Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2015

Mwa-azwilizya Ukuzifya Paladaise wa Unkolanya

Mwa-azwilizya Ukuzifya Paladaise wa Unkolanya

Ndacindamika “musumba” wane.—EZA. 60:13.

INYIMBO: 28, 19

1, 2. Uzye izwi lyakuti “cilyatilo cangazo” likapiliula cani umu malembelo ya ciYebulai?

YEOVA walanzile ati: “Iyulu ali cilimba cane, insi nayo ali cilyatilo ca ngazo zyane.” (Eza. 66:1) Nupya Yeova walanzile apa “cilyatilo ca ngazo” zyakwe ati: Ndacindamika “musumba” wane. (Eza. 60:13) Uzye akacindamika uli “cilyatilo ca ngazo” zyakwe, nanti ukucizifya? Nupya cikapiliula cani kuli yaayo akaikalapo?

2 Umu malembelo ya ciYebulai, izwi lyakuti “cilyatilo ca ngazo” lyaomviwa uku kulondolola ing’anda yakwe Leza iyaliko mpiti, ino aina Izlaeli yaomvyanga. (1 Mila. 28:2; Masa. 132:7) Yeova walolanga ing’anda iiyo ukuti yali isuma cuze pano i yaomviwanga umu upefi wa cumi. Nupya, yaomviwanga uku kulumbanyizizyako aliwe pano nsi.

3. Uzye ing’anda yakwe Leza ikulu aali cani, nupya aliilaci lino yatandike ukuomba?

3 Nga ndakai, i cifulo ci cino antu yakwe Yeova yakaomvya umu kupepa kwa cumi icaya wa ng’anda iya kupepelamo iyaliko mpiti? Asi cikulwa nanti ing’anda ya cumicumi. Lelo i ng’anda yakwe Leza iya unkolanya, nupya ikaomviwa uku kulumbanyizizyamo Yeova. Nomba, uzye ing’anda kwene ii iya unkolanya ali cani? I mitantikile yakwe Leza iyaayako, iikalenga antu ukuya yacuza yakwe Yeova nu kumupepa.  Imitantikile ii ikaomba pa mulandu wi lambo lyakwe Yesu. Nupya yatandike ukuomba umu mwaka wakwe 29, lino Yesu wawatiziwe nu kusontwa ukuya Simapepo Mukalamba uwa mu ng’anda yakwe Leza ikulu.—Ayeb. 9:11, 12.

4, 5. (a) I cani cino ya kapepa yakwe Yeova aacumi yakalondesya ukucita wakwe vino calembwa umu Masamu 99? (b) A mauzyo ci yano tulinzile ukuyuzya?

4 Tukataizya sana pali vino Yeova watantika ukuti twamupepa umu cumi. Tukalanga ukuti tukataizya lino tukuneenako yauze api zina lyakwe Leza na pali vino watukulula uku luyembu ni mfwa. Tukazanga cuze ukuti ya Nte aacizile pali 8 milyoni, yakalumbanya Yeova cila wanda! Aingi amu mipepele iyasyala, yakaelenganya ukuti yalaalumbanya Leza ukwiyulu ndi yafwa, nomba antu yakwe Yeova yene yamanya ningo ukuti yalinzile ukumulumbanya ndakai kwene nupya pano nsi kwene.

5 Ndi tukulumbanya Yeova, ala tukukolanya aomvi yakwe Leza alumbulwa pa Masamu 99:1-3, 5. (Welengini.) Mose, Aloni na Samueli yaali aomvi ya cisinka, aatungilile ukupepa kwa cumi. (Masa. 99:6, 7) Ndakai apakwe aacili pano nsi, yakaombela Yeova na ucisinka umu ng’anda yakwe Leza iya unkolanya. ‘Aamfwele na zyuze’ nayo, yaka-azwilizya apakwe. (Yoa. 10:16) Yonsi kwene yakapepela Yeova capamwi. Nomba tulinzile ukuyuzya sweineco ukuti, ‘Uzye nkatungilila ukupepa kwa cumi?’

UKUMANYA AAKAOMBELA APA NG’ANDA YAKWE LEZA IYA UNKOLANYA

6, 7. Uzye iintazi ci ino izile iya umu cilongano ca Ina Klistu akutandikilako, nupya i cani icacitike pakasi ka mwaka wakwe 1914 na 1919?

6 Apipi ni myaka 100 ukufuma pano iuvi lya Ina Klistu lyapangiilwe, usangu wavuzile wakwe cimwi ndi vino casoowilwe. (Mili. 20:28-30; 2 Tesa. 2:3, 4) Kufuma paapo, catazile sana ukumanya ya kapepa yakwe Leza aacumi. Paapisile imyaka ingi cuze lino Yeova atali aomvye Yesu ukutwazwa ukumanya aombelanga apa ng’anda yakwe iya unkolanya.

7 Lino umwaka wakwe 1919 wafisile, yaayo aombelanga apa ng’anda yakwe Leza iya unkolanya yano Yeova watemilwe, iizile yamanyikwa. Antu yaayo yasenwike sana icakuti Yeova wazumile imipepele yao. (Eza 4:2, 3 Malaki 3:1-4) Vino Paulo waweni umu cilolwa ala paapita imyaka iingi sana vyatandike ukufikiliziwa.

8, 9. Uzye “paladaise” wino Paulo waweni umu cilolwa i cani?

8 Cilolwa cino Paulo waweni calondololwa ningo api lembelo lyakwe 2 Kolinto 12:1-4. (Welengini.) Umu cilolwa ciici, Yeova walangizye Paulo ivyali nu kucitika uku nkoleelo. Uzye “paladaise” wino Paulo waweni i cani? Icakutandikilako, Paladaise wiyo angaya a wiya alayako lino Leza alazifya insi ii. (Luka 23:43) Cakwe ciili, angaya a paladaise uwa unkolanya aalayako umu nsi ipya. Nupya cakwe citatu i cakuti, angaya uwikalo usuma cuze uwa mwiyulu kulikuti “paladaise yakwe Leza.”—Umbw. 2:7.

9 Nomba, u mulandu ci uno Paulo walandiile ukuti, “uvwile ivintu vino vitanga londololwa, vintu vino muntu atangazumiliziwa kulanda”? Pano itaali insita ino Paulo wali nu kulondolola vyonsi vino waweni umu cilolwa. Lelo ndakai, Leza watuzumilizya ukunenako antu ivintu ivisuma ivikacitikila antu yakwe.

10. U mulandu ci uno “paladaise wa unkolanya” ni “ng’anda yakupepelamo iya unkolanya” vyapusanila?

 10 Ilingi tukalanda pali paladaise wa unkolanya, nomba uzye paladaise wiyo i cani? Paladaise wa unkolanya, u mutende uno Leza akapeela antu yakwe. Fwandi paladaise wa unkolanya ni ng’anda yakupepelamo iya unkolanya vitaakolana. Ing’anda yakupepelamo iya unkolanya a mapekanyo yakwe Leza aakupepa kwa cumi. Paladaise wa unkolanya aantu yano Leza watemwa yaayo aakamupepela apa ng’anda ya kupepelamo iya unkolanya.—Malaki 3:18.

11. I syuko ci lino twakwata ndakai?

11 Cikatuzanzya sana ukumanya ukuti ukutandika umu 1919, Yeova wazumilizya antu aatamalilika ukuya muli paladaise wa unkolanya, ukukomya paladaise wiyo, nu kwazwa antu na yauze ukwiza muli paladaise kwene wii. Uzye namwe mukaombako umulimo kwene uu usuma cuze? Uzye mukataizya api syuko lino mwakwata ilyakuombela pamwi na Yeova pakuti mwacindika izina lyakwe pano nsi?

IUVI LYAKWE YEOVA LIKUYA LIKUZIPILAKO SILE

12. Twamanya uli ukuti ilembelo lyakwe Ezaya 60:17 lyafikiliziwa? (Lolini cikope ca kutandikilako.)

12 Ezaya wasoowile ukuti kwali nu kucitika ivintu ivisuma ivingi sana umwi uvi lyakwe Yeova. (Welengini Ezaya 60:17.) Aina Klistu acance nanti yaayo atandike likwene ukuya Inte Zyakwe Yeova, yaawelenga nanti ukuuvwa pa vintu ivyasenuka umwi uvi lyakwe Yeova. Lelo, kwaya aina aingi aailolela vino ivintu vyasenuka umwi uvi lyakwe Yeova! Aomvi yakwe Leza kwene yaayo aacumi, yasininkizya ukuti Yeova akaomvya Umwene witu, Yesu, ukutungulula iuvi lyakwe. Ndi tukukutika kuli vino Aina Klistu kwene yaayo yakulondolola ivyacitika umwi uvi, tulaataila sana Yeova.

13. I vyani vino tulinzile ukucita ukulingana na mazwi aya pa Masamu 48:12-14?

13 Aina Klistu yonsi yalinzile ukunenako antu yauze api uvi lyakwe Yeova. Nanti icakuti tukaikala umu nsi ino Satana ali kateeka, twalemana sana umu miombele itu, fwandi cii tungati i cizungusyo! Cilazipa sana ukunenako “inkulo iziliza” uku nkoleelo api uvi lyakwe, apa Wene Wakwe uwa kwiyulu, alino na pali paladaise wa unkolanya uwaya pano nsi!—Welengini Masamu 48:12-14.

14, 15. U kusenuka kwa musango ci ukwacitiike umu 1970, nupya ivintu vyaziipa uli umwiuvi lyakwe Yeova?

14 Acikalamba aingi yano twaya nayo umu vilongano, yailolela vino ivintu vyasenuka umwi uvi lyakwe Yeova na vino ivintu vyatwalilila ukuzipilako umwi uvi lii. Yakaiusya vino mpiti icilongano catungululwanga nu muomvi wenga ukupusanako na vino caya ndakai, pano lyene icilongano cikatungululwa ni umba lyakwe ya eluda. Yakaiusya vino cali lino iofesi lya musambo lyatungululwanga nu muomvi wenga, ukupusanako na vino caya ndakai, pano umusambo lyene ukatungululwa na komiti wa musambo. Nupya yakaiusya vino cali lino umuntu wenga sile wimililangako iuvi lyonsi lyakwe ya Nte Yakwe Yeova ukupusanako na vino caya ndakai, pano lyene kwaya Iumba Likatungulula ilya Nte Zyakwe Yeova. Nanti cakuti aina aombanga imilimo kwene ii mpiti yakweti aayazwanga, umuntu wenga sile u wapingulangapo ivya kucita apa cilongano, api ofesi lya musambo, na pa maofesi akalamba yakwe ya Nte Yakwe  Yeova. Pa cisila ca mwaka wakwe 1970, kwali ukusenuka umu vilongano, pakuti kuye amaumba yakwe ya eluda aatandike ukuombela pamwi lino yakupingula pali vimwi umu cilongano.

15 U mulandu ci uno ukusenuka kwa musango uu kwalenga kuti ivintu vizipe umwi uvi lyakwe Yeova? Pano lyene kwali ukulondela vino amalembelo yaalaanda. Mu cifulo cakuti umuntu sile wenga aliwe aapingula ivilinzile ukucitwa pa cilongano, lyene ya eluda yonsi kulikuti “amawila,” yano Yeova watupeela, yakaombela pamwi.—Efes. 4:8; Mapi. 24:6.

Yeova akapeela antu umu nsi yonsi ivingayazwa (Lolini mapalagalafu 16, 17)

16, 17. Uzye u kusenuka ci ukwacitika ndakai kuno mwatemwa sana, nupya u mulandu ci?

16 Elenganyini pa kusenuka ukwacitika ndakai uku mpapulo zitu. Tukaipakizya ukusiila antu impapulo izikaloleka ningo sana izikalanda pa vintu vino vikacitika ndakai. Elenganyini na pali vino tukaomvya iviombelo vya ndakai pa kusimikila antu ilandwe lya Wene. Lyene kwaya webusaiti yakwe jw.org iika-azwa antu aingi cuze ukusambilila ivingayazwa. Ivintu vyonsi vii ivyasenuka vikalanga ukuti Yeova watemwa sana antu.

17 Nupya tukataizya sana pali vino ukulongana kwasenuka, lyene tukakwata insita ya kupepa kwa lupwa nanti insita ya kuisambilizya Baibo. Nupya tukataizya sana pa kusenuka ukwacitika uku maukongano yakalamba, kulikuti ukongano wa ciputulwa nu wa citungu. Amaukongano yaa yakazipilako sile cila mwaka! Tukataizya na pa masambililo aayako ndakai kuno tukasambilila Baibo. Ivintu vyonsi vii ivyasenuka vikalanga ukuti Yeova aakatungulula iuvi lyakwe nu kuti watwalilila ukuzifya paladaise wakwe uwa unkolanya!

 VINO MUNGAAZWILIZYA UKUZIFYA PALADAISE WA UNKOLANYA

18, 19. Uzye tungazwilizya uli ukuzifya paladaise wa unkolanya?

18 Yeova watucindika sana pa kutupeela isyuko lya kwazwilizyako ukuzifya paladaise wa unkolanya. Nomba, uzye tuka-azwilizya uli? Tukacita vivyo lino tukuombesya umu mulimo wa kusimikila nu kupanga asambi. Lyonsi lino twazwa umwi ukuya umuomvi wakwe Yeova, ala tukwazwilizya ukuti paladaise wa unkolanya aalunduluka.—Eza. 26:15; 54:2.

19 Nupya tuka-azwilizya ukuzifya paladaise wa unkolanya ndi tukuzifya imiyele itu nu kuya Aina Klistu asuma. Cii cikalenga kuti antu yauze yaalondesya ukwiza muli paladaise kwene wii uwa unkolanya. Icikalenga antu ukutemwa paladaise wiyo, asi vino twamanya ningo amalembelo, lelo yakatandikilapo ukulola imiyele itu isuma na vino tukauvwana. Lyene ndi yalola vivyo, yakatandika ukutemwa sana Yeova na Yesu.

Mungazwilizya ukuzifya paladaise wa unkolanya (Lolini mapalagalafu 18, 19)

20. I vyani vino tulinzile ukulondesya ukucita ukulingana na mazwi aaya pa Mapinda 14:35?

20 Cikazanzya sana Yeova na Yesu ndi yalola vino paladaise wa unkolanya waziipa ndakai. Uluzango luno tukaya nalo ndakai lino tukwazwilizya ukuzifya paladaise wa unkolanya, u lunono sile ndi twalulinganya uku luzango luno tulaya nalo lino tulaombela pamwi ukuzifya insi yonsi ukuya Paladaise wa cumicumi. Fwandi lyonsi twaiusya amazwi aaya pali Mapinda 14:35, aakati: “Umwene akazangila mu muomvi wakwe” umucenjele. Lekini lyonsi twaya na mano lino tukuombesya ukuzifya paladaise wa unkolanya!