Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2017

Ya Alisa

Yaipeelisye Ukuomba—ku Turkey

Yaipeelisye Ukuomba—ku Turkey

AINA KLISTU ya kutandikilako yaombisye pakuti yasimikile antu aingi ‘landwe lisuma ilya Wene.’ (Mate. 24:14) Yamwi yayanga nu ku mpanga zyuze. Umutumwa Paulo waile ukwayela impanga ino yakaama ndakai ukuti Turkey nu kusimikila sana lino wali pa njendo zyakwe umisyonali. * Lino papisile imyaka 2,000, umu 2014, impanga ya Turkey nupya kwene yaombilwemo lino kwali kampeni umuiyele uwa mulimo wa kusimikila. U mulandu ci uno kwayelile kampeni wii? Aaweni aomvileko?

“I VYANI IVIKUCITIKA?”

Umu mpanga ya Turkey mwaya ya kasimikila kucila pali 2,800, nomba antu yonsi aaya umu mpanga iiya yaya 79 milyoni. Fwandi kasimikila wenga afwile ukusimikila uku yantu apiipi na 28,000. Fwandi ya kasimikila yasimikila sile antu anono umu mpanga ii. Kampeni wiya umuiyele wayelileko ukuti antu aingi yasimikilwe umu nsita sile inono. Aina na ya nkazi apiipi na 550 aakalanda ululimi lwa Citurkish aakaikala uku mpanga zyuze yaile uku Turkey nu kuombela pamwi na ina aakaikala uku mpanga kwene ii. I visuma ci ivyacitiike?

Umulimo wa kusimikila waomvilwe sana. Amu cilongano conga umu musumba wa Istanbul yalemvile ukuti: “Lino antu yatulolanga, yatuzyanga yakuti: ‘Uzye kuli ukongano wa Citungu uiyele? Konsi kuno twaya tukulola ya Nte Yakwe Yeova!’” Amu cilongano icaya umu musumba wa Izmir nayo yalemvile ukuti: “Umonsi umwi aakaombela apakaimilila amatakisi uzizye ati, ‘I vyani ivikucitika? Uzye imulundako imiombele?’” I cumi kwene antu yaweni ukuti kuli kampeni.

Ya Steffen

Aafumile uku mpanga zyuze yaipakizye sana ukuombako umulimo wa kusimikila. Ya Steffen, aafumile uku Denmark, yalanzile ukuti: “Cila wanda nasimikilanga uku yantu aatatala yuvwapo pali Yeova. Nayuvwanga ukuti nazwilizyanga antu ukumanya izina lyakwe Yeova.” Ya Jean-David aku France yalemvile ukuti: “Twasimikile umu museo umwi pa maawala aingi. Cazifile sana! Antu aingi yatamanyile ya Nte Yakwe Yeova. Twalanzyanyanga na antu aingi yano twazananga pa mang’anda, ukuyatambisya mavidyo, nu kuyasiila impapulo.”

Ya Jean-David (aali pakasi)

 Ya kasimikila 550 aomvileko muli kampeni wii yasiilile antu impapulo apiipi na 60,000 umu milungu sile iili! I cumi kwene kampeni wii walenzile ukuti antu aingi yasimikilwe.

Ya kasimikila aingi yatandike ukulondesya ukuombako. Kampeni muiyele walenzile ukuti aina aku Turkey yakomeleziwe. Aingi yatandike ukwelenganya pa kutandika upainiya. Icipendo cakwe ya painiya umu Turkey cakulileko na 24 pesenti umu myezi 12 iyapisilepo pa cisila cakwe kampeni.

Ya Şirin

Ya kasimikila yonsi aaomvileko mulimo uu aafumile ku mpanga zyuze yalondolwile vino kampeni walenzile misimikilile yao iizipe nanti sile alino yaswilile kumwao. Şirin, nkazi uwafumile ku Germany, walemvile ati: “Aina itu mu Turkey yasimikilanga ningo nupya misimikilile yao yali iyangupale. Nakweti insonyi nupya cantalilanga ukusimikila ningo. Nomba kampeni wii umuiyele, miombele ya ina, alino na mapepo yano yapepanga vyalenzile mbombe ningo sana kucila vino naombanga mpiti. Nasimikilanga nu kusila antu tupepala twilandwe nu mu ncende zino ntatazile nsimikilemo! Lyene ndakai insonyi zyacepa.”

Ya Johannes

Ya Johannes aafumile uku Germany yalanzile yati: “Nasambilile ivya kuomba ningo umu mulimo. Aina aku Turkey yakalondesya ukusimikila antu aingi. Yakasimikila lyonsi lino yasyukila insita. Nanikwene avino nkulonda ince nacita ndi naswilila uku Germany. Nupya ndakai lyene nkasimikila antu aingi ukucila mpiti.”

Ya Zeynep

Ya Zeynep aafumile ku France yalanzile yati: “Kampeni wii walenzile ukuti imisimikilile yane izipe. Wangazwilizye ukuti inje umusipe nu kutaila sana Yeova.”

Ya kasimikila yatandike ukuombela pamwi. Vino aina afumile uku mpanga izipusane pusane yaombelanga pamwi alino nu kutemwana sana, calenzile ivintu vizipe. Ya Jean-David atiyalumbulwa mpiti yalanzile ukuti: “Twailolile vino aina yatusakamile ningo.” Yalanzile nu kuti: “Yatupokelile kwati sweswe ya cuza yao nupya kwati sweswe ya lupwa yao. Yatupokelile umu mang’anda yao. Namanyile ukuti twaya wa lupwa longa mu nsi yonsi, nawelenganga ilingi pali cii umu mpapulo zitu. Nomba lyene nailolile. Nacizilemo nu  kuvwa ningo sana ukuti nene Inte Yakwe Yeova, nupya nkataizya sana Yeova pi syuko lii ilisuma cuze.”

Ya Claire (aali pakasi)

Ya Claire aafumile uku France yalanzile yati: “Asi mulandu umwi wafuma uku Denmark, ku France, ku Germany, nanti ndi akaikala umu Turkey, swensi kwene twali ulupwa longa. Cali kwati Leza wasisizyepo imipaka yonsi.”

Ya Stéphanie (aali pakasi)

Ya Stéphanie afumile uku France nayo yatiile: “Kampeni walenzile ukuti tumanye ukuti icikalenga twaombela pamwi asi lulimi nanti ulutambi lumwi lelo u kutemwa Yeova.”

KWAYA IVISUMA IVINGI VYACITIKA

Ya kasimikila aingi aku mpanga zyuze yatandike ukwelenganya ukukukila uku Turkey pakuti yakatwalilile ukuombako umulimo wa kusimikila pano akulondekwa ukusimikila aingi. Aingi yakuuka nu kukuuka. Tukataizya aina yaa na ya nkazi.

Tale elenganyini pi umba umwaya ya kasimikila 25. Pa myaka iingi mwali sile eluda wenga. Elenganyini pali vino aina yaa yuvwile umu 2015 lino ya kasimikila 6 akalonda ukuya umu kusimikila ukukalondekwa ya kasimikila ingi afumile uku Germany nu ku Netherlands yaile umukuombela pamwi nayo!

VINO CALI LINO YAOMBANGA

Uzye ayile uku Turkey umu kuombako umulimo wa kusimikila pa nsita inono yalanzile vyani pali vino uwikalo wali? Nanti icakuti insita zimwi ivintu vikatala, ukuya ukukalondekwa ya kasimikila aingi kukaleta uluzango. Uvwini vino yamwi yalanzile:

Ya Federico

Ya Federico, ali ni myaka uku ma 40 aatwala, ayile uku Spain yalanzile yati: “Ukukana kwata ivintu ivingi ivya kusakamala kwaleenga ukuti inje nu untungwa, nupya nkasumba sana mano pa mulimo ucindame.” Uzye yangakomelezya yauze ukuombako umulimo uu? Yalanzile yati: “Ee ningayakomelezya sana. Ndi cakuti waya uku mpanga yuze uku kwazwa antu ukumanya Yeova, ala Yeova amakusakamalanga. Kukaya ukuyuvwa ukuti kwene akukutungilila sana ukucila na vino cali mpiti.”

Ya Rudy

Umwina Rudy uwatwala, aali ni myaka ukucila pali 50, uwafumile uku Netherlands, walanzile ati:  “Cikatuzanzya sana ukuombako umulimo uu, nu kusimikila antu aatatala yuvwapo icumi. Ukulola vino antu yakaya ni nsansa lino yapokelela icumi kukatuletela sana uluzango.”

Ya Sascha

Umwina Sascha uwatwala, aali ni myaka uku ma 40 uwafumile uku Germany, walanzile ukuti: “Lyonsi lino naya umu mulimo wa kusimikila, nkakomaana na antu aatatala yuvwapo icumi. Ukwazwa antu ya musango uwo ukumanya Yeova kukanzanzya sana.”

Ya Atsuko

Nkazi Atsuko, uwatwalwa uwa myaka ukucila panono pali 30 uwafumile ku Japan, walanzile ukuti: “Mpiti nalondesyanga ukuti Alamagedoni aize zuwa. Nomba pa cisila cakwiza uku Turkey, nkataizya sana Yeova ukuti acili wateeka umwenzo. Lino nkumanyilapo ivingi pa miombele yakwe Yeova, alino nkalondesya ukupalama kuli aliwe.”

Nkazi Alisa, aali ni myaka uku ma 30 uwafumile ku Russia, walanzile ati: “Ukuombela Yeova umu mulimo uu kwaleenga njuvwile nemwineco usuma wakwe.” (Masa. 34:8) Walanzile nu kuti: “Yeova a Tata nupya cuzane, nkamumanyilako lino ivintu ivipusane pusane vikucitika. Kwaya ivintu ivingi ivikancitikila ivikanzanzya sana nupya Yeova akampolelela!”

“LOLEKESYINI IVYALO”

Pa mulandu na kampeni umuiyele uwacitike uku Turkey, antu aingi yuvwile ilandwe lisuma. Nomba kucili icifulo icikulu sana icitali ciombelwemo uku Turkey. Aina aakaya umu kuombela ukukalondekwa ya kasimikila aingi uku Turkey, cila wanda yakakomaana na antu aatuvwapo pali Yeova. Uzye mungatemwa ukuyaombela uku cifulo ca musango uwo? Ndi cakuti mungatemwa ukucita vivyo, tukumukomelezya ukuti: “Lolekesyini ivyalo. Vizao vyativica nupya vikulolela kuzombolwa.” (Yoa. 4:35) Uzye mungaya mukazwilizyeko kuno “vizao vyativica nupya vikulolela kuzombolwa”? Ndi cakuti mungatemwa ukucita vivyo, tandikini ukuipekanya pakuti mukaombeko umulimo uwo. Icintu conga cino mungasininkizya ukuti cilamucitikila aeci: Ukuombesya umu mulimo wa kusimikila antu api landwe lisuma “kufika na kuno insi yapela” kulaleenga mupolelelwe sana!—Mili. 1:8

^ par. 2 Lolini kabuku kakuti “See the Good Land,” mafwa 32-33.