Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Julai 2016

Mauzyo Yano Aakawelenga Yakauzya

Mauzyo Yano Aakawelenga Yakauzya

Uzye ukukambatanya kwa ntuwa ziili ukwalondololwa muli Ezekelo cipandwa 37 kukapiliula cani?

Yeova wanenyile Ezekelo pa ulayo wakuti luko lwa Ina Islaeli lwali nu kulemana ndi yaswilila uku Mpanga Iyalavilwe. Ilandwe lilyo lyalanzile na pali vino antu yakwe Leza yali nu kutandika ukuombela pamwi umu manda akusyalikizya.

Yeova wanenyile Kasema Ezekelo ukulemba pa ntuwa ziili. Wali nu kulemba pa ntuwa yonga ukuti: “Kuli Yuda nu ku Ina Islaeli yauze,” alino pa ntuwa yakwe ciili ati: “Kuli Yosefe, ni intuwa yakwe Efulemu na mu ng’anda yakwe Izlaeli yauze.” Intuwa zii zyoili zyali nu kuya “intuwa yonga sile” mu minwe yakwe Ezekelo.—Ezek. 37:15-17, NWT.

Uzye izwi lya kuti “Efulemu” lyapiliulanga cani? Umwene wakutandikilapo wa wene wa ku kayeya wa mitundu 10,  Yeloboamu, wafumile mu mutundu wakwe Efulemu, uwizile iuya ali mutundu ukalamba. (Malan. 33:13, 17; 1 Yamw. 11:26) Mutundu uu wafumile muli mwana Yosefu, Efulemu. (Mpe. 1:32, 33) Yosefu wapokelile ipaalo iliiyele sana kufuma kuli isi, Yakobo. Fwandi cali sile ningo ukuti intuwa iimililangako wene wa mitundu 10 yaamwa ukuti “intuwa yakwe Efulemu.” Pa nsita ino Ezekelo walembanga usesemo uu wa pa ntuwa ziili, uwene wa Ina Izlaeli ala wapasangana mpiti yayasenda nu mu uzya ku Ina Asilya mu 740 B.C.E. (2 Yamw. 17:6) Nupya, ala aina Izlaeli yasalanganila mu mpanga zya mu Babiloni, izyali impanga zya ina Asilya.

Mu 607 B.C.E., uwene wa mitundu iili uwayelile ku katutu alino na yonsi asileko muli yaya amu wene wa kukayeya yasenzilwe mu uzya ku Babiloni. Aene amu mutundu wakwe Yuda ateekanga mitundu ii yoili, na yasimapepo yaali nu kulafuma mu mutundu wakwe Yuda, pano yaombelanga pa ng’anda yakupepelamo iya mu Yelusalemu. (2 Mila. 11:13, 14; 34:30) Fwandi caali sile ningo ukuti Wene wa mitundu iili waimililwa ni ntuwa “yakwe Yuda.”

A lilaci lino izile yakambantanya intuwa ziizi ziili izya unkolanya? Alili lino Aina Izlaeli yaswilile ku Yelusalemu ku kukuula ing’anda yakupepelamo mu 537 B.C.E. Yonsi aali mu Wene wa mitundu 10 na yayo aali mu Wene wa mitundu iili yawelile pamwi kufuma mu uzya. Asi mulandu nu kuti pali kupatukana pa yana yakwe Izlaeli. (Ezek. 37:21, 22) Nupya kwene, Aina Izlaeli yatandike kupepela Yeova capamwi. Kulemana kuu kwasowilwe na kuli ya kasesema yaa yaili Ezaya na Yelemiya.—Eza. 11:12, 13; Yele. 31:1, 6, 31.

I cisinka ci icicindame sana icikalanda pa upefi wa cumi icalandwapo sana mu uusowelo uu? Icisinka aeci: Yeova alalenga ya kapepa yakwe ukuya alemenkane. (Ezek. 37:18, 19) Uzye usowelo uu wafikiliziwa umu manda itu? Ee. Umuku wa kutandikilako lino wafikiliziwe u mu 1919, lino antu yakwe Leza yatandike ukuombela pamwi nupya kwene. Nanti cakuti Satana walondanga ukuyapaalukanya, amapange yakwe yataomvile.

Pa nsita iya, aingi alemine yakweti upaalilo wakwizaya aene nupya ya simapepo na Yesu mwi yulu. (Umbw. 20:6) Mu unkolanya tungati yali kwati intuwa yakwe Yuda. Nanti ciye vivyo, lino insita yayanga ikupita, antu aingi cuze akwata upaalo wa kwikala pano nsi yailunda kuli yaa Ayuda ya unkolanya. (Zaka. 8:23) Yaya kwati intuwa yakwe Yosefu, nupya yatakwata upaalilo wa kuyateeka na Klistu.

Vino yalemana, maumba yonsi yoili yakaombela pamwi ndakai wa yantu yakwe Yeova akwata kateeka wenga, Yesu Klistu, wino usoweelo walanzile ukuti “umuomvi wane Davidi.” (Ezek. 37:24, 25) Yesu wapefile ukuti alondezi yakwe ‘yaye wenga, ndi vino Isi na aliwe yaya wenga.’ * (Yoa. 17:20, 21) Yesu napya wasoowile nu kuti ufyo unono wa yalondezi yakwe wizile iuya “ufyo onga” na a “mfwele nazyuze.” Yonsi yakwata “mucemi wenga” sile. (Yoa. 10:16) Vino amazwi yakwe Yesu yalondolwile kulemana kwa yantu yakwe Yeova ndakai vyaya ningo sana asi mulandu nu paalilo uno yakwata uwa kunkolelo.

^ par. 6 Yesu walondolwile ningo sana ivilangililo ivizile iviya umu cilangililo cakulanga ukwiza kwakwe. Icankolelo walanzile pa “muomvi mutailwe nu wamano” iumba linono lya ina apakwe akatungulula. (Mate. 24:45-47) Lyene wapeezile ni vilangililo ivyalozyanga kuli yayo yonsi akwata upaalilo wa kuya kwi yulu. (Mate. 25:1-30) Mukulekelezya walanzile na pali yayo akwata upaalilo wa kwikala pano nsi akaazwilizyako aina yakwe Klistu. (Mate. 25:31-46) Ukupalana na vii vino walanzile, ukufikiliziwa kwa ndakai kwa usesemo wakwe Ezekelo inkolelo kukalozya kuli vino vilacitika kuli yayo akwata upaalilo wa kuya kwi yulu. Nanti icakuti Uwene wa mitundu 10 utalozyanga sana kuli yayo alikala pano nsi, ukuombela pamwi ukwalondololwa mu usesemo uu kukatwiusyako ukuombela pamwi ukwaya pali yayo akwata upaalilo wa kwikala pano nsi alino na akwata upaalilo wa kuya kwi yulu.