Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi  |  Na. 4 2016

 BAIBO IKA-AVWA ANTU UKUSENUKA

Nafilwanga Maila Aingi Suka Nkwanisya

Nafilwanga Maila Aingi Suka Nkwanisya
  • UMWAKA UNO WAVILWE: 1953

  • KUNO WAVYALILWE: AUSTRALIA

  • VINO UMI WAKWE WALI: KUTAMBA IVIKOPE VYA UZELELE KWAMUTESILE UZYA

VINO NAALI:

Ya tata yakuukile uku Australia ukufuma uku Germany umu 1949. Yizile uku kulonda incito iya mu maini ni ya kupanga malaiti nupya iikazile umu muzi umu musumba wa Victoria. Ku kwene ali kuno yafumaliile na ya mayo, alino umu 1953 ali lino nani naviilwe.

Pa cisila ca myaka sile inono, ya mayo yatandike ukusambilila Baibo na ya Nte Yakwe Yeova, fwandi pa vintu vino namanyile ala ncili sile umwance pali ni vyeo ivyaya muli Baibo. Nomba ya tata yatalondanga nanti panono imisango yonsi iya mipepele. Yizile iyatandika ukuya ankalwe nupya yatucuzyanga cakuti ya mayo yayatiinanga sana. Ya mayo yatwalilile ukusambilila Baibo mu umfisolo nupya yatemilwe vino yasambililanga. Ya tata nga yati yafumapo apa ng’anda, ya mayo yatusimikilanga vino yasambililanga, kaci wane capamwi nani. Yatusimikiile pali vino insi ilazipa cuze uku nkoleelo na vino tungaya ni nsansa ngi cakuti tukulondela masunde a mu Baibo.—Masamu 37:10, 29; Ezaya 48:17.

Lino naali ni myaka 18, ntalondanga ukutwalilila ukwikala pa ng’anda pano ya tata yacizilemo ukuya ankalwe. Kwene nazumile vino ya mayo yansambilizye ukufuma mu Baibo, lelo ntamanyile vino ivyeo vivyo vyacindime. Fwandi ntavilondelanga foo. Natamfile ukuomba incito ya malaiti mu maini. Lino naali ni myaka 20, natwaazile. Umwana umukazyana iyeli wavilwe pa cisila ca myaka itatu, nupya pa nsita iyo natandike ukwelenganya pali cino cali i cicindame mu umi wane. Vino namanyile ukuti ivyeo ivyaaya muli Baibo vingaavwa ulupwa lwane, natandike ukusambilila Baibo na Nte Wakwe Yeova umwi. Nomba uwane wene atalondanga ya Nte nanti panono. Insita imwi lino naile indonganako kuli ya Nte, mamane wanenyile ukuti mfwile nsoolole pa kusambilila Baibo nanti ukutaana. Amano yasizile, nalondiile vino walondanga, nupya natiile ukulazanwa na ya Nte. Pa cisila natandike ukulanguluka pano ntacisile cino namanyile ukuti i cali icilungame.

Wanda umwi, anji yano naombanga nayo yandanzile ivikope ivya uzelele. Kwene ivikope vivyo vyanzungusyanga nupya ndi natamba nayuvwanga uwa mulandu sana. Nga niusya vino nasambilile muli Baibo, namanyile ukuti kwene nanti ciye uli Leza alamfulula. Nomba lino natwalilile ukutamba ivya uzelele kwene vivyo, umwenzo watiile ukuncuzya. Lino papisile insita ivikope viivyo vyantesile uzya.

Lino papisile imyaka ukucila pali 20, ntalondelanga nanti panono vino ya mayo yansambilizye. Imisango yane ipiisye wakwe vivi  kwene vino natambanga. Mvwango zyane zyali izya ntusi sile, nupya nalandanga ivya uzelele ku kusekesya antu. Nizile nja sile cintuvwa kuli yamama. Nanti nakweti mamane, nacitanga ucende na ya namayo yauze. Wanda umwi lino nalolekisye cata cane mwi galasi, nalanzile ukuti, ‘Ntakutemwa foo.’ Naisuzile ne mwineco wakwe cimwi, nupya naipasile.

Icupo cane casizile, lyene wikalo wizile iuya cuze cuze. Napefile kuli Yeova nu mwenzo wane onsi. Natandike nupya kwene ukusambilila Baibo nanti cakuti papisile imyaka 20 kufuma pano nasambililepo. Apa nsita ii, ala ya tata yafwa, ya mayo yene ala a ya Nte Yakwe Yeova awatiziwa.

VINO BAIBO YANGAVWILE UKUSENUKA:

Vino naali vyapusiine sana na vino Baibo yalanda. Nomba nalondesyanga ukukwata umutende uno Baibo yalaya antu. Cino natampilepo ukucita, u kuzifya imvwango zyane alino nu kuteeka umwenzo. Nupya napingwilepo ukuta ucintuvwa, kuteya ivyangalo vya kusitikana, ucakolwa, alino nu kwiyila aanjingizye incito.

Anji pa ncito yatamanyile cino nalondelanga ukusenuka sana umu miyele yane. Pa myaka itatu, yezyanga ukumpatikizya pakuti inswilile uku miyele yane iya mpiti. Nga nawezyako panono amano ya mpiti, wakwe nga nasoka sana nanti nga nalanda amazwi yamwi aipe, yapundanga iyati: “Eya! Ali Joe wino twamanya wii.” Ala amazwi yaa yalenganga nauvwa uyi sana, nailolanga kwati nene wa sile-sile.

Anji yano naombanga nayo uku ncito yatemilwe sana ukutamba ivya uzelele pa makompyuta, mafoni alino nu mu mabuku. Yatemilwe sana ukusalanganya uku yauze ivikope kwene vivyo ivipe pa makompyuta, wakwe vino nacitanga mpiti. Ntalondanga ukutwalilila ukutekwa uzya ku vya uzelele, lelo anji yene yalondesyanga sana kuti ntata ukuvitamba. Lyene nanenyileko wino wansambilizyanga Baibo pakuti angavwe nu kunkomelezya. Wankutiike ningo sana lino namunenanga vyonsi ivyali uku mwenzo. Wandanzile malembelo asuma sana angangazwa ukucimvya uwavya uno nakweti, nupya wankomelizye ukuti napepa lyonsi kuli Yeova apa wavya uno nakweti.—Masamu 119:37.

Uwanda umwi namile aomvi yanji kuti tulanzyanyeko vimwi. Lino yakolongiine, nayanenyile ukuti yapeele amabotolo yaili a wengwa uku yalumendo yaili ateesilwe uzya uku wengwa. Lyene yonsi yalanzile iyati: “Awe, utanga ucite vivyo we! Antu yaa yakalonda ukucimvya uwavya uno yakwata uwa kuteekwa uzya uku wengwa!” Lyene nani nayaswike inti: “Ee, nani kwene natekwa uzya.” Kufuma uwanda uwo, aomvi yanji yamanyile uwavya uno nalwisyanga uwa kuteekwa uzya ku kutamba ivikope vya uzelele nupya kufuma lilyo kwene yatiile ukumpatikizya ukuwelela uku misango yane iya mpiti.

Mu kuya kwa manda, Yeova wangavwile sana nupya nacimvizye uwavya uwa kutemwisya ukutamba ivya uzelele. Umu 1999, nizile nja Nte Wakwe Yeova umuwatiziwe, nupya nkataizya wakwe cimwi pa kupeelwa isyuko umuku wakwe ciili pakuti ningaziifya imiyele yane nu kuya ni nsansa.

Ndakai, namanya umulandu uno Yeova wapatila ivintu vino natemilwe apa myaka iingi. Pa mulandu wa kuti wantemwa, walondanga kuti ancingilile, pakuti ntoononeka ku kutamba ivikope vya uzelele. Ala mazwi aaya pali Mapinda 3:5, 6 aacumi sana! Yakati: ‘Uwataila muli Yeova nu mwenzo wako onsi, utaezya ukutaila amano yako foo. Waiusya Yeova muli vyonsi vino ukucita, nga nawe amakulanganga muno ungacitila pe.’ Masunde a mu Baibo yancingilila nupya yalenga kuti naomba ningo sana.—Masamu 1:1-3.

UKUSENUKA KWANGAVWA SANA:

Mpiti naisuzile sana ne mwineco, nomba ndakai nkauvwa ningo nupya nakwata umutende. Nkalondela masunde yakwe Leza, nasininkizya nukuti Yeova wanjelela nupya aakangavwa. Umu 2000, natwazile Karolin, Umwina Klistu munji umusuma, uwatemwa Yeova ndi vino nani namutemwa. Apa ng’anda pa mwitu paaya umutende utupu. Ala twasyuka cuze pa kuya umwi uvi umwaya Aina Klistu aatemwana insi yonsi.