Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2016

Mwasimikila Ilandwe Lisuma Ilya Cikuuku Cakwe Leza

Mwasimikila Ilandwe Lisuma Ilya Cikuuku Cakwe Leza

“Kukosola Ilandwe Lisuma lya pamulandu wa cikuku cakwe Leza.”—MILI. 20:24.

INYIMBO: 10, 25

1, 2. Uzye mutumwa Paulo walangizye uli ukuti wataizyanga pa cikuuku cakwe Leza?

UMUTUMWA Paulo walanzile cisinka lino watile: “cikuku cakwe [Leza] citali caula milimo kunondi.” (Welengini 1 Kolinto 15:9, 10.) Paulo wamanyile ningo ningo ukuti ataalinzile nu kulangwa cikuuku cakwe Leza nanti uluse, pano wacuzyanga sana Aina Klistu.

2 Lino kwasile panono kuti afwe, Paulo walembiile Timoti wino yaombanga nawe ukuti: “Nkataizya Klistu Yesu Mwene witu, wino uwampile maka akuomba mulimo uu.” (1 Tim. 1:12-14) Wali u mulimo ci uwo? Paulo wanenyile ya eluda amu cilongano ca ku Efeso vino wali nu kuomba umulimo uwo, ati: “Ntasakamile pa umi wane, pano nkulonda sile kuti imale umulimo uno Mwene Yesu wampile ukucita, uwa kukosola ilandwe lisuma lya pamulandu wa cikuku cakwe Leza.”—Mili. 20:24.

3. U mulimo ci uiyeele uno Paulo wapeezilwe? (Lolini cikope cakutandikilako.)

 3 I “landwe lisuma” ci lino Paulo wakosoolanga ilyalangizyanga cikuuku cakwe Yeova? Wanenyile Aina Klistu aku Efeso ati: “Muvwile ukuti Leza mu cikuku cakwe wampile mulimo uu uwa kumuombela.” (Efes. 3:1, 2) Paulo wapeezilwe mulimo wa kukosoola ilandwe lisuma ku antu ataali Ayuda pakuti nayo kwene yangaya pali yaya aamilwe kuya pamwi na Klistu mu Wene wakwe Mesiya. (Welengini Efeso 3:5-8.) Vino Paulo waombesyanga mu mulimo wakwe wa kukosoola, walangilile Aina Klistu ya ndakai ukuti icikuuku cakwe Leza citaali “icaula milimo,” kuli aliwe.

UZYE ICIKUUKU CAKWE LEZA CIKALENGA MWAOMBESYA?

4, 5. U mulandu ci uno tungalandila ukuti “ilandwe lisuma lya Wene” icili cimwi ni landwe lisuma lya “cikuuku cakwe Leza”?

4 Mu nsita ii ya ku mpela, antu yakwe Yeova yapeelwa mulimo wa kukosoola “ilandwe lisuma lya Wene . . . kuya umboni ku antu amu nko zyonsi.” (Mate. 24:14) Ilandwe lino tukakosoola nupya lyaya “ilandwe lisuma ilya cikuuku cakwe Leza” pano amapaalo yonsi yano twataila ukuti tulapokelela lino Wene ulateeka yalizila kupitila mu cikuuku cakwe Yeova icikalolekela muli Klistu. (Efes. 1:3) Uzye swensi wenga na wenga tukakolanya Paulo ukulanga ukuti tukataizya pa cikuuku cakwe Yeova lino tukuombesya mu mulimo wa kusimikila?—Welengini Loma 1:14-16.

5 Mu cipande icafumileko, twasambilile visuma ivikatucitikila pa mulandu ni cikuuku cakwe Yeova mu nzila izingi nanti icakuti sweswe yakaifya. Tulinzile ukwezya na maka ukunenako antu yonsi kuti yamanye vino Yeova akatulanga ukutemwa ni visuma ivingayacitikila wenga na wenga pa mulandu ni cikuuku cii cakwe Leza. A vyani vimwi vimwi vino Leza watucitila pa mulandu ni cikuuku cakwe vino tunganenako yauze ukulataizya?

MWASIMIKILA ILANDWE LISUMA PA MPOLELWA YAKWE YESU

6, 7. Uzye tukakosoola uli pi landwe lisuma lya cikuuku cakwe Leza lino tukulondolola impolelwa yakwe Yesu ku yantu?

6 Ndakai, aingi yasiuvwa uyi ndi cakuti yayembuka, fwandi yasiuvwikisya mulandu uno antunze yalinzile ukukululwa. Pa nsita ili yonga kwene, antu aingi cuze yakalola ukuti umi wa musango uu usiyaletela insansa zya cumicumi. Antu aingi ndi cakuti yalanda na ya Nte Yakwe Yeova, alino yakamanya vino luyembu lwaya. Antu a myenzo ya cumi yakatekeziwa ndi yamanya ukuti Yeova, pa mulandu wa kutemwa alino ni cikuuku cakwe, watumile mwana wakwe pano nsi kuti aize atukulule kwi iifyo ni mfwa.— 1 Yoa. 4:9, 10.

7 Lino Paulo walandanga pa Mwana wakwe Yeova, walemviile ati: “Pano Klistu wakomilwe pakuti wazi wakwe uye impolelwa yakutulenga kuya antungwa, cii cikusenula vino ndakai maifyo itu yelelwa. Klistu wacisile cii pamulandu wakuti [Yeova] wali ni cikuuku civule kunotuli.” (Efes. 1:7) Impolelwa yakwe Yesu ali cintu cimwi cikalamba sana cino Leza walangilamo ukuti watutemwa nupya cikalangilila ucindami wa cikuuku cakwe. Ala i syuko kusambilila ukuti ndi tukutaila mu wazi wakwe Yesu, amaifyo itu yalelelwa na ya kampingu itu nayo yalaya asanguluke! (Ayeb. 9:14) I lyasi lisuma sana ilyakunenako na antu yauze.

 MWAAZWA ANTU KULUNDULULA UCUZA WAO NA LEZA

8. U mulandu ci uno antunze yalinzile kuyela ya cuza yakwe Leza nanti cakuti yakaifya?

8 Twakwata umulimo wa kulenga antu yanji yamanye ukuti nayo kwene yangaya ya cuza apalamisye na Kaumba wao. Ngi ca kuti antunze yatatala yakwata utailo mu mpolelwa yakwe Yesu, Leza akayalola ukuti anisi yakwe. Mutumwa Yoane walemviile ukuti: “Wino wensi akataila Mwana wene ali nu umi wape. Lelo wino wensi asyayela Mwana wene atalaya nu umi. Ukali wakwe Leza ulaya panoli.” (Yoa. 3:36) Icazipa icakuti, impolelwa yakwe Klistu yalenga kuti cangupale kuya pa mutende na Leza. Paulo watile: “Pa nsita imwi mwemo mwali kutali cuze kufuma kuli Leza nupya mwali anisi yakwe pamulandu wa vintu viipe vino mwacitanga na vino mwelenganyanga, lelo ndakai kupitila mu mfwa ya Mwana wakwe yaku mwili, mwemo Leza wamucita kuya yacuza yakwe.”—Kolo. 1:21, 22.

9, 10. (a) U mulimo ci uno Klistu wapeezile aina yakwe apakwe? (b) Uzye “amfwele nazyuze” yakaazwa uli aina yao apakwe?

9 Klistu wapeela aina yakwe apakwe acili pano nsi cino Paulo wamanga ukuti “mulimo uwa kupanga mutende pakasi kakwe umwisikulu na antu.” Pa kulondolola vii, Paulo walembiile Aina Klistu apakwe akutandikilapo ati: “Leza aliwe uwacita vii vyonsi. Wene watumile Klistu kupanga mutende pakasi kakwe Leza naswe, nupya watupela mulimo uwa kupanga mutende pakasi kakwe umwisikulu na antu. Cino tukusenula i cakuti Leza akupanga mutende pakasi kakwe na antu muli Klistu. Nupya wene watupeela mulimo uwa kusalanganya ilandwe ilya kupanga mutende. Twatumilwe kuya nkombe zyakwe Klistu, Leza umwisikulu akumupapata kuti mupange mutende pakasi kinu na aliwe.”—2 Kol. 5:18-20.

10 “Amfwele nazyuze” yakalola ukuti isyuko sana ukuombela pamwi na ina yao apakwe umu mulimo wa kusimikila. (Yoa. 10:16) Yakaomba wa ntumi zyakwe Klistu, nupya yakaombesya umu mulimo wa kusambilizya antu icumi nu kuyazwa ukuya ya cuza yakwe Yeova. Ukusambilizya ali kuno kwacindama sana umu mulimo wa kusimikila ilandwe lisuma ilya cikuuku cakwe Leza.

MWASIMIKILAKO ANTU ILANDWE LISUMA LYA KUTI LEZA AKAUVWA MAPEPO

11, 12. U mulandu ci uno cazipila kusambilizya antu ukuti yangapepa kuli Yeova?

11 Antu aingi yakapepa pano ipepo likalenga yuvweko ningo, lelo yatazumila ukuti Leza akauvwa amapepo yao. Yalinzile ukumanya ukuti Yeova ‘akauvwa mapepo.’ Kalemba wa masamu Davidi walemvile ati: “Pano wemo ukauvwa amapepo, antu yonsi yamaizanga kuli wewe. Apa mulandu wa kwifya kwitu nanti tungifya uli, wemo ukatwelela apa kuluvyanya kwitu.”—Masa. 65:2, 3.

12 Yesu wanenyile asambi yakwe ati: “Ndi mwandenga cimwi mwi zina lyane, ndacita.” (Yoa. 14:14) Ukwaula nu kutwisika, “cimwi” cikapiliula ciliconsi cino tungalenga ukulingana nu kulonda kwakwe Yeova. Yoane walanzile ati: “Swemo tukaposya pa manso yakwe Leza, pano twasininkizya ukuti ndi twamulenga wene akatuvwa nu kutwasuka pali consi cino twalenga ukulingana nu kulonda kwakwe.” (1 Yoa. 5:14) Fwandi ukusambilizya antu ukuti ipepo likalenga tupalame sana uku “cilimba ca wene cakwe Leza, kuno kuli cikuuku” i cintu icisuma sana. (Ayeb.  4:16) Ndi tukusambilizya antu ukuti yapepa umu nzila isuma, kuli wino yalinzile ukupepako, nu kulumbula ivintu ivicindame umu mapepo yao, tungayazwa ukuti yapalame sana kuli Yeova nupya yangaateekeziwa lino yaaya ni ntazi.—Masa. 4:1; 145:18.

LEZA ALATWALILILA UKULANGA ICIKUUKU NU MU NSI IPYA KWENE

13, 14. (a) I vintu ci ivisuma ivilacitikila apakwe uku nkoleelo? (b) U mulimo ci usuma cuze uno apakwe yalacitila antunze?

13 Icikuuku cakwe Yeova cilatwalilila na lino antu aipe amu nsi ii yalononwa. Ukulozya ukwisyuko lino Leza wapeela aaya umwi umba lyakwe ya 144,000, aasoololwa ukuti yakateeke na Klistu ukwi yulu, Paulo walemvile ati: “Luse lwakwe Leza lwavulisya cuze, nga nu kutemwa kuno watutemwa nako u kukulu cuze, cakuti lino twali afwe ku mupasi pa kuntayela wene watulenzile kuya aumi muli Klistu. Mwatuuzilwe ni cikuku cakwe Leza. Muli Klistu Yesu, Leza uwatukatwisye nga atupeela cifulo mwi yulu pamwi na Klistu. Wene wacisile cii kuti mu myaka ikwiza alange ukama wa cikuku cakwe uiyele uno waya mu kutemwa kuno watulanga muli Klistu Yesu.”—Efes. 2:4-7.

14 Tutanga tumanye ivintu vyonsi visuma vino Yeova alacitila Aina Klistu apakwe lino yalikala pa vilimba nu kulateeka pamwi na Klistu ukwi yulu. (Luka 22:28-30; Filip. 3:20, 21; 1 Yoa. 3:2) Yeova alayalanga “ukama wa cikuku cakwe uiyele.” Yalaya umwi umba lyakwe yaayo alaya muli “Yelusalemu Mupya,” nawinga wakwe Klistu. (Umbw. 3:12; 17:14; 21:2, 9, 10) Yalaombela pamwi na Yesu ‘kupozya antu amu nko zyonsi,’ pakuti yaye antungwa uku luyembu ni mfwa nu kuyalenga ukuya amalilike.—Welengini Umbwilo 22:1, 2, 17.

15, 16. Uzye Yeova alalaanga uli icikuuku cakwe uku yantu “amfwele nazyuze” uku nkoleelo?

15 Pali Efeso 2:7, tukawelenga ukuti Leza alalaanga icikuuku “mu myaka ikwiza.” Ukwaula nu kutwisika, insi ipya yakwe Yeova ilalanga “ukama wa cikuku cakwe uiyele.” (Luka 18:29, 30) Icintu conga cino Yeova alalangilamo icikuuku cakwe u kutuutulula antu ukufuma “ukwaya afwe.” (Yobo 14:13-15; Yoa. 5:28, 29) Antu ya utailo aonsi na anaci aafwile mpiti ala Yesu atatala wapeela umi wakwe, alino na yonsi aaya umwi umba lya “mfwele nazyuze” aakafwa nu utailo umu manda yaa akusyalikizya, yalaya nu umi nu kutwalilila ukuombela Yeova.

16 Antunze aingi cuze, aafwile ukwaula ukumanya Leza, nayo kwene yalatuutuluka. Yalapeelwa isyuko lya kutandika ukutontela ukateeka wakwe Yeova uwa papelapela. Yoane walemvile ati: “Nga ndola afwe akulu na anono kwene, ala yaimi pa nkoleelo ya cilimba ca wene. Alino mpapulo zikupukulwa, nga lyene lupapulo na luze lukupukulwa. Luu luli lupapulo lwa antu aumi. Afwe yapingulwa ukulingana ni vintu vino yacisile kulingana ndi vino vyalembwa umu mpapulo. Lyene yemba afumya afwe ali mwenemo. Imfwa ni cifulo ca antu afwe navyo kwene vifumya antu aali mwenemo. Na onsi yapingwilwe kulingana ni vintu vino yacisile.” (Umbw. 20:12, 13) Kuya kwene, yaayo alatuutuluka yalalondekwa ukusambilila vino yangaomvya ivisinte ivya muli Baibo. Nupya, yalaalondekwa ukulondela ivyeo ivilasokololwa umu “mpapulo” izilalondolola vino yaayo alikala umu nsi ipya yalaalondela. Ukusokolola ivilaya  umu mapapulo zizyo nako kulaya u kulanga icikuuku cakwe Yeova.

TWALILILINI UKUKOSOOLA ILANDWE LISUMA

17. I cani cino tulinzile ukwelenganyapo sana lino tuli umu mulimo wa kusimikila?

17 Ikwene ali nsita ino tulinzile ukuombesya umu mulimo wa kukosoola ilandwe lisuma ilya wene lino impelelekezyo ikupalama! (Mako 13:10) I cumicumi ilandwe lisuma likalanga icikuuku cakwe Yeova. Tulinzile ukwiusya vii lino tuli umu mulimo wa kusimikila. Cino tukalondesya ukucita lino tukusimikila, u kucindika Yeova. Swensi kwene tungaacita vii ndi tukulanga antu ukuti amalayo ya vintu ivilacitika umu nsi ipya yakalanga icikuuku cakwe Leza.

Mwaya acincile ‘wa angalizi asuma yano Leza walaanga icikuuku.’—1 Pet. 4:10 (Lolini mapalagalafu 17-19)

18, 19. Uzye tukapeela uli ululumbi kuli Yeova pa mulandu wa cikuuku cakwe?

18 Lino tukukosoola ilandwe uku yantu, tungayalondolwela ukuti lino Yesu alaateeka insi, alacitila antunze ivintu ivisuma sana pa mulandu wa mpolelwa nupya alalenga antu ukuya amalilike. Baibo ikati: “uumbo ulakululwa ku uzya wa kuola, kuti ukakume ku untungwa wa lulumbi lwa ana yakwe Leza.” (Loma 8:21) Cii cilacitika sile pa mulandu ni cikuuku cakwe Yeova.

19 Twakwata isyuko lya kunenako antu angatemwa ukuvwa pa ulayo usuma sana uwaya pa Umbwilo 21:4, 5 uukati: “[Leza] alayakumbula minsozi yonsi. Kutalaya imfwa nupya. Kutalaya kulosya nanti kulila, nanti ukuvwa kuwaika. Vintu vyampiti vyati vipita.” Nupya Yeova, wino atenzi pa cilimba ca wene avwanga ati: “Ndakai vintu vyonsi nkuvicita vipya!” Alanda nu kuti: “Lemba vii, pano mazwi yaa acumi nupya yalinzile kutailwa.” Lyonsi lino tukuombesya ukusimikila antu ilandwe kwene lii ilisuma, tukapeela ululumbi kuli Yeova pa mulandu wa cikuuku cakwe!