Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Ogasiti 2016

Mauzyo Yano Aakawelenga Yakauzya

Mauzyo Yano Aakawelenga Yakauzya

U mulandu ci uno ukufulala uku minwe wali u mulandu ukome uku yalwani yakwe Yesu?

Lii lyali i lyasi lyonga sile pa malyasi aingi yano alwani yakwe Yesu yapeelelangapo Yesu na asambi yakwe imilandu. Amasunde Yakwe Mose yalanzile pali vino aina Izlaeli yali nu kulondela pa kusangulula imili yao pa mulandu ni vikafuma umu mwili, ulwale wakwe tembwe, alino nu ku vitumbi vya yantu ni vyanyama. Mwali ni vyeo ivyalandanga pa kuisangulula uku vintu iviipe. Antu yaisangululanga ukuomvya impolelwa ya kooca, ukufulala, nanti ukuisansa sile amanzi.—Levi vipande 11-15; Mpe. cipande 19.

Ya simapepo Ayuda ikangako amasunde na yauze uku masunde kwene yaa. Ivyalembwa vimwi vikalanga ukuti ukukowela kwa misango yonsi kwaletanga “mauzyo pali vino cayanga pakuti umuntu akowele, vino ukukowela kwene kuko kwali nu kwambukila yauze, iviya nanti ivintu ivyali nu kukoweziwa, alino ni vya kucita pakuti umwi aye umusanguluke nupya.”

Alwani yakwe Yesu yamuzizye yati: “Uzye pacani cino alondezi yako yasyayela intambi zino vikolwe vitu vyatusiliile, yakalya ni minwe ya mifitalila?” (Mako 7:5) Alwani kwene yaa yatalozyanga umu kuti asambi yakwe Yesu yalyanga ukwaula ukufulala uku minwe. Wakwe vino ulutambi lwali, ya simapepo yalondanga ukuti umuntu iyamufulalikizya amanzi uku minwe lino atatala watandika ukulya. Ivyalembwa ivyativilandwapo vikalanda nu kuti: “Citamanyikwa ningo iviya vino yaomvyanga pa kufulalikizya umuntu uku minwe, amanzi yano yali nu kuomvya, uwali nu kufulalikizya antu amanzi kwene yayo uku minwe, na pano yali nu kufisya ukufulala uku minwe.”

Yesu walanzile sile ukwaula nu kupita umu mbali kuli ya simapepo ya Ciyuda apa masunde apanzilwe sile nantu ati: “Ezaya wali ningo lino wasemile pali mwemwe! Mwe yasomvi, wakwe cino walemvile ati, ‘antu yaa, yakancindika sile mu mazwi yao. Lelo melenganyo yao yali kutali kufuma kunondi [Yeova].’ Mwasya masunde yakwe Leza nu kusunga intambi zya untunze.”—Mako 7:6-8.