Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Lupungu Lwa Mulinzi (Lwa Kusambililamo)  |  Januwale 2017

Ukuicefya Kwacindama na Ndakai Kwene

Ukuicefya Kwacindama na Ndakai Kwene

“Apali ukuicefya pene pakafuma amano.”—MAPI. 11:2.

INYIMBO: 38, 11

1, 2. U mulandu ci uno Leza wizile akaanila umuntu uwali umuicefye apa nsita imwi? (Lolini cikope cakutandikilako.)

UMWENE SAULO uwaliko umu Izlaeli, watandike ukuteeka ala akuloleka ukuti waicefya nupya antu yamucindikanga sana. (1 Sam. 9:1, 2, 21; 10:20-24) Nomba lino papisile sile insita inono ukufuma pano wayelile umwene, watandike ukucita ivintu ivyalanganga ukuti wali ni cilumba. Lino kasema Samueli wacezilwe ukufika uku Giligali apa nsita ino yuvwanyile, Saulo wafizilwe ukuti atwalilile ukuloleela. Aina Filisti yaipekanyanga ukutandika ulwi, nupya aina Izlaeli yatandike ukupuuka Saulo. Limwi Saulo welenginye ati, ‘Mfwile ukucita vimwi zuwazuwa.’ Fwandi wapeezile impolelwa kuli Leza, nomba ataakweti insambu zya kucita vivyo. Yeova ataatemilwe.—1 Sam. 13:5-9.

2 Lino Samueli wafisile uku Giligali, wakalipiile Saulo. Nomba Saulo ataapokeelile ukwazwa, watandike ukuizifilizya, atandika ukupeela yauze imilandu nu kulanda ukuti vino wacisile vitaifile sana. (1 Sam. 13:10-14) Vikwene avino Saulo watandike  ukuituntumba icalenzile ukuti Yeova ate ukumutemwa nu kwiza mufumya pa wene. (1 Sam. 15:22, 23) Nanti icakuti Saulo watandike ningo, ivintu vizile ivimwipila sana.—1 Sam. 31:1-6.

3. (a) I vyani vino antu aingi yakaelenganya pa kuicefya? (b) A mauzyo ci aalinzile ukwasukwa?

3 Ndakai antu yakacimvyanya sana umu nsi, yamwi yakaelenganya ukuti yalinzile ukupusanako na yauze pakuti yaye acindame sana. Ukucita vii kungalenga ukuti yate ukuicefya. Umonsi umwi uwaombanga umulimo wa kupanga amafilimu uwizile atandika ukuya umu vikanza vya miteekele, pa nsita imwi walanzile ati: “Izwi lya kuti ukuicefya lisiomba kuli nene. Nkutaila ukuti litalatala liombepo.” Nomba, u mulandu ci uno ukuicefya kwacindamila? Uzye ukuicefya kwalola mwi, nupya i cani cino kusisenula? Nupya tungatwalilila uli ukuya aicefye asi mulandu ni ntazi nanti ukutunkwa ukukafuma uku yantu yauze? Umu cipande cii, tumaasuka ivyuzyo viili ivya kutandikilako. Icuzyo cakwe citatu cilaasukwa umu cipande icilondeliilepo.

U MULANDU CI UNO UKUICEFYA KWACINDAMILA?

4. Uzye mungalondolola uli umuntu uwaya ni cilumba?

4 Baibo ikalanga upusano uwaya pa kuicefya ni cilumba. (Welengini Mapinda 11:2.) Davidi wene wapefile kuli Yeova ukuti amucingilile “uku cilumba.” (Masa. 19:13) Uzye umuntu uwaya ni “cilumba” akacita uli ivintu? Umuntu uwaya ni cilumba akacita ivintu vino atakweti insambu zya kucita ukwaula ukuteekela. Pa mulandu nu luyembu luno twapyana, swensi kwene insita zimwi tukakwata icilumba lino tukucita vimwi. Nomba wakwe vino Umwene Saulo wacisile, ndi cakuti tukulonda ukuti twaloleka ukuti twacindama ukuluta yauze, tungailetelela nupya Leza angata ukututemwa. Pa Masamu 119:21 pakalanda pali Yeova ukuti: “Ukakalipila avilumba.” U mulandu ci uno akacitila vivyo?

5. U mulandu ci uno ukuya ni cilumba kwaipila sana?

5 Icilumba caipa sana ukuluta ukuluvyanya pa mulandu wa kukanamanya vimwi. Icakutandikilako icakuti, ndi tuli ni cilumba tukafilwa ukucindika Yeova kateeka witu uwa papela pela. Cakwe ciili, ndi tukucita ivintu vino tutaapeelwa insambu zya kucita, cingalenga ukuti tutauvwana na yauze. (Mapi. 13:10) Nupya cakwe citatu icakuti, ndi camanyikwa ukuti twacisile vimwi pa mulandu ci cilumba, tungazewana nanti cingatuletela insonyi. (Luka 14:8, 9) Ukuya ni cilumba kusilenga ukuti ivintu vizipile umwi. Wakwe vino Amalembelo yakalanda, ukuicefya ali cintu cino cazipa sana.

I VYANI IVYAYA UMU KUICEFYA?

6, 7. Uzye ukuicefya kukapiliula cani?

6 Muli Baibo, ukuicefya kukapiliula ukukanaya ni cilumba nanti ukukana ituumika. (Filipi 2:3) Umuntu uwaicefya, akamanya apapezile amaka yakwe, nupya akazumila ndi waluvyanya. Akazumila ndi yauze yakumupanda amano nu kuomvya ivyeo ivipya vino wasambilila. Umuntu uwaicefya akazanzya Yeova.

7 Muli Baibo, ukuicefya kukalozya na kuli vino umuntu akailola nu kumanya ukuti kwaya ivintu vino atanga akwanisye ukucita. Umu lulimi luno Baibo yatandikilepo ukulembwa, icikaalandwapo sana apizwi lii u kumanya vino yauze yakauvwa pali vino tukacita.

8. I vyani vimwi ivingatwazwa ukumanya ukuti twatitutandika ukuya ni cilumba umu myelenganyizizye nu mu micitile itu iya vintu?

8 A lilaci lino tungatandika ukulanga ukuti imyelenganyizye itu na vino tukucita vikulanga ukuti tuli ni cilumba? Elenganyini pali vimwi vimwi ivingalenga tumanye ukuti tuli ni cilumba. Limwi tungatandika ukuilola kwati twacindama sana nanti ukulola kwati umulimo uno twapeelwa u wacindamisya. (Loma 12:16) Limwi tungaacita vimwi ivingalenga antu yasumba sana mano kuli sweswe. (1 Tim. 2:9, 10) Nanti limwi  tungaalonda ukuti yauze yaazumila vyonsi vino twayanena pa mulandu ni cifulo cino twapeelwa, pa mulandu wakuti tukauvwana nayo, nanti sile pa mulandu ni myelenganyizye itu. (1 Kol. 4:6) Ilingi ndi tukucita ivya musango uu, tusimanya nu kuti itutandika ukuya ni cilumba.

9. I vyani ivyaleenga kuti yamwi yaye ni cilumba? Landini pali umwi uwalembwa muli Baibo.

9 Umuntu aliwensi angaya ni cilumba ndi cakuti waleka ukuti ivilondwa vya mwili vimucimvye. Ukulondesya ukuya sana na maka ukuluta yauze, ukuvwila yauze uzuwa pa mulandu wakuti yatucila muli vimwi, alino nu kusoka ukuluta umu cipimo, vyalenga ukuti aingi yacita ivintu ivikalanga ukuti yaya ni cilumba. Antu yamwi aalembwa muli Baibo wakwe Abusalomu, Uziya, na Nebukadineza, yaatandike ukucita vikwene vino untunze ukacita nupya Yeova wayacefizye pa mulandu ni cilumba cao.—2 Sam. 15:1-6; 18:9-17; 2 Mila. 26:16-21; Dan. 5:18-21.

10. U mulandu ci uno citazipila ukutunganya yauze pali vino vyativilenga yacite vimwi? Landini pali umwi uwalembwa muli Baibo.

10 Lelo, kwaya imilandu na yuze iingalenga umwi aye ni cilumba. Elenganyini pa malyasi yaa amuli Baibo: Utandiko 20:2-7 na Mateo 26:31-35. Uzye ukulondesya ukucita ivipe u kwalenzile kuti Abimeleki na Petulo yacite vino yacisile ivyalanganga ukuti yaali ni cilumba? Nanti uzye antu yaa limwi yatamanyile ningo vyonsi ivyacitikanga, nanti uzye ivyacitiike vyaiukizye sile? Pa mulandu wa kuti tutakwata amaka ya kumanya vino umuntu umwi akwelenganya, cisizipa ukutandika ukutunganya yauze pali vino vyativilenga yacite vimwi.—Welengini Yakobo 4:12.

UKUMANYA IMILIMO INO TWAPEELWA

11. Uzye ukuicefya kukatwazwa uli ukumanya imilimo ino Leza watupeela umwi uvi lyakwe?

11 Ukuicefya kukalenga kuti tumanye imilimo ino twapeelwa umwi uvi lyakwe Leza. Vino Yeova a Leza aakalonda imilimo iyaombwa ningo, akapeela cila muntu umulimo uno alinzile ukuomba. Cila muntu wakwata imilimo iyaiyela sana umu cilongano, nomba swensi kwene tulinzile ukwazwana. Pa mulandu ni cikuuku cakwe Yeova, watupeela swensi kwene cila muntu amawila, imilimo, amaka, nanti ukumanya imilimo imwi iyiyele. Tungaaomvya vyonsi vii ukuti twamulumbanya nu kwazwa yauze. (Loma 12:4-8) Yeova watupeela umulimo ukalanga ukuti watucindika, nupya watutaila, alino nupya wamanya ukuti tungakwanisya ukuomba ningo.—Welengini 1 Petulo 4:10.

I vyani vino tungasambilila kuli Yesu lino twapokelela imilimo ipya? (Lolini mapalagalafu 12-14)

12, 13. U mulandu ci uno tutalinzile ukuzungukila ndi cakuti twapeelwa imilimo yuze umwi uvi lyakwe Yeova umukuya kwa nsita?

12 Imilimo ino Leza akatupeela iya pa nsita imwi sile. Limwi umukuya kwa nsita tungapeelwa imilimo yuze. Elenganyini pali Yesu. Pa kutandika, aliwe sile wali pamwi na Yeova. (Mapi. 8:22) Lyene Yesu wazwilizyeko Leza ukupanga angeli, ivintu vyonsi ivyayako, alino nu kuumba antunze. (Kol. 1:16) Nomba umukuya kwa nsita, Yesu wapeezilwe umulimo pano nsi, watandikilepo ukuya akanya akalondekwanga uwazwilizyo alino aiza akula. (Filipi 2:7) Pacisila ca kutuula umi wakwe, Yesu waswilile ukwiyulu pa kuti akaye Umwene wino Leza wasoolwile ukutandika umu 1914. (Ayeb. 2:9) Nupya asi ali pano ukupeelwa imilimo yuze kulapeleela. Pa cisila ca Kuteeka Myaka Izimbi, Yesu alawezezya Uwene kuli Yeova pakuti Leza akaye “kateeka wa vintu vyonsi sile.”—1 Kol. 15:28, Cimambwe New Testament.

13 Fwandi naswe kwene tungapeelwa imilimo yuze umukuya kwa nsita, ilingi vii vikacitika pa mulandu na vino twapingulapo sweineco. Uzye mwali umusimbe, lyene lino papita insita imwiza mutwala nanti ukutwalwa? Uzye mwatandika ukukwata ana? Uzye lyene mwangupazya  umi pakuti mutandike ukuomba umulimo wa nsita yonsi? Ukupingula pali vii vyonsi kwalenzile ukuti mupeelwe imilimo imwi. Ivintu ndi vyasenuka umu umi witu, limwi tungapeelwa imilimo iingi iya kuomba nanti limwi imilimo iyo ingacepelako. Uzye mucili sana na maka nanti uzye mwati mukula sana icakuti na maka yatiyacepa? Uzye umi winu uli sile ningo nanti uzye mukalwalilila? Lyonsi Yeova akatupeela imilimo ino tungaomba ningo ukulingana na maka itu. Akalonda sile ukuti twaomba ningo, nupya akataizya sana imilimo yonsi ino tukaomba umwi uvi lyakwe.—Ayeb. 6:10.

14. Uzye ukuicefya kungatwazwa uli ukuomba ningo imilimo ino twapeelwa nu kuya nu luzango muli vyonsi vino tukucita?

14 Yesu wayanga nu luzango umu milimo yonsi ino wapeelwa, naswe tungaya nu luzango umu milimo yonsi ino twapeelwa. (Mapi. 8:30, 31) Umuntu uwaicefya asilola kwati imilimo ino wapeelwa itacindama. Asilondesya ukuti akapeelwe imilimo na yuze uku nkoleelo nanti ukukuumbwa imilimo ino yauze yapeelwa. Lelo, akasumba sana mano pa milimo ino wapeelwa nu kutemwa sana imilimo iiyo, pano akalola ukuti Yeova u wamupeela. Nupya, akacindika sana imilimo ino Yeova wapeela yauze. Ukuicefya kukalenga twaitemelwa ukucindika yauze nu kuyazwilizya.—Loma 12:10.

VINO UKUICEFYA KUSIPILIULA

15. I vyani vino tungasambilila kuli Gidyoni pali vino waicefizye?

15 Gidyoni waicefizye sana. Apa muku wakutandikilako lino umungeli wakwe Yeova walolekiile kuli aliwe, Gidyoni waicefizye sana.  (Yakapi. 6:15) Pacisila cakuzumila umulimo uno Yeova wamupeezile, Gidyoni wasininkizye ukuti wamanya ivyalondekwanga umu kuomba umulimo uwo, nupya walesile ukuti Yeova amutungulula. (Yakapi. 6:36-40) Gidyoni wasifile sana. Lelo, wacenjile umu miombele yakwe. (Yakapi. 6:11, 27) Ataomvizye isyuko lya mulimo uno wapeezilwe ukuti antu yamucindika. Lelo, waipeelisye ukuti angaswilila uku milimo ino waombanga ndi calondekwa ukucita vivyo.—Yakapi. 8:22, 23, 29.

16, 17. I vyani vino umuntu uwaicefya akalolapo lino akwelenganya pali vino angatwalilila ukulunduluka muli ukapepa?

16 Ukuicefya kusipiliula ukuti tulinzile ukwikala sile pakuti yatatupeela imilimo na yuze. Malembelo yakatukomelezya ukuti swensi kwene tulinzile ukutwalilila ukulunduluka. (1 Tim. 4:13-15) Nomba uzye cii cikusenula ukuti lyonsi tulinzile ukupeelwa imilimo yuze? Awe. Yeova angatupolelela ukuti tutwalilile ukulunduluka umu milimo ino watupeela. Tungatwalilila ukuomvya ningo amaka yano Leza watupeela pakuti twazifya imiombele itu lyonsi.

17 Lino umuntu uwaicefya atatala wazumila imilimo imwi, akalondesya ukuti atala amanya ivilaalondekwa ukucita umu milimo iiyo. Lyene akaya nu ufuma cumi aiceceta ukuti alole ndi cakuti alakwanisya ukuomba ningo. Limwi angaiceceta nu kulola ndi cakuti alaaomba sile ningo imilimo iiyo ukwaula ukutazyela ivintu vyuze ivicindame. Cingazipa ukulola ndi cakuti imilimo imwi ingapeelwa kuli yauze pakuti imilimo ino wapeelwa ice iyaombwa ningo. Ndi cakuti caloleka ukuti atanga kwanisye ukuomba ningo, limwi cingazipa ukupeela imilimo iiyo kuli muze. Ukupepa kuli Yeova nu kuiceceta ningo kungatwazwa ukukana zumila imilimo ino tungafilwa ukuomba ningo. Ukuicefya kungalenga kuti tukane imilimo iiyo.

18. (a) Uzye ukuicefya kulatwazwa ukucita uli ndi twapeelwa imilimo ipya? (b) Uzye umuntu uwaicefya angaomvya uli amazwi aalembwa pali Loma 12:3?

18 Ndi cakuti twazumila imilimo ipya ino twapeelwa, vino Gidyoni wacisile vikatwazwa ukumanya ukuti pakuti twaomba ningo, Yeova alinzile ukututungulula nu kutupolelela. Pano Baibo ikatunena ukuti tulinzile ‘ukupita umu ufuke na Leza witu.’ (Mika 6:8) Fwandi lyonsi lino twapeelwa imilimo ipya, tulinzile ukupepa kuli Yeova pakuti atwazwa ukumanya ningo vino akatunena ukupitila muli Baibo nu mwi uvi lyakwe. Tulinzile ukusambilila ukukolanya Yeova lino tukuomba imilimo ipya ino twapeelwa. Lekini lyonsi twaiusya ukuti Yeova akatupeela imilimo pa mulandu wakuti waicefya asi pa mulandu nu kucenjela kwitu foo. (Masa. 18:35) Fwandi ndi twasoolola ukuti twapita na Leza umu ufuke, tutalaelenganya ukuti twacindama sana ukuluta yauze nanti ukuilola kwati sweswe asile sile.—Welengini Loma 12:3.

19. I milandu ci iilinzile ukutulenga ukuya aicefye?

19 Umuntu uwaicefya akacindika sana Yeova, pano u watuumvile nupya ali kateeka witu uwapapela pela. (Umbw. 4:11) Ukuicefya kukatwazwa ukuya nu luzango alino nu kuombesya umu milimo ino Leza watupeela. Ukuicefya kukalenga kuti tutasuula antu yauze, nupya kukalenga ukuti antu yakwe Yeova yaombela pamwi. Ukuicefya kukalenga ukuti twalondesya ukuleka ivintu vyazipila yauze, nupya kukalenga ukuti tuye acenjele, nu kusenka uku kucita ivingalenga tuiletelele. Pa mulandu na vyonsi vino twalandapo, antu yakwe Leza yakalonda ukuti yaicefya lyonsi, nupya Yeova watemwa sana antu aicefya. Nga ndi cakuti ivintu vyatutalila, tungacita uli? Icipande icilondeliilepo cilatulanga vino tungatwalilila ukuya aicefye lino ivintu vyatutalila sana.