Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Welini Kuli Yeova

Kalata Ukufuma Ukwi Umba Likatungulula

Kalata Ukufuma Ukwi Umba Likatungulula

Kuli kapepa munji:

Wakwe vino mwamanya, muli Baibo mwaya malyasi aakalanda pa yantu aaliko mpiti. Aingi yaali aonsi na anaci a utailo aakwatanga intazi wakwe zino naswe kwene tukakwata ndakai. Nayo kwene yaali “wakwe sweswe.” (Yakobo 5:17) Yamwi yakweti intazi izyayacuzyanga sana alino na masakamika. Yauze nayo yuvwanga sana uyi pali vino yalupwa yao nanti ya kapepa yauze yayacitanga. Nupya yamwi yayuvwanga a mulandu pali vino yaluvyanyizye.

Uzye intazi zizyo zyalenzile ukuti yasye Yeova cakuti iyamwilila nu kumwilila? Awe. Aingi yaali kwati a kalemba wa Masamu uwapefile ukuti: “Nkululumba wa mfwele iponge. Lelo ndanga undondole ne muzya wako, pano nemo ntapumbuka mu masunde yako.” (Masamu 119:176) Uzye namwe vya musango uu vyatala vyamucitikilapo?

Yeova asyailila ya kapepa yakwe aafuma umu cilongano. Lelo wene akapalama kuno yali, nupya ilingi pa kucita vivyo akaomvya aina na ya nkazi. Elenganyini pali vino wavwile Yobo umuomvi wakwe, Yobo wali ni intazi izipisye cakuti waponzizye ivyuma vino wakweti, ana yakwe yafwile alino nawe kwene walwile indwala iipisye sana. Yobo wazizimizye na mazwi aipe yano yacuza yakwe aalolekanga kwati aangamwazwa yamunenanga. Nanti icakuti insita zimwi wakasi aluvyanye muli vino welenganyanga, lelo atatazile apumbuke kuti afume kuli Yeova. (Yobo 1:22; 2:10) Uzye Yeova wavwilizye uli Yobo pakuti atwalilile ukuya ni nsansa?

Yeova waomvizye kapepa muze Eliu pa kwazwa Yobo. Lino Yobo walondololanga ivyamusakamike, Eliu wakutikanga lyene pacisila alino wizile alanda. I vyani vino wali nu kulanda? Uzye wali nu kutandika ukukalipila Yobo nanti ukulanda mazwi aali nu kulenga Yobo ukuvwa ulanda nanti ukuyuvwa uwa mulandu? Uzye Eliu wailolanga ukuti wali umucindame pali Yobo? Awe foo! Umupasi wakwe Leza walenzile ukuti Eliu alande mazwi yaa: “Nene naawe tuli sile aliyamwi pa manso yakwe Leza. Sweili kwene twaumvilwe kufuma uku lukungu.” Lyene wanenyile Yobo ukuti: “Fwandi kusi cimwi icingalenga ukuti wemo uwaoopa nene nanti inkufyengelekezye, pasi pano nemo ntakukupatikizya foo.” (Yobo 33:6, 7) Fwandi umu nsita iyakuti Eliu alundepo intazi pa ntazi zino Yobo wakweti, wene wamwavwile mu nzila isuma nupya waomvizye mazwi akukomelezya alondekwanga kuli Yobo.

Acino tukumumanyisya ukuti naswe kwene ali vino cali pakuti tupekanye kabuku kaa. Inkoleelo tuvwile, nupya twelenginyepo sana pali vino vikucitika alino na pa yantu aafuma umu cilongano. (Mapinda 18:13) Lyene twawelenzile malembelo, nu kupepelapo sana pakuti tuvwikisye vino Yeova wavwile aomvi yakwe aaliko mpiti lino yali ni ntazi. Cakusyalikizya i cakuti, twizile itulinganya malembelo yayo kuli vino vikucitikila antu ndakai. Fwandi tukumukomelezya sana ukuti muwelenge sana kabuku kaa. Mukwai, manyini ukuti twamutemwa wakwe cimwi.

Iumba Ilikatungulula Ilya Nte Zyakwe Yeova