.)

10 Sweingi twatwalilila ukuloleela pa myaka iingi. Lelo, tutalinzile ukuta ukuloleela pa mulandu wa kuti papita insita itali. Tulinzile ukuipekanya lino tukuloleela ukwiza kwakwe Yesu umu konoona aipe. Iusyini ukuti Yesu wanenyile alondezi yakwe ati: “Cenjelini, pempulini, pano mutamanyile lino nsita ii iliza. Cili wa muntu wino ali pa lwendo kufuma ku muzi wakwe nu kusya aomvi kuti yaangalila milimo yakwe. Lyene apeela kuli wenga na wenga incito ya kuti aomba nu kunena kalinda kuti aapempula. Caleka, pempulini, pano mutamanyile kasita lino umwine wa ng’anda ali nu kwiza, limwi ku manguzi lino ilanzi lyawa, nanti usiku pakasi, nanti pa macaca, nanti lino ilanzi lyatunka. Ndi wene wapumikizya pa kwiza, atalinzile azane mukaswile. Cino nkunena mwemwe, acino nkunena na yonsi kwene nati, ‘Pempulini!’”—Mako 13:33-37.

11 Lino alondezi yakwe Yesu yamanyile ukuti ukuyapo kwakwe Yesu kwatandike umu 1914, yatandike ukuipekanya pano yelenginye ukuti limwi impelelekezyo ingiza zuwa. Acino yatandike ukusimikila sana. Yesu walangiliile ukuti aliza pa nsita yuze lino waomvizye amazwi yakuti aliza “pa macaca, nanti lino ilanzi lyatunka.” Uzye alondezi yakwe Yesu yaali nu kucita uli ndi vya musango uu vyacitika? Walanzile ati: “Pempulini.” Fwandi ukuloleela pa nsita itali, kutaali nu kulenga kuti asambi yakwe Yesu yatandike ukwelenganya ukuti impelelekezyo ili ukutali nanti sile ukuta ukuloleela.

12. I cuzyo ci cino Habakuku uzizye Yeova, nupya Leza waswike atuuli?

12 Elenganyini pali kasema Habakuku, uwatumilwe ukuti asoowele ukononeka kwakwe Yelusalemu. Wafisile uku Yelusalemu, ala amazwi yakucelula ukuti umusumba ulononwa yatandika mpiti ukuvwika. Ivintu vyaifile sana icakuti ‘antu aipe yaafyenganga antu asuma.’ Fwandi tutanga tuzunguke ukuti Habakuku uzizye ati: ‘U kufika lilaci lino we Yeova namaalilila kunuli kuti ungazwe?’ Yeova ataaswike icuzyo cii wakwe vino Habakuku welenganyanga, lelo Yeova wanenyile kasema kwene wii ati uwononesi wali nu kwiza “ukwaula kucelwa.” Leza wanenyile Habakuku ukutwalilila ‘ukuloleela.’—Welengini Habakuku 1:1-4; 2:3.

13. Uzye Habakuku nga watandike ukwelenganya uli, nupya u mulandu ci uno nga cali ukukanaya na mano ukwelenganya vivyo?

13 Limwi Habakuku nga watoovwike  nu kwelenganya ukuti: ‘Natandika mpiti sana ukuvwa pa ononesi wakwe Yelusalemu. Nga ndi cakuti uwononesi ucili ukutali? Citanga cizipe fwandi ukuti ntwalilile ukusoowela uwononesi wakwe Yelusalemu kwati uli apiipi sana. Namaleka ukuti yauze aliyo yasoowela.’ Habakuku aaelenganya ndi vii, Yeova nga ataatwaliliile ukumutemwa, nupya nga ononike pa nsita ino aina Babiloni izile umu konoona Yelusalemu!

14. U mulandu ci uno tungasininkizizya ukuti ndi twatwalilila ukuloleela, ivintu vilatuziipila sana?

14 Umu nsi ipya, tulaya sana nu luzango ukumanya ukuti vyonsi ivyasoowilwe pa manda akusyalikizya vyacitike. Ukwelenganya pali vino ivintu vyacitiike kulaleenga twataila sana Yeova na malayo yakwe aakunkoleelo. (Welengini Yoswa 23:14.) Tulaataizya sana Yeova, ukuti wamanyile ‘lino ivintu vii vyali nu kucitika,’ nupya watuneenyile ukuti ‘mpelelekezyo ya vintu vyonsi yatipalama.’—Mili. 1:7; 1 Pet. 4:7.

TULINZILE UKUOMBAKO VIMWI LINO TUKULOLEELA!

Uzye mukaombesya umu mulimo wakusimikila? (Lolini palagalafu 17)

15, 16. U mulandu ci uno umulimo wa kusimikila wacindamila sana ndakai?

15 Tutanga tutwisike ukuti Iuvi lyakwe Yeova lilatwalilila ukutukomelezya ukuya acincile lino tukuombela Yeova. Vino iuvi lyakwe Yeova likatwiusyako vikatwazwa ukuya acincile umu mulimo wakwe Leza, nu kumanya ukuti icilangililo ca kuyapo kwakwe Klistu cikufikiliziwa. Uzye tulinzile ukuomba uli umu manda yaa aakusyalikizya? Tulinzile ukutwalilila ukulonda Uwene wakwe Leza inkoleelo nu wololoke wakwe lino tukuombesya umu mulimo wa kusimikila ilandwe lisuma!—Mate. 6:33; Mako 13:10.

16 Nkazi umwi walanzile ati: “Ndi tukusimikila ilandwe lisuma ilya Wene Wakwe Leza, . . . tungazwa antu ukwiza pusuka uwononesi wa yantu aipe.” Nkazi wii wamanya upiliulo wa kupususya umwi, pano wene na iya yapuswike uzanzo wa pa manzi uwipisye. Uzanzo uwo wacitiike umu 1945 lino uwato umwi (Wilhelm Gustloff ) uno yaakwezilemo wononike. Na lino umwi ali umu uzanzo uwipisye, angaelenganya pa vintu ivitaacindama. Nkazi wii akaiusya ukuti umwanaci umwi watwalilile ukupunda ati: “Icola cane! Iyemwe icola cane! Ukasi wane! Ukasi wane onsi wasyala umu manzi. Vintu vyane vyosi vyasyala umu manzi!” Lelo, yamwi aali umu wato uwo yaaitemiilwe ukwika umi wao mu uzanzo pakuti sile yazweko yauze. Naswe twaya wa yantu yaaya aipeezile pano tukaombesya ukuti  twazwe antu ukwiza pusuka. Twacincila umu mulimo wa kusimikila nupya tukaazwa antu ukuti yace yapusuke lino uwononesi uliza.

Uzye mukapingulapo ningo ivyakucita pakuti mutwalilile ukuya apempule? (Lolini palagalafu 15)

17. I vyani ivyatwazwa ukuzumila ukuti impelelekezyo ili apiipi?

17 Ivikacitika umu nsi ndakai vikaalanga ukuti usoowelo wa muli Baibo ukufikiliziwa nupya uwononesi uli apiipi. Fwandi, tutalinzile ukwelenganya ukuti insita akuno icili iyakuti “impembe ikumi” ni “cilyanyi” ivyalandwa pa Umbwilo 17:16 vice vizanze Babiloni Mukulu, kulikuti upefi wa ufi uwaya umu nsi yonsi. Lekini lyonsi twaiusya ukuti Leza ‘aliika umu myenzo’ yakwe yaayo aalakatukila Babiloni Mukulu ukuti yamonone, nupya cii cingacitika apa nsita iliyonsi iitamanyikwa nupya cingacitika zuwa sana! (Umbw. 17:17) Uwononesi wa yantu aipe usi ukutali foo. Fwandi tulinzile ukuvwila ukucelula kwakwe Yesu ukwakuti: “Cenjelini pakuti imyenzo inu italaukilwa mu kupunuka, mu ukolesi na masakamiko amu umi uu, pano limwi uwanda uwa ungamupumikizya wa citeyo.” (Luka 21:34, 35; Umbw. 16:15) Lekini tutwalilile ukuya acincile lino tukuombela Leza, lyonsi twasininkizya ukuti Leza “angacitila antu yano yamutaila” ivintu ivisuma nu kupususya aakamuloleela.—Eza. 64:4.

18. Uzye iiuzyo ci ililaasukwa umwi lyasi ililondelilepo?

18 Lino tukulolela impelelekezyo ya nsi ii, lekini lyonsi twaiusya amazwi amuli Baibo yano Yuda walanzile aakuti: ‘Mwe yacuza yane akundwe, twalililini kukula mu utailo winu wa muzilo. Pepini mu maka ya mupasi wa muzilo. Ikalini mu kutemwa kwakwe Leza. Loleelini Mwene witu Yesu Klistu, nawe alaya na mizu kuno muli nu kumupeela umi wa pe.’ (Yuda 20, 21) Uzye lyene tungalanga uli ukuti tukaloleela insi ipya ino Yeova watulaya? Iuzyo lii lilaasukwa umwi lyasi ililondelilepo.

^ par. 1 Pakuti mulole mausoowelo na yauze aakalanda pali Mesiya na vino yafikiliziwe, lolini ifwa 200 umwi buku lyakuti Uzye Baibo Ikasambilizya Ukuti Uli?