Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Febuluwale 2017

Impolelwa—‘U wila Ufumaluke’ Uwafuma Kuli Tata

Impolelwa—‘U wila Ufumaluke’ Uwafuma Kuli Tata

“Wila usuma onsi ni cakupeelwa cifumaluke consi cikafuma kwiyulu, kuli Tata.”—YAKO. 1:17.

INYIMBO: 148, 5

1. Uzye impolelwa yalenga ukuti tukwate upaalilo ci?

IMPOLELWA yakwe Yesu yalenga ukuti tukwate mapaalo aingi sana. Impolelwa kwene ali nzila ino Leza wapekanya ukuti yonsi ya mwana Adamu aakacita ivya wololoke yakatwalilile ukuya antu yakwe. Impolelwa yalenga nu kuti tukwate upaalilo wa kwizaikala amanda pe. Fwandi, impolelwa yalenga ukuti antu ya cuvwila yakakwate mapaalo aingi. Yesu waitemiilwe ukupeela umi wakwe nu kutwalilila ukucita ivyaololoke pakuti aazanzya Leza wapapela pela.—Ayeb. 1:8, 9.

2. (a) I vyani ivicindame sana vino Yesu wasambilizye alondezi yakwe ukupepela? (Lolini icikope cakutandikilako.) (b) I vyani vino tumasambililapo umu cipande cii?

2 Imyaka iili icisila lino Yesu atatala wafwa ukuti apeele impolelwa, wasambilizye alondezi yakwe ukupepa ati: “Tata witu uwa mwiyulu, izina lyako licindikwe, Uwene wako wize, kulonda kwako kucitike pano nsi vino kukacitika mwiyulu.” (Mate. 6:9, 10) Pakuti twalanga ukuti tukataizya sana pa mpolelwa,  tumalanda pali vino impolelwa yalemana sana nu kulenga izina lyakwe Leza ukucindikwa, ukuteeka kwa Wene Wakwe Leza, alino nu kufikilizya ukulonda kwakwe.

“IZINA LYAKO LICINDIKWE”

3. Uzye izina lyakwe Leza likalangilila vyani, nupya Satana wazewanyizye uli izina lii lya muzilo?

3 Cino Yesu watandikilepo ukulanda umwi pepo lino wasambilizye alondezi yakwe i zina lyakwe Leza ukuti licindikwe. Izina lyakwe Leza i likalangilila ningo ululumbi lwakwe, amaka na umuzilo wakwe. Umwi pepo limwi lino Yesu wapefile, wamile Yeova ukuti “Tata wa Muzilo.” (Yoa. 17:11) Yeova u wa muzilo, ali cino na masunde yakwe yayeela amuzilo. Nanti ciye vivyo, Satana wene watwisike insambu zya kwe Leza izya kuteeka antunze umu Edeni. Vino satana watumpwilile Yeova, calenzile ukuti izina lya kwe Leza lizewane.—Utan. 3:1-5.

4. Uzye Yesu walenzile uli izina lyakwe Leza ukucindikwa?

4 Yesu watemilwe sana izina lya kwe Leza. (Yoa. 17:25, 26) Nupya walenzile ukuti licindikwe. (Welengini Masamu 40:8-10.) Lino Yesu wali pano nsi, walangilile ukuti antu yonsi yangatwalilila ukulalondela masunde yakwe Leza awololoke yano wapeela iviumbwa vyakwe. Nanti sile alino wacululukanga nu kufwa, Yesu wene watwalilile ukuya uwa cisinka kuli Isi wa kwi yulu. Vino watwalilile ukuya uwa cisinka, walangilile ningo ukuti umuntu umumalilike angatwalilila ukuya ni cuvwila nu kulondela masunde yakwe Leza.

5. Uzye tungacita uli pa kucindika izina lyakwe Leza?

5 Tungalanga uli ukuti twatemwa izina lyakwe Yeova? Tungalanga vivyo ndi cakuti tuli ni miyele isuma. Yeova akalonda ukuti tuye amuzilo. (Welengini 1 Petulo 1:15, 16.) Cii cikusenula ukuti tulinzile ukulapepa sile Yeova nu kuyeela masunde yakwe nu mwenzo witu onsi. Na lino tukuzunyiwa, tukaezya na maka ukwikala ukulingana ni visinte alino na masunde yakwe alungame. Lino tukucita ivilungame, tukaaya wa nkozyo umu nsi nupya tukacindika izina lyakwe Yeova. (Mate. 5:14-16) Vino sweswe antu ya muzilo, vino tukaikala vikalanga ukuti amasunde yakwe Yeova aasuma nu kuti Satana akalanda ivyaufi. Ndi twaluvyanya, tukalapila nu kutaluka ku vipe ivisileta umucinzi kuli Yeova.—Masa. 79:9.

6. U mulandu ci uno Yeova akatulolela ukuti sweswe yalungame, nanti icakuti tutamalilika?

6 Pa mulandu ni mpolelwa yakwe Yesu, Yeova akaelela amaifyo yakwe yayo yonsi aakamutaila. Akapokelela yakapepa yonsi aakaipeela kuli aliwe. Yeova akalola Aina Klistu apakwe ukuti ana yakwe na yayo amfwele na zyuze alungame ukuti aacuza yakwe. (Yoa. 10:16; Loma 5:1, 2; Yako. 2:21-25) Fwandi na ndakai kwene, impolelwa ikalenga tuye alungame mu manso yakwe Tata alino nu kucindika izina lyakwe.

“UWENE WAKO WIZE”

7. A mapaalo ci aaya mu Wene Wakwe Leza, yano impolelwa yalenga tukwate?

7 Umwi pepo lyakulangilila, cuze cino Yesu walenzile Leza i cakuti: “Uwene wako wize.” Uzye impolelwa vyalemana uli nu Wene Wakwe Leza? Impolelwa yalenga cangupale ukulonganika ya 144,000 akuyateeka ukwiyulu alino nu kuya ya simapepo na Yesu. (Umbw. 5:9, 10; 14:1) Yesu pamwi na ya kateeka yauze, yano yapanga Uwene Wakwe Leza, yalalenga  antu yacuvwila yonsi ukuipakizya ivintu ivisuma pa myaka 1,000 pa mulandu ni mpolelwa. Insi ilaya paladaise, antu yonsi acisinka yalaya aamalilike, nupya palaya ukulemenkana pa viumbwa vyonsi ivya mwiyulu ni vya muno nsi. (Umbw. 5:13; 20:6) Yesu alafwamfwanta inzoka uku mutwe nu kufumyapo ucipondoka onsi uno Satana waleta.—Utan. 3:15.

8. (a) Uzye Yesu wavwilizye uli alondezi yakwe ukumanya ucindami wa Wene Wakwe Leza? (b) Tukalanga uli ukuti tukutungilila Uwene ndakai?

8 Lino Yesu wali pano nsi, wazwilizye alondezi yakwe ukumanya ucindami wa Wene Wakwe Leza. Lino wawatiziwe sile wakosozile “ilandwe lisuma lya Wene Wakwe Leza ku misumba” yonsi. (Luka 4:43) Umu mazwi aakusyalikizya yano Yesu wanenyile alondezi yakwe lino waswililanga kwi yulu, wayanenyile ukuya ya kambone yakwe “kufika na kuno insi yapela.” (Mili. 1:6-8) Umulimo wa kukosoola, walenga antu yakwate isyuko lya kusambilila pa mpolelwa alino nu kuyalenga kuti yaatungilila Uwene Wakwe Leza. Ndakai, tukalanga ukuti tukutungilila Uwene ndi cakuti tukwazwilizyako aina yakwe Klistu aya pano nsi ukusimikila ilandwe lisuma ilya Wene umu nsi yonsi.—Mate. 24:14; 25:40.

“KULONDA KWAKO KUCITIKE”

9. Uzye tungasininkizya uli ukuti Yeova alafikilizya ukulonda kwakwe?

9 Uzye Yesu walozizye mwi lino walanzile ukuti: “Kulonda kwako kucitike”? Yeova a Kaumba. Lino walanda ukuti cimwi cilacitika, cikaya kwati icicitika na mpiti. (Eza. 55:11) Atalazumilizya ucipondoka wakwe Satana ukumulesya ukucitila antunze vino akalonda. Ukufuma pa kutandika, Yeova walondanga umu nsi muzuule ana yakwe Adamu na Eva aamalilike. (Utan. 1:28) Ndi cakuti Adamu na Eva yaafwile ukwaula kukwata ana, ukulonda kwakwe Leza ukwakuti insi izuule antu nga kutafikiliziwe. Nomba, lino Adamu na Eva yaembwike, Yeova wayazumilizye ukukwata ana. Umu mpolelwa yakwe Yesu amuno Leza wapeelela yonsi autailo isyuko lya kwizaya aamalilike nu kwikala umi wa pe. Yeova watemwa antu, nupya ukulonda kwakwe kwali kwakuti antu yonsi acuvwila yaikala ningo.

10. Uzye aafwe yalaaipakizya uli ivisuma ivyafuma mu mpolelwa yakwe Yesu?

10 Uzye antu aingi cuze aafwile ale yatakweti isyuko lya kumanya nanti ukuombela Yeova, cilaya uli? Impolelwa yalenga cangupale ukumanya ukuti aafwe yalazyuka. Tata witu uwa kwi yulu uwaya nu kutemwa alazyula yonsi aafwa nupya alayapeela isyuko lya kusambilila vino akalonda nu kwikala manda pe. (Mili. 24:15) Yeova akalonda antu yaikala ningo kwaula ukufwa. Vino aliwe watupeela umi, waaya a Isi wakwe wensi alatutuluka. (Masa. 36:9) Fwandi amazwi yano Yesu watunenyile mwi pepo akuti: “Tata witu uwa mwiyulu.” Yaali ningo sana. (Mate. 6:9) Yeova wapeela Yesu amaka yakututulula aafwe. (Yoa. 6:40, 44) Umu Paladaise, Yesu alafikilizya amazwi yaa akuti: “Nene kuzyukuka nu umi.”—Yoa. 11:25.

11. I vyani vino Leza alacitila antu amwi “umba likulu cuze”?

11 Icikuuku cakwe Yeova citaya sile pa antu anono, pano Yesu watile: “Wensi akacita vino Leza akalonda, wene ali mwina wane, na kaci wane, na mayo.” (Mako 3:35) Ukulonda kwakwe Leza ukwakuti “iumba ilikulu cuze” ilitangapendwa, alikuti  antu amu nko zyonsi, imitundu yonsi alino ni ndimi zyonsi yaye ya kapepa. Yonsi aataila mu mpolelwa yakwe Yesu na yonsi akacita kulonda kwakwe Leza yaaya pali yayo aakapunda ati: “Ufyusi ukafuma kuli Leza witu, wino uwikala pa cilimba ca wene, nga nu ku Mwana wa mfwele!”—Umbw. 7:9, 10.

12. Uzye vino Yeova akalonda ukucitila antu yakwe acuvwila vyakolana uli ni vyaya mwipepo lya cilangililo?

12 Vino Yeova akalonda ukucitila antu yakwe vyakolana na vino Yesu walanzile mwi pepo lya cilangililo. Ukulingana ni pepo lii, tukalondesya ukucindika nu kulenga izina lyakwe Yeova ukuya ilya muzilo. (Eza. 8:13) Izina lyakwe Yesu likapiliula ukuti “Yeova Akapususya” nupya ipusukilo litu ukupitila mu mpolelwa yakwe Yesu likaleta umucinzi nu lulumbi kwi zina lyakwe Yeova. Uwene wakwe Leza ulalenga antunze ukuipakizya usuma uno impolelwa yaleta. Ipepo lya cilangililo likalenga tusininkizye ukuti kusi cingalesya ukulonda kwakwe Leza ukucitika.—Masa. 135:6; Eza. 46:9, 10.

MWATAIZYA PA MPOLELWA INO YESU WAPEEZILE

13. I vyani vino tukalanga ndi twawatiziwa?

13 Inzila icindame ino tukalangilamo ukuti tukataizya pa mpolelwa, u kuipeela sweineco kuli Yeova pa mulandu nu utailo uno twakwata mu mpolelwa nu kuwatiziwa. Nga twawatiziwa tukalanga ukuti “sweswe antu yakwe [Yeova].” (Loma 14:8) Uluwatizyo lukalenga twapepa kuli Leza na kampingu musanguluke. (1 Pet. 3:21) Yeova akatulenga ukumanya ukuti sweswe ya cuza yakwe. Twasininkizya ukuti alatupeela vyonsi vino walaya.—Loma 8:32.

Iinzila ci ino tungalangilamo ukuti tukataizya apa mpolelwa? (Lolini Paragalafu 13, 14)

14. U mulandu ci uno tulinzile ukutemwa antu yanji?

 14 Iinzila ci na yuze ino tungalangilamo ukuti tukataizya pa mpolelwa yakwe Yesu? Pa mulandu wa kuti Yeova watemwa vyonsi vino wacita, ukulonda kwakwe u kwakuti yonsi akamupepa yaye nu kutemwa. (1 Yoa. 4:8-11) Tukalanga ukuti tukalondesya ukuya “ana yakwe Tata witu uwa mwi yulu” lino tukulanga ukutemwa uku yanji. (Mate. 5: 43-48) Isunde lya kuti twatemwa anji ali sunde lyakwe cili pa lya nkoleelo ilyakuti watemwa Yeova. (Mate. 22:37-40) Inzila yonga ino tukalangilamo ukutemwa uku anji ukuyasimikilako ilandwe lisuma. Lyonsi lino tukulanga ukutemwa kuli yauze, ala tukuyalanga vino Leza wayatemwa. Acino ukutemwa Leza “kukaaya ukufumaluke muno tuli” ndi cakuti tukulondela isunde lya kuti twatemwa yauze, sana sana aina itu.—1 Yoa. 4:12, 20.

IMPOLELWA YALENGA TUKWATE UPEMWILO UKUFUMA KULI YEOVA

15. (a) A mapaalo ci yano Yeova watupeela ndakai? (b) A mapaalo ci yano alatupeela uku nkoleelo?

15 Tukaelelwa maifyo itu ndi cakuti tukulangizya utailo umu mpolelwa. Baibo ikatunena ukuti amaifyo itu “yangelelwa.” (Welengini Milimo 3:19-21.) Wakwe vino itulandapo, impolelwa yalenga ukuti kuye ukusoolola Aina Klistu aapakwe ukuya ana yakwe Leza. (Loma 8:15-17) Lyene swe umba lya mfwele na zyuze naswe Yeova watupalamika nu kutusoolola ukuti tukumeko uku lulumbi lwakwe. Lino tulaya amalilike apa cisila ca wezyo wa kupelelekezyako, Yeova alatemwa sana ukutukulula pakuti tukatwalilile ukuya ana yakwe pano nsi. (Loma 8:20, 21; Umbw. 20:7-9) Kutemwa kwakwe Leza u kwa manda pe. Alino mapaalo yano impolelwa yaleta nayo kwene aamanda pe. (Ayeb. 9:12) Uwila uu utalatala usile incito. Kusi umuntu nanti aumwi angatupokolola uwila uu.

16. Uzye impolelwa yalenga uli ukuti tukululwe?

16 Pasi nanti acimwi cino Satana angacita uku kulesya umuntu uwalapila ukutwalilila ukuombela Yeova. Yesu wizile pano nsi nu kufwila antu yonsi ‘iila lyonga sile.’ Nomba impolelwa yene icili ikaomba na likwene. (Ayeb. 9:24-26) Impolelwa ino Yesu wapeezile yafumizyepo vyonsi viipe vino Adamu waleesile. Tukataizya sana pali vino Yesu wapeezile impolelwa iyalenga ukuti tukululwe umu nsi ii ipe ino ikatungululwa na Satana, nupya calenga ukuti tutaatiina imfwa.—Ayeb. 2:14, 15.

17. Uzye ukutemwa kwakwe Leza kukapiliula cani?

17 Tungataila malayo yano Leza watulaya. Wakwe viivi kwene vino wafikilizye vino iviumbwa vyakwe vyalondekwanga, Yeova atalatala afilwe ukufikilizya vino walaya. Asisenuka foo. (Malaki 3:6) Yeova watupeela ivintu ivingi ivisuma vino tukaipakizya. Watutemwa cuze. Naswe sweisikulu twamanya nu kutaila ndi vino Leza watutemwa. Leza u kutemwa. (1 Yoa. 4:16) Insi yonsi ilaya paladaise mumo umulaya uluzango, nupya antu yonsi yalatemwana. Lekini swensi twalumbanyizizya pamwi Yeova lino tukuombela pamwi ni viumbwa vya kwi yulu alino nu kuvwanga ituti: “Kulumbanyiziwa, lulumbi, mano, kutaizya, mucinzi, maka nu ulamba vyonsi ivyakwe Leza witu manda pe! Ameni!”—Umbw. 7:12.