Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2015

Twalililini Ukuya Acisinka Uku Wene Wakwe Leza

Twalililini Ukuya Acisinka Uku Wene Wakwe Leza

“Yasi wa antu amu nsi.”—YOA. 17:16.

INYIMBO: 18 54

1, 2. (a) U mulandu ci uno ukuya uwa cisinka kuli Yeova kwacindamila, nupya vyakolana uli nu kukana-iika umu vya munsi? (Lolini icikope ca kutandikilako.) (b) I vyani vino antu yatemwa sana, nupya i cani icacitika?

AAOMVI yakwe Yeova yataaya umu vikanza vya mu nsi, ivikalenga antu kupaalukana. Yasilola ukuti yacindama kuluta antu yauze pa mulandu nu mutundu wao, kuno yafuma nanti intambi zyao. Umulandu ci? Pano yatemwa Yeova, aacisinka kuli aliwe nupya yakaamuvwila. (1 Yoa. 5:3) Usi mulandu na kuno tukaikala nanti kuno twafuma, swensi tukalondela masunde yakwe Leza. Ukuya acisinka kuli Yeova nu ku Wene wakwe i cacindama kuluta cili consi. (Mate. 6:33) Fwandi ali cino tungalandila ukuti tutaaya “wa antu amu nsi.”—Welengini Yoane 17:11, 15, 16; Eza. 2:4

2 Antu aingi umu nsi, yatemwa sana impanga yao, mutundu wao, intambi zyao nanti sile iumba lyao ilyaya umu vyangalo vya kucimvyanya. Ica ulanda i cakuti, kwaya ukucimvyanya, kupatana, nupya insita zimwi yakakoma yauze aasikuyatungilila. Nanti icakuti swemo tutaaya umu vintu vya musango uu, imiyele ii ingatwambukila, nupya tungatandika ukupata yauze.  Ndi cakuti mauteeko ya untunze yatapingwile ningo pali vimwi, tungatandika ukuiika umu vikanza vya mu nsi, pano twaumbwa na maka ya kumanya icisuma ni ciipe. (Utan. 1:27; Malan. 32:4) Uzye mukauvwa uli ndi cakuti vya musango uu vyacitika? Uzye mukasuulako sile nanti limwi mukaiikamo?

3, 4. (a) U mulandu ci uno swemo tusitungilila antu aaya umu vikanza vya mu nsi? (b) I vyani vino tumasambilila umwi sambililo lii?

3 Utuungwe twa mauteeko tungaapatikizya antu ukuya umu vikanza vya mitekele. Lelo swe Ina Klistu ya cumi tutanga tuzumile ukucita vivyo. Swemo tutaaya umu vikanza vya miteekele, nupya tusilwako inkondo. (Mate. 26:52) Tusisombwa nanti yatupatikizye yatuuli ukwelenganya ukuti miteekele imwi yacindama ukucila iyuze. (2 Kol. 2:11) Tusilonda nanti panono ukuya umu vya mu nsi.—Welengini Yoane 15:18, 19.

4 Vino tutamaliilika, limwi tutanga tutemwe antu yamwi pa mulandu na kuno yaafuma. (Yele. 17:9; Efes. 4:22-24) Umwi sambililo lii, tumasambilila pa visinte vya muli Baibo ivingatwazwa ukutaaluka uku misango kwene ii iikapalukanya antu. Nupya tumasambilila na pali vino tungatwalilila ukuya acisinka uku Wene Wakwe Leza ukupitila umu kuisambilizya pakuti twaelenganya wakwe vino Yeova na Yesu yakaelenganya.

UMULANDU UNO TUSI-IKILA UMU VIKANZA VYA MU NSI

5, 6. Uzye Yesu walolanga uli antu lino wali pano nsi, nupya u mulandu ci?

5 Ndi cakuti insita zimwi camutalila ukukana iika umu vikanza vya muno nsi, cingazipa imuyuzya muti ‘Uzye ndi cakuti ivintu vii vyacitikiile Yesu, nga wacisile uli?’ Lino Yesu wali pano nsi, antu aikalanga uku Yudeya, ku Galile, nu ku Samaliya yatuuvwananga. Elenganyini pali vimwi ivyacitikanga apa nsita iiya. Aina Samaliya na aYuda yataavwanzyanyanga. (Yoa. 4:9) Afaliseo na Asaduki yatuuvwananga. (Mili. 23:6-9) Mutundu wa aYuda aamanyile Amasunde yelenganyanga ukuti yalusile antu yauze aatamanyile Amasunde. (Yoa. 7:49) Nupya aYuda yapasile ya kasonkesya yamisonko na ina Loma. (Mate. 9:11) Nomba Yesu wene ataiikanga umu milandu ya musango uu. Nanti icakuti Yesu wakosoolanga icumi pali Yeova nupya wamanyile ukuti aina Izlaeli yaali aantu yakwe Leza aiyele, ataatazile anenapo alondezi yakwe ukuti yaalusile antu yauze. (Yoa. 4:22) Lelo, wanenanga asambi yakwe ukutemwa antu yauze.—Luka 10:27.

6 U mulandu ci uno Yesu atalolanga antu yamwi ukuti yaalusile yauze? Pano Yesu na Yeova yataaya umu vikanza vya mu nsi. Lino Yeova waumvile umonsi nu mwanaci, walondanga ukuti yakavyale ana nu kusalangana umu nsi yonsi. (Utan. 1:27, 28) Fwandi Yeova na Yesu yasilola ukuti umutundu umwi nanti antu andimi zimwi, yacindama ukuluta antu yauze. (Mili. 10:34, 35; Umbw. 7:9, 13, 14) Fwandi tulinzile ukulolanya Yeova na Yesu.—Mate. 5:43-48.

7, 8. (a) A weni wino tukatungilila, nupya u mulandu ci? (b) I cani cino tulinzile ukwiusya pa ntazi zino antunze yaaya nazyo?

7 U mulandu ci uno tusitungilila kateeka aliwensi nanti uteeko umwi uwa muno nsi? Pano tukatungilila Yeova. Wene ali Kateeka witu. Umu Edeni, Satana walanzile ukuti Yeova asiteeka ningo antu. Satana walondanga antu yazumile ukuti imicitile yakwe iya vintu yali ningo ukuluta imicitile yakwe Yeova. Yeova akaalonda twaipingwila sweineco wino tukulonda ukutungilila. Nga mwemo pa lwinu? Uzye mukauvwila Yeova pa mulandu wakuti mwamanya ukuti imicitile yakwe iya  vintu yaaya ningo ukuluta vino mungaisoolwela ukucita? Uzye mwasininkizya ukuti Uwene Wakwe Leza sile uungazifya ivintu? Nanti uzye mukaelenganya ukuti cila muntu alinzile ukuipingwila pa kusoolola ivisuma ni viipe?—Utan. 3:4, 5.

8 Uzye mungasuka uli ndi cakuti umwi wamuzya pali vino mukalola akaliumba kamwi akavikanza vya miteekele, akaliumba ka yantu aakalonda ukusenula ivintu kuno mwikala, nanti utumaumba tuuze utwakolana na tuu? Utumaumba tumwi wakwe tuu, tungaaomba sile ningo nu kulondesya ukwazwa antu. Nomba twamanya ukuti Uwene Wakwe Leza sile uungasisyapo intazi nu lufyengo lonsi. Nupya tukauvwila utunguluzi wakwe Leza umu cilongano, swensi kwene cila muntu tusicita sile vino tukwelenganya ukuti vili ningo. Fwandi ali mulandu uno tukaombela pamwi umu cilongano.

9. Uzye iintazi ci ino Paulo waweni uku Ina Klistu akutandikilako, nupya yalondekanga ukucita uli?

9 Umu nsita ya atumwa, aina Klistu yamwi aikalanga uku Kolinto yapaazyanyanga nu kulanda yati, “‘Nemo nkalondela Paulo,’ ‘Nemo nkalondela Apolo,’ ‘Nemo nkalondela Petulo,’ ‘Nemo nkalondela Klistu.’” Lino Paulo wamanyile vii, camupezizye amano. Ii yaali intanzi ikulu, pano umu cilongano mutaali nu kuya umutende. Paulo uzizye aina na ya nkazi ati: “Uzye Klistu wankanyiziwa?” Lyene wayanenyile ati: “Inane mwi zina lya Mwene witu Yesu Klistu nkumupapata mwensi, kuti, mwazumilizyanya muli vino mwalanda, pakuti kutaya kupaatukana muno muli. Muye alemane cuze a mwenzo onga na melenganyo ali yamwi.” Na ndakai kwene avino caya. Umu cilongano mutalinzile ukuya ukupaalukana.—1 Kol. 1:10-13; welengini Loma 16:17, 18.

10. I vyani vino Paulo wanenyile Aina Klistu apakwe, nupya tungasambililako vyani?

10 Paulo wanenyile Aina Klistu apakwe ukuti, yene a ikazi yakwiyulu nu kuti yatafwile ukwika amano uku “vintu vya muno nsi.” (Filipi 3:17-20) * Aina Klistu apakwe i nkombe izikaimililako Leza na Yesu. Lino inkombe yaaya uku mpanga yuze, i sicitako vino amu mpanga iiyo yakacita, nanti sile ukuiika umu vikanza vya mu mpanga iiyo. A vino na apakwe yaaya, yasi-ika umu milandu nu mu vikanza ivya muno nsi. (2 Kol. 5:20) Aina Klistu aalikala pano nsi, nayo kwene yaaya acisinka uku Wene Wakwe Leza nupya yataaya umu vikanza vya muno nsi.

MWAISAMBILIZYA UKUYA ACISINKA KULI YEOVA

11, 12. (a) I miyele ci ino tutalinzile ukuya nayo ndi tukulonda ukutwalilila ukuya acisinka uku Wene Wakwe Leza? (b) Uzye nkazi umwi walolanga uli antu yamwi, nupya i cani icamwavwile ukusenuka?

11 Umu ncende izingi, antu yakatemwana sana nga yaafuma ukuli kumwi, nga yaakwata intambi izili zimwi alino nu kulanda lulimi lulilumwi. Yakauvwa sana icilumba apa mulandu ni ncende kuno yaakulila. Nomba tutafwile ukukwata imiyele ya musango uu. Lelo, tulinzile ukusenuka mu myelenganyizizye iitu nu kusambilizya yakampingu itu pakuti twaya acumi muli vyonsi. Tungacita uli vivyo?

12 Ya Mirjeta * yavyalilwe umu mpanga ino yaamanga yakuti Yugoslavia. Umu ncende iiyo muno yaakulile, antu yaapasile aina Serbia. Lino yasambilile pali Yeova, izile yamanya ukuti Yeova atatemwapo mutundu umwi kuluta uuze nupya  yasambilile ukuti Satana aakalonda ukuti antu yaapatana. Fwandi iizile yasenuka muli vino yelenganyanga. Nomba lino inkondo ya mitundu yatandike umu mpanga iiya muno iikalanga, ya Mirjeta yatandike ukupata aina Serbia nupya kwene. Yataalondanga nu kuyasimikila. Yaamanyile ukuti ukucita vivyo cali iciipe, fwandi yapefile kuli Yeova ukuti ayazwe ukuta ukupata yauze, nu kuti ayazwe ukutandika upainiya. Ya Mirjeta yalanzile yati: “Ukuombesya sana umu mulimo wa kusimikila i cikangavwa sana. Lino indi umu mulimo wa kusimikila, nkaezya ukukolanya imiyele yakwe Yeova, nupya natandika ukuta ukupata yauze.”

13. (a) I cani icacitike kuli Zoila, nupya wacisile uli? (b) Uzye tungasambililako vyani kuli vino vyacitikile Zoila?

13 Nkazi Zoila, wakuukile uku Europe ukufuma uku Mexico. Umu cilongano cino wayamo, mwaya aina na ya nkazi aafuma uku ncende yuze iya ku Latin America. Zoila walanzile ukuti, aina na yankazi yamwi yamusekanga pa mulandu ni ncende ino wafumileko, intambi zya ku ncende iiyo, alino ni nyimbo izyayako. Nomba atuvwanga ningo, fwandi wapefile kuli Yeova ukuti amwavwe ukukana uvwa uyi. Uzye nga cali asweswe nga twacisile uli? Yamwi tucili tukaezya na maka ukuta ukuvwa uyi ndi yamwi yalanda iviipe apa ncende ino twafumako. Tutalinzile ukulanda ivili vyonsi ivingalenga ciloleke kwati antu yamwi yacindama ukuluta yauze. Tutalinzile ukuleta amalekano apa ina itu nanti apa yantu yauze.—Loma 14:19; 2 Kol. 6:3.

14. I cani icingamwazwa ukulola antu yauze ndi vino Yeova akayalola?

14 Twamanya ukuti aomvi yakwe Yeova yakaombela pamwi, fwandi tutalinzile ukulola kwati incende imwi nanti impanga, yacindama ukuluta iyuze. Nomba limwi yalupwa inu nanti yacuza inu, yangalenga mutemwe sana incende ino mwafumako. Limwi namwe insita zimwi mukatala imwelenganya viipe apa antu amitundu yuze, intambi, indimi, nanti aafuma uku mpanga yuze. I cani icingamwazwa ukusenuka? Mwaelenganya pali vino Yeova akalola antu aakayuvwa pa mulandu ni mpanga ino yafumako nanti yaayo aakalola kwati yacindama ukuluta auze. Mwalondelezya ivyeo apa mulandu uu lino mukuisambilizya Baibo nanti apa mapepo ya lupwa. Nupya mwapepa kuli Yeova pakuti aamwazwa ukulola antu yauze ndi vino wene akayalola.—Welengini Loma 12:2.

Pakuti tutwalilile ukuya acisinka kuli Yeova, tulinzile ukumuvwila nandi antu yatucuzye (Lolini mapalagalafu 15, 16)

15, 16. (a) Uzye antu yauze yanguvwa uli ndi cakuti twapusanako na aliyo? (b) Uzye avyazi yangazwa uli ana yao kutwalilila ukuya acisinka kuli Yeova?

15 Tukalonda twaombela Yeova na kampingu musuma, fwandi insita zimwi tulinzile ukupusanako na yano tukaomba nayo, yano tukasambilila nayo, aina mupalamano, nanti yalupwa itu. (1 Pet. 2:19) Yesu watucelwile ukuti antu yauze yalatupata pa mulandu wakuti twapusanako na aliyo. Mwaiusya ukuti aingi pali yano yakaatukanya yataamanya cimwi apa Wene Wakwe Leza. Fwandi yataamanya umulandu uno cacindamila ukuya acisinka uku Wene Wakwe Leza ukuluta amauteeko ya antunze.

16 Pakuti tuye acisinka kuli Yeova, tulinzile ukumuuvwila usi mulandu na vino antu yangalanda nanti ukucita. (Dan. 3:16-18) Maka-maka acance cingayatalila kupusanako na auze. Mwe yavyazi, mwa-azwa ana inu ukuti yaaya asipe lino yali uku sukulu. Limwi ana inu yangauvwa intete ukukana ukulanga umucinzi kuli Fulagi nanti ukukana ukuzanwako uku kuzevya kuno asyala yakazevya. Apa kupepa kwa lupwa, mungasambilila pali  vino Yeova akalola ivintu vivyo. Mwayasambilizya vino yangalondolola vino yazumilamo umu nzila iyanguke nupya umu mucinzi. (Loma 1:16) Nupya nga cingacitika, mwa-azwa ana inu lino mukulanda na ya mwalimu yao nu kuyalondolwela vino twazumilamo.

MWATEMWA VINTU VYONSI VINO YEOVA WAUMBA

17. I vyani vino tutalinzile ukulaelenganya, nupya u mulandu ci?

17 Ilingi tukatemwa ivyakulya, ululimi luno tukavwanga, imilolekele ya ncende kuno twikala alino ni ntambi izya mu mpanga ino twakulilamo. Uzye tukaelenganya ukuti vyonsi vino twatemwa i vyaziipa ukuluta vino anji yaatemwa? Yeova akaalonda ukuti twatemwa ivintu vyonsi vino waumba. (Masa. 104:24; Umbw. 4:11) Fwandi citange cizipe ukwelenganya ukuti imiombele iya vintu vimwi yacindama ukuluta iyuze.

18. U mulandu ci uno cacindamila ukulola yauze vino Yeova akayalola?

18 Yeova akaalonda antu yonsi ukusambilila icumi pali aliwe, ukumupepa, alino nu kuti yakikale amanda pe. (Yoa. 3:16; 1 Tim. 2:3, 4) Tukaitemelwa ukuvwa vino antu yauze yakulanda, nu kuyazumilizya nandi i cakuti vino yalanda ivipusana na vino tukwelenganya. Nga tukucita vivyo lyene tungaya ni nsansa nupya tulatwalilila ukuombela pamwi na ina. Pa mulandu wakuti twaya acisinka kuli Yeova nupya tukatungilila Uwene wakwe, tusi-ika umu vikanza vya mu nsi. Twapata icilumba nu kucimvyanya ukwa mu nsi ii yakwe Satana. Tukataizya wakwe cimwi pano Yeova watusambilizya vino tungaatemwana nu kuvwana na anji! Tukayuvwa wakwe vino kalemba wa masamu walanzile ati: “Lolini vino cazipa na vino cazanzya antu yakwe Leza, ukwikala pamwi wa cina nyina!”—Masa. 133:1.

^ par. 10 Aina Klistu yamwi aaliko umu cilongano ca ku Filipi limwi yaali aina Loma, fwandi yaali ni nsambu zino aina yauze yataakweti.

^ par. 12 Aasi mazina yao.