Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Mei 2017

Vino Gayusi Wazwilizye Aina

Vino Gayusi Wazwilizye Aina

GAYUSI na Ina Klistu yauze aaliko uku kusila kwa ciputulwa ca myaka ya mu nsita ya atumwa yakomanaanga ni intazi. Antu yamwi asalanganyanga ivisambilizyo vya ufi yezizye ukutonsya utailo wa Ina Klistu nu kuyapatukanya. (1 Yoa. 2:18, 19; 2 Yoa. 7) Umonsi uwi zina lyakuti Diotilefe ‘watumpwilanga’ umutumwa Yoane na yauze, wakananga ukupokelela Aina Klistu aenyi, nupya wezyanga ukulyombeleka yauze ukuti yamukolanya. (3 Yoa. 9, 10) Vikwene i vyacitikanga lino Yoane walembiile Gayusi kalata. Kalata wino umutumwa walemvile, apiipi nu mwaka wakwe 98 C.E., waya umu Malembelo ya Ina Klistu aa Cigliki nupya akaamwa ukuti “Yoane Wakwe Citatu.”

Asi mulandu ni ntazi zino Gayusi wakwatanga, watwalilile ukuombela Yeova na ucisinka. Uzye walangilile uli utailo? U mulandu ci uno tukalonda ukuti twakolanya Gayusi ndakai? Uzye kalata wino Yoane walemvile angatwazwa uli ukucita vivyo?

KALATA KULI CUZA UWATEMWIKWA

Uwalemvile Yoane wakwe citatu wailumbwile ukuti “wikolo.” Cii calenzile ukuti Gayusi amanye ukuti wii wali u mutumwa Yoane. Yoane walembiile Gayusi ukuti “mukundwe wane, wino mu cumi namutemwa.” Lyene Yoane walanzile ukuti cingazipa ndi cakuti Gayusi wali nu umi usuma alino nu kupepa ningo Leza. Yaa yaali amazwi asuma nupya akukomelezya!—3 Yoa. 1, 2, 4.

Limwi Gayusi wali aeluda umu cilongano, nomba kalata italandapo vivyo. Yoane wataizye sana Gayusi pa kupokelela aina nanti icakuti atayamanyile. Yoane waweni ukuti Gayusi wali uwa cisinka, pano ukupokelela aenyi kukalenga aomvi yakwe Leza ukuya apusaneko.—Utan. 18:1-8; 1 Tim. 3:2; 3 Yoa. 5.

Amazwi ya kutaizya yano Yoane watumiile Gayusi pa mulandu nu kupokelela aina yalangilile ukuti Aina Klistu yayanga kuno Yoane wikalanga alino nu ku vilongano, nupya yanenanga Yoane ivyayacitikilanga kuno yafuma. Limwi i calenzile ukuti Yoane amanye ivyacitikanga umu vilongano vivyo.

Aina Klistu aayanga uku ncende izipusane pusane yalondanga ukwikala na ina. Ivyacitikanga umu mang’anda ya kufikilamo aenyi vitaazifile, mutasakamalwanga ningo, nupya mwacitikanga sana upulumusi. Fwandi ndi calinga, aenyi acenjele ikalanga ni vyuza; Aina Klistu aenyi nayo ikalanga na Ina Klistu yauze.

“YENE YAKATWIKE YAYA PA LWENDO MU KUTUMIKILA KLISTU”

Yoane wanenyile Gayusi ukutwalilila ukupokelela aenyi, pano wamunenyile ukuti:  “Uyazwe ukutwalilila ulwendo lwao mu musango uno ukazanzya Leza.” Ukwazwa aenyi ukutwalilila nu lwendo lwao kwalozyanga umu kuyapeela vyonsi ivyalondekwanga pa lwendo mpaka iyafika kuno yayanga. Ukwaula nu kutwisika, vikwene avino Gayusi wacitanga uku enyi yano wapokelelanga, pano avino aina yanenyile Yoane pali vino Gayusi walanganga ukutemwa alino nu utailo.—3 Yoa. 3, 6.

Limwi pa enyi yayo payanga na ya misyonali, intumi zino Yoane watumanga, nanti angalizi aatandalilanga ivilongano. Yonsi yaa yatwalanga ilandwe lisuma uku yantu. Yoane walanzile ukuti: “Yene yakatwike yaya pa lwendo mu kutumikila Klistu.” (3 Yoa. 7) Yoane watazile alanda pali Leza (lolini cikomo 6), fwandi lino walanzile pa “kutumikila Klistu” cikaloleka kwati walandanga pa kumanyisya antu api zina lyakwe Leza. Fwandi aina yaa nayo kwene yali amu cilongano ca Ina Klistu nupya yalondekwanga ukuyapokelela ningo. Vikwene avino na Yoane walemvile ukuti: “Tulinzile ukwazwa antu yaa pakuti tukumeko ku mulimo wao uwa kusalanganya ilandwe.”—3 Yoa. 8

UKWAZWANA UMU NSITA ZITALE

Kalata wino Yoane walembile Gayusi ataali uwa kumutaizya sile. Yoane walondanga nu kwazwa Gayusi ukucimvya intazi itale. Umwina Klistu umwi umu cilongano uwizina lyakuti Diotilefe ataalondanga ukupokelela Aina Klistu aenyi. Wezyanga nu kulesya yauze ukupokelela aenyi.—3 Yoa. 9, 10.

Ukwaula nu kutwisika, Aina Klistu acisinka nga yatatemilwe ukuyaikala na Diotilefe ikuya isyuko lya kuya ukwakwe. Diotilefe walondanga ukuya uwa nkoleelo umu cilongano, pasi cino wapokelile ukufuma kuli Yoane mu mucinzi, nupya watumpwilanga umutumwa Yoane alino na Ina Klistu yauze. Nanti icakuti Yoane atatazile aama Diotilefe ukuti a kasambilizya wa ufi, Diotilefe wakananga vino Yoane walandanga. Diotilefe walondesyanga ukucindikwa nupya imiyele yakwe itazifile, na ci calenzile ukuti ucisinka wakwe watwisikwa. Vino Diotilefe wacitanga vikalangilila vino umuntu aakalonda ukuya umucindame sana umu cilongano angaleta icimvulunganya. Fwandi acino Yoane waneniile Gayusi, ukwikako sile naswe kwene ndakai ati: “Utakolanya vipe.”—3 Yoa. 11, Cimambwe New Testament.

UMULANDU UNO TULINZILE UKUCITILA VISUMA

Ukupusanako na Diotilefe, Yoane walumbwile Umwina Klistu wino yamanga ukuti Demetiliyo ukuti wali u muntu musuma. Yoane walemvile ukuti: “Cila muntu akavwangila Demetiliyo visuma . . . Naswe kwene tukulundapo umboni pali aliwe, nupya mumanyile ukuti vino tukulanda i vya cumi.” (3 Yoa. 12) Limwi Gayusi walondekwanga ukwazwa Demetiliyo, nupya Yoane wakwe citatu limwi wali a kalata wino umutumwa walembiile Gayusi ukuti angazwa Demetiliyo. Limwi Demetiliyo kwene uwatwazile kalata wii kuli Gayusi. Vino Demetiliyo wali nkombe yakwe Yoane, nanti limwi wali u mwangalizi uwatandalilanga ivilongano, afwile wakomelizye Aina Klistu ukusumba mano kuli vino Yoane walemvile.

U mulandu ci uno Yoane wakomelizye Gayusi ukutwalilila ukupokelela aenyi nanti cakuti vivyo kwene avino wacitanga? Uzye tungati limwi Yoane walondanga ukuti Gayusi atwalilile ukuya umusipe? Uzye ale umutumwa Yoane wasakamile ukuti Gayusi angata ukupokelela aenyi pa mulandu wakuti Diotilefe walondanga ukuzinga antu ya musango uwo umu cilongano? Yoane wakomelizye Gayusi lino wamulembiile ukuti: “Wino akacita visuma wene uwakwe Leza.” (3 Yoa. 11) Uu u mulandu usuma sana uwakutwazwa ukutwalilila ukucita ivisuma.

Uzye kalata wino Yoane walemvile wazwilizye Gayusi ukutwalilila ukupokelela aenyi? Vino Yoane wakwe citatu wasuunzilwe nu kwizaya muli Baibo na vino wakwatamo amazwi  akukomelezya na antu yauze ‘ukukolanya ivisuma,’ i vikalanga ukuti wakomelizye sana Gayusi.

VINO TUNGASAMBILILA MWI BUKU LYAKWE YOANE WAKWE CITATU

Kutaaya na vyuze vino twamanya pa mwina witu uwaliko mpiti, Gayusi. Lelo, ivyeo ivinono sile vikwene ivikalanda pa umi wakwe, vingatusambilizyako vimwi.

Uzye tungacita uli pakuti tutwalilile ‘ukuzengela alendo mu mang’anda itu”?

Icakutandikilako, sweingi pakuti tumanye icumi, kwali yamwi aitemilwe ukupita intamfu itali pakuti ize yatusambilizye. Ukuya kwene, asi Ina Klistu yonsi ndakai aakapita intamfu itali ukuti yakasimikile ilandwe lisuma. Lelo, wakwe vino Gayusi wacitanga, tungaazwilizya nu kukomelezya yaayo aakapita intamfu itali, wakwe angalizi ya viputulwa na ya mama yao. Nanti limwi tungazwilizya aina na ya nkazi aakaya umu kuombela ukukalondekwa ya kasimikila aingi umu mpanga yao kwene nanti uku mpanga zyuze. Fwandi lekini ‘twazengela alendo mu mang’anda itu.’—Loma 12:13; 1 Tim. 5:9, 10.

Cakwe ciili, tutalinzile ukuzunguka ndi cakuti yamwi yatandika ukulwisya aakatungulula umu vilongano ndakai. Yamwi vivyo kwene avino yacisile kuli Yoane, nupya vyacitikile nu mutumwa Paulo. (2 Kol. 10:7-12; 12:11-13) Uzye lyene tungacita uli ndi cakuti twakwata intazi zya musango uwo umu cilongano? Paulo wanenyile Timoti ukuti: “Muomvi wa Mwene atalinzile kulemanila. Wene alinzile kuya uwa luse kuli onsi, nupya aye kasambilizya musuma akateeka mwenzo. Uye mufuke lino ukulungika yao akukulwisya.” Ndi cakuti tukuteeka umwenzo na lino yamwi yatusosya, yamwi aakatupeela imilandu yangasenuka nu kutandika ukucita ivisuma. Ni cingacitika icakuti “Leza angayapeela insita yakuzenzuka nu kumanya cumi.”—2 Tim. 2:24, 25.

Cakwe citatu icakuti, tulinzile ukutaizya Aina Klistu yanji aakaombela Yeova na ucisinka na lino yamwi yakuyakanya. Umutumwa Yoane wakomelizye Gayusi nu kumwazwa ukumanya ukuti vino wacitanga vyali ningo sana. Umu nzila iliyonga kwene, ya eluda ndakai yalinzile ukukolanya Yoane nu kukomelezya aina na ya nkazi pakuti ‘yataatonta.’—Eza. 40:31; 1 Tesa. 5:11.

Umu mazwi sile 219 umu lulimi lwa Cigiliki, kalata wino umutumwa Yoane walembiile Gayusi ali buku lipi sana pa mabuku aaya muli Baibo. Nomba, lyacindama sana uku Ina Klistu ndakai.