Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2015

Uzye Cacindama Antu Ukumanya Umulimo Uno Mukaomba?

Uzye Cacindama Antu Ukumanya Umulimo Uno Mukaomba?

BEZALELE na Ooliyabu yamanyile ningo ivya makuule. Lino yaali azya uku Eguputo, yaombesyanga sana pakuti yatame injelwa izingi, fwandi yatalondanga nu kwiusya umulimo uno yaombanga lino yali azya. Lelo imyaka iiya yapisile. Lyene apa nsita ii, yamanyile sana imilimo icakuti ali yano yatungululanga umulimo wa kukuula itenti lya kupepelamo. (Kufu. 31:1-11) Nandi icakuti yaombesyanga, antu anono sile aali nu kulolako imilimo imwi ikulu ino yaomvile. Uzye vino antu aingi yataaweniko imilimo ino yaomvile yatoovwike? Uzye cacicindime antu ukumanya imilimo ino yaombanga? Uzye cacindama antu ukumanya umulimo uno mukaomba?

ANTU ANONO SILE AAWENI VINO YAOMVILE NINGO

Ivintu vimwi vino yapanzile umwi tenti lya kupepelamo vyali ivya kuzungusya. Tale elenganyini pali ya kelubi aapangiilwe na goldi yano yali papela ya mbokosi ya upangano. Umutumwa Paulo walondolwile ya kelubi yaayo ukuti, yalanganga “ukucindama” kwakwe Leza. (Ayeb. 9:5) Ala ya kelubi yaayo aunkolanya aapanzilwe na goldi, yalolekanga ningo cuze!—Kufu. 37:7-9.

Ivintu vino Bezalele na Ooliyabu yapanzile nga vyaliko ndakai, yangaviika nu mu vikuulwa vya lulumbi muno yakatambisizya ivintu, muno antu aingi yangaavitamba. Nomba, pa nsita ino vyapangilwepo, a yanga aweniko vintu vivyo? Ya kelubi, yaali umu ncende ya Muzilo, fwandi uwayalolanga sile a simapepo mukalamba pa Wanda wa Kufuuta Maifyo, umuku onga sile apa mwaka. (Ayeb. 9:6, 7) Fwandi, antu anono sana aliyo yaweni vintu vivyo.

MWAYA NI NSANSA NANTI ANTU YASIKUMUTAIZYA

Ngi cakuti mwemwe mwali Bezalele nanti Ooliyabu, nupya mwaombisye pa kupanga vintu viivi vya lulumbi, uzye nga muvwile uli ukulola ukuti anono sile aliyo yaviweni? Ndakai, antu yakauvwa cilumba sana ndi cakuti yamwi yayawanzya nanti yakukumbwa vino yatiyacita. Yakaalola ukuti ali nzila yakumanyilamo ndi cakuti watuomba ningo. Lelo aomvi yakwe Leza yene asi vino yaaya. Wakwe vino Bezalele na Ooliyabu yaali, naswe kwene tukaya ni nsansa nga tukuombela Yeova nu kumanya ukuti watatemwa.

 Lino Yesu wali pano nsi, ya simapepo yatemilwe ukupepa mapepo pakuti yauze yaayalumbanya. Lelo, Yesu atatemilwe mapepo ya musango uu, walanzile ati: Mwapepa sile kufuma pansi ya mwenzo, asi kuti yauze yamulole. Uusuma ci uwaya umu kucita vii? Yesu walanzile ati, “So aakalola vino mukacita mu nkama alamupeela cilambu.” (Mate. 6:5, 6) Fwandi, vino Yeova akalola mapepo iitu i cacindama kuluta vino antu yakaelenganya. Vino Yeova akaelenganya pa mapepo iitu, i vikalenga ukuti yaye nu upiliulo. I cilicimwi na vino tukaomba umu mulimo wakwe Leza. Tusilola kwati umulimo witu wacindama pa mulandu sile wakuti yauze yakutuwanzya. Lelo, Yeova ‘aakalola vino tukacita mu nkama’ aali wino tufwile ukuzanzya.

Lino yaamazile ukupanga itenti lya kupepelamo, ikumbi lyavimvile “Itaalu lya Ukongano, nu luswepo luyengese lwakwe [Yeova] luyengesa umwi Taalu.” (Kufu. 40:34) Icumi kwene Yeova watemilwe wakwe cimwi! Uzye mukwelenganya ukuti Bezalele na Ooliyabu yuvwile uli? Nanti icakuti yatalemvilepo amazina yao pali vino yapanzile, yafwile yuvwile ningo sana kumanya ukuti Leza wapaazile umulimo wao. (Mapi. 10:22) Lino papisile imyaka, yazanganga wakwe cimwi ndi yalola ukuti vino yaapanzile vyatwalilile ukuomviwa umu mulimo wakwe Yeova. Umu nsi ipya, lino Bezalele na Ooliyabu yalatuutuluka, yalatemwa cuze ukuvwa ukuti itenti lya kupepelamo lyaomviiwe apa myaka 500 umu kupepa kwa cumi!

Nanti angala kusi antu akulola imilimo ino tukaomba iya kuitemelwa, Yeova wene akalola!

Ndakai umwi uvi lyakwe Yeova, mwaya aakapanga mavidyo, aakalenga ivikope, aakakopa vikope, aakaimba inyimbo, ya kasenula, na ya kalemba. Yonsi yaa yakaomba ukwaula ukulolekela uku yantu. Fwandi tungati kusi “aakalola” milimo ino yakaomba. I cilicimwi ni milimo yuze iingi ikaombwa umu vilongano ivicizile pali 110,000 umu nsi yonsi. Uzye a weni aakalola kuno umuomvi wa mpiya akulemba vino impiya zyati ziomviwa pa mpela ya mwezi? A weni aakalola lino kalemba akulemba lipoti ya mulimo wa kusimikila iya cilongano? Nga lino aina na ya nkazi yakuziifya Ing’anda ya Wene, uzye a weni aakalola?

Lino Bezalele na Ooliyabu yaafwile, yataakweti ivilambu pa milimo yao isuma ino yaomvile. Lelo yakweti cintu cimwi cicindame sana, kulikuti ucuza usuma na Yeova. Fwandi tungati Yeova waweni imilimo yao isuma. Si lekini naswe kwene twakolanya vino yaali aicefye na vino yaitemelwanga ukuomba imilimo.