Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Maaci 2017

Mwapeela Umucinzi Kuli Yano Yalinzile Ukucindikwa

Mwapeela Umucinzi Kuli Yano Yalinzile Ukucindikwa

Kuli “wino uwikala pa cilimba ca wene pamwi nu mwana wa mfwele yene yalumbanyiziwe, yapelwe mucinzi, lulumbi nu ulamba manda pe!”—UMBW. 5:13.

INYIMBO: 9, 14

1. U mulandu ci uno antu yamwi yalinzile ukucindikilwa, nupya i vyani vino tumasambilila?

UKUCINDIKA umwi kukapiliula ukumwikako mano nu kumupeela mucinzi. Tukaenekela ukuti umuntu wino alinzile ukupeelwa mucinzi watacita vimwi vino tufwile kumupeelelapo umucinzi nanti ukuti akaomba imilimo imwi icindame sana. Fwandi limwi tunguzya tuti, Aaweni yano tulinzile ukucindika, nupya umulandu ci uno tulinzile ukuyacindikila?

2, 3. (a) U mulandu ci uno Yeova u walinga ukucindikwa sana? (Lolini cikope cakutandikilako.) (b) Pali Umbwilo 5:13, a weni Umwana wa Mfwele, nupya u mulandu ci uno alinzile ukucindikilwa?

2 Wakwe vino ilembelo lyakwe Umbwilo 5:13 likalangilila, wiyo “wino wikala pa cilimba ca wene . . . nu mwana wa mfwele” yalinzile ukucindikwa sana. Umu cipande 4 umwilembelo ililimwi kwene, tukazana umulandu nauze uno Yeova alinzile ukucindikilwa. Angeli umwi yulu yakasanzula amazwi lino yakulumbanya Yeova, “wino waya nu umi manda pe.” Yakapunda yati: “We Mwene witu! Wemo wazipilwa, kupelwa lulumbi, mucinzi na maka,  pano wewe waumvile vintu vyonsi. Ku kulonda kwako walenzile vyonsi kuti viyeko, nupya wewe waviumvile.”—Umbw. 4:9-11.

3 Umwana wa Mfwele a Yesu Klistu, “Mwana wa Mfwele wakwe Leza wino akafumya maifyo ya antu.” (Yoa. 1:29) Baibo ikatunena ukuti Yesu ali mukulu kuluta pali ya mwene yonsi aayako nanti aaliko mpiti. Baibo ikalondolola ukuti: “A kateeka wakwe yakateeka nupya Mwene wakwe ya mwene onsi, aliwe wenga sile asyafwa. Wene akaikala mu luswepo luno kusi nanti umwi angapalamako. Kusi nanti umwi uwatala walola Leza. Kusi nanti umwi angamulola.” (1 Tim. 6:14-16) Uzye umwene ci uwatala watufwila pa maifyo itu? Mufwile mukauvwa ningo sana ukuomvya amazwi yano angeli aingi cuze yakaomvya aakuti: “Mwana wa Mfwele wino uwakomilwe wene wazipilwa ukupeelwa maka, icuma, mano, ulamba, mucinzi nu kulumbanyiziwa.”—Umbw. 5:12.

4. U mulandu ci uno tutalinzile ukuisoolwela sile sweineco ukuti twacindika Yeova na Yesu?

4 Tutalinzile ukuisoolwelapo sile sweineco ukuti twacindika Yeova na Yesu. Vikwene avino tulinzile sile ukucita pakuti tukikale amanda pe. Amazwi yano Yesu walanzile aaya pali Yoane 5:22, 23 yakatwazwa ukumanya ningo icisinka kwene cii. Yakati: “Pano Tata asyapingula umuntu ali wensi. Lelo wapeela Mwana insambu yonsi yakupingula, pakuti yonsi yacindike Mwana vino yacindika Isi. Wino asyakucindika Mwana ala asyakucindika ni Isi wino wamutumile.”—Welengini Masamu 2:11, 12.

5. U mulandu ci uno tukapeelelako antu yonsi umucinzi?

5 Antu yaumvilwe “mu cata cakwe Leza.” (Utan. 1:27) Fwandi ali mulandu uno antu aingi yakalangila imiyele imwi yakwe Leza nanti icakuti imiyele yao ikapusana pusana. Antunze yakatemwana, ukuuvwilana uluse, ni cikuuku. Leza waumvile antu na kampingu, nupya cii cikalenga antu yamanya icisuma ni ciipe. Nupya kampingu akayalenga iyamanya ndi cakuti vino yakucita vili sile ningo nanti foo, yakamanya na lino umwi ali nu ufuma cumi nanti foo. (Loma 2:14, 15) Antu aingi yakatemwa ivintu vya usaka nupya iviyembe. Yakatemwa ukuya pa mutende na antu yauze. Nanti lino yakucita vii ukwaula nu kumanya, ala yakulanga ululumbi lwakwe Yeova, nupya pa mulandu wakwe cii, yalinzile ukupeelwako umucinzi.—Masa. 8:5.

TULINZILE UKUKWATA UMWAKUPEELELA LINO TUKUCINDIKA YAUZE

6, 7. Pa kulanga umucinzi uku yantunze, uzye ya Nte Yakwe Yeova yapusanako uli na antu aingi?

6 Tulinzile ukucenjela sana lino tukupeela antu yamwi umucinzi nupya tulinzile ukukwata umwakupeleela. Antu aingi cuze ndakai yakatungululwa nu mupasi wa mu nsi ino Satana ali kateeka. Ali mulandu uno antu yamwi yakacindikila sana antu yauze pano yasikwata umwakupeleela. Yakacindika sana ya simapepo ni ntunguluzi zya vikanza vya miteekele, aalumbuka sana umu vyangalo, aakacita ivya kusekesya, alino na antu yauze aalumbuka sana, nupya ilingi yakalola antu yaayo kwati angeli. Fwandi ali mulandu uno ance kumwi na ikolo yakalondela sana ukukolanya antu yaayo, ilingi yakayakolanya umu mivwangile, imizwalile, nanti umu micitile ya vintu.

7 Aina Klistu ya cumi yasilondela vino antu ya mu nsi yakacita pa kucindika antunze. Klistu sile ali muntu wino wali umumalilike lino wali pano nsi nupya ali wino tulinzile ukukolanya. (1 Pet. 2:21) Leza atanga atemwe ndi cakuti twatandika ukucindika antunze ukucila umu cipimo. Tulinzile ukumanya icisinka cii: “Antu yonsi iifya, nupya yali kutali na Leza wino akatuula.” (Loma 3:23) I cumicumi,  kusi umuntu alinzile ukupeelwa sana umucinzi icakuti aya wa kaluwi.

8, 9. (a) Uzye ya Nte Yakwe Yeova yakalola uli aomvi ya uteeko? (b) Uzye tulinzile ukuuvwila aomvi ya mu uteeko ukufika pi?

8 Umu miteekele ya antunze, antu yamwi yakapeelwa sana amaka. Aomvi ya mu uteeko yakapanga masunde nu kusungilila umutende alino nu kusakamala antu yano yakateeka. Cii cikalenga ivintu vyazipila antu yonsi. Fwandi ali cino umutumwa Paulo waneniile Aina Klistu ukuti yaalinzile ukulola antu yaayo ukuti ‘aakateeka’ yano Aina Klistu yalinzile ukutontela. Walanzile ukuti: “Mupeele uteeko vyonsi vino muli nu kupeela, kuli kuti musonko wa mwili nu musonko wa vintu vino mwakwata, nupya mwafukila yakateeka yonsi nu kuyacindika.”—Loma 13:1, 7.

9 Fwandi ali mulandu uno ya Nte Yakwe Yeova yakacindikila aomvi ya uteeko, yakacita vivyo ukulingana nu lutambi ulwaya uku mpanga ino iikalako. Tukauvwila vino yatuneena lino yakuomba imilimo yao. Ukuya kwene, umucinzi uno tukayapeela wakwata umwakupeleela, tukalondela vino Malembelo yakatuneena. Tusicita ivintu ivingalenga tute ukuuvwila Leza nupya tusiyika umu vikanza vya miteekele.—Welengini 1 Petulo 2:13-17.

10. Uzye tungakolanya uli vino aomvi yakwe Yeova aliko mpiti yaombanga na mauteeko alino na aomvi ya mu uteeko?

10 Aomvi yakwe Yeova aaliko mpiti yacitanga vino tungakolanya ndakai lino tukuomba na aomvi ya mu uteeko. Lino uteeko wa ina Loma wapeezile ilamulo lyakuti antu yonsi yalinzile ukupeendwa, Yosefu na Maliya yuvwiliile isunde lya uteeko. Yapisile ulwendo lwa ku Betelemu nanti cakuti Maliya wali apiipi nu kukwata umwana uwakutandikilako. (Luka 2:1-5) Mu kuya kwa nsita, lino Paulo wapeezilwe umulandu wakucita iviipe, waicingilile umwisikulu nu mucinzi nupya wacindike sana Umwene Helodi Agilipa na Fesito, umuomvi wa mu uteeko wa ku citungu ca ina Loma uku Yudeya.—Mili.25:1-12; 26:1-3.

11, 12. (a) U mulandu ci uno tusipeelela umucinzi uliumwi ku yaomvi ya mu uteeko na kuli ya simapepo? (b) I visuma ci ivyacitiike lino Nte wa ku Austria wapeezile umucinzi kuli umwi uwali umu vikanza vya miteekele?

11 Nomba, ya Nte Yakwe Yeova yasicitila ya simapepo kwati yalinzile ukucindikwa sana, nanti icakuti ya simapepo yaayo yangalonda ukuyacindika sana. Imipepele yaufi isisambilizya ivya cumi pali Leza na pi Zwi lyakwe. Fwandi tukalola intunguluzi zya mu macalici wakwe vino tukalola antu yonsi, nomba yatalinzile ukucindikwa ukucila umu cipimo. Tukaiusya ukuti Yesu wapeezile aonsi ya musango uuwo umulandu lino wali pano nsi ukuti yali asomvi nupya intunguluzi impafu. (Mate. 23:23, 24) Lelo, ukucindika aomvi ya mu uteeko kungalenga ukuti ivintu vizipe insita zimwi, nupya yangatucitila ni vintu vino tusikwenekela.

12 Ya Leopold Engleitner yaali a Nte acincile afumile ku Austria yano uteeko wa Nazi walemile nu kuyasenda mwi sitima ku Buchenwald concentration camp. Umuntu umwi aakaamwa ukuti Dr. Heinrich Gleissner nawe wali umufungwa umwi sitima ilili limwi kwene. Waali umwina Austria uwali mu vikanza vya miteekele. Nanti ciye vivyo, uteeko wa Nazi utamutemilwe. Pa lwendo lwa kuya kuno yasungilanga afungwa, Umwina Engleitner walondolwile ivizumilo vyakwe kuli Gleissner, uwasumvileko sana amano pa kukutika. Lino inkondo yakwe ciili iya mu nsi yonsi yasizile, Gleissner wazwilizye sana ya Nte umu Austria. Limwi mungiusya na vyuze ivisuma ivyacitikiile ya Nte yamwi pa mulandu nu kulanga umucinzi uku yaomvi  ya mu uteeko, lino yalondiile vino Baibo ikati avino Aina Klistu yalinzile ukucita.

YAUZE YANO TULINZILE UKUPEELA UMUCINZI

13. Uzye aaweni alinga ukupeelwa umucinzi, nupya u mulandu ci?

13 Yaayo akaombesya yalinzile ukucindikwa. Sana sana ya eluda aakaombesya pa kutungulula iuvi. (Welengini 1 Timoti 5:17.) Tukacindika aina itu asi mulandu ni nkulilo yao, masambililo, vino iikala nanti sile ndi yakwata icuma nanti foo. Baibo ikalanda pali ya eluda ukuti: “amawila ku antu,” nupya yakaezya na maka ukusakamala ivikulondekwa antu yakwe Leza. (Efes. 4:8) Tale elenganyini pali ya eluda umu vilongano, angalizi ya viputulwa, aaya muli Komiti Ikatungulula Iofesi, alino na aaya umwi Umba Ilikatungulula. Aina na ya nkazi aliko umu nsita ya atumwa yacindikanga sana yao aasonsilwe ukulatungulula, nupya naswe kwene avino tukacita ndakai. Tusyacindikisya yao aakatungulula umwi uvi nanti ukulayalola kwati yacindama ukuluta ali wensi nanti ukulayalola wa angeli. Nanti ciye vivyo, tukacindika antu yaa pa mulandu na vino yakaombesya alino na vino yaicefya.—Welengini 2 Kolinto 1:24; Umbwilo 19:10.

14, 15. Londololini upusano uwaya pali ya kacema ya cumi Aina Klistu alino na yaayo aakaitaka sile ukuti aakacema.

14 Ya eluda ya musango uwo yakamanyikwa ukuti aakacema aicefya. Icikalanga ukuti yaicefya, yakakana ukuti yauze yayalola kwati yalumbuka sana. Cii cikalenga yapusaneko na ya simapepo alino na yaaya aliko umu nsita ya atumwa yano Yesu walanzile ukuti: ‘Yene yatemwa vifulo visuma pa vimulo nga ni vilimba vya ucindami mu mang’anda ya mapepo. Yene yatemwa kulamukwa nu mucinzi mu mamaliketi.’—Mate. 23:6, 7.

15 Ya kacema ya cumi yakalondela amazwi yakwe Yesu aakuti: “Lelo mwemo yatalinzile kuti yamwama yati, ‘Kasambilizya,’ pano mwakwata sile kasambilizya wenga, nupya mwensi mwemwe ina. Mutaama umuntu nanti umwi pano pa nsi muti ‘Tata,’ pano mwakwata So wenga sile, wino uwa mwiyulu. Mutaleka nanti wenga uwa munomuli aamwa ukuti ntunguluzi, pano Klistu wenga sile ali ntunguluzi inu. Mukulu uwa munomuli alinzile aye muomvi winu. Pano wino wensi akaikuzya wene alacefiwa, na wino wensi akaicefya wene alakuziwa.” (Mate. 23:8-12) Fwandi munguvwikisya umulandu uno ya eluda amu vilongano ivipusane pusane umu nsi yonsi yakatemwikwa sana nu kucindikwa kuli ya Nte yauze.

Lino yakuicefya umu miombele yao, ya eluda yakatemwikwa sana nu kucindikwa (Lolini mapalagalafu 13-15)

16. U mulandu ci uno mulinzile ukutwalilila ukwezya na maka ukumanya nu kuomvya vino Baibo ikatuneena ukuti ali vino tulinzile ukucita pa kulanga umucinzi?

 16 Ukwaula nu kutwisika, cingatusendela insita pakuti tumanye ningo vino tulinzile ukucita pa kupeela yamwi umucinzi nu kumanya yano tulinzile ukucindika. Vikwene avino cali nu ku Ina Klistu akutandikilako. (Mili. 10:22-26; 3 Yoa. 9, 10) Nomba cacindama sana ukwezya na maka ukulondela vino Baibo ikatunena pali vino tulinzile ukulanga umucinzi. Ukulanga umucinzi umu nzila isuma kukalenga ivintu vizipe.

USUMA UWAYA MU KUPEELA YAUZE UMUCINZI UNO YALINZILE UKUPEELWA

17. I visuma ci vimwi ivyaya umu kucindika aomvi ya mu uteeko?

17 Lino tukucindika aaya umu uteeko, insita zimwi cikalenga kuti yacingilila insambu zitu izya kusimikila. Ilingi yakatandika ukulola ukuti umulimo witu waya ningo. Imyaka iyapita, ya Birgit, ya painiya aakaikala uku Germany, yazanyilwe ukwi sukulu lino umwana wao wasambililangako. Ya mwalimu yanenyile ya Birgit ukuti yali sana nu luzango ukukwata ya mwana ya Nte apa sukulu. Yalanzile ukuti nga citaazifile ukukana kwata ya mwana ya Nte api sukulu lyao. Ya Birgit yalondolwile yati, “Ana itu yakasambiliziwa ukulondela vino Leza akatunena ukuti avino tulinzile ukucita, nupya pali vii paya nu kucindika ya mwalimu.” Mwalimu umwi walanzile ati, “Ndi cakuti ana yonsi yaali wa yana inu, ukusambilizya nga kwazifile sana.” Lino papisile imilungu, mwalimu umwi wizile azanwa ukwiungano umu musumba wa Leipzig.

18, 19. U mulandu ci uno ukucindikila ya eluda umu nzila isuma kwazipila?

18 Ukucindika ya eluda umu vilongano nako kwaya ningo, nupya ivisinte vya muli Baibo avino tulinzile ukulondela lino tukucita vivyo. (Welengini Ayebulai 13:7, 17.) Tulinzile ukuyataizya pa kuombesya kwao nu kwezya na maka ukulondela vino yakutunena ukucita. Ndi tukucita vivyo, yangatwalilila ukuomba imilimo yao ni nsansa. Nomba cii cisikupiliula ukuti tulinzile ukukonkelezya vino eluda umwi “umucindame” akazwala nu kuiyemvya, imipeelele yakwe iya malyasi, nanti vino akacita lino akulanzyanya na yauze. Citanga cizipe ndi cakuti tukumukonkelezya umu vintu vya musango uu. Tutalinzile ukwilila ukuti nawe kwene atamalilika. Wino tulinzile ukulondela nu kukolanya a Klistu.

19 Ndi tukucindika ya eluda umu nzila isuma, ukwaula ukuyacitila kwati aantu aalumbuka, ala tukuyazwa. Tukalenga ukuti yatatandika ukuya ni cilumba, ukuyuvwa ukuti yacila yauze nanti ukuti yalungama sana.

20. Uzye ukucindika yauze kukatwazwa uli?

20 Naswe cikatwazwa sana ukukanaitaila ndi cakuti tukucindika yaayo alinzile ukupeelwa umucinzi. Cikatwazwa ukukana ituumika ndi cakuti yamwi yatupeela umucinzi. Tukaomba ningo ni uvi lyakwe Yeova, ilisipeela sana antu umucinzi nanti icakuti aakapepa yakwe Yeova nanti foo. Nupya ukucita vivyo kukalanga ukuti twakwata mano, pano tusitoovoka ndi cakuti umuntu wino twacindiike waluvyanya.

21. Uusuma ci uwaya umu kucindika yaayo alinzile ukupeelwa umucinzi?

21 Icacindama sana lino tukupeela umucinzi kuli yano yalinzile ukucindikwa, u kuzanzya Leza. Tukaomba ukulingana na vino umwineco akalonda twaomba nupya tukatwalilila ukuya akaele. Nupya yaayo aakalonda ukuzewanya Yeova yakauvwa insonyi. (Mapi. 27:11) Umu nsi mwaya antu aingi cuze aatamanya vino yalinzile ukulanga umucinzi. Tukataizya sana pa ukumanya inzila isuma iyakulangilamo umucinzi ndi vino Yeova akalonda.