Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2015

Yaipeelisye Ukuomba—ku Russia

Yaipeelisye Ukuomba—ku Russia

UMU 1991, ya Nte Yakwe Yeova uku Russia yatemilwe cuze lino yuvwile ukuti iiyayazumilizya ukuomba umulimo wao uwa kusimikila, uno uteeko walesizye pa myaka iingi. Apa nsita iiyo, anono sile aelenganyanga ukuti impendwa yakwe ya Nte ingafika kuli 170,000 ndi vino cili ndakai! Pa mpendwa kwene ii yakwe ya kasimikila akaombesya, paya na ya Nte aafumile uku mpanga zyuze ukwiza azwilizya umulimo wa uzombozi umu Russia. (Mate. 9:37, 38) Lekini tulande pali yamwi.

AINA YAITEMIILWE UKWAZWA IVILONGANO

Umu mwaka kwene uno uteeko wazumilizye umulimo wa kusimikila umu Russia, Matthew uwafumile uku Britain wali ni myaka 28. Umu mwaka kwene uuwa apa ukongano wa citungu, kwali ilyasi ilyalangiliile ukuti uku vilongano vya ku ufumo ndaka wa mpanga ya Ulaya kwalondekwanga uwazwilizyo. Kalanda wi lyasi, walumbwilepo icilongano cimwi ica mu St. Petersburg, uku Russia, icakweti sile umuomvi wenga ukwaula Eluda nanti umwi. Lelo ya kasimikila yene yatungululanga masambililo ya Baibo aingi cuze! Matthew walanzile ati: “Apacisila ci lyasi, natandike ukwelenganya pa kuya uku Russia, icakuti napefile kuli Yeova, ukumulondolwela vino nalondanga ukucita.” Matthew watandike ukusunga impiya, nupya wakazizye iviya vimwi vino wakweti, alino umu 1992 wizile akuukila uku Russia. Uzye ivintu vizile viya uli?

Matthew

Matthew walanzile ati “Cantaliile sana ukusambilila ululimi, ntalanzyanyanga ningo na antu ivya muli Baibo.” Cintu cuze icatazile, u kuzana umwa kwikala. “Ntanga mpende imiku ino yamfumyanga umu ng’anda inkuukila kuuze, ukwaula ukuipekanya.” Usi mulandu ni ntazi zizyo, Matthew walanzile ati: “Ukukuukila uku Russia ali cintu cisuma cino nacisile.” Walondolwile ati: “Ukuombela kuno, kwalenga ukuti nataila sana Yeova nupya akangazwa wakwe cimwi.” Matthew wizile asontwa ukuya Eluda nupya painiya umuiyele, lyene ndakai akaombela api ofesi lya musambo umupipi nu ku St. Petersburg.

Umu 1999, Hiroo wamazile isukulu lya Ina Klistu Asimbe uku Japan, ala ali ni myaka 25, nupya lino yaasambililanga, kasambilizya wenga wamukomelizye ukuyaombela uku mpanga yuze. Hiroo walondesyanga ukuyaombela uku Russia nupya watandike  ukusambilila ululimi lwa ciRussian. Nupya wacisile icintu na cuze. Walanzile ati: “Naile nikala uku Russia apa myezi 6. Vino insita ya mpepo kukazuka sana, naileko umu Novemba, pakuti nkalole ndi cakuti ningakwanisya.” Lino insita ya mpepo yasizile, waswilile uku Japan kuno waile aikala mikalile iyanguke pakuti asungeko impiya nu kuswilila uku Russia.

Hiroo na Svetlana

Lyene Hiroo aataikala umu Russia apa myaka 12, nupya waombela umu ivilongano ivingi. Insita zimwi wayanga sile aali Eluda wenga uwazwanga ya kasimikila ukucila pali 100. Umu cilongano cimwi, cila mulungu walandanga amalyasi aingi umu kulongana kwa Mulimo, watungululanga Ukulongana kwi Sukulu, Isambililo Lya Lupungu, alino ni sambililo lino ndakai tukati Isambililo Lya Baibo Apa Cilongano, umu vifulo 5. Nupya watandalilanga sana aina na ya nkazi aamu cilongano. Hiroo ndi welenganya imyaka iiyo, akati: “Nayanga ni nsansa sana vino nazwilizyanga aina na ya nkazi ukuya aakome muli ukapepa.” Uzye ukuombela kuuku ukukaalondekwa uwazwilizyo kwamwavwile uli? Walanzile ati: “Lino ntali nize uku Russia, naali Eluda nupya painiya, nomba kufuma pano nizila kuno, nalola ukuti ucuza wane na Yeova wakomelako sana. Nasambilila ukutaila sana Yeova umu umi wane onsi.” Umu 2005, Hiroo watwazile Svetlana, nupya yatwalilile ukuombela pamwi upainiya

Michael na Olga pamwi na Marina na Matthew

Matthew, uwa myaka 34, nu muto wakwe Michael, uwa myaka 28, yaavyaliilwe uku Canada. Yonsi yoili yaaile uku Russia umu kutandala. Yaazungwike sana ukulola vino antu aingi izanga umu kulongana, nomba kwali sile aina anono aangasambilizya antu yaayo Baibo. Matthew walanzile ati: “Icilongano cimwi cino naile ndonganako kwazanyilwe antu 200, nomba kwali eluda wenga sile uwa cikalamba uwatungululanga ukulongana nu muomvi wenga uwa cance. Lino naweni viivyo, natandike ukulondesya ukukuukila uku cilongano ciici pakuti nkaazwilizyeko aina.” Matthew waile uku Russia umu 2002.

Lino paapisile imyaka 4, Michael nawe wakukiile uku Russia, nupya wazanyile ukuti kucili kukalondekwa aina akutungulula ivilongano. Vino wali u muomvi, wapeezilwe imilimo umu cilongano iya kusakamala impiya, ukuombela uku mpapulo, alino nu kwangalila icifulo cakusimikilamo. Nupya wapeezilwe umulimo uno ulinzile ukuombwa na kalemba pa cilongano. Yaamupeelanga na malyasi, alino nupya wazwilizyanga ukupekanya amaukongano yakalamba nu kukuula Mang’anda ya Wene. Na ndakai kwene kucili kukalondekwa aina aakwazwilizya ukutungulula ivilongano. Nanti icakuti ukupeelwa ivya kucita ivingi umu cilongano u mulimo ukome, Michael, lyene ndakai a eluda, nupya walanzile ati: “Ukwazwa aina, kukandetela sana uluzango. Ali mulimo usuma sana uno ningaomba ndakai!”

Matthew watwazile nkazi uwizina lyakuti Marina, alino Michael nawe watwazile Olga. Yonsi yoili pamwi na yamama yao, alino na ina na ya nkazi yauze aipeelesya, yaatwalilila ukwazwilizya ivilongano ivikaavulilako sile.

YA NKAZI AACINCILA YAKA-AZWILIZYA UMU MULIMO WA UZOMBOZI

Tatyana

Umu 1994, lino Tatyana wali ni myaka 16 iya kuvyalwa, ya painiya aiyele 6 aafumile ku Czech Republic, ku Poland, nu ku Slovakia, yaatandike ukuombela umu cilongano umwali Tatyan uku Ukraine. Acili akaiusya ya painiya yaaya. Nupya walanzile ati: “Ya painiya yaaya, yaali acincile nupya yatemilwe ukuya pamwi na yauze umu cilongano. Yaamanyile sana Baibo.” Nkazi wii wailoliile vino Leza wapolelile aina na ya nkazi yaaya, nupya welenganyanga ukuti, ‘nkalonda ukuya wakwe ya painiya yaa.’

Ya painiya yaaya yakomelilzye sana Tatyana, na ci calenzile ukuti ndi sukulu lyalala, aya uku ncende izyayela ukutali sana umu kusimikila, pamwi na ya kasimikila yauze umu mpanga ya Ukraine na Belarus kuno kutaaya ya Nte Yakwe Yeova. Tatyana uvwanga ningo sana ukuya umu kusimikila uku ncende zizyo. Watandike ukulondesya ukuya uku Russia umu kusimikila. Watandikiilepo ukuya tandalila nkazi uwa fumile uku mpanga yuze alino nu kulonda incito iyali nu kumwazwa ukuisakamala lino akuomba upaniya kuuku. Waile  uku Russia umu 2000. Uzye camutaliile sana ukuyelezya uwikazi wa kuuku?

Tatyana walanzile ati: “Vino ntaali nu kukwanisya ukuilipilila umwa kwikala, natandike ukusonkela ing’anda pamwi na yauze. Uwikalo wa musango uwo utangupiile. Insita zimwi nelenganyanga pa kuswilila ukumwitu. Nomba lyonsi Yeova wangavwanga ukumanya ukuti nali nu kupolelelwa ndi natwalilila ukuomba umulimo wa kusimikila uku Russia.” Ndakai, Tatyana akaomba umisyonali uku Russia. Tatyana wasondweliile ukuti: “Imyaka yonsi ino naombela kuno naya nu luzango sana nupya nazana ivyuza ivingi sana. Ni cacindama sana icakuti, lyene utailo wane wakomelako pa myaka yonsi ino nikala kuno.”

Masako

Masako uwa ku Japan, ndakai ali ni myaka uku ma 50, walondesyanga ukuombako umisyonali, nomba vino walwalililanga, calolekanga kwati atanga aombeko umulimo uwo. Lelo lino watandike ukuvwako ningo, wapingwilepo ukuya uku Russia ukuti akazwilizye umu mulimo wa uzombozi. Nanti icakuti catazile sana ukuzana umwakwikala ni ncito, watandike ukuomba incito ya kusambilizya ululimi lwa ciJapanese nu kuzifya ivikuulwa, nupya wakwanisyanga ukuisakamala lino waombanga upainiya. Uzye i cani icazwilizya nkazi wii ukutwalilila umu mulimo wa kusimikila?

Masako walanzile ati, “Ndi niusya imyaka 14 iyapitapo ukufuma pano nailiile uku Russia, cikandenga ukuya sana nu luzango, nupya nsi-iusya ni ntazi zino napitamo. Ukusimikila uku ncende ukukalondekwa yakasimikila aingi, kukalenga umwi ukuya sana nu luzango alino nu kusenuka muli vimwi.” Masako walanzile nu kuti: “Nemo ningati Yeova wancitila ivizungusyo pa myaka yonsi ino naomba, pano lyonsi akampeela ivyakulya, ivya kuzwala, nu mwakwikala.” Kuuze kuno Masako waombela umu mulimo wa uzombozi, u ku mpanga ya Kyrgyzstan. Nupya, nkazi wii wazwilizyako utumaumba twa ndimi zya Cizungu, ciChinese, ni ciUighur. Ndakai akaomba upainiya uku St.Petersburg.

INDUPWA NAZYO ZIKAOMBAKO UMULIMO WA UZOMBOZI

Inga na Mikhail

Pa mulandu nu kutala kwa wikazi, indupwa zikaaya uku mpanga zyuze pakuti uwikalo uzipeko. Lelo wakwe Abulaamu na Sala, aaliko mpiti, indupwa zimwi  zikaaya uku mpanga zyuze ukuya ombako umulimo wa kusimikila. (Utan. 12:1-9) Mikhail na Inga, aatwalane aafuma uku Ukraine nupya yaakukiile uku Russia umu 2003. Yaazanyile antu aalondanga ukusambilila Baibo.

Mikhail walanzile ati: “Pa nsita imwi twaile umu kusimikila uku ncende ino kutaaya ya Nte Yakwe Yeova. Uwacikalamba umwi wayuzile icisaasa nu kulanda ati, ‘Uzye mwemwe ya kasimikila?’ Lino twazumile, walanzile ati: ‘Namanyile ukuti muliza. Amazwi yano Yesu walanzile yatanga yakane ukufikiliziwa.’ Sikulu wiyo walanzile amazwi aaya pali Mateo 24:14.” Mikhail walanzile nu kuti: “Umu ncende iiya, twazanyile na ya mama 10 amu calici ca Baptist, aafumacumi aalondesyanga ukusambilila Baibo. Yaakweti ibuku lyakuti Mungikala Manda Pe (Live Forever) nupya yaomvyanga ibuku kwene lii cila Ciwelusi nu Mulungu. Twaswike amauzyo yano yaakweti umu maawazi aingi sana nu kwimbila pamwi nayo inyimbo zya Wene, alino nu kuliila pamwi nayo icakulya ca manguzi. Nkaiusya sana ukutandala kuuku.” Mikhail na Inga yaazumila ukuti ukuombela uku vifulo ukukalondekwa yakasimikila ya Wene aingi, kwalenga yaye nu utailo ukome, ukutemwa sana antu, nu kuya sana nu luzango. Ndakai, lyene yaaya umu mulimo wa kutandalila ivilongano.

Oksana, Aleksey, and Yury

Yury na Oksana, aatwalana aaku mpanga ya Ukraine, aali ni myaka umu ma 30, yaakwata umwana aali ni myaka 13 uwizina lyakuti Aleksey. Umu 2007, ulupwa luu lwayile umu kutandala ukwi ofesi lya musambo ilyayela uku Russia. Lino yaali kuuku, yaaweni mapu wa ku Russia apaali incende ikulu cuze ukutaaya yakasimikila. Oksana walanzile ukuti: “Lino twaweni mapu wiya, twilwike ukuti kwalondekwanga ya kasimikila aingi uku ncende iiya. Twapingwilepo ukukuukila uku Russia.” I cani icalenzile yapingulepo ukucita vivyo? Yury walanzile ati: “Ukuwelenga impapulo zitu, apa malyasi aakuti: ‘Uzye Mungaya Mukaombeleko Uku Mpanga Yuze?’ kwatwazwa sana. * Twatandaliile icifulo cimwi uku Russia cino iofesi lya musambo lyalondanga ukuti akuno tukaye. Twaile umu kulonda umwa kwikala alino ni ncito.” Umu 2008, yaakukiile uku Russia.

Pakutandika citaangupiile ukuzana incito, nupya ilingi yaakukanga ukuya umu mang’anda apusane-pusane. Yury walanzile ati: “Ilingi twapepanga ukuti Leza atwazwe ukukana toovoka, nupya twatwalilile ukusimikila, nu kutaila ukuti Yeova alatwalilila ukutwazwa. Lyonsi lino twalondanga Uwene inkoleelo, Yeova watwaliliile ukutusakamala. Umulimo uu walenzile ukuti twauvwana sana umu lupwa lwitu.” (Mate. 6:22, 33) Uzye ukuombela ukukalondekwa ya kasimikila aingi kwazwilizye uli Aleksey uwa cance? Oksana walanzile ukuti: “Calenzile ukuti Aleksey atandike ukuomba ningo sana. Waipeezile kuli Yeova, nupya wawatiziwe ala ali ni myaka 9. Vino kukalondekwa ya kasimikila aingi, cikalenga Aleksey ukuombako upainiya wa nsita inono. Tukazanga cuze ukulola vino Aleksey wacincila umu mulimo wa kusimikila.” Ndakai, Yury na Oksana yakaomba upainiya uiyele.

“VINO NKAALANGULUKA”

Wakwe vino ya kasimikila yano twatitulandapo yaalanzile, kukuukila uku ncende yuze uku kutungilila umulimo wa kusimikila, kukalondekwa ukutaila sana Yeova. I cacumi ukuti aakaombela ukukalondekwa sana uwazwilizyo yakaya ni ntazi uku ncende ino yakuukilako, lelo yakaya sana ni nsansa pa mulandu wakuti yakasimikila ilandwe lisuma uku yantu akalondesya ukuvwa ilandwe lya Wene. Uzye namwe mungatungilila umulimo wa uzombozi uku ncende ukukalondekwa ya kasimikila? Ndi cakuti mwasolola ukucita vii, mulauvwa wakwe vino Yury uvwile, uwalanzile pali vino wapingwilepo ukuya ukwalondekwanga yakasimikila, ati: “Cino nkalanguluka sile i cakuti ntapingwilepo zuwa.”

^ par. 20 Lolini Lupungu Lwa Mulinzi lwakwe, Okotoba 15, 1999, mafwa 23-27.