Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Januwale 2017

Yaipeelisye Aineco

Yaipeelisye Aineco

APA antu aingi aakaya umukuombela uku mpanga zyuze ukukalondekwa ya kasimikila ya Wene, paya na ya nkazi aingi aipeelesye. Aingi pali yaa yaomba apa myaka iingi uku mpanga zyuze. I cani icayavwile pakuti yakuukile uku mpanga yuze? I vyani vino yaasambilila lino yakuombela uku mpanga yuze? Uzye umi wao wasenuka uli? Tuuzizyeko ya nkazi yamwi aomba sana umulimo uu. Ndi cakuti mwemwe ya nkazi aakalondesya ukuombesya umu mulimo uu, mumaipakizya ukuvwa uku malyasi asuma cuze yano yasimike. Nomba swensi kwene swe ya kapepa, tungasambililako kuli ya nkazi yaa.

YATAATWISIKANGA

Ya Anita

Uzye mukasakamala ukuti mutanga mukwanisye ukuomba ningo upainiya uku mpanga yuze lino mucili asimbe? Ya Anita aali ni myaka ukucila pali 70 yatwisikanga sana ngi cakuti yangakwanisya ukuomba. Yakuliile uku England, kuno yatandike upainiya ala yali ni myaka 18. Yalanzile ukuti “Natemilwe ukusambilizya sana antu pali Yeova nomba ntelenganyanga ukuti ningakukila uku mpanga yuze. Ntatazile insambilila ululimi ululi lonsi ulwa ku mpanga yuze, nupya ntelenganyanga napo pa kusambilila ululimi lwa ku mpanga yuze. Lyene lino yangamile ukuya ku sukulu lya Gilyadi campezizye mano. Ntelenginyepo ukuti ningapokelela ulwamo luu. Nomba nelenginye ukuti, ‘nga Yeova watalola ukuti ningaomba, ndezya.’ Lyene ipapita imyaka 50. Kufuma lili kwene nkaomba umisyonali uku Japan.” Ya Anita yalanzile nu kuti: “Lyonsi nkaya sana ni nsansa, lino nkukomelezya ya nkazi acance ukuti yaombako umulimo uno nkaomba! Nkatemwa ukulola ukuti aingi yakuombako umulimo uu.”

YAALI AASIPE

Ya nkazi aingi aaya umu kuombela uku mpanga yuze, pakutandika cayataliile pakuti yayeko. Nomba icani icayazwile ukuya asipe?

Ya Maureen

Ya Maureen, aali ni myaka kucila pali 60 ndakai, yalanzile yati: “Nalondesyanga ukuomba umulimo wa kwazwa yauze.” Lino yafisizye imyaka 20 yaile uku musumba wa Quebec ku Canada ukwalondekwanga sana ya painiya. Nupya yalanzile yati: “Yangamile ukuti nkazanwe ukwi Sukulu Lya Gilyadi nomba natiinanga ukuya uku mpanga ino ntamanyile, ukutaali anji. Nupya nasakamile sana pali vino yamayo yali nu kusyala yakusakamala ya tata aalwalililanga. Fwandi ndi caya usiku nalilanga nu kupepa  kuli Yeova. Lyene lino nanenyile avyazi pali vino vyancuzyanga, yankomelizye ukuya uku Sukulu Lya Gilyadi. Amu cilongano yaombesyanga sana ukusakamala avyazi yane. Ukulola vino Yeova wangavwile, kwalenzile ntaile ukuti alatwalilila ukungazwa. Napingwilepo ukupita!” Ukufuma umu 1979 ya Maureen yaomba umisyonali apa myaka ukucila pali 30 uku West Africa. Nanti icakuti yakasakamala ya nyina akote, ya Maureen yacili yakaomba upainiya uiyele. Nga iusya imyaka ino yaombela uku mpanga yuze yakati: “Yeova akampeela vyonsi vino nkalonda nupya apa nsita ino nkuvilonda.”

Ya Wendy

Ya Wendy, aali ni myaka kucila pali 60 ndakai, yatandike upainiya uku Australia ala yacili ance. Yalanzile ukuti: “Nuvwanga sana insonyi ukulanda na antu yano ntamanyile. Nomba upainiya wangazwa sana ukumanya ivya kulanzyanya na antu apusane pusane, lyene ndakai nasipa. Upainiya wangazwa ukutaila sana Yeova icakuti lyene nkauvwa ningo sana ukuombela uku mpanga yuze. Nkazi umwi umusimbe uwaomba sana umisyonali pa myaka ukucila pali 30, wangamile ukuti tukaombele pamwi nawe apa myezi itatu. Kuombela pamwi nawe kwankomelizye sana ukuya ombela uku mpanga yuze.” Apa cisila cakwe 1980, ya Wendy yakuukiile uku cilila ca Vanuatu uku mpanga yuze ukwakupita ma kilomita 1,770 uku ufumo ndaka wa Australia.

Ya Wendy yacili uku Vanuatu, kuno lyene yakaombela api ofesi lya mulimo wa kusenula. Yalanzile yati: “Ukulola vino ivilongano vikupangwa umu ncende zya mu mizi kukandetela sana uluzango, ukuombela Yeova umu mulimo uu isyuko ilikulu cuze lino ntanga ndondolole.”

Ya Kumiko (aali pakasi)

Ya Kumiko aali ni myaka kucila pali 60, yaombelanga upainiya uku Japan lyene painiya muze wayanenyile ukuti yakukile uku Nepal. Ya kumiko yasimike ukuti: “Umunji wi wanenanga lyonsi ukuti tukakuuke nomba nemo nakananga. Nasakamile sana ngi cakuti nali nu kuya elezya uwikazi wa kuuku alino nu lulimi. Nupya nasakamile pano ntamanyile kuno nali nu kufumya impiya zya kuya umu kuomvya uku mpanga yuze. Lino ncili nkucula na melenganyo yaa, naponyile na onda icakuti naizanyile uku cipatala. Natandike ukwelenganya ukuti aweni amanyile icingancitikila nupya? Limwi ningalwala icakuti imfilwe nu kuya omba upainiya uku mpanga yuze, uzye ntanga mbombeko nanti sile apa mwaka onga? Napefile kuli Yeova ukuti angazwe.” Lyene lino ya Kumiko yafumile umu cipatala, yaile iyatandala uku Nepal, lyene avino yapingwile ukukukila kuuko na painiya muze.

 Ya Kumiko yalanzile pali vino yaomba upainiya uku Nepal apiipi ni myaka 10 ukuti: “Amavya yonsi yano nakweti yasizile wakwe vino amanzi yakamile pali yemba muyenzu. Nkauvwa ningo sana ukuombela kuno ya kasimikila yacepa. Ilingi nga nkusimikila apa Ng’anda imwi, aina mupalamano aali 5 nanti 6 yakaiza umu kuvwa. Nanti sile ance yakauvwa ningo sana icakuti yakalengako ni mpapulo. Nkauvwa ningo sana ukuombela uku ncende ii.”

VINO MUNGACIMVYA INTAZI

Ya nkazi asimbe yano tuuzizye, yapita sana umu ntazi. Uzye yacisile uli pa kucimvya intazi zizyo?

Ya Diane

Ya Diane aku Canada yalanzile iyati: “Pakutandika cantalile sana ukuya ukutali nu kusya ulupwa. Nomba lino yali ni myaka uku ma 60 yaomvile umisyonali uku Ivory Coast (kuno ndakai yakaama ukuti Côte d’Ivoire) pa myaka 20. Yalanzile iyati: “Napepanga kuli Yeova ukuti aangazwa ukuya nu kutemwa uku antu yano nkuomba nayo. Umwina umwi uwatusambilizyanga ukwi sukulu lya Gilyadi, watunenyile ukuti pa kutandika limwi tungasakamala, ukuvwa uyi apa mulimo uno tukuomba sana sana ngi cakuti tukuulizya vimwi. Lyene umwina watile: ‘Mutaika sile mano pa vintu vino mukuulizya. Mwasumba mano ku antu. Mwaika mano kuli vino antu yakauvwa ndi mwayasimikila.’ Vikwene ali vino nacisile nupya napolelelwa wakwe cimwi! Lino nkusimikila ilandwe lya Wene, nkalola vino antu yakauvwa ningo!” Uzye icani icazwa ya Diane ukuya umu kuombela uku mpanga yuze? Yalanzile ukuti: “Nkaya sana na ucuza kuli yano nkasambilizya Baibo nupya nkauvwa ningo ukulola vino yakulunduluka nu kuya aomvi yakwe Yeova. Nkalola ukuti kukwene kuno nkaombela ali ku mwitu. Nazana ya mayo na yatata, ya kalume yane na ya kaci yane wakwe vino Yesu walavile.”—Mako 10:29, 30.

Ya Anne, aali ni myaka kucila pali 40, yaombiile uku Asia kuno yalesya umulimo witu. Yalanzile yati: “Imyaka iingi ino naombela uku mpanga zyuze zipusane pusane, nikazile na ya nkazi apusane pusane aakweti inkulilo ni miyele ipusane na ino naya nayo. Insita zimwi ivya musango uu ivyalenganga nu kupusana. Ndi vya musango uu vyacitika nezyanga sana na maka ukulanzyanya na yano nikalanga nayo pakuti imanye ningo intambi zyao. Nupya naombesyanga pakuti naya sana nu kutemwa alino nu kumanya ningo antu. Nkauvwa ningo ukulola vino ukuombesya kuu kwaleta ivintu visuma nu kungavwa ukuya cuza musuma lino nkuomba umulimo.”

Ya Ute

 Umu 1993, ya Ute, aali ni myaka 50 akaikala uku Germany,yayatumile ukuya omba umisyonali uku Madagascar. Yalanzile iyati: “Pa kutandika, nacuzile sana pakuti nsambilile ululimi, ukuelezya incende nu kuelezya malwale ali wakwe malaria alino na vintu vyuze ivili wa tuzizi. Nomba antu yangazwanga. Ya nkazi aku ncende iyo, ana, alino na yano nasambilizyanga yangavwile ukusambilila ululimi. Misyonali munji nawe wangavwanga ndi nalwala. Nomba uwangazwanga sana a Yeova. Lyonsi napepanga kuli aliwe ukumulondolwela intazi zino nakwatanga. Lyene nalolenga apa manda aingi, insita zimwi apa myezi iingi pakuti Yeova aasuke ipepo lyane. Yeova wangazwanga muli vyonsi.” Ya Ute yaombela uku Madagascar apa myaka 23.

YAKAAPOLELELWA SANA

Wakwe vino caya na kuli yauze aakaombela kuno yakasimikila yacepa, ya nkazi asimbe aakaombela uku mpanga zyuze yakaalanda ukuti ukuombela uku mpanga yuze kukalenga uumi wao ukuzipilako. Uzye amapaalo ci yano yakwata?

Ya Heidi

Ya Heidi, aali ni myaka uku ma 70 aku Germany, yaomba umisyonali uku Ivory Coast (kuno ndakai yakaama ukuti Côte d’Ivoire) ukufuma umu 1968. Yasimike ukuti: “Uluzango luno naya nalo u kulola vino ana atemwa Leza ‘yakuyela icumi.’ Yamwi yano nasambizyanga Baibo ndakai lyene aa eluda nupya yamwi aa painiya. Aingi yakangama ukuti mayo nanti mama. Eluda umwi wene pali yaa na mamakwe alino na ana, yakandola sile wa lupwa. Fwandi ningati Yeova wampeela umwana, manguvyala alino na izikulu yatatu.”—3 Yoa. 4.

ya Karen (Aali pakasi)

Ya Karen aali ni myaka uku ma 70 aaku Canada, aaombela umisyonali uku West Africa apa myaka 20 yalanzile yati: “Mulimo wa umisyonali wansambilizya ukuya umuipeelesye, ukuya nu kutemwa, alino nu kuteekela. Nupya ukuombela pamwi na ina amu mpanga izipusane pusane kwangazwa sana. Nasambilila inzila izingi izya kuombelamo ivintu. Nupya nkayuvwa ningo ukukwata ivyuza umu nsi yonsi! Nanti icakuti umulimo uno twapelwa wasila, u cuza wene usyasila.”

Ya Margaret, aali ni myaka kucila pali 70 yakaomba umisyonali uku Laos. Yasimike ukuti: “Ukuombela uku mpanga yuze kwalenga ukuti indole vino Leza wakolonganya antu amitundu yonsi nu kuyaleta umwi uvi lyakwe. Ukulola vii kwalenga utailo wane ukukomelako. Calenga ntaile ukuti Yeova akutungulula iuvi lyakwe nu kuti ukulonda kwakwe kwasya kucitike.”

Ala mwandini ya nkazi asimbe akaombela uku mpanga zyuze yakalanga ukuipeelesya kuno naswe tungakolanya. Fwandi tulinzile ukutaizya ya nkazi ya musango uu. (Yakapi. 11:40) Ni cacindamisya icakuti, ya kaomba yakuya yakuvulilako sile. (Masa. 68:11) Uzye mungaiteululako pakuti mukolanye ya nkazi acincile aatiyalumbulwa umu cipande cii? Ndi mwacita vivyo, ukwaula nu kutwisika “Mulayuvwila mweisikulu mwenga usuma wakwe Yeova vino waya!”—Masa. 34:8.