Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi—Lwa Kusambililamo  |  Mei 2017

IVYACITIIKE MPITI

“Yatwalilile Ukuombesya nu Kulanga Sana Ukutemwa”

“Yatwalilile Ukuombesya nu Kulanga Sana Ukutemwa”

KWATANDIKE ukukaya sana uwanda kwene uwa pali Cisano akatondo umu Sepetemba umwaka wakwe 1922 lino antu 8,000 ingile umu cikuulwa ca ukongano. Ceyamani wamanyisizye yonsi ukuti apa nsita kwene iiya icindame, umuntu ali wensi wali u mutungwa ukufuma, nomba wensi uwafuma ataali nu kuzumiliziwa ukwingila nupya.

Kwali ukwimba inyimbo pa kutandika ukongano, lyene pa cisila umwina Joseph F. Rutherford waile apa pulatifomu. Aingi umwi umba yatamanyile ivyali nu kucitika. Antu yamwi imilile sile ala ikukaya. Kalanda wayanenyile ukuti ikale nu kukutika kuli vino vikulandwa. Uzye kwali umwi uwaweni icisalu cino yapomvile ningo icali mupela lino ilyasi lyatandike?

Umwina Rutherford walanzile ilyasi ilyali nu mutwe wakuti “Uwene wa mwi yulu watiupalama.” Api awala lyonga na citika, wavwanzile ni izwi lya maka pali vino ya kasema aliko mpiti yamanyisyanga antu ukwaula intete pa kwiza kwa Wene. Lino ilyasi lyafisile apakasi, uzizye ati, “Uzye mwazumila ukuti Kateeka wa lulumbi watandika ukuteeka?” Aali umwi umba yapunzile yati: “Ee!”

Umwina Rutherford walanzile ati: “Fwandi twalililini ukuombesya, mwe yana yakwe Leza wa papela pela!” Watwalilile ukuvwanga ni zwi lya maka ati “Lolini, Umwene akuteeka! Mwemwe yaomvi yakwe. Fwandi, manyisyini, manyisyini, manyisyini.”

Apa nsita kwene iiya, icisalu icali papela catandike ukupomboloka, ipalolekela na mazwi alemvilwepo akuti: “Manyisyini Umwene nu Wene Wakwe.”

Umwina Ray Bopp walanzile ukuti: “Antu yazanzile cuze.” Nkazi Anna Gardner walondolwile vino “incesi zyatentanga ala antu yakutoota.” Umwina Fred Twarosh walanzile ati: “Yonsi aali umwi umba yakatwike kwati u muntu wenga.” Umwina Evangelos Scouffas walanzile ukuti, “Cali kwati amaka yamwi yatukatusya swensi apa vilimba, nupya twimiliile nu kutandika ukuponya aminsozi.”

Aingi aali pa ukongano uwa ala yatandika mpiti ukusimikila antu api landwe lisuma ilya Wene. Lelo, pa nsita iiya yuvwile kwati yapeelwa amaka na yauze akuomba umulimo. Nkazi Ethel Bennecoff walanzile ukuti Asambi ya Baibo “yatwalilile ukuombesya nu kulanga sana ukutemwa.” Nkazi Odessa Tuck, wino pa nsita iiya wali ni myaka 18, wafumile pa ukongano uu ala akulondesya ukuomba ukulingana ni cuzyo cakuti “Aweni amaya?” Walanzile ati: “Ntamanyile umulimo kwene uwo, nanti ukwakuya, nanti ivya kuomba umulimo kwene uu. Icintu conga sile cino namanyile i cakuti nalondanga ukukolanya Ezaya uwalanzile ati: ‘Mukwai namayako! Ntumini nene!’” (Eza. 6:8) Umwina Ralph Leffler walanzile ukuti: “Uwanda kwene uwa uiyele alino umulimo uukaombwa umu nsi yonsi ndakai uwa kusimikila antu pa Wene watandike.”

Fwandi acino tutanga tuzunguke ukuti ukongano uwacitike umu 1922 umu musumba wa Cedar Point, umu citungu ca Ohio, wamanyikwa sana uku yantu yakwe Yeova na ndakai kwene! Umwina George Gangas walanzile ati, “Ukongano uwa wankomelizye  ukutwalilila ukuzanwa pa maukongano yonsi.” Umwina wiya wiusyanga ukuti atatazile apuswe uku ukongano nanti onga. Nkazi Julia Wilcox walemvile ukuti: “Ntanga ndondolole uluzango luno nkakwata lyonsi lino nawelenga umu mpapulo pa ukongano uwaliko uku Cedar Point umu 1922. Lyonsi nkalonda ukulanda inti, ‘Nkukutaizya, Yeova, pali vino wanzumilizye ukuzanwako.’”

Ukwaula nu kutwisika, sweingi ndakai tukayuvwa wakwe vino nkazi wii wayuvwile lino twiusya ukongano uwatufisile sana pa mwenzo nu kutulenga ukutwalilila ukuya acincile nu kutemwa sana Leza witu uwakulisya nu Mwene wino wasoonta. Lino tukwiusya ivya musango uu, naswe kwene tukalondesya ukulanda ituti, “Nkukutaizya, Yeova, pali vino wanzumilizye ukuzanwako.”