Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Ogasiti 2017

Mauzyo Yano Aakawelenga Yakauzya

Mauzyo Yano Aakawelenga Yakauzya

U mulandu ci uno malyasi yano Mateo na Luka yalemvile pali Yesu yapusaniile?

Ilyasi lino Mateo walemvile pali vino vyali nu kucitika ukulozya uku kuvyalwa kwakwe Yesu ni mikulile yakwe, lyapusanako panono ni lyasi lino Luka walemvile, pano cila wino walanzile pa muntu mupusane.

Ilyasi lyakwe Mateo likalanda pali vino vyacitikile Yosefu. Likalanda pali vino Yosefu wacisile lino wamanyile ukuti Maliya ali ni ndilwa, pa ciloto cino walosile muno umungeli wamunenyile vino ivintu vyali, na vino wazumile ulondolozi uwo. (Mate. 1:19-25) Mateo watwalilile ukulondolola pa ciloto cino Yosefu walosile muno umungeli wamunenyile ukupuukila uku Eguputo, ukupuuka pamwi nu lupwa, na muno yamunenyile ukuti aswilile uku mpanga ya Izlaeli, vino waswiliile, alino na vino wapingwilepo ukuti akikale nu lupwa uku Nazaleti. (Mate. 2:13, 14, 19-23) Umu vipande vya kutandikilako umwi Landwe lyakwe Mateo, izina lyakwe Yosefu lyalumbulwa imiku 8, nomba lyakwe Maliya lyene lyalumbulwa sile imiku 4.

Ilyasi lyakwe Luka lyene likalanda sana pali Maliya. Likalanda pali vino umungeli Gabilieli wamutandalile, vino cali lino watandalile Elizabeti, na pali vino Maliya wataizye Yeova. (Luka 1:26-56) Luka walanzile na pa mazwi yano Simeoni wanenyile Maliya pali vino Yesu wali nu kucula uku nkoleelo. Nu mwi lyasi ilikalanda pali vino cali lino ulupwa lwakwe Maliya lwaile uku ng’anda yakwe Leza ala Yesu ali ni myaka 12, Luka walemvile amazwi yano Maliya walanzile, atalanzile pa mazwi yakwe Yosefu. Luka walemvile nu kuti vyonsi ivyacitiike vyafisile sana Maliya pa mwenzo. (Luka 2:19, 34, 35, 48, 51) Umu vipande viili ivya kutandikilako umwi Landwe lyakwe Luka, izina lyakwe Maliya lyalumbulwa imiku 12, nomba lyakwe Yosefu lyene lyalumbulwa sile imiku itatu. Fwandi Mateo walanzile sana pali vino Yosefu wacitanga ni vyamusakamike, lelo Luka wene walanzile ivingi pali Maliya ni vyamucitikiile.

Lyene nu ulondolozi ukalanda pa mupanda uno Yesu wavyalilwemo nao wapusanako. Mateo walondolwile umupanda uno Yosefu wavyalilwemo nu kulanga ukuti vino Yosefu wali a isi wakwe Yesu, fwandi Yesu wakweti insambu zya kwikala pa cilimba ca wene cakwe Davidi. U mulandu ci? Pano Yosefu wavyalilwe umu mupanda wa Mwene Davidi ukupitila muli Solomoni mwana Davidi. (Mate. 1:6, 16) Lelo, Luka wene walanzile umupanda umwafumile Maliya nu kulangilila ukuti Yesu walinzile ukuya impyanyi, pa wene wakwe Davidi ‘muli u muntu wakwe.’ (Loma 1:3) U mulandu ci? Pano Maliya wafumile umu mupanda wa Mwene Davidi ukupitila muli Natani mwana Davidi. (Luka 3:31) Nomba uzye u mulandu ci uno Luka atalembiile izina lyakwe Maliya pa mutande wa mazina ukulanga ukuti wali umwana wakwe Heli? A pamulandu wakuti umupanda uno umwi wavyalilwemo yaulondelanga ukupitila umu yonsi. Fwandi vino Luka walemvile Yosefu pa mutande nu kulanga ukuti wali a mwana Heli, camanyikwe ukuti Yosefu wali aisivyala wakwe Heli—Luka 3:23.

Imitande ya mazina ino Mateo na Luka yalemvile ikalangilila ukuti Yesu wali ali Mesiya uwasoowilwe. Nupya, umupanda uno Yesu wavyalilwemo wamanyikwe sana icakuti nanti Afaliseo na Asaduki yavizilwe nu kupaazya. Ndakai, umutande wa mazina aaya muli Mateo na Luka yaya pali vino vyalembwa muli Baibo vino twataila sana nupya yakalanga vino malayo yakwe Leza yaya aacumi.